Pasiuna sa Ang Basahon ni Moroni
Ngano nga kinahanglang tun-an kini nga basahon?
Samtang ang mga estudyante nagtuon sa basahon ni Moroni, makadawat sila og kalig-on gikan sa gamhanang mga ehemplo ug mga pagtulun-an ni Moroni ug sa iyang amahan, si Mormon. Makat-unan nila ang mahitungod sa sukaranang mga ordinansa ug mga tulumanon sa Simbahan ni Jesukristo, ang importansya sa paghimo og matarung nga mga buhat uban sa tinuod nga katuyoan; ang pamaagi sa paghukom tali sa maayo ug sa dautan; ang kalabutan tali sa hugot nga pagtuo, paglaum, ug gugmang putli; ug ang kaluwasan sa gagmay nga mga bata. Mabasa usab sa mga estudyante ang awhag ni Moroni sa pag-ampo aron mahibalo sa ilang mga kaugalingon nga ang Basahon ni Mormon tinuod (tan-awa sa Moroni 10:3–5) ug sa “pagduol ngadto kang Kristo, ug paghingpit diha kaniya ” (Moroni 10:32).
Kinsa ang misulat niini nga basahon?
Gisulat kini nga basahon ni Moroni, nga naglakip sa iyang kaugalingong mga pulong, sa mga pulong ni Jesukristo ngadto sa Iyang Napulog duha ka mga disipulo nga mga Nephite (tan-awa sa Moroni 2), ug sa mga pulong sa iyang amahan, si Mormon (tan-awa sa Moroni 7–9). Sa wala pa malaglag ang mga Nephite, mialagad kanila si Moroni isip usa ka pangulo sa militar ug lider sa Simbahan (tan-awa sa Mormon 6:12; Moroni 8:1). Sama sa ubang bantugang mga manunulat ug magtitigum sa Basahon ni Mormon, si Moroni usa ka saksi sa Manluluwas. Gipamatuod niya, “Ako nakakita ni Jesus, ug … siya nakigsulti kanako nawong sa nawong” (Ether 12:39). Nagmatinud-anon si Moroni sa iyang pagpamatuod, nagdumili sa paglimud ni Kristo atol sa panahon sa dihang gipamatay sa mga Lamanite ang matag Nephite kinsa dili molimud Kaniya (tan-awa sa Moroni 1:1–3). Sa 1823, mga 1,400 ka mga tuig human makompleto ang rekord sa Basahon ni Mormon, mipakita si Moroni ngadto ni Propeta Joseph Smith isip usa ka binanhaw nga tawo ug mipahibalo ni Joseph nga ang rekord gitago diha sa usa ka bungtod duol sa iyang panimalay (tan-awa sa Joseph Smith—Kasaysayan 1:29–35). Niana nga panahon ug sa matag panahon sa sunod upat ka tuig, gitudloan ni Moroni si Joseph Smith “mahitungod sa pagabuhaton sa Ginoo, unsaon ug sa unsa nga paagi ang pagdumala sa iyang gingharian sa katapusan nga mga adlaw” (Joseph Smith—History 1:54).
Para kang kinsa kini gisulat ug ngano?
Gipahayag ni Moroni, “ako mosulat og dugang nga pipila ka mga butang, nga tingali sila mahimo nga bililhon ngadto sa akong mga kaigsoonan, ang mga Lamanite, sa uban nga umaabut nga adlaw” (Moroni 1:4; tan-awa usab sa Moroni 10:1). Gipadayag usab niya nga siya misulti “ngadto sa tanan nga mga lumolupyo sa yuta,”nagpasidaan nga diha sa hukmanan sa Dios, ang tanan manubag alang sa mga pulong nga iyang gisulat (tan-awa sa Moroni 10: 24, 27). Agi og pangandam alang niini nga panghitabo, gidapit ni Moroni ang tanan nga “moduol ngadto ni Kristo” (Moroni 10:30, 32).
Kanus-a ug diin kini gisulat?
Malagmit gisulat ug gitigum ni Moroni kini nga basahon tali sa mga tuig A.D. 401 ug A.D. 421 (tan-awa sa Mormon 8:4–6; Moroni 10:1). Wala siya misulti diin siya sa dihang iyang gisulat kini—nga siya naglatagaw bisan asa kutob sa iyang mahimo alang sa kaluwasan sa iyang kinabuhi (tan-awa sa Moroni 1:1–3).
Unsa man ang mga butang nga nakalahi niini nga basahon?
Kini nga basahon naghatag og mga detalye kabahin sa mga panudlo ni Jesukristo ngadto sa Iyang napulog duha ka mga disipulo nga Nephite samtang mihatag Siya kanila og gahum sa pagtugyan sa gasa sa Espiritu Santo (tan-awa sa Moroni 2; tan-awa usab sa 3 Nephi 18:36–37). Kini naglakip usab sa mao lamang nga mga panudlo diha sa Basahon ni Mormon mahitungod sa pagpahigayon sa mga ordinansa sa priesthood ug sa mga pag-ampo nga gigamit sa ordinansa sa sakrament (tan-awa sa Moroni 3–5). Ang ubang lahi nga mga kalainan niini nga basahon naglakip sa mga pagtulun-an ni Mormon sa pag-ila sa maayo gikan sa dautan (tan-awa sa Moroni 712–19), ang pagpangalagad sa mga anghel (tan-awa sa Moroni 7:29–39), gugma nga putli isip ang tiunay nga gugma ni Kristo (tan-awa sa Moroni 7:44–48), ug ang kaluwasan sa gagmay nga mga bata (tan-awa sa Moroni 8). Kini naglakip usab sa paghulagway ni Mormon sa kahilayan sa mga Nephite ug mga Lamanite sa wala pa ang katapusan nga gubat sa Cumorah (tan-awa sa Moroni 9). Gilakip ni Moroni ang iyang kaugalingon nga mga pagtulun-an sa mga gasa sa Espiritu (tan-awa sa Moroni 10:8–26). Girekord usab niya ang pagdapit, makita diha sa Moroni 10:3–5, nga naghatag og importante nga kontribusyon sa Basahon ni Mormon. Nag-refer niini nga tudling, gipasabut ni Gordon B. Hinckley nga ang Basahon ni Mormon “mao lamang ang basahon diin diha sa sulod niini anaa ang saad nga pinaagi sa balaang gahum ang tigbasa mahibalo uban sa kasigurohan sa kamatuoran niini” (“A Testimony Vibrant and True,” Ensign, Ago. 2005, 4).
Outline
Moroni 1–6 Samtang naglatagaw alang sa kaluwasan sa iyang kinabuhi, si Moroni nagrekord og mga ordinansa ug mga tulumanon sa Simbahan ni Jesukristo. Kini naglakip sa pagtugyan sa gasa sa Espiritu Santo, pagpahigayon sa mga pag-orden sa priesthood, pagpangalagad sa sakrament, ug pagkasarang alang sa bunyag. Naghisgot usab si Moroni sa espiritwal nga pag-amuma sa mga miyembro sa Simbahan ingon man sa mga katuyoan sa mga miting sa Simbahan ug sa unsa nga paagi kini ipahigayon.
Moroni 7 Nagrekord si Moroni og usa ka wali nga gihatag ni Mormon, kinsa mitudlo mahitungod sa Kahayag ni Kristo, sa importansya sa pagbuhat og matarung nga mga buhat uban sa tinuod nga katuyoan, pag-ila sa kalainan tali sa maayo ug sa dautan, paghupot diha sa matag maayong butang, ug sa relasyon tali sa hugot nga pagtuo, paglaum, ug gugma nga putli.
Moroni 8–9 Nagrekord si Moroni og mga sulat gikan ni Mormon nga nagpasabut ngano nga ang gagmay nga mga bata wala magkinahanglan og bunyag ug naghulagway sa grabe nga pagkadautan taliwala sa mga Nephite ug sa mga Lamanite.
Moroni 10 Nag-awhag si Moroni sa tanan kinsa mobasa sa Basahon ni Mormon sa pag-ampo aron mahibalo sa pagkatinuod niini, sa dili paglimud sa gahum ug sa mga gasa sa Dios, ug sa pagduol ngadto ni Kristo ug maghingpit diha kaniya.