1. E ke Akua e! Auhea la Oe? A auhea la ka halelewa e uhi nei i Kou wahi e pee ai?

2. Pehea la ka loihi o ke kaohi ia ana o Kou lima, a nana mai Kou maka, he oiaio, Kou maka maemae, mailoko mai o na lani mau loa, i ka hana ino ia o Kou poe kanaka, a me Kau poe kauwa hoi, a e komohia ia ai Kou pepeiao e ko lakou mau uwe ana?

3. He oiaio, e ka Haku, pehea la ka loihi o lakou e ehaeha ai i keia mau hana ino ia ana a me na hookaumaha ia ana i ku ole i ke kanawai, mamua o ka hoopalupalu ia ana o Kou naau no lakou, a haehae ia Kou naau i ke aloha no lakou?

4. E ka Haku ke Akua Mana Loa, ka Mea nana i hana i ka lani, i ka honua, a me na kai, a me na mea a pau iloko o lakou, a o ka Mea hoi e hoomalu ana a e hoopio ana i ke diabolo, a me ke aupuni pouli a naaupo o Seole! E o mai i Kou lima; e hakapono mai Kou maka a ike ia loko loa; e lawe ia Kou halelewa iluna; aole e uhi hou ia Kou wahi e pee ai; e hoohaliu ia mai Kou pepeiao; e hoopalupalu ia Kou naau, a e haehae ia Kou naau me ke aloha ia makou;

5. E hoaa ia Kou inaina e kue i ko makou poe enemi; a iloko o ka huhu ana o Kou naau, me Kau pahikaua e hoopai aku no ko makou hana ino ia mai;

6. E hoomanao mai i Kou Poe Hoano e ehaeha ana, e ko makou Akua! A e hauoli auanei Kau poe kauwa iloko o Kou inoa a mau loa aku.

7. E Kuu keiki e maluhia kou uhane; he pokole wale no kou poino a me kou mau popilikia;

8. A alaila, ina e hoomanawanui pono oe, e hookiekie auanei ke Akua ia oe iluna; e lanakila auanei oe maluna o kou poe enemi a pau;

9. Ke kakoo nei kou poe hoaloha ia oe, a e hea hou aku ana lakou ia oe me na puuwai pumehana a me na lima o ka hoaloha;

10. Aole oe i like aku i keia wa me Ioba; aole kue mai kou poe hoaloha ia oe, aole hoi i hoahewa mai ia oe no kekahi hana hewa, e like me ka poe i hana aku ai ia Ioba;

11. A o ka poe e hoahewa nei ia oe me kekahi hana hewa, e poho wale ana ko lakou manaolana, a e hehee wale ana ko lakou mau alahele pomaikai e like me ka hehee wale ana o ka hau paa imua o na kukuna wela o ka la e puka mai ana;

12. A ua hoopaa no hoi ke Akua i Kona lima a me ka sila, e hoololi i na au o ka manawa a me na kau, a e hoopouli i ko lakou mau naau, i hoomaopopo ole ai lakou i Kana mau hana kupanaha; i hoao ai no hoi Oia ia lakou, a e loaa lakou iloko o ka lakou hana maalea iho;

13. A mamuli no hoi o ka ino o ko lakou mau naau, a no na mea a lakou i makemake ai e lawe mai maluna o ka poe okoa aku, a i ake nui e ehaeha kekahi poe e ae, e kau mai auanei ia mau mea a pau loa maluna o lakou iho;

14. I hoohoka ia ai no hoi lakou, a oki pu ia ae ko lakou mau manaolana;

15. A aole e loihi na makahiki mai keia wa aku e kahuli ia aku lakou a me ka lakou mau mamo, mai lalo aku o ka lani, wahi a ke Akua, a aole e hookoe ia kekahi o lakou e ku ma ka pa:

16. E hoino ia ka poe a pau e hapai ana i ke kuekue wawae e kue i Kuu poe i poni ia, wahi a ka Haku, a kukala aku ua hana hewa lakou nei, oiai nae aole lakou i hana hewa imua Oʻu, wahi a ka Haku, aka, ua hana i ka mea pono imua o Kuu mau maka, a o ka mea hoi Aʻu i kauoha ai ia lakou;

17. Aka o ka poe kukala aku ana ua hana hewa kekahi, ke hana nei lakou ia, no ka mea, he poe kauwa hoi lakou na ka hewa, a o lakou iho na keiki o ka hoolohe ole;

18. A o ka poe hoohiki wahahee e kue ana i Kuu poe kauwa i lawe mai ai lakou la ia lakou nei i ka noho luhi ana, a i ka make;

19. Auwe ia poe; no ka mea, ua hana hewa mai lakou i Kuu mau keiki liilii; e oki ia aku lakou mai na lawelawepaa aku o Kuu hale;

20. Aole e piha ko lakou hinai, e pau ana ko lakou mau hale a me na hale papaa, a e hoowahawaha ia lakou iho e ka poe nana i hoomalimali mai ia lakou;

21. Aole e loaa ia lakou ke kuleana i ka Oihanakahuna, aole i ka lakou mamo mahope o lakou, ia hanauna aku, ia hanauna aku;

22. E aho no lakou ke nakinaki ia kekahi pohaku wili palaoa ma ko lakou mau ai, a hoopiholo ia lakou iloko o kahi hohonu o ke kai.

23. Auwe ka poe a pau e hoehaeha ana i Kuu poe kanaka, a e kipaku ana, a e pepehi ana a make, a e hoike kue ana ia lakou, wahi a ka Haku o na Lehulehu; aole e pakele kekahi hanauna moonihoawa i ka poino o gehena.

24. Aia hoi, ke ike nei Kuu mau maka a hoomaopopo hoi i ka lakou mau hana a pau, a ua hookoe no Au i kekahi hoopai hikiwawe iloko o ka wa kupono, no lakou a pau;

25. No ka mea, ua koho ia he manawa no kela a me keia kanaka, e like me kana mau hana e hana ai.

26. E haawi aku ke Akua ia oukou (ka Poe Hoano) i ka ike ma Kona Uhane Hemolele, he oiaio, ma ka haawina o ka Uhane Hemolele i hiki ole ke hai ia, ka mea i hoike ole ia mai mai ka hookumu ia ana o ka honua a hiki i keia wa;

27. Ka mea a ko kakou mau kupuna i kakali ai me ka manaolana e ake nui ana e hoike ia mai ma na manawa hope, ka mea hoi a ko lakou mau naau i kuhikuhi ia aku ai e na anela, a i hookoe ia hoi no ka piha ana o ko lakou nani;

28. He manawa e hiki mai ana, a iloko olaila aole kekahi mea e huna ia, ina paha he hookahi Akua, a i ole, he lehulehu paha na Akua, e hoike ia mai ana lakou;

29. E hoike ia mai ana na nohoalii a me na aupuni, na panalaau a me na mana a pau a e hooili ia maluna iho o ka poe a pau i kupaa me ka wiwo ole no ka Euanelio o Iesu Kristo;

30. A pela no hoi, ina paha ua kukulu ia i mau palena ma na lani, a i na kai paha; a i ka aina maloo paha, a i ka la, i ka mahina, a i na hoku paha;

31. O na manawa a pau o ko lakou mau kaa ana; na la, na malama, a me na makahiki a pau i hookumu ia, a me na la a pau o ko lakou mau la, mau malama, a mau makahiki, a me ko lakou mau nani, mau kanawai, a mau wa a pau i koho pono ia, e hoike ia mai ana ma na la o ke kau o ka hooko ana i na mea o na kau a pau,

32. I ku i ka mea i hooholo ia iwaena o ka Ahakuka a ke Akua Mau Loa o na Akua e ae a pau, mamua o ka hookumu ia ana o keia ao, ka mea e hookoe ia ana a hiki i ka pau ana a me ka hopena ona, ka wa hoi a kela a me keia kanaka e komo aku ai imua o Kona alo mau loa, a i Kona maha palaho ole.

33. Pehea la ka loihi e waiho maemae ole ai na wai e kahe ana? Heaha ka mana nana e kaohi aku i na lani? E aho no i ke kanaka e hohola aku i kona lima nawaliwali e hoopaa aku i ka wai o ka muliwai Misouri mai kona alahele maa mau, a i ole e hoohuli hou paha i ka wai iuka, mamua o ke akeakea ana aku i ka Mea Mana Loa mai ka ninini ana mai i ka ike mai ka lani mai, maluna o na poo o ka Poe Hoano o na La Hope nei.

34. Aia hoi, he nui ka poe i kahea ia, aka he kakaikahi ka poe i wae ia. A no keaha la lakou i wae ole ia ai?

35. No ka mea, ua kau nui ko lakou mau naau maluna o na mea o keia ao, a ke imi nei i ka hanohano o kanaka, a ao ole lakou i keia haawina hookahi—

36. Oia hoi, o na kuleana o ka Oihanakahuna ua hoohui ia me na mana o ka lani a hiki ole ke hookaawale ia, a aole e hiki ke hoomalu ia, aole hoi e lawelawe ia na mana o ka lani, ke ole maluna o na kumupaa o ka pono.

37. He oiaio no, ua hiki ke hooili ia ia mau mea maluna o kakou; aka, i ka wa a kakou e hoao ai e uhi i ko kakou mau hewa, a e hooko paha i ko kakou manao haaheo, ko kakou makee lapuwale, a i ole, e hoao e hoomalu, a noho mana paha, a hookikina paha, maluna o na uhane o na keiki a kanaka, ma kekahi ano pono ole, aia hoi, e hookaawale aku na lani ia lakou iho; a hoehaeha ia ka Uhane o ka Haku; a i ka wa e hookaawale ia ai ia, Amene i ka Oihanakahuna, a i ole, i ka mana o ia kanaka.

38. Aia hoi! Mamua o kona hoomaopopo ana ua haalele ia oia me ia iho e peku i na mea oioi; e hoomaau i ka Poe Hoano, a paio kue i ke Akua.

39. Ua ao ia kakou ma na ehaeha a kakou i komo ai, o ke ano a kulana hoi ia o ka hapanui o na kanaka a pau, i ka wa a lakou i loaa ai kekahi mana uuku, i ko lakou manao, e hoomaka koke no lakou e hoohana i ka mana hoomalu pono ole.

40. Nolaila, he nui ka poe i kahea ia, aka he kakaikahi ka poe i wae ia.

41. Aole hiki, aole hoi he pono ke hoomau ia kekahi mana ma o ka Oihanakahuna la, koe wale no ma ka hookonokono ana, ma ke ahonui, ma ka oluolu, a me ka haahaa, a me ke aloha hoomalae ole;

42. Ma ka lokomaikai a me ka ike oiaio, na mea nana e hoomahuahua ae i ka uhane me ka hookamani ole, a me ka hewa ole,

43. E ao ikaika ana me ka oolea i ka wa kupono, i ka wa i uluhia ia e ka Uhane Hemolele, a alaila e hoike ae mahope aku he mahuahua o ke aloha i ka mea au i ao ikaika aku ai, o manao auanei oia o oe kona enemi;

44. I hoomaopopo ai oia ua oi aku ka ikaika o kou kupaa ana mamua o na kaula o ka make;

45. E piha no hoi kou naau me ke aloha i na kanaka a pau, a i ko ka hale o ka manaoio, a na ka maemae e kahiko hooki ole i kou mau manao, alaila e ikaika auanei kou hilinai ana imua o ke alo o ke Akua, a e haule mai ana ke ao ana o ka Oihanakahuna maluna o kou uhane me he kehau la mai ka lani mai.

46. O ka Uhane Hemolele kou hoapili mau, a o kou kookoo-alii, he kookoo-alii loli ole o ka pono a me ka oiaio, a o kou mana hoomalu he mana hoomalu mau loa ana ia, a me ka hana hookikina ole e kahe aku ana ia i ou la no ka wa mau loa a mau loa.