1. Aia hoi, ke olelo aku nei Au ia oe, oiai ua makemake Kuu kauwa, o Makini Hailaki, i hoike mai Oʻu aku, ua loaa ia oe, e Kuu kauwa, e Iosepa Kamika, opio, na papa au i hooia a hoike aku ai ua loaa ia oe mai Aʻu aku;

2. A ano, aia hoi, eia kau e olelo aku ai ia ia, o ka mea i olelo mai ia oe, ua olelo mai ia oe, Owau, ka Haku ke Akua, a ua haawi aku i keia mau mea ia oe, e Kuu kauwa, e Iosepa Kamika, opio, a ua kauoha aku ia oe e pono oe e ku i hoike no keia mau mea.

3. A ua kena aku Au ia oe e pono oe e komo iloko o ka berita me Aʻu, aole e pono ia oe e hoike aku ia mau mea, koe wale no i ka poe Aʻu i kauoha aku ai ia oe; a aole hoi ou mana maluna o ia mau mea, ke ole Au e haawi aku ia ia oe.

4. A ua loaa ia oe ka haawina e unuhi i na papa, a o keia ka haawina mua Aʻu i hoili aku ai maluna ou, a ua kauoha Au aole oe e hookohukohu i kekahi haawina okoa ae, a hiki i ka hooko ia ana o Kuu manaopaa ma keia; no ka mea, aole Au e haawi aku ana ia oe i kahi haawina e ae a hiki i ka pau pono ana o ia mea.

5. He oiaio, ke olelo aku nei Au ia oe, e hoea mai ana ka popilikia i na kanaka o ka honua, ke ole lakou e hoolohe mai i Kaʻu mau olelo;

6. No ka mea, ma keia hope aku e hoolilo ia auanei oe a e hele aku a lawe i Kaʻu mau olelo i na keiki a kanaka.

7. Aia hoi, ina aole lakou e manaoio i Kaʻu mau olelo, aole lakou e manaoio ia oe, e Kaʻu kauwa, e Iosepa, ina he mea hiki ia oe ke hoike aku ia lakou i keia mau mea a pau Aʻu i haawi aku ai ia oe.

8. Auwe! E keia hanauna hoomaloka a ai oolea, ua hoaa ia Kuu inaina e kue ia lakou.

9. Aia hoi, he oiaio, ke olelo aku nei Au ia oe, ua hookoe Au i ua mau mea nei Aʻu i waiho aku ai ia oe, e Kuu kauwa, e Iosepa, no kekahi manao naauao iloko Oʻu, a e hoike ia aku auanei ia i na hanauna o keia mua aku;

10. Aka, e loaa i keia hanauna Kaʻu olelo ma ou la;

11. A i pakui no kau olelo hoike, na olelo hoike a na mea ekolu o Kaʻu mau kauwa Aʻu e kahea a e hoolilo aku ai, ka poe hoi Aʻu e hoike aku ai i keia mau mea, a e hele pu aku lakou me Kaʻu mau olelo i haawi ia aku ai ma ou la;

12. Ae, e ike maoli ana lakou me ka maopopo lea he oiaio keia mau mea, no ka mea, e hai aku Au ia mea ia lakou mai ka lani mai.

13. E haawi aku no Au ia lakou i ka mana i hiki ai ia lakou ke nana a ike i keia mau mea ma ko lakou ano maoli;

14. A aole Au e haawi aku i kahi mea e ae i keia mana e loaa keia hoike hookahi no mawaena o keia hanauna, ma keia ka hoomaka ana o ke ku ana ae a me ka puka ana mai o Kuu Ekalesia mailoko mai o ka waonahele; i molaelae e like me ka mahina, a i nani e like me ka la, a i weliweli e like me kekahi puali-kaua me na hae.

15. A o na olelo-hoike a na mea hoike ekolu Kaʻu e hoouna aku ai ma o Kaʻu olelo la;

16. A aia hoi, o ka poe manaoio i Kaʻu mau olelo, ia lakou Au e hele aku ai me na hoike ana o Kuu Uhane, a e hanau ia lakou ma Oʻu la, oia hoi, ma o ka wai a me ka Uhane la.

17. A e kali iki oe no kekahi wa pokole, no ka mea, aole oe i hoolilo ia i keia wa;

18. A o ka lakou olelo-hoike e hele pu aku ana ia no ke ahewa ana i keia hanauna, ina e hoopaakiki lakou i ko lakou mau naau e kue mai ia lakou;

19. No ka mea, e hele aku ana he hahau hooneoneo mawaena o na kanaka o ka honua, a e hoomau ia aku ka ninini ia ana mai ia manawa aku ia manawa aku, ina e mihi ole lakou, a hiki i ka neoneo ana o ka honua, a pau hoi kona poe kanaka i ka anai ia aku, a luku koe koena ole ia, e ke alohilohi o Koʻu hiki ana mai.

20. Aia hoi, ke hai aku nei Au ia oe i keia mau mea, e like me Aʻu i hai aku ai i na kanaka no ka luku ia ana o Ierusalema, a o Kaʻu olelo e hooiaio ia i keia wa e like me ia i hooiaio ia ai i na wa i hala.

21. A ano, ke kauoha aku nei Au ia oe, e Kaʻu kauwa, e Iosepa, e mihi a e hele me ka hooi ana ae o ka pololei imua Oʻu, a mai ae hou aku i na koi ana a na kanaka;

22. A e kupaa oe i ka malama ana i na kauoha Aʻu i kauoha aku ai ia oe, a ina e hana oe i keia, aia hoi, e haawi aku no Au ia oe i ke ola mau loa, ina no paha e pepehi ia ana oe a make.

23. A ano, eia hou, ke olelo aku nei Au ia oe, e Kuu kauwa, e Iosepa, e pili ana i ke kanaka e makemake ana i ka hoike.

24. Aia hoi, ke i aku nei Au ia ia, ke hookiekie nei oia ia ia iho, a aole oia i hoohaahaa kupono ia ia iho imua Oʻu; aka, ina e kulou oia i lalo imua Oʻu, a hoohaahaa ia ia iho ma ka pule ikaika a me ka manaoio, me ka oiaio o kona naau, alaila e haawi aku no Au ia ia he ike ana i na mea ana i makemake ai e ike.

25. A, alaila, e olelo aku ia i na kanaka o keia hanauna, aia hoi, ua ike au i na mea a ka Haku i hoike ai ia Iosepa Kamika, opio, a ke ike nei au me ka maopopo lea he mau mea oiaio lakou, no ka mea, ua ike maka au ia mau mea, no ka mea, ua hoike ia mai ia mau mea iaʻu e ka mana o ke Akua, aole ma o kanaka la.

26. A ke kauoha nei Au, ka Haku, ia ia, ia Makini Hailaki, Kuu kauwa, aole oia e olelo hou ia lakou e pili ana i keia mau mea, koe wale no e olelo oia Ua ike au ia mau mea, a ua hoike ia mai ia mau mea iaʻu ma o ka mana la o ke Akua, a o keia na olelo ana e olelo aku ai;

27. Aka, ina e hoole oia i keia, e uhai ana oia i ka berita ana i berita ai me Aʻu mamua, a aia hoi, e hoahewa ia oia.

28. A ano, ke ole oia e hoohaahaa ia ia iho a ae mai Iaʻu i na mea hewa ana i hana ai, a e berita me Aʻu e malama oia i Kaʻu mau kauoha, a e hana me ka manaoio mai Iaʻu, aia hoi, ke i aku nei Au ia ia, aole e loaa ia ia ka ike ana ia mau mea, no ka mea, aole Au e haawi aku ana ia ia i ka ike ana i na mea Aʻu i hai ae nei.

29. A ina o keia iho la ke ano, ke kauoha aku nei Au ia oe, e Kuu kauwa, e Iosepa, e olelo aku oe ia ia, aole oia e hana hou, aole hoi e hoouluhua hou mai Iaʻu e pili ana i keia mea.

30. A ina o keia iho la ke ano, aia hoi, ke olelo aku nei Au ia oe, e Iosepa, aia a pau ia oe i ka unuhi ia he mau aoao kakaikahi hou aku, e hooki oe no ka manawa, he oiaio, a hiki i Kuu kauoha hou ana aku ia oe; alaila e hiki ia oe ke unuhi hou aku.

31. A ke ole oe e hana i keia, aia hoi, e nele ana oe i ka haawina, a e lawe no Au i na mea Aʻu i waiho aku ai ia oe.

32. A ano, no Koʻu ike e ana i na hoohalua ana e pepehi loa ia oe, ae, ke ike e nei Au, ina aole Kuu kauwa, o Makini Hailaki, e hoohaahaa ia ia iho, a loaa ka hoike mai Koʻu lima aku, e haule ana auanei oia iloko o ka hewa;

33. A he nui ka poe e hoohalua nei e pepehi ia oe mai ka ili aku o ka honua, a no keia kumu, i hooloihi ia ai kou mau la, ua haawi aku Au ia oe i keia mau kauoha;

34. Ae, no keia kumu Aʻu i olelo ai, e hooki a e ku malie a hiki i Kuu kauoha ana aku ia oe, a Naʻu no e hoomakaukau i mau mea e hiki ai ia oe ke hooko aku i ka mea Aʻu i kauoha aku ai ia oe;

35. A ina e kupaa oe ma ka malama ana i Kaʻu mau kauoha, e hookiekie ia ae auanei oe i ka la hope. Amene.