Pasiuna sa Basahon ni Jacob
Ngano nga kinahanglang tun-an kini nga basahon?
Pinaagi sa pagtuon sa basahon ni Jacob, makakat-on ang mga estudyante og importanting mga leksyon gikan sa usa ka tawo kinsa adunay dili matarug nga pagtuo diha ni Jesukristo. Mibalik-balik si Jacob og pagpamatuod bahin sa Manluluwas ug midapit sa iyang mga katawhan ug niadtong kinsa mobasa sa iyang mga pulong nga maghinulsol. Mitudlo ug mipahayag siya sa kaimportante sa makugihong pagtuman sa mga calling gikan sa Ginoo. Mipasidaan siya sa iyang mga katawhan batok sa mga kakuyaw sa garbo, mga katigayunan, ug imoralidad. Mikutlo ug mikomentaryo usab si Jacob sa sambingay ni Zenos sa mga kahoy nga oliba, diin naghulagway sa walay pagkaluya nga paningkamot sa Manluluwas nga mopahigayon sa kaluwasan sa tanang mga anak sa Dios ug naghatag og usa ka overview sa mga pakiglabot sa Dios uban sa balay ni Israel. Sa iyang pakigharong batok ni Sherem nga usa ka anti-Kristo, si Jacob mipahayag kon unsaon pagtubag sa matarung nga paagi niadtong kinsa mosukitsukit o mosaway sa atong pagtuo.
Kinsa ang nagsulat niini nga basahon?
Si Jacob, ang ikalimang anak nga lalaki ni Sariah ug Lehi, ang misulat niini nga basahon. Natawo siya sa kamingawan atol sa panaw sa iyang pamilya padulong sa gisaad nga yuta. Sa iyang pagkabata, si Jacob “nag-antus sa mga kasakit ug hilabihan nga kasubo, tungod sa kapintas sa [iyang] igsoon nga mga lalaki” (2 Nephi 2:1). Hinoon, misaad si Lehi kang Jacob nga ang Dios “mopahinungod sa [iyang] mga kasakit alang sa [iyang] kaayohan” ug nga ang iyang mga adlaw magahin “sa pag-alagad sa [iyang] Dios” (2 Nephi 2:2–3). Sa iyang kabatan-on, nakakita si Jacob sa himaya sa Manluluwas (tan-awa sa 2 Nephi 2:3–4). Mipahinungod si Nephi kang Jacob nga mahimong usa ka pari ug magtutudlo sa mga Nephite (tan-awa sa 2 Nephi 5:26) ug sa wala madugay gisaligan siya sa gagmay nga mga palid ni Nephi (tan-awa sa Jacob 1:1–4). Isip usa ka matinud-anon nga lider sa priesthood ug magtutudlo, makugihong mitrabaho si Jacob sa pagdani sa iyang mga katawhan nga motuo kang Kristo (tan-awa sa Jacob 1:7). Nakadawat siya og mga pagpadayag kabahin sa Manluluwas, nakasinati sa pagpangalagad sa mga angel, nakadungog sa tingog sa Ginoo (tan-awa sa Jacob 7:5), ug nakakita sa iyang Manunubos (tan-awa sa 2 Nephi 11:2–3). Si Jacob mao ang amahan ni Enos, kang kinsa niya gisalig ang mga palid sa wala pa ang iyang kamatayon.
Ngadto kang kinsa kini nga basahon gisulat ug ngano?
Misugo si Nephi kang Jacob nga irekord ang sagrado nga mga pagtulun-an, mga pagpadayag, ug mga panagna “alang sa kaayohan ni Kristo, ug alang sa kaayohan sa atong mga katawhan” (Jacob 1:4). Misunod si Jacob niini nga sugo ug mipreserbar sa mga sinulat nga iyang “gihunahuna nga mao ang labi nga bililhon” (Jacob 1:2). Misulat siya: “Kami maghago nga makugihon sa pagkulit niini nga mga pulong diha sa mga palid, manghinaut nga ang among hinigugma nga mga kaigsoonan ug ang among mga anak modawat [niini] uban sa mapasalamaton nga mga kasingkasing. … Kay, alang niini nga katuyoan kami nakahimo sa pagsulat niini nga mga butang, nga sila unta masayud nga kami nasayud kang Kristo, ug kami adunay usa ka paglaum sa iyang himaya sa daghan nga gatusan ka mga tuig sa wala pa siya moanhi” (Jacob 4:3–4). Gishisgutan ni Jacob ang usa ka mahinungdanon nga tema sa iyang mga sinulat sa dihang miingon siya, “Kay ngano nga dili mamulong mahitungod sa pag-ula ni Kristo, ug mokab-ut ngadto sa hingpit nga kasayuran kaniya … ?” (Jacob 4:12).
Kanus-a ug asa man kini gisulat?
Ang basahon ni Jacob nagsugod duol sa 544 B.C., sa dihang gisalig ni Nephi kang Jacob ang gagmay nga mga palid. Natapos kini duol sa katapusan sa kinabuhi ni Jacob, sa dihang gipasa niya ang mga palid ngadto sa iyang anak nga si Enos. Misulat si Jacob niini nga rekord samtang nagpuyo didto sa yuta sa Nephi.
Unsa ang pipila sa kalainan niini nga basahon?
Ang basahon ni Jacob naghatag og impormasyon kabahin sa Nephite nga panggobyerno human sa kamatayon ni Nephi. Midihog si Nephi og usa ka tawo nga mosunod niya isip hari ug tigmando sa mga katawhan, samtang si Jacob ug ang iyang igsoon nga lalaki nga si Joseph mipadayon isip espirituhanong mga lider sa mga Nephite. Ang laing kalainan niini nga basahon mao ang pagpanghimaraut ni Jacob sa walay awtoridad nga pagbuhat sa dinaghan nga kaminyoon [pagpangasawa og daghan]. Ang bugtong pakisayran niini nga hilisgutan diha sa Basahon ni Mormon nahitabo diha sa Jacob 2. Ang basahon ni Jacob naglakip usab sa labing taas nga kapitulo diha sa Basahon ni Mormon, Jacob 5, diin naglangkob sa sambingay ni Zenos sa mga kahoy nga oliba. Agig dugang, ang basahon ni Jacob nagrekord sa unang higayon sa usa ka propeta diha sa Basahon ni Mormon nga direktang mipasidaan sa mga Nephite batok sa garbo—ang sala nga maoy nahimong hinungdan sa ilang pagkalaglag sa katapusan (tan-awa sa Jacob 2:12–22; Moroni 8:27). Nagrekord usab kini sa unang pagpakita sa usa ka anti-Kristo taliwala sa mga Nephite.
Outline
Jacob 1 Misunod si Jacob sa sugo ni Nephi nga motipig og usa ka sagrado nga rekord. Namatay si Nephi. Nangalagad si Jacob ug Joseph taliwala sa mga katawhan, nagtudlo kanila sa pulong sa Dios.
Jacob 2–3 Namulong dapit sa templo, nagpasidaan si Jacob sa mga Nephite batok sa garbo, paghigugma sa mga katigayunan, ug imoralidad.
Jacob 4–6 Mipamatuod si Jacob ni Kristo ug mikutlo sa sambingay ni Zenos sa mga kahoy nga oliba. Nag-awhag siya sa iyang mga katawhan nga maghinulsol, modawat sa kalooy sa Ginoo, ug mangandam alang sa paghukom.
Jacob 7 Uban sa tabang sa Ginoo, gilibug ni Jacob si Sherem, usa ka anti-Kristo. Naghisgot siya sa mga panagbangi tali sa mga Nephite ug mga Lamanite ug gipasa ang gagmay nga mga palid ngadto kang Enos.