1. He oiaio, penei wahi a ka Haku ia oukou, e Kuu kauwa, e Iosepa Kamika, opio, a me Kuu kauwa, o Sidane Rigedona no hoi, a me Kuu kauwa, o Hailama Kamika no hoi, a me ko oukou mau hoakuka i koho ia a e koho ia aku ana ma keia hope aku;

2. A ia oe no hoi, e Kuu kauwa, e Eluene Paterige, a me kona mau hoakuka;

3. A pela no hoi i Kaʻu mau kauwa kupaa, ka poe o ka Ahakuka Kiekie o Kuu Ekalesia ma Ziona (no ka mea, pela e kapa ia ai ia,) a i na Lunakahiko a pau a me na kanaka o Kuu Ekalesia o Iesu Kristo o ka Poe Hoano o na La Hope nei, i kauliilii ia ma o a maanei o ke ao nei a pau;

4. No ka mea, pela Kuu Ekalesia e kapa ia ai ma na la hope nei, oia hoi ka Ekalesia o Iesu Kristo o ka Poe Hoano o na La Hope nei.

5. He oiaio, ke olelo aku nei Au ia oukou a pau, E ala a e alohi ae, i lilo ai ko oukou malamalama i lama-ku no na lahuikanaka,

6. A i lilo ai ka houluulu pu ana maluna o ka aina o Ziona, a me kona mau Mahele-aina, i pale a i puuhonua mai na ino nui mai, a mai ka inaina mai i ka wa e ninini ia mai ai ia me ka hoohui pu ole ia me kahi mea okoa maluna o ka honua holookoa.

7. A e lilo ke kulanakauhale, o Komohana Mamao, i aina hemolele i hoolaa ia Iaʻu nei, a e kapa ia ia he hemolele loa, no ka mea, he hemolele ka aina kahi au e ku nei;

8. Nolaila, ke kauoha aku nei Au ia oukou e kukulu i kekahi hale Noʻu, no ka houluulu pu ana i Koʻu Poe Hoano, i hoomana mai ai lakou Iaʻu;

9. A e hoomaka ia keia hana, a me kekahi kahua, a me kekahi hana hoomakaukau hoi, i keia kau mehana ae;

10. A e hoomaka ia ka hana ana ma ka la 4 o keia Iulai ae, a mai ia manawa aku e hana aku Koʻu poe kanaka me ka ikaika e kukulu i kekahi hale i Koʻu inoa,

11. A iloko o hookahi makahiki mai keia la aku, e hoomaka hou ai lakou i na hookumu ana i ke kahua o Kuu hale;

12. A pela lakou e hana ai me ka ikaika mai ia manawa aku a hiki i kona paa ana mai kona pohaku kihi aku a hiki i kona wekiu, a koe ole kekahi mea me ka pau ole i ka hana ia.

13. He oiaio, ke olelo aku nei Au ia oukou, mai komo hou aku Kuu kauwa, o Iosepa, aole hoi Kuu kauwa, o Sidane, aole hoi Kuu kauwa, o Hailama, iloko o ka aie no ke kukulu ana i kekahi hale i Koʻu inoa;

14. Aka, e kukulu ia kekahi hale i Kuu inoa i ku like i ke ana Aʻu e hoike aku ai ia lakou.

15. A ina e kukulu Kuu poe kanaka ia mea me ke ku like ole i ke ana Aʻu e hoike aku ai i ko lakou papa Peresidena, aole loa Au e hoapono ana ia mea ma ko lakou mau lima;

16. Aka, ina e kukulu Kuu poe kanaka ia mea i ku like i ke ana Aʻu e hoike aku ai i ka lakou Papa Peresidena, oia hoi, o Kuu kauwa o Iosepa a me kona mau hoakuka, alaila e hoapono no Au ia mea ma na lima o Kuu poe kanaka.

17. A eia hou, he oiaio, ke olelo aku nei Au ia oukou, o Koʻu makemake no ia e kukulu koke ia ke kulanakauhale o Komohana Mamao, ma ka houluulu ana o Kuu Poe Hoano,

18. A e koho ia no hoi kekahi mau wahi okoa ae i mau Mahele-aina ma na aina e pili kokoke mai ana, e like me ia mau mea e hoike ia aku ana i Kuu kauwa, ia Iosepa, ia manawa aku ia manawa aku;

19. No ka mea, aia hoi, Owau pu no me ia, a e hoolaa Au ia ia imua o na kanaka, no ka mea, ia ia Au i haawi aku ai i na ki o keia aupuni a me ka lawelawe ana ma ka Oihanakahuna. Pela io no. Amene.