1. Owau no ka Alepa me ka Omega, o Kristo ka Haku; he oiaio, Owau no Ia, ka hoomaka ana a me ka hopena, ka Hoolapanai o ko ke ao nei.

2. Mamuli o Kaʻu hana ana a hooko ana i ka makemake o ka Mea Nona Au, oia hoi, ka Makua, e pili ana Noʻu—ua hana ia keia i hiki ai Iaʻu ke hoolilo i na mea a pau malalo iho Oʻu—

3. E paa ana i ka mana a pau, he oiaio, i ka anai ana ia Satana me kana mau hana ma ka hopena o ke ao nei, a me ka la hookolokolo nui mahope, Aʻu e hookau aku ai maluna o na kanaka o keia ao, e hookolokolo ana i kela me keia kanaka e like me kana mau hana a me na mea ana i hana ai.

4. A he oiaio, e mihi kela a me keia kanaka e pono ai, a i ole, e ehaeha, no ka mea, he hopena ole Au, ke Akua;

5. No ia mea, aole Au e hoopau i na hoopai Aʻu e kau aku ai, aka, e hele aku na popilikia, ka uwe ana, ke kumakena ana a me ka uwi ana o na niho, he oiaio, i ka poe e loaa ana ma Koʻu lima hema;

6. Eia nae, aole i palapala ia aole he hopena ko keia ehaeha ana, aka, ua palapala ia he ehaeha hopena ole.

7. Eia hou, ua palapala ia he poino mau loa; no ia mea, ua oi aku kona moakaka mamua o na Palapala Hemolele e ae, i hiki ai ia ke hana maluna o na naau o na keiki a kanaka, o ia mau mea a pau no ka nani o Koʻu inoa;

8. No ia mea, e hoakaka aku no Au ia oe i keia mea pohihihi, no ka mea, he kupono nou e maopopo e like me Kaʻu mau Aposetolo.

9. Ke olelo aku nei Au e pili ana i keia mea ia oukou, ka poe i wae ia, he oiaio, me he mea hookahi la, i komo mai ai oukou iloko o Koʻu maha;

10. No ka mea, aia hoi, nani wale ka pohihihi o ke ano o ke Akua! No ka mea, aia hoi, he hopena ole Au, a o ka hoopai e haawi ia mai Koʻu lima aku, he hoopai hopena ole ia, no ka mea, he hopena ole Koʻu inoa: no ia mea—

11. O ka hoopai mau loa ka ke Akua hoopai ia.

12. O ka hoopai hopena ole ka ke Akua hoopai ia.

13. No ia mea, ke kauoha aku nei Au ia oe e mihi, a e malama i na kauoha i loaa ai ia oe ma ka lima o Kaʻu kauwa o Iosepa Kamika, opio, ma Kuu inoa;

14. A mamuli no ia o Koʻu mana nui loa i loaa ai ia oe ia mau mea;

15. Nolaila, ke kauoha nei Au ia oe e mihi—e mihi, o hahau aku Au ia oe ma ke kookoo o Kuu waha, a ma Kuu inaina, a ma Kuu huhu, a walania kou ehaeha ana—o ka nui o ka walania aole oe i ike! A o ka oi loa aku aole oe i ike! He oiaio, o ka paakiki o ka hoomanawanui ana aole oe i ike!

16. No ka mea, aia hoi, ua ehaeha Au, ke Akua, i keia mau mea no na mea a pau, i ehaeha ole ai lakou ke mihi mai lakou,

17. Aka, ina aole lakou e mihi, e ehaeha no lakou e like me Aʻu,

18. Ka ehaeha ana nana Au, oia hoi, ke Akua, ka mea oi aku mamua o na mea a pau, i hoohaalulu mamuli o ka eha, a i hookahe mai i ke koko ma kela a me keia pukapuka o ka ili, a i hoehaeha pu hoi i ke kino a me ka uhane: a makemake ina paha he mea hiki e inu ole Au i ko ke kiaha awahia a kuemi—

19. Eia nae, e hoonani ia ka Makua, inu iho la Au a hoopau pono i Kaʻu mau hoomakaukau ana no na keiki a kanaka;

20. No ia mea, ke kauoha hou aku nei Au ia oe e mihi, o hoohaahaa aku auanei Au ia oe me Koʻu mana nui loa, a e hoike hoi oe i kou mau hewa, o ehaeha auanei oe i keia mau hoopai Aʻu i olelo aku nei, na mea au i hoao ai ma ke ano liilii loa, he oiaio, ma ke ano he wahi lihi i ka wa Aʻu i lawe ae ai i Kuu Uhane.

21. A ke kauoha aku nei Au ia oe, aole oe e hai aku i kekahi mea, koe wale no ka mihi, a mai hoike i keia mau mea i ko ke ao nei a hiki i ka wa kupono i Koʻu naauao.

22. No ka mea, aole hiki ia lakou ke lawe i ka io i keia manawa, aka, o ka waiu ke loaa ia lakou e pono ai; no ia mea, aole he pono no lakou e ike i keia mau mea o make lakou.

23. E ao ia e Aʻu, a e hoolohe mai i Kaʻu mau olelo; e hele iloko o ka haahaa o Kuu Uhane, a e loaa no ia oe ka maluhia iloko Oʻu.

24. Owau o Iesu Kristo; hiki mai la Au ma o ka makemake la o ka Makua, a ke hana nei Au i Kona makemake.

25. A eia hou, ke kauoha aku nei Au ia oe, mai kuko oe i ka wahine o kou hoalauna; aole hoi e imi i ke ola o kou hoalauna.

26. A eia hou, ke kauoha aku nei Au ia oe mai minamina oe i kou waiwai iho, aka, e haawi aku me ka aua ole no ke pai ana i ka Buke a Moramona, iloko hoi olaila ka oiaio a me ka olelo a ke Akua,

27. Oia hoi Kaʻu olelo i ka poe Genetile, i hiki koke aku ai ia i ka poe Iudaio, i manaoio mai ai lakou i ka Euanelio, a nana hou ole aku no kekahi Mesia e hiki mai, oiai, ua hiki e mai Oia, a o ka poe Lamana he koena lakou no lakou nei,

28. A eia hou, ke kauoha aku nei Au ia oe, e pule hoi oe me ka leo e like me ka pule ana iloko o kou naau; he oiaio, imua o ko ke ao nei a ma kahi mehameha, ma ke akea a ma kahi malu.

29. A e hai aku oe i ka nuhou hauoli, he oiaio, a e hoolaha aku ia mea maluna o na mauna, a maluna o kela a me keia wahi kiekie, a mawaena o kela a me keia poe kanaka au e ae ia mai ai e ike.

30. A e hana oe ia mea me ka haahaa loa, e paulele ana iloko Oʻu, e olelo ino ole ana i ka poe i olelo ino mai.

31. A mai olelo oe no na loina, aka, e hai aku oe i ka mihi a me ka manaoio iloko o ka Hoola, a me ke kala ia ana o na hala ma ka bapetizo ana a ma ke ahi, he oiaio, oia hoi ka Uhane Hemolele.

32. Aia hoi, he kauoha nui keia a o ka hope hoi Aʻu e haawi aku ai ia oe e pili ana i keia mea; no ka mea, ua lawa keia nou i kela la a me keia la, a hiki i ka hopena o kou ola ana.

33. A e loaa no ia oe ka popilikia ke nana ole oe i keia mau olelo ao; he oiaio, oia hoi ka luku ia ana ou a me kou waiwai.

34. E haawi aku i kekahi mahele o kou waiwai; ae, oia hoi, kekahi hapa o kou mau aina, a me na mea a pau, koe kekahi no ka malama ana i kou ohana.

35. E hookaa i ka aie au i ae-like ai me ka mea pai palapala. E hookuu ia oe iho mai ka noho luhi ana.

36. E haalele i kou hale a me kou home, koe wale no i ka wa au e makemake ai e ike i kou ohana:

37. E olelo aku me ka hilahila ole i ka poe a pau: ae, e haiolelo, e kauleo, e hai i ka oiaio me ka leo nui, me ka leo o ka hoohauoli ana e kahea ana—Hosana, Hosana! Pomaikai ka inoa o ka Haku ke Akua.

38. E pule mau, a e ninini aku no Au i Koʻu Uhane maluna iho ou, a e nui auanei kou pomaikai; he oiaio, i oi aku mamua o na waiwai o ka honua a me na mea popopo a pau ona ke loaa ia oe.

39. Aia hoi, hiki mai anei ia oe ke heluhelu i keia me ka hauoli ole ana a me ka hapai ole ana i kou naau no ka olioli?

40. A i ole, hiki anei ia oe ke holo hou aku i o a i anei me he alakai makapo la?

41. A i ole, hiki anei ia oe ke haahaa a akahai, a e malama ia oe iho ma ke ano naauao imua Oʻu? He oiaio, e hele mai imua Oʻu kou Mea e Ola ai. Amene.