Leksyon 18

1 Nephi 17

Pasiuna

Human nagpanaw sa kamingawan sulod sa walo ka tuig, ang pamilya ni Lehi miabut sa kabaybayunan nga ilang gitawag og Bountiful. Human nila maestablisar ang ilang kaugalingon sa Bountiful, ang Ginoo misugo ni Nephi sa paghimo og barko. Sa dihang ang iyang mga igsoong lalaki nakahibalo unsay iyang giplano nga buhaton, gibugalbugalan nila siya ug dayon nagbagulbol ug nagdumili sa pagtabang. Gitudloan ni Nephi ang iyang mga igsoong lalaki nga bisan ang Ginoo nagtinguha sa pagpakigsulti kanila pinaagi sa hinay, hinagawhaw nga tingog sa Espiritu, ang ilang kadautan nakapugong nila sa pagbati sa Iyang mga pulong. Gibadlong niya sila tungod sa ilang pagkadautan ug miawhag nila sa paghinulsol.

Mga Sugyot alang sa Pagtudlo

1 Nephi 17:1−51

Ang pamilya ni Lehi mipanaw ngadto sa Bountiful, diin si Nephi gisugo sa paghimo og usa ka barko

Drowinga ang mosunod nga diagram sa pisara:

Easy Difficult

Hangyoa ang mga estudyante sa pagkonsiderar kon ila bang ihulagway sa ilang mga kinabuhi karonisip sayon o lisud, ug ngano. (Mahimo nimong awhagon ang mga estudyante sa paghisgot sa ilang mga tubag uban sa ilang pares. O dapita ang pipila ka mga estudyante nga mopakigbahin sa ilang mga kasinatian diha sa klase. Pahinumdumi sila nga dili kinahanglan nga mopakigbahin sila og mga kasinatian nga personal ra kaayo o pribado.)

Dapita ang usa ka estudyante sa pagbasa og kusog sa 1 Nephi 17:1, 4, 6. Samtang siya magbasa, ipapangita sa klase ang mga pulong nga nagpakita kon ang panahon ba nga gigahin ni Nephi ug sa iyang pamilya sa kamingawan sayon o lisud.

• Gihulagway ba ni Nephi ang ilang panahon sa kamingawan nga sayon o lisud? Unsa nga mga pulong ang nagsulti nga kini lisud?

Ipasabut nga si Nephi ug ang iyang pamilya napanalanginan usab pag-ayo atol niining panahona. Dapita ang mga estudyante sa pagsusi sa 1 Nephi 17:2, 5, 12−13 sa pagpangita sa pipila sa mga paagi nga napanalanginan si Nephi ug iyang pamilya atol sa ilang panaw. Hangyoa ang pipila ka mga estudyante sa pagpasabut unsay ilang nakit-an.

Tabangi ang mga estudyante nga makakat-on unsaon sa pag-ila sa mga doktrina ug mga baruganan

Samtang magtabang ka sa mga estudyante nga makat-on unsaon sa pag-ila og mga doktrina ug mga baruganan sa mga kasulatan, makahimo sila sa pagtuon sa mga kasulatan nga mas epektibo sa ilang kaugalingon. Tudloi ang mga estudyante sa pagpangita sa mga pulong sama sa “sa ingon kami nakakita,” “busa,” “tan-awa,” o “kon … , nan … ,” nga sa kasagaran nagpaila sa mga baruganan o mga pamahayag sa doktrina.

Sultihi ang mga estudyante nga si Nephi nagtudlo og baruganan nga nagpasabut ngano ang iyang pamilya mapanalanginan niining malisud nga panahon. Dapita ang mga estudyante sa pagbasa sa hilum sa 1 Nephi 17:3 ug ilha ang baruganan nga nagsugod sa pulong kon. Ilakbit sa pagpasabut nga sa mga kasulatan, ang mga baruganan usahay naghatag sa pormat nga “kon-nan”. Ang pulong kon naghisgot og aksyon, ug ang pulong nan naghisgot sa sangputanan (positibo o negatibo) nga atong masinati isip resulta niana nga aksyon.

Bisan og ang 1 Nephi 17:3 walay pulong nga nan, naghulagway kini sa aksyon, uban sa pipila ka mga panalangin nga moresulta. Hangyoa ang mga estudyante sa pagsulti sa mga bahin sa “kon-nan” sa baruganan nga ilang nailhan. Kinahanglang mosulti sila nga susama sa mosunod: Kon kita motuman sa mga sugo, nan ang Ginoo molig-on nato ug mohatag og paagi alang nato sa pagtuman nianang Iyang gisugo. (Mahimo nimong isulat sa pisara kini nga baruganan.) Dapita ang mga estudyante sa pagpangita og ebidensya niini nga baruganan samtang sila magtuon sa kasinatian ni Nephi ug samtang sila mamalandong sa ilang kaugalingong mga kinabuhi.

Iapud-apod ang handout nga duna sa mosunod nga mga pangutana (o isulat ang mga pangutana diha sa pisara sa dili pa ang klase):

1. Unsa ang gisugo sa Ginoo ni Nephi? (1 Nephi 17:7−8) Giunsa ni Nephi sa pagtubag? (1 Nephi 17:9−11, 15−16) Giunsa sa iyang mga igsoon sa pagtubag? (1 Nephi 17:17−21)

2. Giunsa sa Ginoo pagtabang si Moises nga makatuman sa buluhaton nga iyang gisugo nga buhaton? (1 Nephi 17:23−29)

3. Sa unsa nga paagi nga ang mga igsoong lalaki ni Nephi sama sa mga anak sa Israel? (1 Nephi 17:30, 42)

4. Unsa ang gisugo sa Ginoo nga lisud alang nako?

5. Unsaon nako sa pagtubag sama ni Nephi ug Moises? Unsaon nako sa paglikay sa mga sayop sa mga igsoong lalaki ni Nephi ug sa mga anak ni Israel?

Ipaila ang mga pangutana sa ibabaw pinaagi sa pagpasabut nga kini makatabang sa mga estudyante nga makakita kon giunsa ni Nephi pagpadayon sa pagsunod sa baruganan sa 1 Nephi 17:3 human siya miabut sa Bountiful. Ang mga pangutana makatabang usab sa mga estudyante paggamit sa baruganan sa ilang mga kaugalingon. Dapita ang usa ka estudyante sa pagbasa og kusog sa 1 Nephi 17:7−l8. Hangyoa ang klase sa pag-ila unsa ang gisugo nga buhaton ni Nephi. Iparekord sa mga estudyante ang tubag ubos sa pangutana 1 diha sa handout o sa ilang mga scripture study journal.

• Sa unsang mga paagi nga kini nga sugo lisud alang ni Nephi?

Dapita ang usa ka estudyante sa pagbasa og kusog sa 1 Nephi 17:9−11 ug laing estudyante sa pagbasa og kusog sa 1 Nephi 17:15–16. Sa dili pa sila mobasa, hangyoa ang klase sa pagpaminaw sa tubag ni Nephi sa sugo nga maghimo og usa ka barko.

• Unsa ang nakapadani ninyo sa tubag ni Nephi?

Ipasulat sa mga estudyante ang summary sa tubag ni Nephi ubos sa pangutana 1 diha sa handout o sa ilang mga scripture study journal.

Hangyoa ang pipila ka mga estudyante nga magpuli-puli sa pagbasa og kusog gikan sa 1 Nephi 17:17−21. Hangyoa ang klase sa pagpangita sa mga pulong nga nagpadayag sa mga kinaiya nila ni Laman ug lemuel. Ipasulat sa mga estudyante ang summary sa tubag nila ni Laman ug Lemuel ngadto sa sugo sa paghimo og usa ka barko. Dapita ang usa o duha ka mga estudyante sa pagpakigbahin sa ilang mga summary uban sa klase.

Ipasabut nga si Nephi mitubag sa mga bagulbol sa iyang mga igsoong lalaki pinaagi sa pagpahinumdom nila nga ang Ginoo mitabang ni Moises nga matuman ang malisud nga buluhaton sa pagluwas sa mga anak ni Israel gikan sa pagkaulipon. Gitandi usab ni Nephi ang pagkagahi og kasingkasing sa iyang mga igsoong lalaki ngadto sa mga anak ni Israel. Dapita ang mga estudyante sa pagtuon sa mga tudling sa kasulatan ug sa pagrekord sa ilang mga tubag sa pangutana 2 ug 3. Depende sa mga panginahanglan sa imong mga estudyante, mahimong imong ipabuhat kini nila sa tagsa-tagsa o uban sa mga pares.

Ikonsiderar ang mga panginahanglan sa imong mga estudyante samtang ikaw magtudlo.

Maalamon ang pag-usab sa mga paagi sa pagtudlo aron sa pagtabang sa mga estudyante nga malampusong motuman sa ilang tahas isip mga tigkat-on. Sama pananglit, kon ang mga estudyante gikapoy na, ikonsiderar ang pagpabuhat nila uban sa mga pares aron sa pagtabang nga padayon silang magkat-on. Kon ang mga estudyante lagsik pa, mahimong mohangyo ka nila nga magtuon sa tagsa-tagsa aron sa pagtabang nila nga magpabilin diha sa buluhaton.

Human makompleto sa mga estudyante ang mga pangutana 2 ug 3, ipangutana:

• Giunsa sa Ginoo pagtabang si Moises nga makatuman sa buluhaton nga iyang gisugo nga buhaton?

• Ngano sa inyong hunahuna nga ang ehemplo ni Moises nakatabang ni Nephi?

• Sa unsa nga paagi nga ang mga igsoong lalaki ni Nephi nahisama sa mga anak ni Israel?

Itudlo nga kon ang Ginoo mohatag nato og mahagiton nga mga buluhaton o mga sugo, makapili kita sa pagtubag sama sa gibuhat ni Nephi, o kita makatubag sama sa gibuhat nila ni Laman ug Lemuel. Ipasabut nga bisan og ang Dios wala mosugo nato sa pagtuman og mga buluhaton sama sa paghimo og usa ka barko o pagbahin sa Pula nga Dagat, Siya mihatag og mga sugo ug misugo nato sa pagtuman sa mga butang nga lisud para sa ubang mga tawo. Sama pananglit, siya misugo nato nga magbaton og mahiyason nga mga hunahuna ug pagbalaan sa adlawng Igpapahulay. Siya naglaum nga atong tumanon ang mga calling sa Simbahan (sama sa presidente sa korum o klase) ug moserbisyo sa uban. Naglaum usab siya nato sa pagtuman sa atong mga pakigsaad ug magpabiling aktibo sa Simbahan, bisan sa atubangan sa mga hagit. Hatagi ang mga estudyante og panahon sa pagrekord sa mga tubag sa mga pangutana 4 ug 5. Awhaga sila sa pagtubag sa ika-upat nga pangutana pinaagi sa pagsulat mahitungod sa bisan unsa nga gisugo sa Ginoo nga malisud alang nila.

Human ang mga estudyante dunay igong panahon sa pagsulat, basaha og kusog ang gisulti ni Nephi bahin sa hugot nga pagtuo diha sa 1 Nephi 17:50. Dayon hangyoa ang mga estudyante sa pagbasa sa hilum sa 1 Nephi 17:51 ug ikonsiderar sa unsa nga paagi kini magamit sa ilang mga kinabuhi. Awhaga sila sa pagdugang sa ilang mga pangalan sunod sa pulong kanako ug pulihi ang mga pulong mohimo og usa ka barko uban sa buluhaton o sugo nga alang nila malisud. Ikonsiderar ang pagdapit sa mga estudyante kinsa komportable sa paghimo sa ingon sa pagbasa og kusog sa 1 Nephi 17:51 uban sa pag-ilis nga ilang gihimo. I-refer og usab sa baruganan nga naa sa pisara.

• Unsa nga kasinatian ang nasinati na ni Nephi niini nga baruganan nga nakahatag niya og pagsalig nga ang Ginoo motabang niya nga matuman ang bisan unsa nga sugo?

• Unsa ang inyong nasinati nga nakahatag ninyo og pagsalig nga ang Dios motabang ninyo nga matuman ang Iyang bisan unsa nga gihangyo ninyo?

Ipakigbahin ang imong pagpamatuod nga kon kita motuman sa mga sugo, ang Ginoo molig-on nato ug mohatag og mga paagi nga atong matuman ang mga butang nga Iyang gisugo.

1 Nephi 17:45−55

Gibadlong ni Nephi sila si Laman ug Lemuel tungod sa ilang pagkadautan

Si Nephi Mibuntog sa Iyang Masinupakon nga Igsoong mga Lalaki

Ipakita ang litrato Si Nephi Mibuntog sa Iyang Masinupakon nga Igsoong mga Lalaki (62044; Libro sa mga Hulagway sa Ebanghelyo [2009], nu. 70). Dapita ang mga estudyante sa pag-summarize unsay nahitabo sa litrato. Kon ang mga estudyante walay tubag, dapita sila sa pagpangita og tubag sa 1 Nephi 17:48, 53–54.

• Sumala sa 1 Nephi 17:53, nganong gipakurog sa Ginoo ang igsoong mga lalaki ni Nephi? (Mahimo nimong dad-on ang atensyon sa mga estudyante ngadto sa footnote 53a aron sa pagtabang nila nga makasabut nga ang pulong kurog niini nga konteksto nagpasabut kini “sa pagkauyog o pagkatay-og.”)

Ipasabut nga ang pagkurog nga gihatag sa Ginoo ngadto nila ni Laman ug Lemuel usa lamang sa daghang mga paagi nga ang Ginoo nakigsulti kanila. Dapita ang mga estudyante sa pagbasa sa 1 Nephi 17:45 ug ipaila ang pipila ka mga paagi nga ang Ginoo nakigsulti kang Laman ug Lemuel sa nangagi.

• Unsa ang pipila ka mga paagi nga ang Ginoo nakigsulti kang Laman ug Lemuel? Hain niini ang morag paagi nga maoy labing komon nga gamiton sa Ginoo sa pagpakigsulti kanato?

Mahimo kang mosugyot nga markahan sa mga estudyante ang mosunod nga pamahayag sa 1 Nephi 17:45: “Siya nakapamulong nganha kaninyo sa usa ka hinay nga hinagawhaw nga tingog.” Hangyoa ang usa ka estudyante sa pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Ang Espiritu Santo mamulong sa tingog nga inyong bation labaw kay sa inyong madungog. Kini naghulagway sa ‘hinay, hinagawhaw nga tingog’ [D&P 85:6]. Ug samtang kita maghisgot sa ‘pagpaminaw sa mga paghunghong sa Espiritu, kasagaran ang usa ka tawo mohulagway og espirituhanong pag-aghat pinaagi sa pag-ingon, ‘Ako dunay gibati …’” (“Personal Revelation: The Gift, the Test, and the Promise,” Ensign, Nob. 1994, 60).

Mahimo nimong dapiton ang mga estudyante sa pagsulat sa mosunod nga kamatuoran sa ilang mga kasulatan tupad sa 1 Nephi 17:45: Ang Espiritu Santo mosulti uban sa hinay, hinagawhaw nga tingog nga atong mabati kay sa atong madungog. (Sa pagpasabut pag-ayo niini nga baruganan, mahimo nimong ipabasa sa mga estudyante ang Doktrina ug mga Pakigsaad 8:2–3.)

• Kanus-a kamo mibati sa hinay, hinagawhaw nga tingog sa Espiritu Santo nga nagsulti kaninyo?

• Unsay inyong buhaton nga makatabang ninyo nga mobati ug makaila sa hinay, hinagawhaw nga tingog sa Espiritu Santo?

Human makatubag ang mga estudyante, mahimo nimong awhagon sila sa pagmarka sa mosunod nga pulong sa 1 Nephi 17:45: “Apan kamo ingon sa walay pagbati, mao nga kamo dili makabati sa iyang mga pulong.” Ipabasa sa mga estudyante ang unang han-ay sa mga pulong sa 1 Nephi 17:45 ug ipasulti ngano nga sila si Laman ug Lemuel “walay pagbati.” Dapita sila sa pagreport unsay ilang nakit-an.

• Ngano nga ang “dali nga mobuhat og kadautan” maoy nakaingon nga sila si Laman ug Lemuel nahimong “walay pagbati”?

• Sa unsa nga paagi nga ang atong mga sala makaapekto sa atong abilidad sa pagbati sa impluwensya sa Espiritu Santo?

Human makatubag ang mga estudyante, basaha ang mosunod nga pamahayag ni Presidente James E. Faust, kinsa nagserbisyo isip sakop sa Unang Kapangulohan:

“Ang mga cellular phone gigamit gyud og maayo sa komunikasyon sa panahon nato. Usahay, bisan pa niana, makakita ‘ta og lugar nga walay signal sa cell phone. Mahitabo kini kon ang naggamit sa cell phone naa ilawom sa tunnel o ubos sa pangpang, o kon dunay laing makababag sa signal.

“Mao usab kana sa balaanong komunikasyon. … Ato kanunayng ibutang ang atong kaugalingon sa mga dapit nga walay signal sa espirituhanong paagi—mga lugar ug mga sitwasyon nga makababag sa balaanong mga mensahe. Ang pipila niini naglakip sa kasuko, pornograpiya, kalapasan, pagkahakog, ug uban pang mga sitwasyon nga makadaut sa Espiritu” (“Nakuha ba Ninyo ang Saktong Mensahe?” Ensign o Liahona, Mayo 2004, 67).

Sa pagtapos, dapita ang mga estudyante sa pagkonsiderar sa mga mensahe nga gusto sa Ginoo nga isulti ngadto nila karong bag-o. Awhaga sila sa pagpamalandong kon duna bay bisan unsa nga “espirituhanong mga dapit nga walay signal” nga makapugong nila sa pagdawat sa mao nga komunikasyon. (Mahimo nimong ipasulat sa mga estudyante ang mahitungod niini diha sa ilang mga scripture study journal.) Ipamatuod nga ang Espiritu Santo naghisgot sa hinay, hinagawhaw nga tingog nga mas mabati nato kay sa atong madungog. Ipamatuod usab nga kita makasinati niini nga komunikasyon kon kita maningkamot nga mahimong takus niining malumo nga mga pag-aghat.

Komentaryo ug Background nga Impormasyon

1 Nephi 17:8−9. Ang hagit nga giatubang ni Nephi sa paghimo og usa ka barko

Si Elder David A. Bednar sa Korum sa Napulog Duha ka mga Apostoles mipasabut:

“Si Nephi dili usa ka marinero. Nagdako siya didto sa Jerusalem, sa usa ka siyudad nga layo sa baybayon, kay sa daplin sa Dagat sa Mediterranean. Wala gyud kaayo siyay nahibaloan o dunay kasinatian sa himan ug mga kahanas nga gikinahanglan sa paghimo og usa ka barko. Wala gani tingali siya makakita og barko. Sa tinuod, lang, si Nephi gisugo ug gimandoan sa pagbuhat og butang nga wala pa gayud niya mabuhat kaniadto aron moadto sa dapit nga wala pa gayud sukad niya maadto” (“Learning to Love Learning” [Brigham Young University commencement address, Abr. 24, 2008], 4, speeches.byu.edu).

1 Nephi 17:45. “Kamo ingon sa walay pagbati”

Si Presidente Henry B. Eyring sa Unang Kapangulohan mipasabut nga ang pagkawala sa Espiritu sa kinabuhi sa usa ka tawo nagsugyot sa panginahanglan sa paghinulsol:

“Usa ka … panginahanglan alang sa kanunay nga pakig-uban ug direksyon gikan sa Espiritu Santo mao ang pagkalimpyo. Ang Espiritu kinahanglan mopahawa gikan niadtong dili limpyo. …

“… Kon maglisud ka sa pagbati sa Espiritu Santo, unta kamo magmaalamon nga mamalandong kon aduna bay butang nga angay ninyong hinulsulan ug mangayo og kapasayloan.

“Kon inyong nabati ang impluwensya sa Espiritu Santo karon, mahimo ninyong isipon kini nga ebidensya nga ang Pag-ula naglihok sa inyong kinabuhi. Tungod niana nga rason ug daghan pa, maayo kaayo nga inyong ibutang ang inyong kaugalingon sa mga dapit ug sa mga buluhaton nga magdapit sa mga pag-aghat sa Espiritu Santo. Ang pagbati sa impluwensya sa Espiritu Santo dunay duha ka epekto: ang Espiritu Santo mopuyo lamang sa limpyo nga templo, ug ang pagdawat sa Espiritu Santo molimpyo nato pinaagi sa Pag-ula ni Jesukristo. Makaampo kamo uban sa hugot nga pagtuo aron makahibalo unsay buhaton aron malimpyohan ug sa ingon mokwalipay sa pagpakig-uban sa Espiritu Santo ug sa serbisyo sa Ginoo. Ug uban niana nga pagpakig-uban malig-on kamo batok sa tintasyon ug may gahum sa pag-ila sa panglingla” (“Gifts of the Spirit for Hard Times,” Ensign, Hunyo 2007, 23).