Librarya
Leksyon 10: 1 Nephi 6 ug 9

Leksyon 10

1 Nephi 6 ug 9

Pasiuna

Mipahayag si Nephi, “Kay ang kahingpitan sa akong tuyo mao nga ako unta makakabig sa mga tawo sa pagpaduol ngadto sa Dios ni Abraham, ug sa Dios ni Isaac, ug sa Dios ni Jacob, ug maluwas” (1 Nephi 6:4). Nagtipig siya og duha ka hugpong sa mga rekord: ang gagmay nga mga palid ni Nephi ug ang dagko nga mga palid ni Nephi. Ang Ginoo misugo kaniya sa pagmubo sa asoy ni Lehi diha sa gagmay nga mga palid (tan-awa sa 2 Nephi 5:28–31). Unya, si Mormon nadasig sa paglakip sa gagmay nga mga palid sa iyang pagtipig sa Basahon ni Mormon (tan-awa sa Mga Pulong ni Mormon 1:6–7). Wala masayud si Nephi o si Mormon ngano, apan silang duha misunod sa direksyon sa Ginoo.

Mga Sugyot alang sa Pagtudlo

1 Nephi 6

Misulat si Nephi sa pagdani sa tanan nga moduol ngadto ni Jesukristo

Ipakita ang pipila ka lain-laing mga basahon o mga salida nga popular sa kabatan-onan karon. Pangutan-a ang mga estudyante unsay ilang gibati nga katuyoan sa tagsulat o naghimo sa matag usa sa mga basahon o mga salida. Paggunit og kopya sa Basahon ni Mormon. Sultihi ang mga estudyante nga sa 1 Nephi 6, mipasabut si Nephi sa iyang katuyoan sa pagsulat sa iyang rekord, nga sa katapusan nahimong kabahin sa Basahon ni Mormon.

Ipabasa sa mga estudyante ang 1 Nephi 6:3–6 ug mangita sa mga pulong nga nagpadayag sa tuyo ni Nephi alang sa pagtipig sa iyang rekord. (Mahimo nimong isugyot nga markahan sa mga estudyante kini nga mga pulong.)

  • Ngano nga importante nga si Nephi misulat sa mga butang “nga makapahimuot ngadto sa Dios” ug dili ang mga butang “nga makapahimuot ngadto sa kalibutan”?

  • Unsaon ninyo sa pagsulti ang tuyo ni Nephi sa inyong kaugalingong mga pulong? (Makatabang tingali ang pagpasabut nga ang mga pulong “ang Dios ni Abraham, ug ang Dios ni Isaac, ug ang Dios ni Jacob” nagpasabut ngadto ni Jesukristo. Mahimo nimong awhagon ang mga estudyante sa pagsulat og Jesukristo diha sa ilang mga kasulatan tupad sa 1 Nephi 6:4. Mahimo usab nimong ipasabut nga ang pangalan nga Jehova nagpasabut ni Jesukristo. [Tan-awa sa 1 Nephi 19:10; 2 Nephi 11:4, 6–7; tan-awa usab sa Giya ngadto sa mga Kasulatan, “Kristo” “Kristo, Mga Pangalan ni.”])

Aron sa pagtabang sa mga estudyante nga makapasalamat nga ang Basahon ni Mormon lain nga tugon ni Jesukristo, dapita sila sa pagpakli sa indeks ug ipa-scan ang tanang mga ulohan nga may kalabutan ni Jesukristo. Hangyoa sila sa pag-ila sa pipila sa mga paagi nga ang Basahon ni Mormon nagtudlo mahitungod sa misyon sa Manluluwas.

Dapita ang usa ka estudyante sa pagsulat sa mosunod nga kamatuoran diha sa pisara: Usa ka katuyoan sa Basahon ni Mormon mao ang pagdani sa tanang mga tawo nga magpaduol ngadto ni Jesukristo.

  • Sa unsa kaha nga paagi nga ang pagsabut sa katuyoan ni Nephi sa pagsulat makaimpluwensya sa paagi sa inyong pagplano sa pagtuon sa Basahon ni Mormon niining tuiga?

Ipakigbahin sa unsa nga paagi nga ang Basahon ni Mormon nakatabang nimo nga mas mahiduol ngadto sa Langitnong Amahan ug sa Manluluwas. Dapita ang mga estudyante sa pagpakigbahin kon sa unsa nga paagi ang Basahon ni Mormon nakaimpluwensya sa ilang mga kinabuhi ug mas nakapaduol nila ngadto sa Langitnong Amahan ug ni Jesukristo. Awhaga sila sa pagpakigbahin sa ilang mga pagbati mahitungod sa Basahon ni Mormon ug sa ilang mga pagpamatuod ni Jesukristo uban sa usa ka higala o sakop sa pamilya sulod sa mosunod nga pipila ka mga adlaw.

1 Nephi 9

Si Nephi nagtipig og duha ka hugpong sa mga palid.

Ipakita sa klase ang basahon sa kasaysayan, ug isulti ang gidugayon sa panahon nga giabut sa basahon. Dayon ipakita sa klase ang personal nga kasaysayan, diary, o journal nga pareho og gidugayon sa panahon. (Kon angay, pagbasa og espirituhanon nga kasinatian gikan sa maong journal.)

  • Sa unsa nga paagi nga ang duha ka mga teksto nagkalahi sa ilang paghimo sa pagrekord og kasaysayan?

  • Ang usa ba ka teksto mas bililhon kay sa usa? Sa unsa nga paagi? (Ang matag usa bililhon tungod sa lain-laing mga rason.)

  • Sa unsa nga paagi nga kini nga mga teksto matandi sa Basahon ni Mormon?

Ipasabut nga sa 1 Nephi 9:1–5, nagsulti si Nephi mahitungod sa iyang paningkamot sa pagtipig og mga rekord sa duha ka set sa mga palid.

Sa usa ka hut-ong sa mga palid, nga karon nailhan na nga ang dagko nga mga palid ni Nephi, iyang girekord “ang kasaysayan sa [iyang] katawhan” (1 Nephi 9:2). Kini nga kasaysayan naglakip sa “makulit nga asoy sa pagmando sa mga hari, ug sa mga gubat ug sa mga panagbingkil sa [iyang] mga katawhan” (1 Nephi 9:4). Mao kadto ang unang rekord nga gihimo ni Nephi, apan kini wala malakip sa unsay anaa nato karon nga Basahon ni Mormon.

Sa laing hugpong sa mga palid, nga karon nailhan nga ang gagmay nga mga palid ni Nephi, iyang girekord “ang pagpangalagad sa [iyang] mga katawhan” (1 Nephi 9:3). Mahimo nimong ipasabut nga ang pulong nga pagpangalagad nagpasabut sa relihiyoso nga mga pagtulun-an ug mga kalihokan. Ang rekord ni Nephi sa gagmay nga mga palid makita karon sa mga basahon sa 1 Nephi ug 2 Nephi.

Aron sa pagtabang sa mga estudyante nga makaila tali sa gagmay ug dagko nga mga palid samtang sila magbasa sa 1 Nephi 9, isulat ang mosunod sa pisara: “kini nga mga palid” = gagmay nga mga palid ug “ang ubang mga palid” = dagko nga mga palid. (Mahimong mosugyot ka nga ang mga estudyante mosulat niini nga mga pulong diha sa ilang mga kasulatan tupad sa tukma nga mga bersikulo.) Sa 1 Nephi 9, ang pulong “kini nga mga palid” kanunay nagpasabut sa gagmay nga mga palid. Ang pulong “ang ubang mga palid” nagpasabut sa dagko nga mga palid.

Hangyoa ang usa ka estudyante sa pagbasa og kusog sa 1 Nephi 9:3, 5–6.

  • Unsa nga mga katarungan ang gihatag ni Nephi sa paghimo sa gagmay nga mga palid dugang ngadto sa dagko nga mga palid? Sa unsa nga paagi nga kini nga mga pagpasabut nagpakita sa hugot nga pagtuo ni Nephi sa Ginoo?

Ipasabut nga paglabay sa dul-an sa 1,000 ka tuig, si propeta Mormon mimubo, o naghimog mubo nga bersyon, sa tanang mga rekord nga gisulat sa iyang mga katawhan. Mao kini ang atong nailhan karon nga ang Basahon ni Mormon. Samtang siya naghimo niining minubo, iyang nakit-an ang gagmay nga mga palid ni Nephi ug gilakip kini sa iyang rekord.

Dapita ang usa ka estudyante sa pagbasa og kusog sa Mormon 1:3–7. Ipasabut nga si Mormon misulat niini nga mga pulong sa mga A.D. 385, sa panahon sa katapusang gubat tali sa mga Nephite ug mga Lamanite. Samtang ang mga estudyante mobasa niini nga mga bersikulo, papangitaa sila sa mga rason nga gihatag ni Mormon sa paglakip sa gagmay nga mga palid ni Nephi sa iyang minubo.

Basaha ang mosunod nga pamahayag ni Elder Marvin J. Ashton sa Korum sa Napulog Duha ka mga Apostoles:

Elder Marvin J. Ashton

“Usahay kon kita sugoon nga magmasulundon, wala kita makahibalo kon ngano, gawas ang Ginoo misugo. … Si Nephi misunod sa mga instruksyon bisan og siya wala makasabut sa hingpit sa maalamon nga katuyoan. Ang iyang pagkamasulundon miresulta sa mga panalangin sa katawhan sa tibuok kalibutan” (“Who Will Forfeit the Harvest?” Ensign, Nob. 1978, 51).

Itudlo nga gikan sa mga ehemplo ni Nephi ug Mormon, makat-unan nato nga kinahanglan nga kita mosunod sa mga sugo sa Dios ug mosunod sa mga pag-aghat gikan sa Espiritu bisan og wala kita makasabut sa hingpit sa mga rason alang niini.

  • Ngano nga importante nga mosunod sa mga sugo sa Ginoo ug mosunod sa mga pag-aghat gikan sa Espiritu bisan og wala kita makasabut sa hingpit sa mga rason alang niini?

  • Kanus-a kamo nagmasulundon ngadto sa Ginoo o misunod og piho nga impresyon nga wala makasabut sa hingpit sa mga rason?

  • Unsaon nato pagpalambo og mas dako nga pagsalig ug kaisug nga magmatinud-anon sa direksyon sa Dios?

Ipamatuod nga kon kita mosunod sa mga sugo sa Dios ug sa mga pag-aghat sa Espiritu Santo, ang atong pagsabut sa mga katuyoan luyo niini motubo, ug ang Ginoo mopanalangin nato tungod sa atong pagkamasulundon.

Dapita ang usa ka estudyante sa pagbasa og kusog sa mosunod nga pamahayag. (Mahimo nimong hatagan ang matag estudyante og gamay nga kopya aron sila makasunod ug makasukip niini sa ilang mga kasulatan alang sa umaabut nga pakisayran.)

Sa labing gamay nga bahin sa “maalamon nga katuyoan” sa Ginoo (1 Nephi 9:5; Mga Pulong ni Mormon 1:7) sa pagtipig ni Nephi og duha ka hugpong sa mga rekord naklaro sa dihang gihubad ni Joseph Smith ang Basahon ni Mormon. Orihinal nga gihubad ni Joseph ang minubo ni Mormon sa dagko nga mga palid ni Nephi. Si Martin Harris, kinsa mitabang ni Joseph, buot mopakita sa hubad ngadto sa iyang asawa ug pamilya. Nagduha-duha, ang Propeta mitugot ni Martin nga hulaman ang 116 ka pahina sa manuskrito nga nakompleto hangtud niadtong higayuna. Ang 116 ka pahina gikawat gikan ni Martin, ug, isip sangputanan, ang mga palid, ang Urim ug Thummim, ug ang gasa sa paghubad temporaryong gikuha gikan ni Joseph Smith (tan-awa sa D&P 3:14).

Human si Joseph Smith nakahinulsol (tan-awa sa D&P 3:10), ang Ginoo misulti kaniya nga dili hubaron pag-usab ang nawala nga bahin (tan-awa sa D&P 10:30). Hinoon Siya misugo ni Joseph sa paghubad sa gagmay nga mga palid ni Nephi (tan-awa sa D&P 10:41), nga naglangkob sa susama ra nga yugto sa panahon. Iyang gipahibalo si Joseph nga kadtong mikuha sa 116 ka pahina miusab niini ug nagplano sa paggamit niini aron sa pagdaot sa trabaho (tan-awa sa D&P 10:10–19). Ang Ginoo nakakita nang daan niini nga mga panghitabo sa daghang mga tuig sa sayo pa ug miandam sa ikaduhang rekord aron sa pagtuis sa plano ni Satanas. (Tan-awa sa History of the Church, 1:20–23; D&P 10:38–46.)

Dapita ang mga estudyante sa pagbasa sa tagsa-tagsa sa 1 Nephi 9:6. Hangyoa sila sa pag-ila sa doktrina nga gitudlo ni Nephi niini nga bersikulo. Ipasulat sa usa ka estudyante ang mosunod nga baruganan diha sa pisara: Ang Dios nasayud sa tanang mga butang ug nag-andam og paagi sa pagtuman sa tanan Niyang buhat.

  • Ngano nga makatabang nga makahibalo nga “ang Ginoo nasayud sa tanan nga mga butang gikan sa sinugdanan”? (1 Nephi 9:6; tan-awa usab sa 2 Nephi 9:20; Mga Pulong ni Mormon 1:7.)

  • Sa unsa nga paagi nga kini nga doktrina makaimpluwensya sa inyong pagpuyo? (Samtang ang mga estudyante motubag niini nga pangutana, mahimo nimong ipakigbahin ang imong mga hunahuna kon sa unsa nga paagi kini nga doktrina nakapalambo sa imong pagtuo, paglaum, ug pagsalig sa Dios.)

  • Sa unsa nga paagi nga kini nga doktrina makatabang ninyo kon kamo mag-atubang og mga pagsulay? (Usa ka posible nga tubag tingali nga kita makaangkon og kahupayan sa kasiguroan nga ang Dios makakita sa sangputanan sa atong mga pagsulay ug mga hagit, bisan kon kita dili. Ug pinaagi sa Espiritu Santo, Siya makahatag nato og kusog, kahupayan, ug direksyon sa pagbuntog o paglahutay sa mga kalisud sa kinabuhi.)

Ipadayag ang imong kombiksyon nga ang Dios nasayud sa tanang mga butang, lakip sa unsay labing maayo sa matag usa sa Iyang mga anak. Tabangi ang mga estudyante nga makakita nga sa ilang tibuok kinabuhi, makasugat sila og mga sugo ug makadawat og inspirasyon gikan sa Dios nga dili nila masabtan sa hingpit sa sinugdanan. Ang ilang pagkamasulundon sa mga sugo sa Ginoo ug ang mga pag-aghat sa Balaang Espiritu mopanalangin sa ilang kaugalingong mga kinabuhi ug sa mga kinabuhi sa uban.

Komentaryo ug Background nga Impormasyon

1 Nephi 6:4. “Ang Dios ni Abraham, ug ang Dios ni Isaac, ug ang Dios ni Jacob”

Si Presidente Ezra Taft Benson mipasabut nga kon ang mga kasulatan naghisgot sa Dios ni Abraham, Isaac, ug Jacob, kini nagpasabut ngadto ni Jesukristo: “Atong ibutang sa atong hunahuna kinsa si Jesus sa wala pa Siya matawo. Siya ang Tiglalang sa tanang mga butang, ang bantugang Jehova, ang Kordero nga gipatay sa wala pa ang katukuran sa kalibutan, ang Dios ni Abraham, Isaac, ug Jacob. Siya mao ug ang Usa nga Balaan sa Israel” (“Five Marks of the Divinity of Jesus Christ,” Ensign, Dis. 2001, 10).

1 Nephi 9:6. Ang Dios nasayud sa tanang mga butang gikan sa sinugdanan

Makasalig kita nga ang Dios nasayud sa tanang mga butang. “Kon wala ang kahibalo sa tanang mga butang ang Dios dili makahimo sa pagluwas sa bisan unsa nga porsyon sa iyang mga nilalang; tungod kay pinaagi sa rason sa kahibalo sa tanang mga butang nga anaa kaniya, gikan sa sinugdanan hangtud sa katapusan, nga nakahimo niya sa paghatag niana nga pagsabut ngadto sa iyang mga nilalang diin sila nahimo nga mga tig-ambit sa kinabuhing dayon; ug kon dili tungod niana nga ideya nga anaa sa mga hunahuna sa mga tawo nga ang Dios aduna sa tanang kahibalo imposible alang kanila sa pagpakita og hugot nga pagtuo diha kaniya” (Lectures on Faith [1985], 51–52).