1. E like me kaʻu i olelo aku ai ia oukou iloko o kaʻu leka mamua o koʻu haalele ana i koʻu wahi, e kakau aku ana au ia oukou ia manawa aku ia manawa aku, a e haawi ia oukou i ka ike e pili ana i na kumumanao he nui, ke hapai hou nei au i ke kumumanao o ka bapetizo ana no ka poe make, oiai, me he mea la oia ke kumumanao nui iloko o koʻu noonoo, a ke komo ikaika nei ia iloko o koʻu naau, mai ka wa mai oʻu i alualu ia ai e koʻu poe enemi.

2. Kakau aku la au ia oukou he mau olelo pokole o ka hoikeana e pili ana i kekahi kakauolelo. Ua loaa iho nei iaʻu he mau manao pakui kakaikahi e pili ana i keia mea, aʻu e hooiaio nei ano. Oia hoi, ua hai ia aku iloko o kaʻu leka mua he mea pono e loaa he kakauolelo, e lilo i mea ike maka, a e lohe no hoi me kona mau pepeiao, i hana ai oia i mookuauhau oiaio imua o ka Haku.

3. Ano, e pili ana i keia mea, he mea paakiki no hookahi kakauolelo e noho pu mai i na manawa a pau a e hana i na hana a pau. I mea e kapae ae i keia pilikia he hiki ke koho ia kekahi kakauolelo iloko o kela a me keia apana o ke kulanakauhale, he mea i makaukau pono no ke kakau pololei ana i ka mooolelo; a e akahele loa oia a pololei loa hoi ma ke kakau ana i na hana a pau, e hooiaio ana iloko o kana mookuauhau ua ike oia me kona mau maka, a ua lohe hoi me kona mau pepeiao, e hoike pu ana i ka la a me na inoa, a pela aku, a me ka mooolelo o ua hana holookoa la; e hoike ana hoi i na inoa o kekahi poe ekolu malaila ia manawa, ina he poe kekahi malaila, he poe hoi e hiki ke hooiaio i ua hana la i kela a me keia manawa e kahea ia ai, i hooiaio ia ai kela me keia olelo ma ka waha o na hoike elua a ekolu paha.

4. Alaila, e loaa he kakauolelo nui, ia ia e haawi ia aku ai keia mau mookuauhau e ae, i hoopili pu ia me na palapala hooiaio maluna ae o ko lakou mau inoa ponoi, e hooiaio ana he oiaio ka mookuauhau a lakou i hana ai. Alaila, e hiki no i ke kakauolelo nui o ka Ekalesia ke hookomo i ka mookuauhau iloko o ka buke mooolelo nui o ka Ekalesia, me na palapala hooiaio a me na ike maka a pau, me kana hoakaka ponoi no hoi, ua manaoio oia he oiaio ka hoakaka a me na mookuauhau maluna ae, mamuli o kona hoomaopopo ana i ke kulana mau a me ke koho ia ana o ua poe kanaka la e ka Ekalesia. A i ka wa e pau ai keia i ka hana ia iloko o ka buke mooolelo nui o ka Ekalesia, ua hemolele no ia mookuauhau, a e hooko auanei ia i ka lawelawe-paa me he mea la ua ike maoli oia me kona mau maka, a lohe hoi me kona mau pepeiao, a hana iho la i mookuauhau o ia mea hookahi iloko o ka buke mooolelo nui o ka Ekalesia.

5. E manao ana paha oukou o keia ano o ka hana ana he hoopololei loa ia, aka, ke hai aku nei au ia oukou he mea ia e hooko ai i ka makemake o ke Akua, ma ka hooko pololei ana i ka lawelawe-paa a me ka hoomakaukau ana a ka Haku i hoolala a hoomakaukau ai mamua o ka hookumu ia ana o ke ao nei, no ka hoola ana i ka poe make e make ana me ka ike ole i ka Euanelio.

6. A eia hou, ke makemake nei au ia oukou e hoomanao, e noonoo nui ana o Ioane, ka Mea Hoike, i keia kumumanao hookahi no e pili ana i ka poe make, i kona hai ana aku, e like me ka mea e loaa ana ia oukou i palapala ia ma Hoikeana 20:12: “A ike aku la au i ka poe make, i ka poe uuku a me ka poe nui, e ku ana imua o ke Akua; a wehe ia iho la na buke; a wehe ia no hoi kekahi buke hou aku, oia hoi ka buke o ke ola; a ua hookolokolo ia ka poe make ma na mea i palapala ia iloko o na buke, mamuli o ka lakou mau hana.”

7. E ike oukou ma keia pauku ua wehe ia na buke; a ua wehe ia he buke hou aku, oia hoi ka buke o ke ola; aka, ua hookolokolo ia ka poe make ma na mea i palapala ia iloko o na buke e like me ka lakou mau hana; no ia mea, o na buke i olelo ia oia maoli no na buke e paa ana i ka mooolelo o ka lakou mau hana; a e kuhikuhi ana i na mooolelo i malama ia ma ka honua nei. A o ka buke, oia hoi, ka buke o ke ola, oia ka mooolelo i malama ia ma ka lani; ua ku like loa ke kumupaa me ke ao ana a oukou i kauoha ia ai ma ka hoikeana i palapala ia iloko o ka leka aʻu i kakau ai ia oukou mamua o kuu haalele ana aku i koʻu wahi, oia hoi, ma ka oukou kakau ana a pau e kakau ia ia ma ka lani.

8. Ano, o ke ano maoli o keia lawelawe-paa aia no ia iloko o ka mana o ka Oihanakahuna, ma ka hoikeana o Iesu Kristo, maloko olaila i haawi ia ai, o ka mea a oukou e hoopaa ai ma ka honua nei e hoopaa ia ma ka lani, a o ka mea a oukou e hookuu ai ma ka honua nei e hookuu ia ma ka lani. A i ole, ma kekahi olelo ana, e lawe ana hoi i ka unuhi ana ma kekahi nanaina okoa, o ka mea a oukou e kakau ai ma ka honua e kakau ia no ma ka lani; a o ka mea a oukou e kakau ole ai ma ka honua aole e kakau ia ma ka lani; no ka mea, mailoko mai o na buke e hookolokolo ia ai ko oukou poe make, mamuli o ka lakou mau hana ponoi, ina ua lawelawe paha lakou iho i na lawelawe-paa ma ko lakou mau kino ponoi, a i ole ma o ko lakou mau agena ponoi la paha, i ku like i ka lawelawe-paa a ke Akua i hoomakaukau ai no ko lakou hoola ia ana, mai ka manawa mamua aku o ka hookumu ia ana o ke ao nei, i ku like hoi i na mookuauhau a lakou i malama ai e pili ana i ko lakou poe make.

9. Malia paha, i ka manao o kekahi poe he ano kaena keia ao ana a kakou e olelo nei—he mana e kakau ana, a i ole, e hoopaa ana ma ka honua, a e hoopaa ana ma ka lani; aka nae, iloko o na kau a pau o ke ao nei, i kela a me keia wa a ka Haku i haawi mai ai i kekahi kau o ka Oihanakahuna i kekahi kanaka, a i ole i kekahi mau kanaka paha, ma ka hoikeana maoli, ua haawi mau ia mai keia mana. Nolaila, o kela a me keia mea a ua poe kanaka la i hana ai ma ka mana, ma ka inoa o ka Haku, a hana hoi ia mea me ka oiaio a me ke kupaa, a malama iho la i mooolelo pololei a oiaio o ia mea, lilo iho la ia i kanawai ma ka honua a ma ka lani hoi, a ua hiki ole ke hoopau ia, mamuli o na kuahaua a Iehova mana. He olelo oiaio keia—owai ka mea e hiki ke lohe ia mea?

10. A eia hou, i mea hoike he mea keia i hana ia mamua, e nana ma Mataio 16:18, 19, “Ke olelo aku nei hoi Au ia oe, o oe no o Petero; a maluna o keia pohaku e kukulu ana Au i Koʻu Ekalesia, aole hoi e lanakila mai na ipuka o ka po maluna ona: a e haawi aku hoi Au ia oe i na ki o ke aupuni o ka lani; a o ka mea au e hoopaa ai ma ka honua nei e hoopaa ia ma ka lani, a o ka mea au e kuu aku ai ma ka honua nei e kuu ia ma ka lani.”

11. Ano, o ka mea huna nui a kiekie o keia mea holookoa, a me ka pomaikai nui o keia kumumanao holookoa e waiho nei imua o kakou, aia no ia iloko o ka loaa ana o na mana o ka Oihanakahuna Hemolele; i ka mea i haawi ia ai keia mau ki aole he paakiki o ka loaa ana o ka ike i na mea oiaio e pili ana i ka hoola ana i na keiki a kanaka, ka poe make a me ka poe ola pu.

12. Eia iloko o ia mea, ka nani a me ka hanohano, a me ka palaho ole a me ke ola mau loa: o ka lawelawe-paa o ka bapetizo ana me ka wai, e hookomo ia iloko olaila, i ku like ai i ke ano o ka mea i make, i ku like ai hoi kekahi kumupaa me kekahi. O ka hookomo ia ana iloko o ka wai a puka hou mai mailoko mai o ka wai oia no ka like ana me ke alahouana o ka poe make, ma ka puka ana mailoko mai o ko lakou mau lua kupapau. Nolaila, ua hookumu ia keia lawelawe-paa i pili like ai me ka lawelawe-paa o ka bapetizo ana no ka poe make, ma ka like ana me ka poe make.

13. No ia mea, ua hookumu ia ka pahu wai bapetizo i mea hoohalike no ka lua kupapau, a ua kauoha ia e hana ia malalo iho o kahi o ka poe ola i maa ai i ka akoakoa ana, i hoike aku i ka poe ola a me ka poe make; a i loaa ai i na mea a pau ko lakou ano like, a i ku like ai hoi lakou kekahi me kekahi,—e likealike ana ko ka honua me ko ka lani, e like me ka Paulo i hai ai, 1 Korineto 15:46, 47, 48.

14. “Aka hoi, o ka mea ma ka uhane, aole oia ka mua, o ka mea no ma ke kino; a mahope ka mea ma ka uhane. O ke kanaka mua no ka lepo ia, a he lepo; a o ka lua o ke kanaka oia ka Haku mai ka lani mai. E like me ka lepo pela no ka poe mai ka lepo mai; e like me ka lani pela no ka poe mai ka lani mai.” A e like me na mookuauhau i hoopaa ia ma ka honua e pili ana i ko oukou poe make, a i hana ia me ka pololei, pela no hoi na mookuauhau i hoopaa ia ma ka lani. Nolaila, o keia iho la ka mana sila a hoopaa hoi, a, ma kekahi olelo ana, o na ki o ke aupuni, oia hoi, ke ki o ka ike.

15. A ano, e kuu mau hoahanau kane a me na hoahanau wahine i aloha nui ia, ke hai aku nei au me ka oiaio ia oukou he mau kumupaa keia e pili ana i ka poe make a me ka poe ola, he mea hiki ole ke kapae wale ia, ma ka mea e pili ana i ko kakou hoola ia ana. No ka mea, o ko lakou la hoola ia ana he mea ia e pono ai a he mea hoi e pono ai no ko kakou hoola ia ana, e like me ka Paulo i olelo ai e pili ana i na kupuna, “Aole hiki lakou ke hoohemolele ia ke ole kakou,” aole kakou e hiki ke hoohemolele ia ke ole ko kakou poe make.

16. A ano, e pili ana i ka bapetizo ana no ka poe make, e haawi aku au ia oukou i kekahi olelo okoa ae a Paulo, 1 Korineto 15:29, “A i ole loa e ala mai ka poe make, pehea la e hana ai ka poe i bapetizo ia ai no ka poe make? No ke aha la i bapetizo ia ai lakou no ka poe make?”

17. A eia hou, e pili ana i keia olelo, e haawi aku au ia oukou i kekahi olelo mai kekahi mai o na Kaula, nona ka maka i kau pono aku i ka hoihoi hou ia ana mai o ka Oihanakahuna, i na nani e hoike ia mai ana i na la hope, a o ka oi loa aku i keia kumumanao nani loa mamua ae o na kumumanao e ae a pau e pili ana i ka Euanelio mau loa, aia hoi, ka bapetizo ana no ka poe make; no ka mea, wahi a Malaki, mokuna hope, pauku 5 a me 6, “Aia hoi, e hoouna aku Au ia Elaika ke Kaula io oukou la, mamua mai o ka hiki ana mai o ua la nui a weliweli la o Iehova; a e hoohuli ae oia i ka naau o na makua i na keiki, a me ka naau o na keiki i ko lakou mau makua, o hele aku auanei Au, a hahau i ka honua i ka hoino ana.”

18. Ua hiki no iaʻu ke haawi aku i unuhina i oi aku ka moakaka mamua o keia, aka ua lawa kona moakaka me ia e ku nei, e ku i kaʻu i manao ai. Ua lawa ka hoomaopopo ana ma keia mea, e hahau ia ana ka honua me kekahi hoino, ke ole he hookuina o kekahi ano a mea e ae paha, mawaena o na makua a me na keiki, maluna o kekahi kumumanao a mea e ae paha: a aia hoi, heaha la ua kumumanao la? Oia no ka bapetizo ana no ka poe make. No ka mea, aole hiki ke hoohemolele ia kakou ke ole lakou; aole hoi e hiki ke hoohemolele ia lakou, ke ole kakou. Aole hoi e hiki lakou, aole hoi kakou, ke hoohemolele ia ke ole ka poe i make hoi iloko o ka Euanelio; no ka mea, he mea ia e pono ai i ka hoopuka ia ana mai o ke kau o ka hooko ana i na mea o na kau a pau, a ke hoomaka nei ano ua kau la e hoopuka ia mai, i hana ia ai he hoohui ana o na mea a pau, a i piha a pololei, a me ka hookuina o na kau, a me na ki, a me na mana, a me na nani, a e hoike ia mai mai na la o Adamu a hiki i keia manawa; a aole o keia wale no, aka o kela mau mea no hoi i hoike ole ia mai mai ka hookumu ia ana o ke ao nei, aka, i huna ia mai ka poe naauao a me ka poe noeau aku, e hoike ia auanei i na pepe a me na keiki omo waiu iloko o keia ke kau o ka hooko ana i na mea o na kau a pau.

19. Ano, heaha ka kakou e lohe nei iloko o ka Euanelio i loaa ia kakou? “He leo o ka hauoli! He leo o ke aloha mai ka lani mai, a he leo o ka oiaio mailoko mai o ka honua; he olelo olioli no ka poe make; he leo hauoli no ka poe ola a me ka poe make; he olelo olioli o ka hauoli nui. Nani wale ma na mauna na wawae o ka poe e lawe mai ana i na olelo olioli o na mea maikai, ka poe e olelo ana ia Ziona, Aia hoi! Ke nohoalii nei kou Akua. E like me ke kehau o Karemela, pela no auanei ka ike o ke Akua e kau mai ai maluna o lakou:”

20. A eia hou, heaha ka kakou e lohe nei? He olelo olioli mai Kumora mai! O Moroni, he anela mai ka lani mai, e hai ana i ka hooko ia ana o ka na Kaula—ka buke e hoike ia mai ana. He leo o ka Haku ma ka waonahele o Feieta, Kalana o Seneka, e hai aku ana i na mea ike maka ekolu e hooiaio ai i ka buke. Ka leo o Mikaela ma na kapa o ka muliwai Sasekuehana, e hoomaopopo ana i ke diabolo i ka wa ona [diabolo] i ikea mai ai me he anela la o ka malamalama. Ka leo o Petero, Iakobo, a me Ioane iloko o ka waonahele mawaena o Hamone, Kalana o Sasekuehana, a me Kolevile, Kalana o Burume, ma ka muliwai Sasekuehana e hai ana aia ia lakou na ki o ke aupuni a o ke kau o ka hooko ana i na mea o na kau a pau.

21. A eia hou, o ka leo o ke Akua iloko o ke keena o ka makua elemakule, o Witima, ma Feieta, Kalana o Seneka, a ma na manawa like ole a ma na wahi like ole, iloko o na kaahele ana a me na popilikia o keia Ekalesia o Iesu Kristo o ka Poe Hoano o na La Hope nei. A o ka leo o Mikaela, ka luna anela, ka leo o Gaberiela, a o Lapela, a me na anela like ole, mai ia Mikaela, oia hoi o Adamu, a hiki i keia manawa, e hai ana lakou a pau i ko lakou kau, ko lakou mau kuleana, ko lakou mau ki, ko lakou mau hanohano, ko lakou kulana alii a me ka nani, a me ka mana o ka lakou Oihanakahuna; e haawi ana i ka lalani maluna o ka lalani, i loina maluna o ka loina; maanei he uuku, a ma o he uuku; e haawi ana ia kakou i ka hooluolu ana ma ka hoike ana i ka mea e hiki mai ana, e hooiaio ana i ko kakou mau manaolana.

22. E na hoahanau, aole anei kakou e nee imua iloko o keia hana nui? E hele imua, aole ihope? E koa, e na hoahanau, a imua, imua i ka lanakila! E hauoli ko oukou mau naau, a e olioli nui hoi. E hooho ae ko ka honua me ke mele ana. E oli ae ka poe make i na halelu o ka hoomaikai mau loa i ke Alii Imanuela, ka Mea nana i hooholo mamua aku o ka honua, i ka mea e hiki ai ia kakou ke hoolapanai ia lakou mailoko mai o ko lakou mau halepaahao; no ka mea, e hele laelae na pio.

23. E hooho na mauna no ka olioli, a e kahea nui oukou, e na awawa a pau; a e hai aku oukou, e na kai a me na aina maloo a pau, i na mea kupaianaha o ko oukou Moi mau loa. A e kahe mai oukou, e na muliwai, na kahawai, a me na auwai, me ka olioli. E hoonani aku na ululaau a me na kumulaau o ke kula i ka Haku; a oukou, e na pohaku paa e uwe no ka hauoli. E mele like ae ka la, ka mahina, a me na hoku o ke kakahiaka, a e hooho ae na keiki a pau a ke Akua no ka olioli. A e hai ae na mea mau loa i hookumu ia, i Kona inoa no ka wa mau loa a mau loa. A eia hou, ke olelo aku nei au, me e ka nani o ka leo a kakou e lohe nei mai ka lani mai, e hai ana iloko o ko kakou mau pepeiao, i ka nani a me ka hoola ana, a me ka hanohano, a me ka palaho ole, a me ke ola mau loa; na aupuni, na aupuni o na keikialii, a me na mana.

24. Aia hoi, ua kokoke mai ka la nui o ka Haku, a owai ka mea hiki ke hoomanawanui i ka la o Kona hiki ana mai, a owai ke hiki ke ku i ka wa Ona e hoea mai ai? No ka mea, ua like Oia me ke ahi a ka mea hoohehee, a me ke kopa o ka mea hoomaemae; a noho auanei Ia me he mea hoohehee a hoomaemae kala la, a e huikala auanei Oia i na keiki a Levi, a hoomaemae ia lakou me he gula a me ke kala la, i mohai aku ai lakou na ka Haku i mohai iloko o ka pono. Nolaila, e haawi aku kakou, ma ke ano he Ekalesia a he poe kanaka hoi, a he Poe Hoano hoi o na La Hope nei, i ka Haku i mohai iloko o ka pono, a e lawe mai kakou iloko o Kona halelaa, i ka wa e paa pono ai ia, i kekahi buke e paa ana i na mookuauhau o ko kakou poe make, he mea hoi i kupono no ke apono ia mai.

25. E na hoahanau, he nui na mea aʻu i makemake ai e hai aku ia oukou e pili ana i keia kumumanao; aka, e hooki ana au no keia manawa, a e hoomau aku i ke kumumanao ma kekahi wa okoa aku. Owau no, e like me ke ano mau, ka oukou kauwa haahaa, a hoaloha loli ole,