1. Aia hoi, a e hoolohe i ka leo o ka Mea nona ka mana a pau, ka Mea mai ka mau loa a i ka mau loa, oia hoi, ka Alepa a me ka Omega, ka hoomaka ana a me ka hopena.

2. Aia hoi, he oiaio, penei wahi a ka Haku ia oukou, e na Lunakahiko o Kuu Ekalesia, ka poe i akoakoa mai ma keia wahi, ka poe nona na hewa i huikala ia ano, no ka mea, ke huikala nei Au, ka Haku, i na hewa, a he aloha lokomaikai i ka poe e hoike ana i ko lakou mau hewa me na naau haahaa;

3. Aka, he oiaio, ke olelo aku nei Au ia oukou, aole he mea pono no keia puulu holookoa o Kuu poe Lunakahiko e holo hikiwawe maluna o na wai, oiai na kanaka ma na kapa a elua e make ana iloko o ka hoomaloka;

4. Eia no nae, ua ae aku no Au ia i hooiaio mai ai oukou; aia hoi, he nui na poino maluna o na wai, a o ka oi aku nae ma keia hope aku;

5. No ka mea, ua hooholo Au ka Haku iloko o Kuu inaina, he nui na luku ana maluna o na wai, he oiaio, o ka oi aku nae maluna o keia mau wai;

6. Eia no nae, aia na mea io a pau iloko o Koʻu lima, a o ka mea kupaa mawaena o oukou aole oia e make ma o na wai la;

7. No ia mea, he mea pono i Kuu kauwa ia Sidane Gilibati, a me Kuu kauwa o Wiliama W. Pelepa, e awiwi ma ko laua huakai hele a misiona hoi;

8. Eia no nae, aole Au e ae e kaawale oukou a hiki i ko oukou ao ikaika ia ana no ko oukou mau hewa a pau, i hookahi ai oukou, i ole ai oukou e make iloko o ka hewa;

9. Aka, ano, he oiaio, ke olelo nei Au he mea pono Iaʻu e hele oukou, no ia mea, e hele Kuu kauwa o Sidane Gilibati a me Wiliama W. Pelepa me ko laua puulu mua, a e hele laua ma ko laua huakai hele me ka awiwi, i hooko ai laua i ka laua misiona, a ma o ka manaoio la e lanakila ai laua;

10. A ina e kupaa laua e malama ia ana laua, a Owau, ka Haku, pu no me laua.

11. A o ke koena e lawe lakou i ka mea kupono no ka aahu ana.

12. A e lawe Kuu kauwa o Sidane Gilibati i na mea a oukou i hemahema ole ai me ia, e like me ka oukou e ae-like ai.

13. A ano, aia hoi, no ko oukou pono ua haawi aku Au ia oukou i kekahi kauoha e pili ana i keia mau mea, a e kamailio Au, ka Haku, me ka noonoo kuhohonu pu me oukou e like la me na kanaka i na la kahiko.

14. Aia hoi, hoopomaikai iho la Au, ka Haku, i na wai i kinohi, aka, i na la hope, ma o ka waha la o Kuu kauwa o Ioane, hoino iho la Au i na wai;

15. No ia mea, e hiki mai ana na la aole he mea io e palekana mau maluna o na wai,

16. A e olelo ia auanei i na la e hiki mai ana aohe he mea e hiki ana ke pii i ka aina o Ziona maluna o na wai, aka, o ka mea wale no i pono ma ka naau.

17. A e like me Kaʻu, ka Haku, i hoino ai i ka aina i kinohi, pela no i na la hope nei i hoopomaikai ai Au ia mea, ma kona manawa, no ka pomaikai o Koʻu Poe Hoano, i ai ai lakou i kona momona.

18. A ano, ke haawi aku nei Au ia oukou i kekahi kauoha o ka mea Aʻu e olelo aku nei i ka mea hookahi oia no Kaʻu e olelo aku nei i ka poe a pau, e ao e aku oukou i ko oukou mau hoahanau e pili ana i keia mau wai, i hele ole mai ai lakou ma ka huakai hele maluna olaila, o haule auanei ko lakou manaoio, a hei lakou iloko o na pahele;

19. Ua hooholo Au, ka Haku, a ke holo nei ka mea luku maluna o kona ili, a aole Au i hoopau ia olelo hooholo;

20. Ua huhu Au ka Haku ia oukou inehinei, aka, i keia la ua huli ae Koʻu huhu i kahi e.

21. No ia mea, e pili ana i ka poe Aʻu i olelo ai, e hele koke lakou ma ko lakou huakai hele, eia hou, ke olelo aku nei Au ia oukou, e hele koke lakou ma ko lakou huakai hele,

22. A he mea ole ia Iaʻu, ke kaulua iki, ina e hooko lakou i ko lakou misiona, ina paha e hele ana lakou ma ka wai, a i ole ma ka aina; e hana ia keia e like me ia i hoike ia ia lakou mamuli o ko lakou noonoo ma keia hope aku.

23. A ano, e pili ana i Kuu mau kauwa ia Sidane Rigedona a me Iosepa Kamika, opio, a me Oliva Kaudare, aole e hele hou mai lakou maluna o na wai, koe wale no maluna o na ala-wai-oki, ia lakou e hoi ana i ko lakou mau home, a i ole, ma kekahi olelo ana, aole lakou e pii mai maluna o na wai ma ka huakai hele ana, koe wale no ma ke ala-wai-oki.

24. Aia hoi, ua wae Au, ka Haku, i ala no ka hele ana o Koʻu Poe Hoano, a aia hoi, o keia ke ala—mahope o ko lakou haalele ana i ke ala-wai-oki, e hele lakou ma ka aina, e like me ko lakou kauoha ia ana e hele aku i ka aina o Ziona;

25. A e hana lakou e like me ko na keiki o ka Iseraela, e kukulu ana i na hale-lewa ma ke alahele.

26. A, aia hoi, e haawi aku oukou i keia kauoha i ko oukou mau hoahanau a pau;

27. Eia nae, i ka mea i haawi ia ka mana e kauoha i na wai, ia ia i haawi ia e ka Uhane e ike i kona mau aoao a pau;

28. No ia mea, e hana oia e like me ka ka Uhane o ke Akua ola e kauoha ai ia ia, ina maluna o ka aina, a i ole maluna o na wai, e like me Kaʻu e manao ai e hana ma keia hope aku;

29. A ua haawi ia ia oukou ke alahele no ka Poe Hoano, a i ole, ke alahele no ka Poe Hoano o ka puali o ka Haku, e hele ai.

30. A eia hou, he oiaio, ke olelo aku nei Au ia oukou, o Kuu mau kauwa o Sidane Rigedona a me Iosepa Kamika, opio, a me Oliva Kaudare, aole e wehe i ko lakou mau waha ma na anaina o ka poe hewa a hiki aku lakou i Kinikinaki ;

31. A ma kela wahi e hookiekie ae lakou i ko lakou mau leo i ke Akua e kue i kela poe kanaka; he oiaio, i ka Mea nona ka inaina i hoaa ia e kue i ko lakou mau hewa; he poe kanaka i aneane e oo no ka luku ia ana;

32. A mai ia wahi aku, e hele lakou i na anaina o ko lakou mau hoahanau, no ka mea, i keia manawa ano, ua makemake nui ia ka lakou mau hana mawaena o lakou, mamua o na anaina o ka poe hewa.

33. A ano, e pili ana i ke koena, e hele lakou a hai i ka olelo mawaena o na anaina o ka poe hewa, e like me ia i haawi ia.

34. A ina e hana lakou i keia, e hoomaemae lakou i ko lakou mau aahu, a e kikohukohu ole lakou imua Oʻu;

35. A e hele like lakou, a i ole, e papalua, e like me ka lakou i manao ai he pono, koe wale no aole e hookaawale ia Kuu kauwa o Renola Kahuna, a me Kuu kauwa o Samuela H. Kamika, na mea Aʻu i olioli loa ai, a hiki i ko laua hoi ana i ko laua mau home, a o keia no kekahi manao naauao iloko Oʻu.

36. A ano, he oiaio, ke olelo aku nei Au ia oukou, a o ka mea Aʻu e olelo aku nei i ka mea hookahi oia no Kaʻu e olelo aku nei i na mea a pau, e hauoli e na keiki liilii, no ka mea, aia no Au mawaena o oukou, a aole Au i haalele ia oukou;

37. A e like me ka oukou hoohaahaa ana ia oukou iho imua Oʻu, pela e lilo ai na pomaikai o ke aupuni ia oukou.

38. E kaei i ko oukou mau puhaka a e kiai a e noho kuoo, me ka nana ana no ka hiki ana mai o ke Keiki a ke Kanaka, no ka mea, e hele mai ana Ia i ka hora a oukou e manao ole ai.

39. E pule mau i komo ole ai oukou iloko o ka hoowalewale ia mai, i ku ai oukou i ka la o Kona hiki ana mai, ina ma ka wa e ola ana, a i ole, iloko o ka make. Pela io no. Amene.