1. E Toma, Kaʻu keiki, pomaikai no oe no kou manaoio iloko o Kaʻu hana.

2. Aia hoi, ua nui wale na popilikia i loaa ia oe mamuli o kou ohana: eia nae, e hoopomaikai no Au ia oe a me kou ohana; he oiaio, o kau mau keiki liilii; a e hiki mai ana ka la e manaoio lakou a e ike i ka oiaio a e lilo i hookahi me oe iloko o Kuu Ekalesia.

3. E hapai ae oe i kou naau a e hauoli, no ka mea, ua hiki mai ka hora o kou misiona: a e wehe ia kou elelo; a e hai auanei oe i ka olelo olioli o ka hauoli nui i keia hanauna.

4. E hai oe i na mea i hoike ia i Kuu kauwa, ia Iosepa Kamika, opio. E hoomaka oe e haiolelo mai keia manawa aku; he oiaio, e ohi ma ke kihapai i keokeo a makaukau e puhi ia:

5. Nolaila, e hookomo aku i kau pahi-kakiwi me kou uhane a pau, a o kou mau hewa ua huikala ia nou, a e kaumaha auanei oe me na pu-a palaoa maluna o kou hokua, no ka mea, ua kupono ka paahana no kona uku. No ia mea, e ola no kou ohana.

6. Aia hoi, he oiaio, ke olelo aku nei Au ia oe, e hele mai o lakou aku no ka manawa pokole wale no a e hai i Kaʻu olelo, a Naʻu e hoomakaukau i wahi no lakou;

7. He oiaio, e hoohamama no Au i na naau o na kanaka, a e hookipa lakou ia oe. A e kukulu aku Au i kekahi apana o ka Ekalesia ma o kou lima la;

8. A e hooikaika oe ia lakou a hoomakaukau ia lakou no ka manawa a lakou e houluulu ia ai.

9. E hoomanawanui iloko o na popilikia, mai hoino aku i ka poe hoino mai. E hoomalu i kou hale me ka haahaa, a e kupaa.

10. Aia hoi, ke olelo aku nei Au ia oe, e lilo oe i kauka lapaau i ka Ekalesia, aka, aole i ko ke ao nei, no ka mea, aole lakou e hookipa ia oe.

11. E hele ma kou ala ma kahi Aʻu i makemake ai, a e haawi ia aku ia oe e ka Uhane Kokua ka mea au e hana ai a me kahi au e hele aku ai.

12. E pule mau, o komo auanei oe iloko o ka hoowalewale ia, a lilo aku kou uku.

13. E kupaa a hiki i ka hopena, a aia hoi, Owau pu me oe. Aole na ke kanaka mai keia mau olelo, aole hoi na na kanaka mai, aka, Naʻu no, na Iesu Kristo, kou Hoolapanai, ma o ka makemake la o ka Makua. Amene.