1. A eia hou, ke waiho aku nei makou no ko oukou noonoo akahele ana i ke kupono i ka Poe Hoano a pau e houluulu mai i na mea oiaio a pau, a me na hoehaeha a me na hoomainoino i kau ia mai maluna o lakou e na kanaka o keia Mokuaina;

2. A me na waiwai no hoi a pau a me ka nui o ka poino a lakou i auamo ai, ma ka hoino ana i ke kulana maikai a me na hoeha ana i ke kino, a pela no hoi ka waiwai paa;

3. A me na inoa hoi o na kanaka a pau i lawelawe pu ma ka hookaumaha ana ia lakou e like me ka hiki ia lakou ke loaa a hoomaopopo ia mau inoa.

4. A malia paha e hiki ke koho ia i komite e noii aku i keia mau mea, a e hoopaa i na olelo-ike a me na palapala hoohiki, a e houluulu no hoi i na olelo hoino i pai ia a e laha nei,

5. A me na mea a pau iloko o na buke nupepa , a iloko o na buke hoike pokole no kela me keia mea , a me na buke mooolelo hoino a pau e hoolaha ia nei, a e kakau ia nei, a me na mea nana i kakau, a e waiho mai i ka huina holookoa o na hana kolohe a ino, a me na hana hewa loa a me na hana i ku i ka pepehikanaka i hookau ia a i lawelawe ia maluna o keia poe kanaka,

6. I hiki ai ia kakou ke hoolaha aku aole i ko ke ao nei a pau wale no, aka e waiho aku ia mau mea iloko o ko lakou waihooluu eleele a ino loa imua o na poo aupuni, i hana hope loa i kau ia mai maluna o kakou e ko kakou Makua Lani, mamua o ka hiki ana ia kakou ke koi piha a pau pono i kela olelo hoopomaikai nana e kahea aku ia Ia e puka mai mai Kona wahi e pee ai, a i hiki ai no hoi ke waiho ia ka lahuikanaka holookoa me ke kumu kupono ole e pale ai mamua o ka hiki ana ia Ia ke hoouna aku i ka mana o Kona lima ikaika.

7. He hana ia e koi ana ia kakou, a kakou e aie nei i ke Akua, i na anela, ka poe a kakou e lawe ia aku ai e ku pu, a ia kakou iho no hoi, i ka kakou mau wahine a me na keiki, ka poe i hookulou ia ilalo me ke kaniuhu, ka luuluu, a me ke kaumaha, malalo o ka lima hoopoino o ka pepehikanaka, ka hookaumaha a me ka hooluhi wale, i kokua ia, hookikina ia, a i kakoo ia ma ka mana o kela uhane nana i makia paa loa i ka manaoio o na kupuna maluna o na naau o na keiki, ka poe i kuuna mai i na wahahee, a hoopiha ae la i ko ke ao nei me ka pioloke, a hoomahuahua mau mai ka ikaika, a i keia wa oia no ke kumu o na mea ino a pau, a ke uwe nei ka honua malalo o ke koikoi o kona mau hewa.

8. He auamo hao ia, a he apo ikaika; oia na kupee-hoopaa lima, a me na kaulahao, a me na kupee-hoopaa wawae, a me na mea hoopaa o gehena.

9. Nolaila, he hana ia e koi ana ia kakou, a kakou e aie nei, aole i ka kakou mau wahine a me na keiki ponoi wale no, aka, i na wahine-kane-make a me na keiki makua ole, no lakou na kane a me na makuakane i pepehi ia a make malalo o ko ia mea lima hao;

10. A o ua mau hana eleele a mainoino la ua lawa ia e hoohaalulu aku ia gehena, a e ku me ka makau a me ka haikea, a e haalulu a e lolo na lima o ke diabolo.

11. A he hana ia e koi mai ana ia kakou, a kakou e aie nei no hoi i ka hanauna hou a pau e ulu mai ana, a i ka poe a pau i maemae ma ka naau,

12. (No ka mea, he lehulehu ka poe e koe nei maluna o ka honua iwaena o na hoomana, na aoao, a me na ekalesia, ka poe i hoomakapo ia e na hana maalea a kanaka, a ma o ia mea la lakou e hoohalua nei e hoopunipuni aku, ka poe hoi i pale ia mai ka oiaio aku, no ka mea, aole lakou i ike kahi e loaa ai ia mea;)

13. Nolaila, e hoolilo a e hoohana aku i ko kakou mau ola no ka hoopuka ana mai i ka malamalama i na mea huna a pau o ka pouli, kahi a kakou i ike ai ia mau mea; a ua hoike ia ia mau mea me ka oiaio mai ka lani mai.

14. E nana pono ia keia mau mea me ka hooikaika nui e pono ai.

15. Mai helu kekahi kanaka ia mau mea me he mau mea liilii la; no ka mea, he nui na mea e waiho mai nei iloko o ka wa e hiki mai ana, e pili ana i ka Poe Hoano, na mea hoi e paulele ana maluna o ua mau mea la.

16. Ua ike no oukou, e na hoahanau, ua hoopomaikai nui ia kekahi moku nui loa e kekahi hoeuli uuku loa i ka wa o kekahi makani ino, ma ka hoohana ia ana e ku pono i ka makani a me na ale.

17. Nolaila, e na hoahanau i aloha nui ia, e hana kakou me ka hauoli i na mea a pau i hiki ia kakou ke hana, alaila e hiki no ia kakou ke ku malie me ka hooiaio loa ana mai e ike i ka hoola ana a ke Akua, a me ka hoike ia ana mai o Kona lima.