1. E hoolohe mai i ka leo o Iesu Kristo, kou Haku, kou Akua, a me kou Hoolapanai, Nana ka olelo ola a mana hoi.

2. No ka mea, aia hoi, ke olelo aku nei Au ia oe, aole he mea ano nui ka mea au e ai ai, a i ole, ka mea au e inu ai, i ka wa au e lawelawe ai i ka Ahaaina a ka Haku, ina nae e hana oe ia mea me ka manao hookahi i Koʻu nani; e hoomanao ana imua o ka Makua i Koʻu kino i waiho ia ilalo nou, a me Koʻu koko i hookahe ia no ke kala ana i kou mau hewa:

3. No ia mea, he kauoha Kaʻu e haawi aku nei ia oe, mai kuai oe i waina, aole hoi i ka waiona mai kou mau enemi mai:

4. No ia mea, mai lawe oe i kekahi o ia mau mea, ke ole he waina hou ia i hana ia mawaena o oukou; he oiaio, iloko o keia ke aupuni o Koʻu Makua ka mea e kukulu ia ana maluna o ka honua.

5. Aia hoi, o keia ka naauao iloko Oʻu: no ia mea, mai kahaha, no ka mea, e hiki mai ana ka hora Aʻu e inu ai i ko ka hua o ka waina me oukou maluna o ka honua, a me Moroni, ka mea Aʻu i hoouna aku ai i ou la e hoike i ka Buke a Moramona, e paa ana i ka piha o Koʻu Euanelio mau loa, ka mea Aʻu i haawi ai i na ki o ka mooolelo o ka laau o ka Eperaima;

6. A pela no hoi me Elia, ka mea Aʻu i haawi ai i na ki o ka hoihoi hou ana mai i na mea a pau i olelo ia ma o ka waha la o na Kaula hemolele a pau, mai ka hoomaka ana o ke ao nei, e pili ana i na la hope:

7. A pela no hoi me Ioane ke keiki a Zakaria, ka Zakaria hoi ana (oia hoi, a Elia) i hele mai ai e ike a haawi i olelo paa e loaa ana ia ia he keikikane, a o kona inoa auanei o Ioane, a e piha auanei no ia me ka uhane o Elia;

8. Oia ka Ioane Aʻu i hoouna aku ai io olua la, i Kaʻu kauwa, ia Iosepa Kamika, opio, a me Oliva Kaudare, e hoolilo ia olua i keia Oihanakahuna mua ka mea a olua i loaa ai, i hea ia ai olua a hoolilo ia e like me Aarona la:

9. A pela no hoi o Elaika, ka mea Aʻu i haawi aku ai i na ki o ka mana o ka hoohuli ana i na naau o na makua i na keiki, a i na naau o na keiki i na makua, i ole e hahau ia ka honua holookoa me kekahi hoino:

10. A pela no hoi me Iosepa a me Iakoba, a me Isaaka, a me Aberahama, ko oukou mau kupuna, ma o lakou la e waiho nei na olelo hoopomaikai;

11. A pela no hoi me Mikaela, oia o Adamu, ka makua o na mea a pau, ke keikialii o na mea a pau, ka Makamua o Na La.

12. A pela no hoi me Petero, a me Iakobo, a me Ioane, ka poe Aʻu i hoouna aku ai io olua la, ma o lakou la Aʻu i hoolilo aku ai ia olua a hoopaa ia olua i mau Aposetolo, a i mau hoike kaokoa no Kuu inoa, a e paa i na ki o ka olua mau hana iloko o ka Oihanakahuna, a i na mea hookahi no Aʻu i hoike aku ai ia lakou:

13. Ka poe Aʻu i haawi aku ai i na ki o Koʻu aupuni, a me ke kau o ka Euanelio no na manawa hope; a no ka piha ana o na manawa, a iloko olaila Aʻu e hoakoakoa ai i na mea a pau a hookahi, na mea iloko o ka lani a me na mea maluna o ka honua:

14. A pela pu no hoi me na mea a pau a Koʻu Makua i haawi mai ai Iaʻu mailoko mai o ko ke ao nei.

15. No ia mea, e hapai ae i ko olua mau naau a e hauoli, a e kaei i ko olua mau puhaka, a e lawe maluna o olua i Koʻu aahu koa holookoa, i hiki ai ia olua ke kupaa ma ka la ino, oiai ua hana olua i na mea a pau i hiki ai ia olua ke ku.

16. Nolaila, e ku me ko olua mau puhaka i kaei ia me ka oiaio, me ke kau ana i ka paleumauma o ka pono, a o ko olua mau wawae i hawele ia me ka makaukau o ka Euanelio o ka maluhia, ka mea Aʻu i hoouna aku ai i Koʻu mau anela e haawi ia olua,

17. Me ka lawe pu ana i ka palekaua o ka manaoio, ka mea hoi e hiki ai ia olua ke kinai i na ihe wela a pau o ka poe hewa;

18. A e lawe i ka mahiole o ke ola mau loa a me ka pahikaua o Kuu Uhane, ka mea Aʻu e ninini aku ai maluna o olua, a me Kaʻu olelo, ka mea Aʻu e hoike aku ai ia olua, a e lokahi e pili ana i na mea a pau a olua e nonoi mai ai Iaʻu, a e kupaa a hiki aku Au, a e kaili ia auanei olua iluna, a ma kahi Aʻu e noho ai malaila pu auanei olua. Amene.