1. E hoolohe mai, e oukou na Lunakahiko o Kuu Ekalesia, ka poe i hoakoakoa pu ia oukou iho ma Koʻu inoa, oia hoi, o Iesu Kristo ke Keiki a ke Akua ola, ka Hoola o ke ao nei, ina nae oukou e manaoio ma Kuu inoa a malama i Kaʻu mau kauoha.

2. Eia hou, ke olelo aku nei Au ia oukou, e haliu mai a e hoolohe a e malama i ke kanawai Aʻu e haawi aku ai ia oukou;

3. No ka mea, he oiaio, ke olelo aku nei Au, e like me ko oukou hoakoakoa ana ia oukou iho e like me ke kauoha Aʻu i kauoha aku ai ia oukou, a ua lokahi hoi e pili ana i keia mea hookahi, a ua noi i ka Makua ma Koʻu inoa, pela no e loaa ai ia oukou.

4. Aia hoi, he oiaio, ke olelo aku nei Au ia oukou, ke haawi aku nei Au ia oukou i keia kauoha mua, e hele aku oukou ma Koʻu inoa, kela mea keia mea o oukou, koe wale no Kaʻu mau kauwa, o Iosepa Kamika, opio, a me Sidane Rigedona.

5. A ke haawi aku nei Au ia laua he kauoha e hele aku laua no kekahi wa pokole, a e hoike ia ma o ka mana la o Koʻu Uhane ka wa o laua e huli hoi mai ai;

6. A e hele papalua aku oukou iloko o ka mana o Koʻu Uhane, e hai ana i Koʻu Euanelio ma Koʻu inoa, e hookiekie ana i ko oukou mau leo e like la me ka leo o ka pu, e hai ana i Kaʻu olelo e like me ka na anela o ke Akua;

7. A e hele aku oukou e bapetizo ana me ka wai, i ka i ana—E mihi oukou, e mihi oukou, no ka mea, ua kokoke mai ke aupuni o ka lani.

8. A mai keia wahi aku e hele aku ai oukou ma na aina ma ke komohana; a ina e loaa ia oukou ka poe e hookipa mai ana ia oukou, e kukulu ae oukou i Koʻu Ekalesia ma kela a me keia wahi,

9. A hiki i ka wa e hoike ia aku ai ia oukou mailuna mai, ka wa e hoomakaukau ia ai ke kulanakauhale o Ierusalema Hou, i houluulu ia ai oukou a hookahi, i hiki ai oukou ke lilo i poe kanaka Noʻu, a Owau ko oukou Akua.

10. A eia hou, ke olelo aku nei Au ia oukou, e ku Kaʻu kauwa, o Eluene Paterige ma ka oihana Aʻu i koho aku ai nona. A eia kekahi, ina e hana hewa ana oia, e koho ia kekahi ma kona wahi. Pela io no. Amene.

11. Eia hou, ke olelo aku nei Au ia oukou, aole e haawi ia ana i kekahi e hele aku e hai i Koʻu Euanelio, a i ole, e kukulu i Kuu Ekalesia, ke ole oia e hoolilo ia e kekahi mea i loaa ka mana, a i maopopo hoi i ka Ekalesia he mana kona, a ua hoolilo ia ma ke ano pololei e na poo o ka Ekalesia.

12. A eia hou, e ao na Lunakahiko, na Kahuna, a me na Kumu o keia Ekalesia, i na kumupaa o Kuu Euanelio, ka mea iloko o ka Baibala a me ka Buke a Moramona, iloko hoi olaila ka piha o ka Euanelio;

13. A e malama lakou i na berita a me na loina o ka Ekalesia a hooko ia mau mea, a o keia ka lakou mau mea e ao ai, e like me ko lakou kuhikuhi ia ana e ka Uhane;

14. A e haawi ia ka Uhane ia oukou ma ka pule o ka manaoio, a ina e loaa ole ia oukou ka Uhane, mai ao oukou.

15. A o keia mau mea a pau ka oukou e malama ai e hana e like me Kaʻu i kauoha aku ai e pili ana i ka oukou ao ana, a hiki i ka haawi ia ana mai o ka piha o Kuu mau Palapala Hemolele.

16. A e like me ko oukou hookiekie ana ae i ko oukou mau leo ma ka Uhane Kokua, pela oukou e olelo a e wanana aku ai e like me Aʻu e manao ai he pono;

17. No ka mea, aia hoi, ke ike nei ka Uhane Kokua i na mea a pau, a ke hoike nei no ka Makua a me ke Keiki.

18. A ano, aia hoi, ke olelo aku nei Au i ka Ekalesia. Mai pepehi kanaka oe; a o ka mea e pepehi kanaka ana aole e loaa ke kala ia ana ma keia ao, aole hoi ma ke ao e hiki mai ana.

19. A eia hou, ke olelo aku nei Au, mai pepehi kanaka oe; aka, o ka mea e pepehi kanaka ana e make no ia.

20. Mai aihue oe; a o ka mea e aihue ana a mihi ole, e kipaku ia ana ia i waho.

21. Mai hoopunipuni oe; a o ka mea e hoopunipuni ana a mihi ole, e kipaku ia ana ia i waho.

22. E aloha oe i kau wahine me kou naau a pau, a e pili aku ia ia a aole i kekahi mea e ae;

23. A o ka mea e nana ana i ka wahine e kuko hewa aku ia ia, e hoole ana oia i ka manaoio, a aole e loaa ka Uhane, a ina e mihi ole oia e kipaku ia oia iwaho.

24. Mai moekolohe oe; a o ka mea e moekolohe ana, a mihi ole, e kipaku ia ana ia iwaho;

25. Aka, o ka mea i moekolohe, a mihi me kona naau a pau, a haalele loa ia mea, a hana hou ole ia mea, e kala aku oe;

26. Aka, ina e hana hou ia ia mea, aole oia e kala ia, aka, e kipaku ia iwaho.

27. Mai olelo ino oe no kou hoalauna, aole hoi, e hana i mea e hoopoino ia ia.

28. Ua ike oe ua haawi ia Koʻu mau kanawai e pili ana i keia mau mea iloko o Koʻu mau Palapala Hemolele; a o ka mea e hana hewa ana a mihi ole, e kipaku ia oia iwaho.

29. Ina e aloha mai oe Iaʻu, e hookauwa mai oe Naʻu, a e malama i Kaʻu mau kauoha a pau.

30. A aia hoi, e hoomanao oe i ka poe ilihune, a e hoolaa mailoko mai o kou mau waiwai i ka mea au e haawi aku ai ia lakou no ko lakou malama ia ana, me kekahi berita a me ka palapala sila i hiki ole ke uhai ia—

31. A e like me kou haawi ana aku mailoko mai o kou waiwai i ka poe ilihune, pela oe e hana mai ai Iaʻu—a e waiho ia ia mau mea imua o ka Bihopa o Kuu Ekalesia a me kona mau hoa-kuka, he elua mau Lunakahiko, a i ole, he mau Kahuna Kiekie, e like me kana e koho ai, a i koho ai paha, a hookaawale no ua hana la.

32. A eia kekahi, mahope o ka waiho ia ana o ia mau mea imua o ka Bihopa o Kuu Ekalesia, a mahope o ka loaa ana ia ia o keia mau palapala hoike e pili ana i ka hoolaa ia ana o na waiwai o Koʻu Ekalesia, aole e hiki ia mau mea ke lawe ia mai ka Ekalesia aku me ke ku like i Kaʻu mau kauoha; a maluna o kela a me keia kanaka ke koikoi o ka hoike ana Iaʻu, ma ke ano he kahu malama waiwai maluna o kona waiwai ponoi iho, a i ole, o ka waiwai e hoolaa ia ana i loaa ai, e like ana me ka lawa kupono nona iho a me kona ohana.

33. A eia hou, ina he mau waiwai kekahi iloko o ka lima o ka Ekalesia, a i ole, ma ka lima o kekahi mau lala ona, i oi aku mamua o ka lawa no ko lakou malama ia ana, mahope iho o keia hoolaa mua ia ana, a he koena hoi ia e hoolaa ia i ka Bihopa, e malama ia ia e haawi ia aku auanei i ka poe i loaa ole, mai ia manawa aku ia manawa aku, i hoolawa kupono ia ai kela a me keia kanaka i nele, a i loaa ai e like me kona mau hemahema.

34. Nolaila, e malama ia ke koena iloko o Koʻu hale hoahu, i mea e haawi aku ai i ka poe hune a nele, e like me ka apono ia ana o ka Ahakuka Kiekie o ka Ekalesia, a me ka Bihopa a me kona mau hoa-kuka,

35. A i mea e kuai ai i na aina no ka pomaikai laula o ka Ekalesia, a me ke kukulu ana i na hale hoomana, a me ke kukulu ana ia Ierusalema Hou, ka mea e hoike ia aku ana ma keia hope aku,

36. I houluulu ia ai a hookahi Koʻu poe kanaka i berita ia ma kela la Oʻu e hiki aku ai i Koʻu halelaa. A o keia Kaʻu e hana nei no ka hoola ana i Koʻu poe kanaka.

37. A eia kekahi, o ka mea e hana hewa ana a mihi ole, e kipaku ia aku oia i waho o ka Ekalesia, a aole e loaa hou ia ia ka mea ana i hoolaa aku ai no ka poe ilihune a me ka poe nele o Koʻu Ekalesia; a i ole, ma kekahi olelo ana, Noʻu nei;

38. No ka mea, ina e hana aku oe ia mea i ka mea uuku loa o keia poe, ua hana mai oe ia mea Iaʻu;

39. No ka mea, e hiki mai ana ka wa e hooko ia ai ka mea Aʻu i olelo ai ma o na waha la o Kaʻu mau Kaula; no ka mea, e hoolaa aku no Au i na waiwai o ka poe e apo mai ana i Kuu Euanelio mawaena o ka poe Genetile, i ka poe ilihune o Koʻu poe kanaka, ka poe o ko ka hale o Iseraela.

40. A eia hou, mai haaheo oe iloko o kou naau; a e hana ia kou mau aahu a pau me ka hoonaninani ole ia, a o ko lakou nani o ka nani no ia a ka hana a kou mau lima ponoi;

41. A e hana ia na mea a pau ma ka maemae imua Oʻu.

42. Mai palaualelo oukou; no ka mea, aole e ai ka mea palaualelo i ka ai, aole hoi e komo i na aahu o ke kanaka hana.

43. A o ka poe mai mawaena o oukou, a aole i loaa ka manaoio e hoola ia, aka, he manaoio no nae, e hanai ia lakou me ka oluolu loa, me na laau nahele a me na mea ai mama, a aole nae ma ka lima o kekahi enemi.

44. A e kahea ia na Lunakahiko o ka Ekalesia, elua a oi aku, a e pule lakou no ka mea mai a e kau i ko lakou mau lima maluna o lakou ma Koʻu inoa; a ina e make lakou, e make ana lakou iloko Oʻu, a ina e ola lakou e ola ana no lakou iloko Oʻu.

45. E noho pu oukou iloko o ke aloha, a no ia mea e uwe oukou no ka hao ana ia lakou, ka poe i make, a o ka oi aku nae no ka poe i loaa ole ka manaolana no ke alahouana iloko o ka nani.

46. A e hiki mai ana keia o ka poe e make ana iloko Oʻu, aole lakou e hoao i ka make, no ka mea, he oluolu ia ia lakou;

47. A o ka poe e make ole ana iloko Oʻu, auwe no lakou, no ka mea, he awahia ko lakou make ana.

48. A eia hou, e hiki mai ana keia o ka mea i loaa ka manaoio iloko Oʻu e hoola ia, a aole i koho ia e make, e hoola ia no;

49. O ka mea i loaa ka manaoio e ike e ike ana no;

50. O ka mea i loaa ka manaoio e lohe e lohe ana no;

51. O ka mea oopa i loaa ka manaoio e lelele e lelele ana no;

52. A o ka poe i loaa ole ka manaoio e hana i keia mau mea, aka, manaoio nae iloko Oʻu, he mana ko lakou e lilo i mau keiki Naʻu; a ina aole lakou e uhaki i Koʻu mau kanawai, e hoomanawanui oe me ko lakou mau nawaliwali.

53. E ku oe ma kahi o kau oihana kahu malama waiwai;

54. Mai lawe oe i ka aahu o kou hoahanau; e uku aku oe no ka mea au e loaa ai mai kou hoahanau mai;

55. A ina e loaa ia oe a oi aku mamua o ka lawa kupono no kou malama ia ana, e haawi aku oe ia mea i Koʻu hale-hoahu, i hana ia ai na mea a pau e like me ka mea Aʻu i olelo ai.

56. E noi oe, a e haawi ia mai Kuu mau Palapala Hemolele e like me Kaʻu i koho ai, a e malama ia lakou me ka maluhia;

57. A he mea pono ke hamau oe e pili ana ia mau mea, a mai ao ia mau mea a hiki i ka loaa ana ia oe ia mau mea a pau.

58. A ke haawi aku nei Au ia oe i kekahi kauoha, ma ua manawa la e ao aku ai oe ia mau mea i na kanaka a pau; no ka mea, e ao ia ia mau mea i ko na aina a pau, na ohana, na olelo a me na kanaka.

59. E lawe oe i na mea i loaa ia oe, na mea i haawi ia ia oe iloko o Kuu mau Palapala Hemolele i kanawai, e lilo i kanawai Naʻu e hoomalu ai i Koʻu Ekalesia;

60. A o ka mea e hana ana e like me keia mau mea e hoola ia oia, a o ka mea e hana ole ana ia mau mea e hoahewa ia oia, ke hoomau oia pela.

61. Ina e noi oe, e loaa ana ia oe he hoikeana maluna o ka hoikeana, ka ike maluna o ka ike, i hiki ai ia oe ke ike i na mea pohihihi a me na mea ku i ka maluhia—na mea e lawe mai ana i ka olioli, na mea e lawe mai ana i ke ola mau loa.

62. E noi oe, a e hoike ia aku ia oe iloko o Koʻu manawa kupono kahi e kukulu ia ai ka Ierusalema Hou.

63. A aia hoi, e hiki mai ana keia e hoouna ia aku Kaʻu mau kauwa i ka hikina a i ke komohana, i ka akau a i ka hema;

64. A i keia manawa ano, o ka mea e hele ana i ka hikina, e ao aku i ka mea e hoohuli ia mai ana e holo i ke komohana, a o keia mamuli o ka mea e hiki mai ana maluna o ka honua, a no na ahahui malu.

65. Aia hoi, e malama oe i keia mau mea a pau, a e nui auanei kou uku; no ka mea, ia oe i haawi ia aku ai e ike i na mea pohihihi o ke aupuni, aka, i ko ke ao nei aole i haawi ia e ike ia mau mea.

66. E malama oe i na kanawai au i loaa ai a e kupaa.

67. A ma neia hope aku e loaa ai ia oe na berita Ekalesia, na mea i lawa e kukulu paa ia oe, ma keia wahi a ma Ierusalema Hou.

68. Nolaila, o ka mea nele i ka naauao, e noi mai ia Iaʻu, a e haawi aku no Au ia ia me ka lokomaikai a me ka nukunuku ole ia ia.

69. E hapai i ko oukou mau naau a hauoli, no ka mea, ua haawi ia aku ke aupuni ia oukou, a i ole, ma kekahi olelo ana, na ki o ka Ekalesia. Pela io no. Amene.

70. E loaa i na Kahuna a me na Kumu ko lakou mau mahele waiwai , e like la me ko na lala;

71. A o na Lunakahiko, a i ole, na Kahuna Kiekie, ka poe i koho ia e kokua i ka Bihopa ma ke ano he mau hoa-kuka ma na mea a pau, e malama ia ko lakou mau ohana mailoko mai o na waiwai i hoolaa ia i ka Bihopa no ka pono o ka poe ilihune, a no kekahi mau kumu e ae, e like me ia i hai mua ia ae nei;

72. A i ole, e loaa ia lakou ka uku kupono no ka lakou mau hana, oia hoi, he mahele waiwai, a i ole, kekahi mea e ae, e like me ka mea i manao ia he maikai, a i ole, e hooholo ia e na hoa-kuka a me ka Bihopa.

73. A e loaa i ka Bihopa no hoi he lawa no kona malama ia ana, a i ole, he uku kupono no kana mau hana a pau iloko o ka Ekalesia.

74. Aia hoi, he oiaio, ke olelo aku nei Au ia oukou, o kela a me keia kanaka mawaena o oukou, i hookaawale aku i ko lakou mau kokoolua no ke kumu o ka moekolohe, a i ole, ma kekahi olelo ana, ina e hooiaio mai lakou imua o oukou me ka haahaa loa o ka naau o keia maoli ke kumu, mai kipaku aku oukou ia lakou maiwaena aku o oukou;

75. Aka, ina e loaa ia oukou kekahi mau kanaka i haalele i ka lakou mau kokoolua no na kumu o ka moekolohe, a o lakou maoli na mea hana hewa, a e ola ana no ko lakou mau kokoolua, e kipaku ia aku lakou maiwaena aku o oukou.

76. A eia hou, ke olelo aku nei Au ia oukou e makaala a e akahele oukou me ka noii pono ana, aole e hookipa mai i kekahi o ia ano mawaena o oukou, ina ua mare ia lakou.

77. A ina aole lakou i mare ia, e mihi lakou i ko lakou mau hewa a pau, i ole ia, aole oukou e hookipa mai ia lakou.

78. A eia hou, e nana pono kela a me keia kanaka iloko o keia Ekalesia o Kristo, e malama i na kauoha a me na berita a pau o ka Ekalesia.

79. A e hiki mai ana keia, ina e pepehi kanaka kekahi poe mawaena o oukou, e haawi ia aku lakou a e hana ia ia lakou e ku i na kanawai o ka aina; a e hooiaio ia mea e ku i na kanawai o ka aina; no ka mea, e hoomanao aole e loaa ana ia lakou ke kala ia ana;

80. A ina e moekolohe kekahi kane a wahine paha, e hookolokolo ia oia imua o na Lunakahiko elua, a oi aku paha, o ka Ekalesia, a e hooiaio ia kela a me keia olelo e kue ana ia ia e na hoike elua o ka Ekalesia, a aole o ka enemi; aka, ina i oi aku na hoike mamua o elua, oia ka maikai loa.

81. Aka, e hoahewa ia oia ma o ka waha la o elua mau hoike, a e waiho na Lunakahiko i ka hihia imua o ka Ekalesia, a e hapai ae ka Ekalesia i ko lakou mau lima e kue ana ia ia, i hana ia aku ai ia ia e ku i ke kanawai o ke Akua.

82. A ina he mea hiki, o ka Bihopa no hoi kekahi malaila e pono ai.

83. A pela oukou e hooponopono aku ai i na hihia a pau e hiki mai ana imua o oukou.

84. A ina e powa kekahi kane a wahine paha e haawi ia aku oia i ke kanawai o ka aina.

85. A ina e aihue oia, e haawi ia aku oia i ke kanawai o ka aina.

86. A ina e hoopunipuni oia, e haawi ia aku oia i ke kanawai o ka aina.

87. A ina e hana oia i kekahi ano o ka hewa, e haawi ia aku oia i ke kanawai, oia hoi, i ke kanawai o ke Akua.

88. A ina e hana hewa mai kou hoahanau kane a wahine paha ia oe, e lawe oe ia ia mawaena ona a me oe wale no; a ina e ae mai oia i kona hewa; e hoolaulea ia oe.

89. A ina e ae ole oia i kona hewa, e haawi aku oe ia ia i ka Ekalesia, aole i na lala, aka, i na Lunakahiko. A e hana ia ia mea iloko o kekahi halawai, a aole nae ia imua o ko ke ao nei.

90. A ina e hana hewa kou hoahanau kane a wahine paha, i ka poe he nui, alaila, e ao ikaika ia oia imua o ka poe he nui.

91. A ina e hana hewa kekahi imua o ke akea, alaila e ao ikaika ia oia ma ke akea, i hilahila ai ia. A ina e ae ole oia i kona hewa, alaila e haawi ia aku oia i ke kanawai o ke Akua.

92. Ina e hana hewa kekahi ma kahi malu, alaila e ao ikaika ia oia ma kahi malu, i loaa ai ia ia ka wa kupono e mihi ai ma ka malu, i ka mea ana i hana hewa aku ai, a i ke Akua, i olelo ino ole ai ka Ekalesia nona.

93. A pela e lawelawe ai oukou ma na mea a pau.