1. He oiaio, penei wahi a ka Haku e pili ana i na kaua e hiki koke mai ana, e hoomaka ana ma ke kipi ana o Karolaina Hema, a e pau ana ma ka make ana a me ka ehaeha loa ana o ka poe he nui.

2. A e hiki mai ana ka manawa e ninini ia aku ai ke kaua maluna o na lahuikanaka a pau, e hoomaka ana ma ua wahi la;

3. No ka mea, aia hoi, e kue ana na Mokuaina o ka Hema i na Mokuaina o ka Akau, a e kahea aku ana na Mokuaina o ka Hema i na lahuikanaka e ae, oia hoi, o ka lahuikanaka o Beretania Nui kekahi, me ia i kapa ia ai, a e kahea aku ana no hoi lakou i na lahuikanaka e aku, i hiki ai ia lakou ke kaupale ia lakou iho mai na lahuikanaka e ae; a pela auanei e ninini ia aku ai ke kaua maluna o na lahuikanaka a pau.

4. A e hiki mai no keia, mahope iho o na la he nui, e ala mai ana na kauwa kuapaa e kue i ko lakou mau haku, a e houluulu ia lakou a e ao ia hoi no ke kaua:

5. A e hiki mai no hoi keia, o ke koena o na kupa o ka aina e houluulu auanei ia lakou iho, a e huhu loa lakou, a e hoonaukiuki i ka poe Genetile me na hana hoonaukiuki loa.

6. A peia, ma ka pahikaua a me ka hookahe koko, e kanikau ai na kanaka o ka honua; a me ka wi, a me ka mai ahulau, a me na olai, a me ka hekili o ka lani, a me ka uila weliweli a olapalapa hoi, e hoomaopopo ai na kanaka o ka honua i ka inaina a me ka ukiuki a me ka lima hoopai o kekahi Akua Mana Loa, a pau loa na lahuikanaka a pau i ka anai ana i hooholo ia;

7. I pau ai ka pii ana mai o ka uwe ana o ka Poe Hoano, a me ke koko o ka Poe Hoano, mai ka honua mai iloko o na pepeiao o ka Haku o Sabaota, i hoopai ia ai ko lakou poe enemi.

8. No ia mea, e ku oukou ma na wahi hemolele, a e hoonaueue ole ia a hiki mai ka la o ka Haku; no ka mea, aia hoi, e hiki koke mai ana ia, wahi a ka Haku. Amene.