1. Ua lawe ia ka paku mai ko maua mau naau ae, a ua wehe ia na maka o ko maua hoomaopopo ana.

2. Ike aku la maua i ka Haku e ku ana maluna o ka paleumauma o ka awai, imua o maua, a malalo o Kona mau wawae he gula maemae i kipapa ia nona ka waihooluu e like me ka amebera.

3. O Kona mau maka me he ula la o ke ahi, ka lauoho o Kona poo he keokeo e like me ka hau maemae, lilelile ae la Kona helehelena a oi aku i ka olinolino o ko ka la, a o Kona leo ua like me ka halulu o na wai-kahe nui, oia hoi, ka leo o Iehova, e i ana—

4. Owau ka mua a me ka hope, Owau no ka Mea e ola nei, Owau no ka mea i pepehi ia, Owau no ko olua Mea Uwao me ka Makua.

5. Aia hoi, ua kala ia ko olua mau hewa, ua maemae olua imua Oʻu, nolaila, e hapai ae i ko olua mau poo a e hauoli,

6. E hauoli no hoi na naau o ko olua mau hoahanau, a e hauoli na naau o Koʻu poe kanaka a pau, ka poe hoi i kukulu ai i keia hale i Koʻu inoa, me ko lakou ikaika,

7. No ka mea, aia hoi, ua apono Au i keia hale, a maanei no auanei Koʻu inoa, a e hoike no Au Iaʻu iho i Koʻu poe kanaka me ke aloha iloko o keia hale,

8. He oiaio, e hiki aku no Au i Kuu mau kauwa, a e olelo aku ia lakou me Koʻu leo ponoi, ke malama Kuu poe kanaka i Kaʻu mau kauoha, a hoohaumia ole hoi i keia hale hemolele,

9. He oiaio, e hauoli nui na naau o na tausani a me na umi tausani mamuli o na pomaikai e ninini ia aku ana, a me ka haawina-laa i hooili ia maluna o Kaʻu mau kauwa maloko o keia hale;

10. A e kui aku no ke kaulana o keia hale i na aina e, a o keia ka hoomaka ana o ka pomaikai e ninini ia aku ana maluna o na poo o Kuu poe kanaka. Pela io no. Amene.

11. Mahope iho o ka pau ana o keia hihio, hamama hou ae la na lani ia maua, a ikea mai la o Mose imua o maua, a hoihoi mai la ia maua i na ki o ka houluulu ana o ka Iseraela mai na mahele eha mai o ka honua, a me ke kai ana mai i na Ohana Umi mai ka aina mai o ka akau.

12. Mahope o keia, ikea mai la o Elia a hoihoi mai la i ke kau o ka Euanelio o Aberahama, me ka i ana, ma o maua nei, a me ka maua mau hua, e hoopomaikai ia ai na hanauna a pau mahope aku o maua.

13. Mahope o ka pau ana o keia hihio, poha mai la kekahi hihio nani a nui e ae maluna o maua, no ka mea, ku mai la imua o maua o Elaika ke Kaula, ka mea i lawe ia aku i ka lani, me ka ike ole i ka make, a olelo mai la—

14. Aia hoi, ua hiki mai ka piha ana o ka manawa i olelo ia ma o ka waha la o Malaki, e hooiaio ana e hoouna ia mai ana oia (o Elaika) mamua o ka hiki ana mai o ka la nui a weliweli o ka Haku,

15. E hoohuli mai i na naau o na makua i na keiki, a o na keiki i na makua, o hahau ia ka honua holookoa me kekahi hoino.

16. Nolaila, ke haawi ia nei na ki o keia kau iloko o ko olua mau lima, a ma keia e ike ai olua, ua kokoke mai ka la nui a weliweli o ka Haku, he oiaio, aia ma na ipuka.