1. He hoikeana a Iesu Kristo i Kana kauwa ia Iosepa Kamika, opio, a me eono mau Lunakahiko, i ko lakou hookuikahi ana i ko lakou mau naau a hookiekie ana ae i ko lakou mau leo iluna.

2. He oiaio, o ka olelo a ka Haku e pili ana i Kona Ekalesia, i kukulu ia i na la hope nei no ka hoihoi hou ana i Kona poe kanaka, e like me Kana i olelo ai ma ka waha o Kana mau Kaula, a no ka houluulu ana i Kona Poe Hoano e ku maluna o Mauna Ziona, ka mea e lilo ana i kulanakauhale o Ierusalema Hou.

3. Ke kulanakauhale hoi e kukulu ia aku ana, e hoomaka ana ma ka apana aina o ka halelaa, ka mea i koho ia e ka manamana lima o ka Haku, ma na palena komohana o ka mokuaina o Misouri, a i hoolaa ia hoi e ka lima o Iosepa Kamika, opio, a me kekahi poe e ae ka poe a ka Haku i olioli loa ai.

4. He oiaio, o keia ka olelo a ka Haku, e kukulu ia ke kulanakauhale o Ierusalema Hou ma ka houluulu ana o ka Poe Hoano e hoomaka ana ma keia wahi, oia hoi, kahi o ka halelaa, ka halelaa hoi e kukulu ia ana ma keia hanauna;

5. No ka mea, he oiaio, aole e pau loa ana keia hanauna a kukulu ia kekahi hale no ka Haku, a e uhi mai kekahi ao maluna ona, a o ua ao la oia no auanei ka nani o ka Haku, ka mea e hoopiha ana i ua hale la.

6. A o na keikikane a Mose, mamuli o ka Oihanakahuna Hemolele ka mea ana i loaa ai malalo o ka lima o kona makua-hunowai-kane, o Ietero;

7. A loaa iho la ia Ietero ia mea malalo o ka lima o Caleba;

8. A ua loaa iho la ia Caleba ia mea malalo o ka lima o Elihu;

9. A ia Elihu malalo o ka lima o Ieremi;

10. A ia Ieremi malalo o ka lima o Gada;

11. A ia Gada malalo o ka lima o Esaiasa;

12. A loaa iho la ia Esaiasa ia mea malalo o ka lima o ke Akua.

13. Ua ola no hoi o Esaiasa i na la o Aberahama, a ua hoopomaikai ia e ia—

14. A loaa iho la i ua Aberahama la ka Oihanakahuna mai ia Melekisedeka mai, ka mea i loaa ia mea ma o ka mamo pololei la o kona mau makua, he oiaio, a hiki ia Noa.

15. A mai ia Noa a hiki ia Enoka, ma o ka mamo pololei la o ko lakou mau makua;

16. A mai ia Enoka a hiki ia Abela, ka mea i pepehi ia ma o ke kuko ino ana la o kona kaikuaana, ka mea hoi i loaa ka Oihanakahuna ma o na kauoha la a ke Akua, ma ka lima o Adamu, kona makuakane, ke kanaka mua.

17. Ka Oihanakahuna e mau ana iloko o ka Ekalesia o ke Akua iloko o na hanauna a pau, a aole ona hoomaka ana o na la a hopena hoi o na makahiki.

18. A hoopaa iho la no hoi ka Haku i kekahi Oihanakahuna maluna o Aarona a me kona mau mamo, iloko o ko lakou mau hanauna a pau—ka Oihanakahuna no hoi e mau ana a e ku ana a mau loa me ka Oihanakahuna, ka mea mamuli o ke ano hemolele loa o ke Akua.

19. A o keia Oihanakahuna oi ae ka mea e lawelawe ana i ka Euanelio a e paa ana i ke ki o na mea pohihihi o ke aupuni, oia hoi ke ki o ka naauao o ke Akua;

20. Nolaila, iloko o na lawelawepaa ona e hoike ia ai ka mana o ke ano Akua;

21. A ke ole na lawelawepaa ona a me ka mana o ka Oihanakahuna, aole e hoike ia aku ka mana o ke ano Akua i kanaka ma ka io;

22. No ka mea, ke ole keia aole e hiki i kekahi kanaka ke ike i ka helehelena o ke Akua, oia hoi, ka Makua, a ola hou aku.

23. Ano, o keia ka Mose i ao moakaka aku ai i na keiki o ka Iseraela iloko o ka waonahele, a i imi ikaika e hoomaemae i kona poe kanaka i hiki ai ia lakou ke nana i ka helehelena o ke Akua;

24. Aka, hoopaakiki iho la lakou i ko lakou mau naau, a aole i hiki ke ku imua o Kona alo, nolaila, i olelo hoohiki ai ka Haku iloko o Kona inaina (no ka mea ua hoaa ia Kona inaina ia lakou) aole lakou e komo iloko o Kona maha oiai ma ka waonahele, a o ua maha nei oia no ka piha o Kona nani.

25. Nolaila, i lawe aku ai Oia ia Mose maiwaena aku o lakou a me ka Oihanakahuna Hemolele pu no hoi;

26. A mau aku la ka Oihanakahuna uuku iho, oia ka Oihanakahuna e paa ana i ke ki o ka lawelawe ana o na anela a me ka Euanelio hoomakaukau;

27. O ua Euanelio la ka Euanelio o ka mihi a me ka bapetizo ana, a me ke kala ana i na hewa, a me ke kanawai o na kauoha pili i ko ke kino, ka mea a ka Haku iloko o Kona inaina i hoomau ai me ka hale o Aarona mawaena o na keiki o ka Iseraela a hiki io Ioane la, ka mea a ke Akua i hoala ae ai, i piha me ka Uhane Hemolele mai ka opu mai o kona makuahine;

28. No ka mea, ua bapetizo ia oia oiai no oia i kona wa kamalii, a hoolilo ia i keia mana e ka anela o ke Akua i ka wa ona he ewalu la, e hoohiolo i ke aupuni o ka poe Iudaio, a e hoopololei i ke alanui o ka Haku imua o ke alo o Kona poe kanaka, e hoomakaukau ana ia lakou no ka hiki ana mai o ka Haku, ka mea i haawi ia ka mana a pau ma Kona mau lima.

29. A eia hou, o na oihana o ka Lunakahiko a me ka Bihopa he mau pakuina laua e pono ai no ka Oihanakahuna Kiekie.

30. A eia hou, o na oihana o ke Kumu a me ke Diakona he mau pakuina laua e pono ai no ka Oihanakahuna uuku iho, ka Oihanakahuna i hoopaa ia maluna o Aarona a me kana mau keikikane.

31. Nolaila, e like me Kaʻu i olelo ai e pili ana i na keikikane a Mose—no ka mea, e haawi na keikikane a Mose, a me na keikikane no hoi a Aarona i kekahi alana a me ka mohai i apono ia iloko o ka hale o ka Haku, ka hale e kukulu ia ana no ka Haku iloko o keia hanauna, maluna o kahi i hoolaa ia ai e like me Kaʻu i koho ai;

32. A e hoopiha ia na keikikane a Mose a me Aarona me ka nani o ka Haku maluna o Mauna Ziona iloko o ka hale o ka Haku, a he mau keikikane oukou no laua; a he nui hou aku no hoi ka poe Aʻu i kahea ai a i hoouna aku ai e kukulu i Kuu Ekalesia;

33. No ka mea, o ka mea hooikaika a kupaa a hiki i ka loaa ana o keia mau Oihanakahuna a elua Aʻu i olelo ai, a me ka hoonani ana i ko lakou oihana, ua hoolaa ia e ka Uhane no ka hana hou ia ana o ko lakou mau kino;

34. Lilo no lakou i mau keikikane na Mose a me Aarona a i hua na Aberahama, a i Ekalesia a me ke aupuni a i poe i wae ia o ke Akua;

35. A o ka poe a pau no hoi e loaa ana o keia Oihanakahuna oia ka i hookipa mai Iaʻu wahi a ka Haku;

36. No ka mea, o ka mea e hookipa ana i Kaʻu mau kauwa oia ka i hookipa mai Iaʻu;

37. A o ka mea hookipa mai Iaʻu oia ka i hookipa i Koʻu Makua;

38. A o ka mea hookipa i Koʻu Makua, oia ka i hookipa i ke aupuni o Koʻu Makua; nolaila, o na mea a pau a Koʻu Makua i loaa ai e haawi ia aku no ia ia ia;

39. A mamuli keia o ka hoohiki a me ka berita o ka Oihanakahuna.

40. Nolaila, o ka poe a pau i loaa ka Oihanakahuna, o lakou ka i loaa keia hoohiki a me keia berita o Koʻu Makua, ka mea hiki ole ia Ia ke uhaki, aole hoi e hiki ke hoonee ia;

41. Aka, o ka mea e uhaki ana i keia berita, mahope iho o ka loaa ana ia ia ia mea, a huli loa mai ia mea aku, aole e loaa ia ia ke kala ia ana o na hewa ma keia ao, aole hoi ma ke ao e hiki mai ana.

42. A auwe ka poe a pau e hiki ole mai ana i keia Oihanakahuna a oukou i loaa ai, ka mea hoi Aʻu e hoopaa aku nei maluna o oukou, ka poe ianei nei i keia la, ma o Koʻu leo ponoi la mailoko mai o na lani, a ua haawi aku no hoi Au i na lehulehu o ka lani a me Koʻu mau anela e malama ia oukou.

43. A ano ke haawi aku nei Au ia oukou i kekahi kauoha e malama oukou ia oukou iho, e haawi i ka hoolohe pono ana i na olelo o ke ola mau loa:

44. No ka mea, e ola no oukou ma o na olelo la a pau e puka mai ana mai ka waha mai o ke Akua.

45. No ka mea, o ka olelo a ka Haku he oiaio ia, a o kela a me keia mea oiaio he malamalama ia, a o kela a me keia mea malamalama he Uhane ia, oia hoi, ka Uhane o Iesu Kristo;

46. A ke haawi nei ka Uhane i ka malamalama i kela a me keia kanaka e hoea mai ana i keia ao; a ke hoomalamalama nei ka Uhane i kela a me keia kanaka ma ke ao nei, ka poe e hoolohe ana i ka leo o ka Uhane;

47. A o kela a me keia mea e hoolohe ana i ka leo o ka Uhane, e hele ana oia i ke Akua, oia hoi, i ka Makua;

48. A e ao ana ka Makua ia ia i ka berita ana i hana hou ai a i hoopaa ai maluna o oukou, ka mea i hoopaa ia maluna o oukou no ko oukou pono, a aole no ko oukou pono wale no, aka, no ka pono o ko ke ao nei a pau;

49. A ke waiho nei ko ke ao nei a pau iloko o ka hewa, a ke uwe nei malalo o ka pouli a malalo o ke apo o ka hewa;

50. A ma keia e ike ai oukou aia lakou malalo o ke apo o ka hewa, no ka mea, aole o lakou hele mai Ioʻu nei.

51. No ka mea, o ka mea e hele ole mai ana Ioʻu nei aia oia malalo o ke apo o ka hewa;

52. A o ka mea hookipa ole i Koʻu leo aole oia i kamaaina i Koʻu leo, a aole oia Noʻu nei;

53. A ma keia e ike ai oukou i ka poe pono mai ka poe hewa mai, a ke uwe nei ko ke ao nei a pau malalo o ka hewa a me ka pouli, he oiaio, i keia manawa ano.

54. A ua hoopouli ia ko oukou mau naau iloko o na manawa i hala ae nei mamuli o ka manaoio ole a no ko oukou hoomalau ana i na mea i loaa aku ia oukou,

55. A o ia hookano a me ka manaoio ole na mea i huki i ka Ekalesia holookoa malalo o ka hoahewa ia ana.

56. A ke kau nei keia hoahewa ana maluna o na keiki o Ziona, he oiaio, maluna o na mea a pau:

57. A e mau ko lakou noho ana malalo o keia hoahewa ana a mihi a hoomaopopo lakou i ka berita hou, oia hoi, ka Buke a Moramona a me na kauoha mua Aʻu i haawi aku ai ia lakou, aole o ka olelo ana wale no, aka, o ka hana ana e like la me ka mea Aʻu i kakau ai,

58. I hiki ai ia lakou ke hoohua mai i ka hua kupono no ke aupuni o ko lakou Makua, i ole pela, aia no he hahau a he hoopai ana e ninini ia aku ai maluna o na keiki o Ziona:

59. No ka mea, e hoohaumia anei na keiki o ke aupuni i Kuu aina hemolele? He oiaio, ke olelo aku nei Au ia oukou, Aole.

60. He oiaio, he oiaio, ke olelo aku nei Au ia oukou ka poe e lohe nei i Kaʻu mau olelo, oia hoi, Koʻu leo, pomaikai no oukou, ina e hookipa mai oukou i keia mau mea:

61. No ka mea, e kala aku no Au i ko oukou mau hewa me keia kauoha, oia hoi, e kupaa oukou ma ko oukou mau naau iloko o ka eehia a me ka uhane o ka pule ma ka hoike ana aku i ko ke ao nei a pau no kela mau mea i hai ia aku ia oukou.

62. Nolaila, e hele aku oukou i ko ke ao nei a pau, a ma kahi a oukou e hiki ole ai ke komo aku e hoouna aku oukou, i laha aku ai ka olelo hoike mai ia oukou aku i ko ke ao nei a pau a i kela a me keia kanaka.

63. A e like me Kaʻu i olelo ai i Kaʻu mau Aposetolo, pela no Au e olelo aku nei ia oukou, no ka mea, o oukou no Koʻu mau Aposetolo, he oiaio, ko ke Akua mau Kahuna Kiekie; o oukou no ka poe a Koʻu Makua i haawi mai ai Iaʻu—o oukou no Koʻu mau hoaloha;

64. Nolaila, e like me Aʻu i olelo ai i Koʻu mau Aposetolo, pela no Au e olelo hou aku nei ia oukou, o kela a me keia kanaka e manaoio mai ana i ka oukou mau olelo, a e bapetizo ia ma ka wai no ke kala ia ana o na hala, e loaa no ka Uhane Hemolele;

65. A e hahai no keia mau ouli i ka poe manaoio.

66. Ma Koʻu inoa lakou e hana ai i na hana kamahao he nui;

67. Ma Koʻu inoa lakou e kipaku ai i na daimonio;

68. Ma Koʻu inoa lakou e hoola ai i ka poe mai;

69. Ma Koʻu inoa lakou e hookaakaa ai i na maka o ka poe makapo, a e hoohamama i na pepeiao o ka poe kuli;

70. A e olelo aku ke alelo o ka poe aa;

71. A ina e hanai kekahi kanaka ia lakou i ka laau-make, aole e hoopoino ia mea ia lakou;

72. A aole e loaa i na wai-awa o ka nahesa ka mana e hoopoino ia lakou.

73. Aka, ke haawi nei Au i kekahi kauoha ia lakou, oia hoi, mai kaena lakou no lakou iho ma keia mau mea, aole hoi e olelo aku ia mau mea imua o ko ke ao nei, no ka mea, ua haawi ia aku keia mau mea ia oukou no ko oukou pono a me ka hoola ana.

74. He oiaio, he oiaio, ke olelo aku nei Au ia oukou, o ka poe e manaoio ole ana i ka oukou mau olelo, a aole e bapetizo ia iloko o ka wai, ma Koʻu inoa, no ke kala ia ana o ko lakou mau hala, i loaa ai ia lakou ka Uhane Hemolele, e hoahewa ia, a aole e hiki mai ana iloko o ke aupuni o Koʻu Makua, i kahi o Koʻu Makua a me Aʻu e noho ai.

75. A o keia hoike ana ia oukou, a kauoha hoi, ua mana no ia mai keia hora ano maluna o ko ke ao nei a pau, a o ka Euanelio no ka poe a pau ia i loaa ole ia mea.

76. Aka, he oiaio, ke olelo aku nei Au i ka poe a pau ka poe i haawi ia aku ai ke aupuni, mai ia oukou aku e hai ia ia mea ia lakou e pono ai, i mihi ai lakou i ko lakou mau hana hewa ana mamua, no ka mea, e ao ikaika ia lakou no ko lakou mau naau ino o ka manaoio ole; a o ko oukou mau hoahanau hoi ma Ziona no ko lakou kipi ana ia oukou i ka wa Aʻu i hoouna ai ia oukou.

77. A eia hou, ke olelo aku nei Au ia oukou, e Koʻu mau hoaloha, (no ka mea mai keia manawa aku e kapa ana Au ia oukou he mau hoaloha,) he mea e pono ai e haawi aku Au ia oukou i keia kauoha i lilo ai oukou e like me Kuu mau hoaloha i na la Oʻu me lakou ma ke kaahele ana no ka hai ana i ka Euanelio iloko o Koʻu mana,

78. No ka mea, aole Au i ae ia lakou e lawe i aa moni, aole hoi i kiekeai, aole hoi i elua mau kuka;

79. Aia hoi, ke hoouna aku nei Au ia oukou e hoao i ko ke ao nei, a he kupono ka paahana no kona uku.

80. A o ke kanaka e hele ana e hai i keia Euanelio o ke aupuni a haule ole ma ke kupaa mau ana ma na mea a pau aole e luhi ana ma ka noonoo, aole hoi e hoopouli ia, aole ma ke kino, na lala, aole hoi ma na ami: a aole e haule kekahi oho o kona poo i ka honua me ka nana ole ia. A aole lakou e hele ana me ka pololi, aole hoi e makewai.

81. Nolaila, mai nana no ka la apopo, no ka oukou mea e ai ai, a i ole, no ka oukou mea e inu ai, a i ole, no ka oukou mau mea e hoaahu ia ai;

82. No ka mea, e nana i na lilia o ke kula, i ke ano o ko lakou ulu ana, aole lakou i hana, aole hoi lakou i milo; a o na aupuni o ke ao nei iloko o ko lakou nani a pau, aole loa i kahiko ia e like me kekahi o keia mau mea;

83. No ka mea, ua ike ko oukou Makua iloko o ka lani, he pono e loaa ia oukou ia mau mea a pau.

84. Nolaila, na ka la apopo e nana no na mea nona iho.

85. Aole hoi oukou e noonoo e mamua i ka oukou mea e olelo ai, aka, e hoahu mau iloko o ko oukou mau naau i na olelo o ke ola, a e haawi ia aku no ia ia oukou ma ia hora i kela hapa i kupono e haawi ia i kela a me keia kanaka.

86. Nolaila, aole kekahi kanaka mawaena o oukou, ka mea e hele ana e hai i keia Euanelio o ke aupuni, e lawe i aa moni, aole hoi i kiekeai, mai keia hora aku, (no ka mea, no ka poe kupaa a pau keia kauoha, ka poe i kahea ia e ke Akua iloko o ka Ekalesia no keia hana o ka Oihanakahuna).

87. Aia hoi, ke hoouna aku nei Au ia oukou e ao ikaika aku i ko ke ao nei no ka lakou mau hana pono ole a pau, a e ao ia lakou no kekahi hoopai e hiki mai ana.

88. A o ka mea e hookipa mai ana ia oukou, malaila pu no hoi Au, no ka mea, e hele no Au mamua o ko oukou alo; e hele no Au ma ko oukou lima akau a ma ko oukou hema, a e noho Koʻu Uhane iloko o ko oukou mau naau, a e poai puni Koʻu poe anela ia oukou e kakoo ia oukou.

89. O ka mea e hookipa mai ana ia oukou oia ka i hookipa mai Iaʻu, a oia no ke hanai mai ia oukou, a e hoaahu ia oukou, a e haawi mai i kala na oukou.

90. A o ka mea e hanai ia oukou, a i ole, e hoaahu ia oukou, a i ole, e haawi i kala na oukou, aole loa e nele i kona uku:

91. A o ka mea e hana ole ana i keia mau mea aole ia he haumana Naʻu; ma keia oukou e ike ai i Kaʻu mau haumana.

92. O ka mea e hookipa ole ana ia oukou, e hele mai ia ia aku a o oukou wale iho no, a e holoi i ko oukou mau wawae, oia hoi, me ka wai, ka wai maemae, ina he wa wela, a i ole, he wa anuanu paha, a e hoike aku no ia mea i ko oukou Makua iloko o ka lani, a mai hoi hou aku i ua kanaka la.

93. A iloko o kela a me keia taona, a i ole, kulanakauhale a oukou e komo ai, e hana aku e like me ia.

94. Aka nae, e imi ikaika a mai hookoe i kekahi; a auwe kela hale, a i ole, kela taona a kulanakauhale paha e hoole ana ia oukou, a i ole, i ka oukou mau olelo, a i ole, i ka oukou mau hoike e pili ana Noʻu.

95. Ke olelo hou nei Au, auwe kela hale, a i ole, kela taona a kulanakauhale paha e kue ana ia oukou, a i ole, i ka oukou mau olelo, a i ole, i ka oukou hoike Noʻu;

96. No ka mea, ua kau aku Au, ka Mea Mana Loa, i Koʻu mau lima maluna o na lahuikanaka e hahau ia lakou no ka lakou mau hana hewa:

97. A e hele aku no na mai ahulau, a aole loa e lawe ia ia mau mea mai ka honua aku nei a hoopau pono Au i Kaʻu hana, ka mea hoi e hoopokole ia ana iloko o ka pono,

98. A hiki i ka hoomaopopo ana o na mea a pau Iaʻu, ka poe e koe ana, oia hoi, mai ka mea uuku loa a i ka mea nui loa, a e hoopiha ia me ka ike o ka Haku, a e alikealike ka ike ana, a e hookiekie i ko lakou leo, a me ka leo e mele pu i keia himeni hou, i ka i ana—

99. Ua lawe hou mai ka Haku ia Ziona:Ua hoolapanai ka Makua i Kona poe kanaka, ia Iseraela,E like me ka wae ana o ke aloha,Ka mea i hooko ia mamuli o ka manaoioA me ka berita o ko lakou mau kupuna.

100. Ua hoolapanai ka Haku i Kona poe kanaka,A ua hoopaa ia o Satana a aole he manawa hou aku:Ua hoakoakoa ka Haku i na mea a pau a hookahi:Ua hoihoi hou mai ka Haku ia Ziona mailuna mai.Ua hoihoi hou mai ka Haku ia Ziona mailalo mai.

101. Ua haakohi ka honua a ua hoopuka mai i kona ikaikaA ua hookumu ia ka oiaio iloko o kona opu:A ua hoomahie na lani maluna ona:A ua hoaahu ia oia me ka nani o kona Akua:No ka mea, ke ku nei Oia mawaena o Kona poe kanaka;

102. O ka nani, a me ka hanohano, a me ka mana, a me ka ikaika,E haawi ia aku i ko kakou Akua; no ka mea, he piha Oia me ke aloha,O ka hoopono, ka lokomaikai a me ka oiaio, a me ka maluhia,No ka wa mau loa a mau loa aku, Amene.

103. A eia hou, he oiaio, he oiaio, ke olelo aku nei Au ia oukou, he mea pono i kela a me keia kanaka e hele aku ana e hai i Kuu Euanelio mau loa, ina he mau ohana ko lakou, a loaa mai na kala ma o ka makana ia mai, e hoouna mai ia mea ia lakou, a i ole, e hoohana aku ia mea no ko lakou pono, e like me ka ka Haku e kuhikuhi ai ia lakou, no ka mea, pela ka pono i Koʻu manao.

104. A o ka poe a pau aole o lakou ohana, a loaa nae na kala, e hoouna lakou ia mea i ka Bihopa ma Ziona, a i ole i ka Bihopa ma Ohaio, i hoolaa ia ai ia no ka hoopuka ana mai i na hoikeana a me ka pai ia ana o ia mau mea, a no ke kukulu ana ia Ziona.

105. A ina e haawi kekahi kanaka i kekahi o oukou i kekahi kuka, a i ole, i kekahi paa lole, e lawe i ka mea i lualua a haawi aku ia mea i ka poe ilihune, a e hele ma ko oukou alahele me ka olioli.

106. A ina he ikaika kekahi kanaka mawaena o oukou ma ka Uhane, e lawe oia me ia i ka mea i nawaliwali, i ao ia ai oia iloko o ka haahaa a pau, i ikaika ai no hoi oia.

107. Nolaila, e lawe me oukou i ka poe i hoolilo ia i ka Oihanakahuna haahaa iho, a e hoouna ia lakou mamua o oukou e imi i mau wahi halawai a e hoolaha aku, a e hoomakaukau i ke ala, a e hooko i na mea i hoolala ia a oukou e hiki ole ai ke hooko aku.

108. Aia hoi, o keia ke ano a Kuu mau Aposetolo o na la kahiko i kukulu ai i Kuu Ekalesia Noʻu nei.

109. Nolaila, e ku kela a me keia kanaka ma kona oihana ponoi iho, a e hana ma kana hana ponoi ona i kahea ia ai; a mai olelo aku ke poo i ka wawae, aole ona pono i na wawae, no ka mea, ke ole ka wawae pehea la e hiki ai ke kino ke ku?

110. Pela no, he mea e pono ai no ke kino na lala a pau, i ao like ia ai lakou a pau, i maikai loa ai ke kino holookoa.

111. A aia hoi, e kaahele na Kahuna Kiekie, a pela no hoi na Lunakahiko, a pela no hoi na Kahuna haahaa iho; aka, e koho ia na Diakona a me na Kumu e kiai maluna o ka Ekalesia, a e lilo i mau luna ku mau no ka Ekalesia.

112. A e kaahele no hoi ka Bihopa, o Nuela K. Witine, a puni mawaena o na apana a pau o ka Ekalesia, e imi pono ana i ka poe ilihune e kokua i ko lakou mau hemahema ma ka hoohaahaa ana i ka poe waiwai a me ka poe haaheo;

113. He pono nona ke koho i agena e malama a e hana i kana mau hana o ko ke kino e like me kana e kuhikuhi ai;

114. Aka nae, e hele aku ka Bihopa i ke kulanakauhale o Nu Ioka, a me ke kulanakauhale o Alabane, a me ke kulanakauhale o Bosetona, a e ao aku i na kanaka o kela mau kulanakauhale me ka leo o ka Euanelio, me kekahi leo nui, no ka hooneoneo ana a me ka anai loa ana e kali nei no lakou ke hoole lakou i keia mau mea;

115. No ka mea, ina e hoole lakou i keia mau mea, alaila ua kokoke mai ka hora o ko lakou hoopai ia ana, a e waiho neoneo ia ko lakou hale no lakou iho.

116. E hilinai mai oia Iaʻu, alaila aole loa oia e hoohoka ia; a aole e haule kekahi oho o kona poo i ka honua me ka nana ole ia.

117. A he oiaio, ke olelo aku nei Au ia oukou, e ke koena iho o Kaʻu mau kauwa, e hele aku oukou e like me ka hiki ia oukou, i ka oukou mau hana like ole i kahea ia ai i na kulanakauhale a me na taona nunui a kaulana, e ao ikaika ana i ko ke ao nei me ka pono no ka lakou mau hana pono ole a pau a me ka lakou mau hana ku ole i ke ano Akua, e hoakaka lea ana ma ke ano hiki ke hoomaopopo ia i ka hooneoneo ana a na mea hoopailua ma na la hope;

118. No ka mea, ma o oukou la, wahi a ka Haku Mana Loa, e wawahi ai Au i ko lakou mau aupuni: aole Au e hoonaueue wale no i ka honua, aka, e haalulu pu na lani i piha i na hoku;

119. No ka mea, ua o aku Au, ka Haku, i Koʻu lima e hoohana i na mana o ka lani me ka ikaika; aole hiki ia oukou ke ike ia mea i keia manawa, aka, aole e liuliu e ike auanei no oukou ia mea, a e ike Owau no Ia, a e hele mai no Au a e nohoalii pu me Koʻu poe kanaka.

120. Owau no ka Alepa a me ka Omega, ka hoomaka ana a me ka hopena. Amene.