1. E hoolohe mai i Kaʻu olelo, e Kuu poe kauwa, e Sidane, a me Pale, a me Limana, no ka mea, aia hoi, ke olelo aku nei Au ia oukou, ke haawi nei Au i kekahi kauoha ia oukou e hele aku oukou a e hai i Kuu Euanelio, ka mea a oukou i loaa ai, i ka poe Kueka, he oiaio, e like me ia i loaa ai ia oukou.

2. Aia hoi, ke olelo aku nei Au ia oukou, ke makemake nei lakou e ike i kekahi hapa o ka oiaio, aka, aole i ka oiaio a pau, no ka mea, aole lakou i pono imua Oʻu a e mihi maoli e pono ai.

3. No ia mea, ke hoouna aku nei Au ia olua, e Kaʻu mau kauwa, e Sidane a me Pale, e hai i ka Euanelio ia lakou;

4. A e hoolilo ia Kaʻu kauwa o Limana no keia hana, i hiki ai ia ia ke kamailio me ka noonoo kuhohonu me ua poe la, aole nae mamuli o na mea ana i loaa ai mai a lakou mai, aka, mamuli o na mea e ao ia aku ana ia ia e olua, e Kaʻu mau kauwa, a mamuli o ia hana ana e hoopomaikai aku ai Au ia ia, i ole ia, aole oia e holomua.

5. Penei, wahi a ka Haku, no ka mea, Owau no ke Akua, a ua hoouna mai i Kaʻu Keiki Hanaukahi iloko o ko ke ao nei no ka hoolapanai ana i ko ke ao nei, a ua hooholo o ka mea e hookipa mai ia Ia e hoola ia oia, a o ka mea e hookipa ole mai ia Ia, e hoahewa ia oia.

6. A ua hana aku lakou i ke Keiki a ke Kanaka e like me lakou i makemake ai; a ua lawe ae Oia i Kona mana ma ka lima akau o Kona nani, a ke nohoalii nei ano iloko o na lani, a e nohoalii aku ana a hiki i Kona iho ana mai i ka honua nei e waiho i na enemi a pau malalo o Kona mau wawae, a ua kokoke mai nei ua manawa la:

7. Ua olelo aku la Au, ka Haku ke Akua, ia mea, aka, o ka hora a me ka la aole kekahi kanaka i ike, aole hoi na anela iloko o ka lani, a aole hoi lakou e ike ana a hiki mai Oia;

8. No ia mea, ke makemake nei Au i na kanaka a pau e mihi, no ka mea, aia lakou a pau malalo o ka hewa, koe wale no ka poe Aʻu i hookoe ai Noʻu iho, he poe hemolele a oukou i ike ole ai;

9. No ia mea, ke olelo aku nei Au ia oukou, ua hoouna aku Au io oukou la i Kuu berita mau loa, oia hoi, ka mea mai kinohi mai—

10. A o ka mea Aʻu i olelo-paa ai oia Kaʻu i hooko pono ai—a e kulou auanei na lahuikanaka o ka honua imua o ia mea; a ina aole mamuli o ko lakou manao iho, e hoohaahaa ia lakou ilalo, no ka mea, o ka mea i hookiekie ia i keia manawa ma ona iho, e hoohaahaa ia auanei oia ma o ka mana la;

11. No ia mea, ke haawi aku nei Au ia oukou i kekahi kauoha, e hele aku oukou iwaena o keia poe kanaka a e olelo aku ia lakou, e like me Kuu Aposetolo o ka wa kahiko, nona ka inoa o Petero;

12. E manaoio i ka inoa o ka Haku Iesu, ka Mea i noho ma ka honua nei, a e hiki mai ana hoi, ka hoomaka ana a me ka hopena.

13. E mihi a e bapetizo ia iloko o ka inoa o Iesu Kristo, i ku i ke kauoha hemolele, no ke kala ia ana o na hala;

14. A o ka mea e hana ana i keia e loaa auanei ia ia ka haawina o ka Uhane Hemolele, ma o ke kau ana la o na lima o na Lunakahiko o keia Ekalesia.

15. A eia hou, he oiaio, ke olelo aku nei Au ia oukou, o ka mea e papa i ka mare ana aole oia i apono ia e ke Akua, no ka mea, ua kukulu ia ka mare e ke Akua no kanaka;

16. No ia mea, ua ku ia i ke kanawai e loaa i ke kanaka hookahi wahine mare, a e lilo laua a elua i io hookahi, a o keia a pau i hooko ai ka honua i ka hopena o kona hana ia ana,

17. A i piha ai ia me ke ana o kanaka, e ku i kona hana ia ana mamua o ka hana ia ana o ke ao nei.

18. A o ka mea e papa ana e waiho aku i na io, i ai ole ai ke kanaka ia mea, aole oia i apono ia e ke Akua;

19. No ka mea, aia hoi, o na holoholona o ke kula a me na manu o ka lewa, a me na mea e puka mai ana mailoko mai o ka honua, ua apono ia no ka pono o ke kanaka, i ai a i aahu nona, a i lako ai oia;

20. Aka, aole i haawi ia e loaa i kekahi kanaka a oi aku mamua o ko kekahi, a no ia mea, ke waiho nei ke ao nei iloko o ka hewa;

21. A auwe ke kanaka e hookahe ana i ke koko, a i ole, e hoomaunauna ana i ka io me ke kumu kupono ole.

22. A eia hou, he oiaio, ke olelo aku nei Au ia oukou, aole e hiki mai ana ke Keiki a ke Kanaka ma ke ano o kekahi wahine, aole hoi, ma ke ano o kekahi kanaka e kaahele ana maluna o ka honua;

23. No ia mea, mai puni oukou i ka hoopunipuni ia, aka, e hoomau ma ke kupaa ana, e nana aku ana i ka wa e hoonaueue ia ai na lani, a e haalulu ai ka honua, a e hikaka i o a i anei me he kanaka ona la, a no na awawa e hookiekie ia ae ai, a no na mauna hoi e hoohaahaa ia ai, a no na wahi apuupuu e hoolaumania ia; a o keia a pau i ka wa a ka anela e hookani ai i kana pu.

24. Aka, mamua o ka hiki ana mai o ka la nui o ka Haku, e ulumahiehie ana o Iakoba ma ka waonahele, a e ohaoha mai ana ka poe Lamana me he rose la.

25. E ulumahiehie o Ziona maluna o na puu a e hauoli maluna o na mauna, a e hoakoakoa pu ia ma kahi Aʻu i koho ai.

26. Aia hoi, ke olelo aku nei Au ia oukou, e hele aku e like me Kaʻu i kauoha aku ai ia oukou—e mihi i ko oukou mau hewa a pau, e noi a e loaa no ia oukou, e kikeke a e wehe ia no ia ia oukou;

27. Aia noi, e hele aku Au mamua o oukou a mahope no hoi, a iwaena Au o oukou a aole oukou e hoopilihua ia;

28. Aia hoi, Owau no o Iesu Kristo, a e hiki koke mai ana Au. Pela io no. Amene.