3 Nephi 2–5

Pasiuna

Pagkahuman nga nakita sa mga tawo ang mga timailhan sa pagkatawo ni Jesukristo, misugod sila sa pagkaanam og kakulang sa pagkahibulong sa mga timailhan, ug mipatig-a sila sa ilang mga kasingkasing. Daghan sa mga tawo ang misalikway sa dugang nga mga timailhan ug mga katingalahan ug misamut sa pagkadautan. Isip resulta, ang mga tulisan ni Gadianton milig-on pag-ayo nga ang mga Nephite ug Lamanite napugos sa paggamit sa mga hinagiban batok kanila. Ang nakabig nga mga Lamanite miapil sa mga Nephite ug nailhan isip mga Nephite. Si Lachoneus, ang labaw nga maghuhukom sa mga Nephite, nanawagan sa mga katawhan sa paghinulsol ug miandam kanila alang sa pakiggubat. Tungod sa ilang paghinulsol, sa ilang hugot nga pagtuo sa Ginoo, ug sa ilang makugihon nga pagpangandam, ang mga Nephite nagmadaugon batok sa mga tulisan ni Gadianton. Pagkahuman nga sila naluwas, ang mga tawo miila sa gahum sa Dios sa pagtagana kanila.

Mga Sugyot alang sa Pagtudlo

3 Nephi 2

Ang nakabig nga mga Lamanite nakighiusa sa mga Nephite sa pagpanalipod sa ilang mga kaugalingon batok sa mga tulisan ni Gadianton

Dapita ang mga estudyante sa paggahin og pipila ka mga minuto sa paglista og pipila sa ilang espirituhanong mga kasinatian diha sa mga notebook o scripture study journal. Pahinumdumi sila nga ang espirituhanong mga kasinatian dili kinahanglan nga madrama o talagsaon aron mahimong makahuluganon. Isugyot nga ilang pamalandungan ang mga panahon nga ilang nabati ang gugma sa ilang Langitnong Amahan o ang impluwensya sa Espiritu Santo. Sama pananglit, tingali magsulat sila mahitungod sa ilang mga nasinati sa dihang nakadawat sila og tubag sa pag-ampo, dihang nakadawat sila og mga panalangin sa priesthood, o dihang sila miserbisyo sa uban. Kon mahuman na sila sa pagsulat, pangutan-a sila kon nganong importante nga hinumduman kining espirituhanong mga kasinatian karon ug sa umaabut nga 10 o 20 ka tuig.

Dapita ang usa ka estudyante sa pagbasa og kusog sa 3 Nephi 2:1–3. Hangyoa ang klase sa pagsunod, nga mangita kon unsa ang nahitabo dihang ang mga tawo misugod sa paghikalimot sa mga timailhan kalabut sa pagkatawo sa Manluluwas.

Unsa nga mga kamatuoran ang gitudlo niining istorya ngari kanato mahitungod sa kakuyaw sa paghikalimot sa espirituhanong mga kasinatian?

Samtang mopakigbahin ang mga estudyante sa mga kamatuoran nga ilang natino, ipasabut og maayo ang mosunod nga baruganan: Kon kita makalimot sa nangagi nga espirituhanong mga kasinatian, mabantang kita sa mga tintasyon ug mga panglingla ni Satanas. Mahimo nimong isulat sa pisara kini nga baruganan. Mahimo usab nimong awhagon ang mga estudyante sa pagsulat niini diha sa ubos sa ilang mga lista sa espirituhanong mga kasinatian.

Ngano kaha nga ang pagkalimot sa espirituhanong mga kasinatian makapabantang nato ngadto ni Satanas?
Unsay atong mabuhat aron masiguro nga dili nato makalimtan ang atong espirituhanong mga kasinatian? (Ang mga tubag mahimong maglakip sa pagpakigbahin og mga kasinatian kon angay, ang pagsulat diha sa personal nga journal, o pagrekord sa mga kasinatian gikan sa Katungdanan ngadto sa Dios o sa Personal nga Kauswagan nga mga kalihokan.)

Dapita ang usa ka estudyante sa pagbasa sa mosunod nga pamahayag, diin si Presidente Henry B. Eyring sa Unang Kapangulohan mipasabut kon sa unsang paagi nga ang pagrekord sa espirituhanong mga kasinatian sa usa ka journal nakatabang kaniya. Hangyoa ang klase sa pagpaminaw sa mga panalangin nga moabut gumikan sa pagtipig og usa ka rekord.

“Nagsulat ako og pipila ka mga linya matag adlaw sulod sa mga katuigan. Wala akoy gisal-angan nga adlaw bisan kon unsa ako kakapoy o unsa ako kasayo mosugod pagka-ugma. Sa dili pa ako mosulat, ako mamalandong sa pangutana: ‘Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?’ Samtang nagpadayon ako paghimo niini, adunay butang nga misugod og hitabo. Samtang naghanduraw sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo nga wala nako namatikdi sa kabise nianang adlawa. Samtang kana nahitabo, ug kana sagad nanghitabo, akong nasabtan nga ang pagsulay og paghinumdom naghatag og higayon sa Dios sa pagpakita kanako unsay Iyang gibuhat.

“Labaw pa kay sa pagpasalamat ang misugod sa paglambo sa akong kasingkasing. Ang pagpamatuod milambo. Nahimo ako nga labaw ka sigurado nga ang atong Langitnong Amahan nakadungog ug nagtubag sa mga pag-ampo. Akong gibati ang labaw nga pagpasalamat alang sa pagpahumok ug sa paglimpyo sa kasingkasing nga miabut tungod sa Pag-ula sa Manluluwas nga si Jesukristo. Ug midako ang akong pagsalig nga ang Espiritu Santo makapahinumdom nato sa tanang butang—bisan sa mga butang nga wala nato namatikdi o tagda sa dihang kini nanghitabo” (“O Hinumdumi, Hinumdumi,” Ensign o Liahona, Nob. 2007, 67).

Dapita ang mga estudyante sa pagpakigbahin kon sa unsang paagi nga ang paghinumdom sa espirituhanong mga kasinatian—pinaagi sa pagsulat sa journal o sa laing mga paagi—nakatabang kanila nga magpabiling matinud-anon, bisan sa paningkamot ni Satanas sa pagtintal o sa paglingla kanila.

I-summarize ang 3 Nephi 2:4–19 pinaagi sa pagpasabut nga samtang ang mga katawhan mipadayon sa ilang pagkadautan, ang mga tulisan ni Gadianton nanaghan ug nagkalig-on. Ang mga tulisan ni Gadianton nahimong mas bayolente ang kaagresibo, ug ang nakabig nga mga Lamanite nagtambayayong uban sa mga Nephite sa pagpakig-away batok kanila. Bisan kon sila nakaangkon og kalampusan sa pagpapahawa sa mga tulisan ni Gadianton gikan sa ilang mga yuta, ang mga Nephite (uban sa nakabig nga mga Lamanite, nga karon gitawag na og mga Nephite) anaa gihapon sa makuyaw nga kahimtang 15 ka tuig human nakita ang mga timailhan sa pagkatawo ni Jesukristo.

3 Nephi 3:1–10

Ang lider sa mga mga tulisan ni Gadianton mimando nga motahan ang mga Nephite

Ipasabut nga sa 3 Nephi 3:1–10, atong makita ang usa ka ehemplo kon sa unsang paagi nga usahay ang kaaway motrabaho pinaagi sa uban aron sa pagsulay sa pagpahuyang sa atong pagtuo ug mopahisalaag kanato. Si Giddianhi, ang lider sa mga tulisan ni Gadianton, misulat ngadto ni Lachoneus, ang labaw nga maghuhukom sa mga Nephite, aron sa pag-agni kaniya sa pagtahan ngadto sa mga tulisan ni Gadianton.

Isulat sa pisara ang Si Giddianhi mitintal ni Lachoneus. Hangyoa ang katunga sa klase sa pagbasa og hilum sa 3 Nephi 3:2–5 ug ang laing katunga sa klase sa pagbasa og hilum sa 3 Nephi 3:6–10. Samtang nagbasa ang mga estudyante, ipapangita nila ang mga pulong nga naghulagway sa mga taktika nga gigamit ni Giddianhi sa pagsulay sa pagpahuyang sa pagtuo ni Lachoneus ug sa pagpahisalaag kaniya. Human og basa sa mga estudyante, hangyoa sila sa pagreport kon unsay ilang nakit-an. Dapita ang usa ka estudyante sa pagsulat sa ilang mga tubag diha sa pisara.

Sa pag-summarize sa mga taktika nga nailhan sa mga estudyante sa 3 Nephi 3:2–10, isulat ang mosunod nga kamatuoran diha sa pisara ubos sa lista sa mga estudyante: Si Satanas ug ang iyang mga sumusunod kanunay nga naggamit og ulog-ulog, bakak nga mga saad, ug mga hulga aron sa pagpahisalaag sa mga tawo. Dapita ang mga estudyante sa pagpili og usa sa mga taktika ni Giddianhi nga nasulat sa pisara ug ipasabut kon sa unsang paagi nga si Satanas ug ang iyang mga sumusunod tingali mogamit og susama nga taktika ngadto sa kabatan-onan karon. Aron matabangan ang mga estudyante sa pagsusi sa pipila niining mga pagkompara, mahimo kang mangutana sama sa mosunod:

Unsa ang pipila ka mga ehemplo kon unsaon paggamit sa kaaway ang pag-ulog-ulog (dili sinsero o sobrang pagdayeg) sa kabatan-onan karon? Unsa ang pipila ka mga bakak nga mga saad o walay pulos nga mga hulga nga mahimong gamiton sa kaaway? Sa unsa kahang paagi nga ang kabatan-onan makabatok niining mga taktika?

3 Nephi 3:11–5:7

Ang mga katawhan ni Lachoneus nangandam sa pagpanalipod sa ilang kaugalingon, ug sila milupig sa mga tulisan ni Gadianton

Dapita ang usa ka estudyante sa pagbasa og kusog sa 3 Nephi 3:11–12. Hangyoa ang klase sa pagsunod, nga mangita kon giunsa ni Lachoneus pagtubag ang makapahulga nga sulat ni Giddianhi.

Unsa nga mga kamatuoran ang atong makat-unan sa paagi sa pagtubag ni Lachoneus ngadto ni Giddianhi? (Usa ka kamatuoran nga tingali mahibaloan sa mga estudyante mao nga ang matarung nga mga lalaki ug babaye dili angayng mahadlok sa dautan ug kinahanglang dili magpadala sa ilang mga panghulga.)

Bahina ang klase ngadto sa upat ka grupo. Hatagi ang matag grupo og usa ka dakong piraso sa papel. Ipabahin-bahin sa grupo ang ilang mga papel sa duha ka kolum, ang usa sulatan og Pagpangandam ni Lachoneus ug ang lain sulatan og Modernong Pagkasusama. Isulat ang mosunod nga mga tudling sa kasulatan diha sa pisara, ug mag-assign og usa sa matag grupo: 3 Nephi 3:12–15; 3 Nephi 3:16–21; 3 Nephi 3:22–26; 3 Nephi 4:1–4. Dapita ang mga estudyante sa pagbasa sa ilang naka-assign nga mga bersikulo, nga mangita sa mga paagi nga si Lachoneus miandam sa iyang mga katawhan sa espiritwal ug pisikal nga paagi sa pagbuntog sa pag-ataki sa mga tulisan ni Gadianton. Ubos sa Pagpangandam ni Lachoneus, ipasulat sa usa ka estudyante nga gikan sa matag grupo kon unsa ang gibuhat sa mga tawo aron maandam. (Pahinumdom: Samtang ang mga estudyante magtuon niini nga mga bersikulo, siguroa nga sila makaila sa kalainan tali ni Giddianhi, ang lider sa mga tulisan ni Gadianton, ug ni Gidgiddoni, ang bantugan nga propeta ug labaw nga kapitan sa mga Nephite.)

Human ang mga estudyante adunay igong panahon sa pagkompleto sa ilang mga lista ubos sa Pagpangandam ni Lachoneus, dapita sila sa paglista ubos sa Modernong mga Pagkasusama ang espiritwal ug temporal nga mga pagpangandam nga kita gitambagan sa paghimo sa ulahing mga adlaw. Kon ang mga estudyante nakagahin na og igong panahon sa pagkompleto niini nga buluhaton, pagdapit og usa ka estudyante gikan sa matag grupo sa pagpakigbahin sa klase kon unsa ang nakat-unan sa iyang grupo. Aron matabangan ang mga estudyante sa pagtino kon unsaon nila paggamit sa unsay ilang nakat-unan, ipangutana ang sama sa mosunod atol sa o human sa ilang mga pasundayag:

Sa unsang paagi nato mapalig-on ang atong mga panimalay batok sa mga pag-ataki sa kaaway?
Ngano nga ang temporal nga mga pagpangandam—sama sa pag-angkon og edukasyon ug home storage—importante sa katapusang mga adlaw?
Sa unsang paagi nga ang pagpundok diha sa mga pamilya ug sa mga ward o sa mga branch makahatag og proteksyon alang kanato?
Kanus-a man nga ang pag-ampo nakatabang kaninyo nga makaangkon og espirituhanong kalig-on?
Sa unsang paagi nga ang paghinulsol nag-andam kanato alang sa umaabut?
Unsa nga mga panalangin ang moabut samtang kita mosunod sa buhing mga propeta ug mga apostoles?
Unsaon nato pagdapit ang espiritu sa pagpadayag sa atong kinabuhi?

Dapita ang pipila ka estudyante nga magpuli-puli sa pagbasa og kusog sa 3 Nephi 4:7–12. Hangyoa ang klase sa pagsunod, nga mangita sa mga paagi nga ang mga katawhan napanalanginan tungod sa ilang espirituhaon ug temporal nga pagpangandam.

Unsa nga mga kamatuoran ang inyong nakat-unan gikan niini nga istorya? (Samtang ang mga estudyante mopakigbahin sa ilang mga tubag, ipasabut og maayo ang mosunod nga baruganan: Samtang nangandam kita sa espiritwal ug temporal nga paagi, ang Ginoo mopalig-on kanato sa pagbuntog sa mga hagit.)

I-summarize ang 3 Nephi 4:13–29 pinaagi sa pagpasabut nga si Lachoneus ug ang iyang mga katawhan mibuntog sa mga tulisan ni Gadianton ug mipatay sa ilang mga lider. Basaha og kusog ang 3 Nephi 4:30–33. Hangyoa ang klase sa pagsunod, nga mangita kon unsay reaksyon sa mga tawo niining kadaugan.

Unsay reaksyon sa mga tawo human ang Ginoo mitubos kanila gikan sa ilang mga kaaway?
Unsay giila sa mga tawo nga hinungdan sa ilang pagkatubos gikan sa mga tulisan ni Gadianton? (Ang ilang paghinulsol ug pagpaubos ug ang kaayo sa Dios. Mahimo nimong ipasabut nga samtang maghinulsol ug magpaubos kita sa atong kaugalingon, ang Dios mopaluyo ug motubos kanato gikan sa atong mga pagsulay.)

Mahimo kang mopakigbahin og kasinatian nga misalig ka sa Dios ug Siya mitabang kanimo sa paglahutay o pagbuntog sa usa ka pagsulay. Mahimo usab nimong dapiton ang usa o duha ka mga estudyante sa pagpakigbahin og ingon nga kasinatian.

Dapita ang usa ka estudyante sa pagbasa og kusog sa 3 Nephi 5:1–4. Hangyoa ang klase sa pagsunod, nga mangita kon unsay gibuhat sa mga Nephite isip resulta sa tabang ug mga panalangin nga ilang nadawat sa ilang pakiggubat batok sa mga tulisan ni Gadianton. Samtang mopakigbahin ang mga estudyante sa unsay ilang nakit-an, ipasabut og maayo nga usa sa mga reaksyon sa mga tawo mao ang pagsangyaw sa ebanghelyo ngadto sa uban.

3 Nephi 5:8–26

Ang kalinaw napahiuli diha sa mga katawhan; si Mormon mipasabut sa iyang pagminubo sa mga rekord

Sultihi ang mga estudyante nga ang nahibilin sa 3 Nephi 5 naglangkob sa mga pagpasabut ni Mormon kon nganong iyang giminubo kining rekord. Dapita ang mga estudyante sa pagbasa og hilum sa 3 Nephi 5:12–15, nga mangita kon unsa ang gisulti ni Mormon mahitungod sa iyang responsibilidad sa pagsulat og usa ka pagminubo sa mga rekord sa mga Nephite.

Unsa nga kamatuoran ang inyong nakat-unan gikan niini nga mga bersikulo nga naghulagway sa atong responsibilidad isip mga disipulo ni Jesukristo? (Bisan og ang mga estudyante mahimong mogamit og lain-laing mga pulong, kinahanglan silang mahibalo sa mosunod nga kamatuoran: Isip mga disipulo ni Jesukristo, kita adunay responsibilidad sa pagtudlo sa uban sa agianan padulong sa kinabuhing dayon. Mahimo nimong isulat kining kamatuoran diha sa pisara.)

Ipasabut nga usa sa labing importante nga mga paagi nga makapakita kita sa atong pagpasalamat ngadto sa Ginoo alang sa mga panalangin nga Iyang gihatag kanato mao ang pagtabang sa uban nga moduol Kaniya ug pagdawat niadtong sama nga mga panalangin. Hangyoa ang mga estudyante sa pagsugyot og pipila ka mga paagi nga sila, isip mga disipulo ni Jesukristo, makatudlo sa uban sa agianan padulong sa kinabuhing dayon. Awhaga ang mga estudyante sa pagpili og usa o duha niining mga sugyot alang sa pagpakigbahin sa ebanghelyo ug mainampuon nga magtinguha sa tabang sa Ginoo sa pagbuhat sa unsay ilang pilion nga buhaton.

Komentaryo ug Background nga Impormasyon

3 Nephi 2:15. “Ang ilang tunglo gikuha gikan kanila”

Alang sa tabang sa pagsabut sa tunglo nga gibutang ngadto sa mga Lamanite, tan-awa ang pamahayag ni Presidente Joseph Fielding Smith sa leksyon 27, ubos sa ideya sa pagtudlo sa 2 Nephi 5:19–25. Tan-awa usab sa mga komentaryo ug background nga impormasyon alang sa Alma 3:6–17 sa katapusan sa leksyon 70.

3 Nephi 2:5–8. Nephite calendars

Sa tibuok nilang kasaysayan, ang mga Nephite migamit og tulo ka lain-laing mga punto sa pakisayran alang sa pagsukod sa panahon sa ilang kalendaryo: (1) sa panahon nga si Lehi mibiya sa Jerusalem; (2) sa panahon dihang ang pangagamhanan miusab gikan sa mga hari ngadto sa mga maghuhukom; ug (3) sa panahon nga gihatag ang mga timailhan sa pagkatawo ni Jesukristo. Wala gayud mahibaloi sa tukma kon kanus-a ang mga Nephite misugod sa pagrekord sa ilang kalendaryo gikan sa panahon sa pagkatawo ni Jesukristo, apan si Mormon nahibalo niining kausaban sa 3 Nephi 2:7–8.

Timaan sa Pagsugod	Bana-bana kon Kanus-a Gigamit	Scripture Block
Gikan sa panahon nga si Lehi mibiya sa Jerusalem	600–92 B.C.	1 Nephi 1–Mosiah 29
Gikan sa panahon dihang ang gobyerno miusab gikan sa mga hari ngadto sa mga maghuhukom	92 B.C.–A.D. 1	Mosiah 29–3 Nephi 1
Gikan sa panahon nga gihatag ang mga timailhan sa pagkatawo ni Jesukristo	A.D. 1–421	3 Nephi 1–Moroni 10