1. Olelo mai la ka Haku ia Iosepa Kamika, opio, i ka i ana: E hoolohe mai Iaʻu, wahi a ka Haku ko oukou Akua, ka poe i hoolilo ia i ka Oihanakahuna Kiekie o Kuu Ekalesia, ka poe i hoakoakoa pu ia oukou iho;

2. A e hoolohe mai i ke ao ana a ka Mea Nana i hoolilo ia oukou me ka mana mailuna mai, ka Mea e olelo ana iloko o ko oukou mau pepeiao i na olelo o ka naauao, i loaa ai ke ola mau loa ia oukou iloko o kela mea a oukou i waiho mai ai imua Oʻu, wahi a ka Haku ke Akua;

3. No ka mea, he oiaio, ke olelo nei Au ia oukou, ua hiki mai ka manawa, a eia no ia ano; a aia hoi, e nana, he mea pono e kukulu ia i hui o Koʻu poe kanaka, no ka hooponopono a me ke kukulu ana i na mea e pili ana i ka hale-hoahu no ka poe ilihune o Kuu poe kanaka, ma keia wahi a ma ka aina hoi o Ziona,

4. A i ole, ma kekahi olelo ana, ke kulanakauhale o Iosepa, i hui kumau a mau loa, a i hui kuikahi hoi no Kuu Ekalesia, i mea nana e hoonee i ka hana imua, ka mea a oukou i komo ai no ka hoola ana i kanaka, a no ka nani o ko oukou Makua iloko o ka lani,

5. I likealike ai oukou iloko o na apo o na mea o ka lani, he oiaio, a me na mea o ka honua pu no hoi, no ka loaa ana mai o na mea o ka lani;

6. No ka mea, ina aole oukou e likealike ma na mea o ka honua, aole e hiki ana ia oukou ke likealike, ma ka loaa ana o na mea o ka lani;

7. No ka mea, ina e makemake oukou e haawi aku Au ia oukou i kekahi wahi iloko o ke ao celesetiela, e hoomakaukau oukou ia oukou iho e pono ai ma ka hana ana i na mea Aʻu i kauoha aku ai ia oukou a i koi ai mai ia oukou mai.

8. A ano, he oiaio, penei wahi a ka Haku, he mea pono e hana ia na mea a pau no Koʻu nani, e oukou ka poe i hui pu ma keia hui;

9. A i ole, ma kekahi olelo ana, e noho Kaʻu kauwa o Nuela K. Watine, a me Kaʻu kauwa o Iosepa Kamika, opio, a me Kaʻu kauwa o Sidane Rigedona ma kekahi ahakuka me ka Poe Hoano ma Ziona.

10. I ole pela e imi no o Satana e hoohuli i ko lakou mau naau mai ka oiaio ae, i makapo ai lakou a hoomaopopo ole i na mea i hoomakaukau ia no lakou;

11. No ia mea, ke haawi aku nei Au ia oukou i kekahi kauoha, e hoomakaukau a e hoonohonoho ia oukou iho ma kekahi apo paa, a i ole he berita mau loa i hiki ole ke uhaki ia.

12. A o ka mea e uhaki ana ia mea e lilo aku kona oihana a me kona kuleana lala iloko o ka Ekalesia, a e haawi ia ae oia i ka hoehaeha ana a Satana a hiki i ka la o ka hoolapanai ana.

13. Aia hoi, o keia ka hoomakaukau ana Aʻu e hoomakaukau nei ia oukou, a me ke kahua, a me ke kumuhoohalike Aʻu e haawi aku nei ia oukou, i mea e hiki ai ia oukou ke hooko i na kauoha i haawi ia ia oukou,

14. A ma o Koʻu malama pono ana la, me ka nana ole i na popilikia e hiki mai ana maluna o oukou, e ku kuokoa ka Ekalesia maluna ae o na mea ola e ae a pau malalo iho o ke ao celesetiela,

15. I hiki ai ia oukou ke pii mai i ka leialii i hoomakaukau ia no oukou, a e hoolilo ia i poe hoomalu maluna o na aupuni he nui, wahi a ka Haku ke Akua, ka Mea Hemolele o Ziona, ka Mea Nana i kukulu i na kahua o Adamu-onadai-Amana;

16. Ka Mea nana i koho ia Mikaela i keiki-alii no oukou, a i kukulu i kona mau wawae, a hoonoho ia ia ma kahi kiekie, a haawi aku ia ia i na ki o ke ola mau loa malalo iho o ke ao ana a me ke kuhikuhi ana o ka Mea Hemolele, ka Mea aohe Ona hoomaka ana o na la a hopena hoi o ke ola ana.

17. He oiaio, he oiaio, ke olelo aku nei Au ia oukou, he poe keiki liilii oukou, aole oukou i hoomaopopo i keia manawa i ka nui o na pomaikai a ka Makua e paa nei ma Kona mau lima ponoi a i hoomakaukau ia hoi no oukou;

18. A aole hiki ia oukou ke hoomanawanui ma na mea a pau i keia manawa, aka, e hauoli no nae, no ka mea, Naʻu no e alakai ia oukou imua: no oukou ke aupuni a no oukou na pomaikai olaila; a no oukou na waiwai o ka wa mau loa;

19. A o ka mea e hookipa ana i na mea a pau me ka mahalo ana e hoonani ia auanei oia; a e pakui ia aku na mea o keia honua maluna ona, he oiaio, he pa-haneri, ae, a oi aku no;

20. No ia mea, e hana i na mea Aʻu i kauoha aku ai ia oukou, wahi a ko oukou Hoolapanai, oia hoi, ke Keiki a Amana, ka Mea e hoomakaukau ana i na mea a pau mamua o Kona lawe ana ia oukou;

21. No ka mea, o oukou ka Ekalesia o ka Hanaumua, a e lawe no Oia ia oukou iluna iloko o ke ao, a e haawi i kela a me keia kanaka i kona mahele.

22. A o ke kahu-waiwai kupaa a naauao e loaa no ia ia na mea a pau. Amene.