Mosiah 21–22

Pasiuna

Human mapakyas og tulo ka higayon sa pagluwas sa ilang mga kaugalingon gikan sa pagkaulipon sa Lamanite, ang mga katawhan ni Limhi sa katapusan midangop sa Ginoo sa pagluwas kanila. Sunod niana, si Ammon ug ang iyang mga kaigsoonan miabut sa yuta sa Lehi-Nephi. Human makigsaad sa pag-alagad sa Ginoo, ang mga katawhan ni Limhi nakalingkawas gikan sa pagkaulipon sa Lamanite, ug gigiyahan sila ni Ammon ngadto sa Zarahemla.

Mga Sugyot alang sa Pagtudlo

Mosiah 21:1–22

Human sa pag-alsa sa katawhan ni Limhi batok sa mga Lamanite ug napildi sa tulo ka higayon, nagpaubos sila sa ilang kaugalingon sa atubangan sa Ginoo ug nagsugod sa pag-uswag.

Isulat ang pulong nga pagkabihag ug kaluwasan diha sa pisara.

Unsa nga mga imahe ang moabut sa inyong salabutan kon maghunahuna kamo niini nga mga pulong?
Unsa nga mga emosyon ang inyong gihunahuna nga may koneksyon niini nga mga pulong?
Unsa kaha ang kalabutan niini nga mga pulong sa plano sa kaluwasan?

Ipasabut nga ang Mosiah 21–24 naglangkob sa mga kasaysayan sa duha ka grupo sa mga katawhan kinsa diha sa pagkabihag sa pwersa sa mga Lamanite ug sa kaulahian giluwas sa Ginoo. Diha sa Mosiah 21–22, atong mabasa ang kalabut ni Limhi ug sa iyang mga katawhan, kinsa nahimong bihag isip resulta sa ilang kadautan. Ang ilang pisikal nga pagkabihag nagsalamin sa espiritwal nga pagkabihag nga ilang nasinati tungod sa ilang mga sala. Ang kasaysayan sa ikaduhang grupo, diha sa Mosiah 23–24, pagahisgutan sa sunod nga leksyon. Kini nag-istorya kabahin sa mga katawhan ni Alma, kinsa misinati og pagkabihag ug kasakit human sila nabunyagan. Ang duha ka istorya nagtudlo og importanting mga kamatuoran mahitungod sa gahum sa Ginoo sa pagluwas kanato gikan sa sala ug mga kasakit. Awhaga ang mga estudyante sa paghunahuna mahitungod sa gahum sa Ginoo sa pagluwas kanato gikan sa sala samtang sila nagtuon sa pagkabihag ug pagkaluwas sa mga katawhan diha sa Mosiah 21–22.

Dapita ang mga estudyante sa pagbasa sa hilum sa Mosiah 21:2–6. Hangyoa sila sa pag-ila og mga pulong nga naghulagway unsay gisinati ni Limhi ug sa iyang mga katawhan ug unsay ilang gibati mahitungod niini. Sa paghatag og gibug-aton sa kalisud nga giatubang sa mga katawhan ni Limhi, mahimo nimong awhagon ang mga estudyante sa pagmarka sa hugpong sa mga pulong “walay paagi nga sila maluwas sa ilang mga kaugalingon” diha sa Mosiah 21:5.

Unsa nga mga detalye diha sa Mosiah 21:6 nga nagsugyot nga ang mga katawhan wala pa magpaubos sa ilang mga kaugalingon ug midangop ngadto sa Ginoo?
Unsa nga solusyon ang gitanyag sa mga katawhan ni Limhi sa pagpangita og kahupayan gikan sa ilang mga kasakit?

I-summarize ang Mosiah 21:7–12 pinagi sa pagsulti sa mga estudyante nga ang mga katawhan ni Limhi nakiggubat og tulo ka higayon sa pagluwas sa ilang mga kaugalingon gikan sa mga Lamanite, apan napildi sila ug nag-antus og dagko nga kapildihan sa matag higayon.

Unsa ang pipila ka mga paagi nga ang mga katawhan mahimong mo-react human sa ikatulong dili malampuson nga pagsulay pagkapakyas sa pagluwas sa ilang mga kaugalingon?

Dapita ang pipila ka mga estudyante sa pagpuli-puli sa pagbasa og kusog gikan sa Mosiah 21:13–16 aron sa pagkat-on kon sa unsa nga paagi ang mga katawhan mitubag. Hunahunaa ang pagpangutana sa pipila o sa tanan nga mosunod:

Sa unsa nga paagi nausab ang mga katawhan human sa ilang ikatulo nga kapildihan?
Sumala sa Mosiah 21:15, ngano nga ang Ginoo hinay sa pagtubag sa ilang mga pag-ampo?
Diha sa Mosiah 11:23–25, unsa ang gisulti ni Abinadi sa mga katawhan nga ilang kinahanglang buhaton sa dili pa ang Ginoo motubag sa ilang mga pag-ampo alang sa kaluwasan?
Bisan tuod wala diha-diha maluwas ang mga katawhan gikan sa pagkabihag, sa unsa nga paagi ang Ginoo mipanalangin kanila samtang sila misugod sa paghinulsol? (Samtang ang mga estudyante nagtubag, hunahunaa ang pag-awhag kanila sa pagmarka sa hugpong sa mga pulong “pag-uswag sa hinay-hinay” diha sa Mosiah 21:16.)
Unsay gitudlo niini mahitungod sa unsay buhaton sa Ginoo kon ang mga tawo mopaubos sa ilang mga kaugalingon, mosugod sa paghinulsol, ug motawag Kaniya alang sa panabang?

I-summarize ang Mosiah 21:16–22 pinaagi sa pagpasabut nga atol sa nahibiling panahon nga ang mga katawhan ni Limhi diha sa pagkaulipon, ang Ginoo mipauswag kanila aron dili sila magutman. Usab “wala nay kasamok tali sa mga Lamanite ug sa mga katawhan ni Limhi” (Mosiah 21:22).

Dapita ang mga estudyante sa pagsulti og mga baruganan nga ilang nakat-unan gikan sa kasaysayan sa mga katawhan ni Limhi. Bisan og ang mga estudyante makigbahin og lain-laing mga baruganan, siguroha nga ilang nasabtan nga kon kita mopaubos sa atong mga kaugalingon, motawag diha sa ngalan sa Ginoo, ug mohinulsol sa atong mga sala, Siya motubag sa atong mga pag-ampo ug mopagaan sa palas-anon sa atong mga sala diha sa Iyang kaugalingong panahon. (Mahimo nimong isulat sa pisara kini nga baruganan. Mahimo usab nimong dapiton ang mga estudyante sa pagsulat niini diha sa ilang mga kasulatan tupad sa Mosiah 21:15–16 o diha sa ilang mga scripture study journal o mga class notebook.)

Sa inyong hunahuna sa unsa nga paagi kita mahimong makabenepisyo gikan sa paghulat sa Ginoo nga moluwas kanato gikan sa palas-anon sa atong mga sala?

Aron matabangan ang mga estudyante sa paggamit unsay ilang nakat-unan, hatagi sila og pipila ka higayon sa pagpamalandong sa mosunod nga mga pangutana ug sa pagsulat og mga tubag diha sa ilang mga scripture study journal. (Mahimo nimong isulat ang mga pangutana diha sa pisara.)

Unsay inyong gibuhat sa pagpangayo sa gahum sa Ginoo sa pagluwas gikan sa inyong mga sala?
Sa unsa nga mga paagi ikaw “gipauswag sa hinay-hinay” sa diha nga kamo nangayo sa panabang sa Ginoo?

Mosiah 21:23–22:16

Nagtinabangay si Limhi, Ammon, ug Gideon sa pagtabang sa mga katawhan sa paglingkawas gikan sa pagkaulipon ug sa pagbalik ngadto sa Zarahemla

Pahinumdom: Mahimo nimong pahinumduman ang mga estudyante nga ang Mosiah 7 ug 8 naglakip sa kasaysayan ni Ammon ug sa iyang mga kaigsoonan sa pagpangita ni Haring Limhi ug sa iyang mga katawhan. Ang sunod nga 14 ka mga kapitulo, Mosiah 9–22, nag-asoy og balik sa kasaysayan sa mga katawhan ni Limhi, nagsugod sa mga 80 ka tuig sa wala pa sila hikaplagi ni Ammon. Kini nga kasaysayan nagtapos uban sa pag-istorya og usab sa pipila ka mga panghitabo nga gihisgutan sa miaging mga kapitulo. Tungod niini nga rason, kadaghanan sa sulod sa Mosiah 21:23–30 gihisgutan diha sa mga leksyon sa Mosiah 7–8 ug Mosiah 18. Aron matabangan ang mga estudyante sa paghinumdom sa mga panghitabo nga girekord diha sa Mosiah 21:23–30, mahimong makatabang ang pagribyu og daklit sa kinatibuk-ang pagpasabut sa mga panaw sa Mosiah 7–24 diha sa appendix sa katapusan niini nga manwal.

Pahinumdumi ang mga estudyante nga ang mga katawhan ni Limhi nakaila nga ang ilang mga kasakit miabut tungod kay ilang gisalikway ang pagdapit sa Ginoo sa paghinulsol (tan-awa sa Mosiah 12:1–2; 20:21). Uban niini nga pag-ila sa ilang mga sala, ang mga katawhan ni Limhi misugod sa proseso sa paghinulsol ug pagkakabig. Ipakigbahin ang mosunod nga pagpatin-aw sa paghinulsol:

“Ang [Paghinulsol] mahinungdanon kini sa imong kalipay niini nga kinabuhi ug hangtud sa kahangturan. Ang paghinulsol mas labaw pa kay sa pag-ila lamang sa sayop nga mga binuhatan. Usa kini ka kausaban sa hunahuna ug sa kasingkasing. … Naglakip kini sa pagpalayo sa sala ug pagpaduol sa Dios alang sa kapasayloan. Naaghat kini tungod sa gugma alang sa Dios ug sa kinasingkasing nga tinguha sa pagsunod sa Iyang mga sugo” (Matinud-anon sa Tinuhoan: Usa ka Pakisayran sa EbanghelyoTrue to the Faith: A Gospel Reference [2004], 128–129).

Dapita ang mga estudyante sa pagbasa og hilum sa Mosiah 21:32–35. Ipaila kanila ang mga pulong ug mga hugpong sa mga pulong nga nagpakita nga si Limhi ug ang iyang mga katawhan mihinulsol ug mibalik sa ilang mga kasingkasing ngadto sa Ginoo. Mahimo nimong isugyot nga ilang markahan kini nga mga pulong ug mga hugpong sa mga pulong. Dapita ang pipila ka mga estudyante sa pagpakigbahin unsay ilang nakit-an. (Ang ilang mga tubag kinahanglan nga mag-apil nga si Limhi ug daghan sa iyang mga katawhan misulod ngadto sa usa ka pakigsaad sa pag-alagad sa Dios ug sa paghupot sa Iyang mga sugo, nga sila mitinguha sa pagpabunyag, ug nga sila andam sa pag-alagad sa Dios uban sa ilang tibuok nga mga kasingkasing.

Ang mosunod nga kalihokan motabang sa mga estudyante sa pagkat-on nga ang Ginoo mitabang sa mga katawhan ni Limhi sa paglingkawas sa pagkaulipon samtang sila mituman sa ilang pakigsaad sa pag-alagad Kaniya ug sa paghupot sa Iyang mga sugo. Isulat ang mosunod nga mga pangutana ug ang mga scripture reference diha sa pisara sa wala pa ang klase:

Sa unsa nga paagi nga ang pag-abut ni Ammon ug sa iyang mga kaigsoonan usa ka tubag sa mga pag-ampo sa mga katawhan ni Limhi? (Tan-awa sa Mosiah 7:14–15, 18–20; 21:14–15, 22–24.)

Agi og dugang sa pagpangayo sa panabang sa Ginoo pinaagi sa pag-ampo, unsa ang gibuhat sa mga katawhan ni Limhi, uban sa pagpangulo gikan ni Gideon, aron maluwas? (Tan-awa sa Mosiah 21:36; 22:1–10.)

Unsa nga mga detalye niini nga mga bersikulo ang nagpakita nga ang Ginoo mitabang sa mga katawhan ni Limhi sa paglayas nga luwas? (Tan-awa sa Mosiah 22:11–16; 25:15–16.)

Bahina ang mga estudyante ngadto sa tulo ka mga grupo. Paandama ang matag grupo sa pagtubag sa usa sa mga pangutana diha sa pisara pinaagi sa pagtuon sa nag-uban nga mga scripture passage. Human sa pipila ka minuto, dapita ang usa ka estudyante gikan sa matag grupo sa pagreport sa ilang mga tubag nga ilang naandam. Kini mahimo usab nga maayong higayon nga padugangan sa mga estudyante og “Mga katawhan ni Limhi milayas” ngadto sa ilang mga diagram sa kinatibuk-ang pagpasabut sa mga panaw diha sa Mosiah 7–24. (Alang sa kompleto nga diagram, tan-awa ang appendix diha sa katapusan niini nga manwal.) Mahimo usab nimong ipa-refer sa mga estudyante ang bookmark sa Basahon ni Mormon aron mahibaloan kon unsay mahitabo sa kadugayan sa mga katawhan ni Limhi (tan-awa sa Mosiah 22:13–14).

Ipasabut nga samtang kita tingali wala manginahanglan sa pagpangayo og kaluwasan gikan sa pisikal nga pagkaulipon sama sa gihimo sa mga katawhan ni Limhi, tanan kita nanginahanglan og kaluwasan gikan sa sala.

Unsa ang inyong nakat-unan gikan sa Mosiah 21–22 nga mohatag og pag-awhag ngadto ni bisan kinsa nga nanginahanglan nga makasinati sa gahum sa Ginoo sa pagluwas kanato gikan sa sala?

Taposa pinaagi sa paghatag sa imong pagpamatuod sa gahum sa Ginoo sa pagluwas kanato gikan sa sala. Hatagi og gibug-aton nga kon kita mopaubos sa atong mga kaugalingon, motawag diha sa ngalan sa Ginoo, ug mohinulsol sa atong mga sala, Siya motubag sa atong mga pag-ampo ug mopagaan sa palas-anon sa atong mga sala diha sa iyang kaugalingong panahon.

Komentaryo ug Background nga Impormasyon

Mosiah 21:15, 29–30. Ang pag-antus nga moabut tungod sa sala adunay katuyoan

Kon kita makasala ug modumili sa paghinulsol, sama sa mga katawhan ni Haring Limhi, magdala kita sa atong mga kaugalingon og dugang nga sakit—usahay pisikal ug kanunay espiritwal. Mipasabut si Elder Kent F. Richards sa Seventy kon sa unsa nga paagi ang sakit mahimong kinahanglanong bahin sa atong espiritwal nga pagkaayo ug pagtubo.

“Ang sakit mao ang sukdanan sa proseso sa pagkaayo. Sa kanunay nagtudlo kini kanato og pasensya. …

Si Elder Orson F. Whitney misulat: “Walay sakit nga atong naantus, walay pagsulay nga atong nasinati ang nakawang. Kini nakapakat-on kanato, sa pagpalambo sa mga kinaiya sama sa pagpasensya, hugot nga pagtuo, kalig-on, ug pagkamapainubsanon. … Pinaagi kini sa kasubo ug pag-antus, kahago ug kalisdanan, nga kita makakuha sa edukasyon nga atong gianhi dinhi aron maangkon.’

“Susama usab, si Elder Robert D. Hales nag-ingon:

“‘Ang sakit makahimo kaninyo nga magpaubos nga nagtugot kaninyo sa pagpamalandong. Kini usa ka kasinatian nga ako mapasalamaton nga nakalahutay. …

“‘Akong nakat-unan nga ang pisikal nga sakit ug ang pagkaayo sa lawas … susama gayud sa espiritwal nga sakit ug pagkaayo sa kalag diha sa proseso sa paghinulsol’” (“Ang Pag-ula Moayo sa Tanang Kasakit” Ensign o Liahona, Mayo 2011, 15).

Mosiah 21:15–16. Unsa ang inyong mga kinaiya sa panahon sa mga kasakit?

Gitudlo ni Elder Richard G. Scott sa Korum sa Napulog Duha ka mga Apostoles ang mahitungod sa mga kinaiya nga atong kinahanglan nga tinguhaong likayan ug ang mga kinaiya nga atong tinguhaong ipalambo sa panahon sa atong mga kasakit:

“Ang Ginoo mohatag og kahupayan nga may balaang gahum kon kamo mangayo og kaluwasan diha sa pagpaubos ug hugot nga pagtuo diha ni Jesukristo.

“Ayaw pag-ingon, ‘Walay usa nga nakasabut kanako; Dili ako makagawas niini o makakuha sa tabang nga akong gikinahanglan.’ Kadto nga mga komentaryo dili makaayo sa kaugalingon. Walay usa nga makatabang kaninyo nga walay hugot nga pagtuo ug paningkamot diha sa inyong bahin. Ang inyong personal nga pagtubo nagkinahanglan niana. Ayaw pagpangita og kinabuhi nga sa pagkatinuod luwas gikan sa kalisud, sakit, kabug-at, hagit, o kaguol, kay kadto mao ang mga himan nga gigamit sa usa ka mahigugmaong Amahan sa pagpadasig sa atong personal nga pagtubo ug pagsabut. Ingon nga gibalik-balik sa pagpanghimatuod sa mga kasulatan, kamo tabangan samtang kamo naggamit og hugot nga pagtuo diha ni Jesukristo. … Ang hugot nga pagtuo diha ni Jesukristo nagpasabut nga kita mosalig Kaniya; kita mosalig sa Iyang mga pagtulun-an. Kana mogiya ngadto sa paglaum, ug ang paglaum nagdala og putli nga gugma, ang putli nga gugma ni Kristo—kanang malinawon nga pagbati nga moabut kon atong mabati ang Iyang kabalaka, Iyang gugma, ug Iyang kapasidad sa pag-ayo kanato o sa pagpagaan sa atong mga palas-anon uban sa Iyang makapang-ayo nga gahum” (“To Be Healed,” Ensign, Mayo 1994, 8).