Leksyon 54

Mosiah 4

Pasiuna

Natandog sa mga pagtudlo ni Haring Benjamin, ang mga katawhan naghinulsol ug nakadawat og kapasayloan sa ilang mga sala. Sila “napuno sa hingpit nga kalipay” ug nagbaton og “kalinaw sa ilang tanlag”(Mosiah 4:3). Mipadayon si Haring Benjamin sa pagtudlo kanila, nagtabang kanila sa pagsabut unsay ilang kinahanglan gayud nga buhaton aron “magbaton sa kapasayloan sa [ilang] mga sala” (Mosiah 4:12). Sa pagbuhat sa ingon, iyang gitandi sila ngadto sa mga makililimos, nagsalig sa Dios alang sa kaluwasan. Gipasidan-an usab sila sa kuyaw sa kawalay pagtagad og bantay sa ilang mga hunahuna, mga pulong, ug mga buhat.

Mga Sugyot alang sa Pagtudlo

Mosiah 4:1–8

Ang mga katawhan ni Haring Benjamin nakadawat og kapasayloan sa ilang mga sala ug napuno sa hingpit nga kalipay ug kalinaw

Hangyoa ang mga estudyante sa pagpamalandong sa mosunod nga pangutana:

• Unsaon nato sa pagkahibalo nga kita napasaylo sa atong mga sala?

Basaha ang mosunod nga pamahayag ni Presidente Harold B. Lee:

“Kon ang panahon moabut nga kamo nakabuhat sa tanan nga inyong mahimo sa paghinulsol sa inyong mga sala, bisan kinsa kamo, bisan hain kamo, ug mihimo og mga kausaban ug mipahiuli sa labing maayo kutob sa inyong mahimo; kon kini usa ka butang nga makaapekto sa inyong kahimtang diha sa Simbahan ug kamo miduol sa tukma nga mga awtoridad, niana gusto ninyo ang panghimatuod nga tubag kon kamo gidawat ba sa Ginoo o wala. Sa inyong pagsiksik sa kaugalingon, kon kamo nagtinguha ug inyong nakaplagan ang kalinaw sa tanlag, pinaagi niana nga timaan kamo mahimong masayud nga ang Ginoo midawat sa inyong paghinulsol” (“Stand Ye in Holy Places,” Ensign, Hulyo 1973, 122).

Pahinumdumi ang mga estudyante nga gipakigbahin ni Haring Benjamin ang mga pulong sa usa ka anghel mahitungod sa unsa nga paagi makadawat og kapasayloan sa mga sala. Mahimo nimong pahinumduman sila sa piho nga paagi sa mga pulong sa anghel mahitungod sa kinaiyanhong tawo ingon nga kaaway sa Dios ug mahitungod sa mga sangputanan nga naghulat niadtong kinsa namatay nga walay paghinulsol sa ilang mga sala (tan-awa sa Mosiah 3:19, 23–27).

Hangyoa ang mga estudyante sa pagbasa og hilum sa Mosiah 4:1–2, nga mangita og mga hugpong sa mga pulong nga nagpakita kon giunsa sa mga katawhan ni Haring Benjamin pagtubag sa mga pulong sa anghel. Hangyoa nga ipakigbahin sa pipila ka mga estudyante ang mga hugpong sa mga pulong nga ilang nakit-an. Kon ang mga estudyante nanginahanglan og tabang sa pagsabut sa hugpong sa mga pulong “kalibutanon nga kahimtang,” ipasabut nga ang pulong kalibutanon mao ang kaatbang sa espirituhanon. Kini nagpasabut sa atong pisikal nga mga kaibug kay sa atong espirituhanong tinguha nga mas maduol ngadto sa Ginoo. Mahimo nimong hangyoon ang mga estudyante sa pagbasa sa Alma 41:11 ug dayon sa pagpasabut sa hugpong sa mga pulong “kalibutanon nga kahimtang” sa ilang kaugalingon nga mga pulong. Aron matabangan ang mga estudyante sa pagsabut sa hugpong sa mga pulong “ubos nga kahimtang kay sa abug sa yuta,” dapita sila sa pagbasa sa Helaman 12:4–8. Dayon hangyoa sila sa pagpasabut sa ilang kaugalingon nga mga pulong kon unsaon ang usa ka tawo kinsa midumili sa pagsunod sa tambag sa Ginoo mahimong ihulagway ingon nga ubos kay sa abug sa yuta. Siguroha nga ilang nasabtan nga ang Langitnong Amahan wala maghunahuna sa Iyang mga anak nga mahimong ubos kay sa abug sa yuta.

Ipasabut nga kon ang mga katawhan miila sa ilang pagkamakasasala, maghinulsol sila, nagpahayag sa ilang hugot nga pagtuo diha ni Jesukristo ug sa Iyang Pag-ula. Dapita ang mga estudyante sa pagbasa og kusog sa Mosiah 4:3. Hangyoa ang klase sa pagpaminaw kon sa unsa nga paagi ang mga katawhan nasayud nga sila napasaylo sa ilang mga sala.

• Sumala sa Mosiah 4:3, unsa nga mga pagbati ang moabut ngadto niadtong kinsa gipasaylo sa Ginoo?

• Nadawat sa mga katawhan ang kapasayloan sa ilang mga sala tungod sa “naghingapin nga hugot nga pagtuo nga sila aduna diha ni Jesukristo.” Unsa nga mga lihok ang nagpakita sa ilang hugot nga pagtuo? (Tan-awa sa Mosiah 4:1–2.)

• Sa inyong kaugalingon nga mga pulong, unsa ang atong nakat-unan gikan sa Mosiah 4:1–3 mahitungod sa pagdawat og kapasayloan sa atong mga sala? (Usa ka posible nga tubag mao nga kon mopakita kita og hugot nga pagtuo diha ni Jesukristo ug sa kinasingkasing maghinulsol, atong madawat ang kapasayloan sa atong mga sala. Mahimo nimong dapiton ang mga estudyante sa pagmarka sa importanting mga pulong diha sa Mosiah 4:1–3 nga naghatag og gibug-aton niini nga baruganan.)

Basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, nga nag-summarize kon unsay atong kinahanglan gayud nga buhaton aron madawat ang kapasayloan sa mga sala.

“Samtang kita matinuoron nga mokumpisal sa atong mga sala, mopahiuli sa unsay atong nahimo ngadto sa nasakitan, ug mobiya sa atong mga sala pinaagi sa pagsunod sa mga sugo, anaa kita sa proseso sa pagdawat og pagpasaylo. Uban sa panahon, bation nato ang kasakit sa atong kasubo nga nag-anam og kawala, nagkuha sa ‘mga kasaypanan gikan sa atong mga kasingkasing’ (Alma 24:10) ug nagdala og ‘kalinaw sa tanlag’ (Mosiah 4:3).

“Alang niadtong kinsa tinuod nga mahinulsulon apan daw wala mobati og kahupayan: padayon sa pagsunod sa mga sugo. Ako mosaad kaninyo, ang kahupayan moabut sa panahon nga gitakda sa Ginoo. Ang pagkaayo nagkinahanglan usab og panahon” (“Paghinulsol … Aron Ako Moayo Kaninyo,” Ensign o Liahona, Nob. 2009, 42).

Dapita ang mga estudyante sa pagsulat diha sa ilang mga scripture study journal o mga class notebook mahitungod sa unsay ilang nakat-unan mahitungod sa paghinulsol ingon sa ilang gihisgutan Mosiah 4:1–3. Hangyoa usab sila sa pagsulat mahitungod sa unsa nga paagi sila makapakita og hugot nga pagtuo diha ni Jesukristo samtang sila naningkamot og kapasayloan sa ilang mga sala.

Ipasabut nga human masaksihan ang mahinulsulong kinaiya sa mga katawhan, gipahinumduman sila ni Haring Benjamin sa ilang pagdepende sa Ginoo. Hangyoa ang pipila ka mga estudyante sa pagpuli-pulig basa og kusog gikan sa Mosiah 4:4–8. Hangyoa ang klase sa pagpangita sa unsay gusto ni Haring Benjamin nga masabtan sa iyang mga katawhan human nila nadawat ang kapasayloan sa ilang mga sala.

• Sumala niini nga mga bersikulo, unsa lamang ang “mga paagi diin [kita] mahimong maluwas”?

Human matubag sa mga estudyante kini nga pangutana, dapita sila sa pagribyu sa hilum sa Mosiah 4:4–8, mangita sa mga hugpong sa mga pulong nga naghulagway sa mga katawhan kinsa nagdawat og kaluwasan. Mahimo nimong isugyot nga markahan nila kini nga mga hugpong sa mga pulong. Ikonsiderar ang pagpangutana sa mosunod:

• Unsa sa imong hunahuna ang gipasabut sa “magmakugihon sa paghupot sa mga sugo [sa Ginoo]”?

• Unsa ang pipila sa mga lihok nga nagpakita nga ang usa ka tawo “nagbutang sa iyang pagsalig diha sa Ginoo”?

• Sa unsa nga mga paagi inyong nakita ang “kaayo sa Dios” ug ang Iyang “dili hitupngan nga gahum”?

Ipasabut nga ang paghinulsol ug pagkamasulundon nagkinahanglan og dakong buhat ug paningkamot sa atong bahin. Bisan pa niana, bisan unsaon nato pagpaninguha, dili gayud kita makadawat og kapasayloan sa atong mga sala ug sa gasa sa kaluwasan kon wala ang Pag-ula ni Jesukristo.

Mosiah 4:9–30

Nagtudlo si Haring Benjamin kon unsaon ang pagbaton og kapasayloan sa mga sala

Isulat ang pagbaton og kapasayloan sa atong mga sala diha sa pisara. Pahibaloa ang mga estudyante nga human ang mga katawhan nakadawat og kapasayloan sa ilang mga sala, si Haring Benjamin mitudlo kanila kon unsaon ang pagbaton, o paghupot, nianang limpyo ug putli nga kahimtang.

• Ngano nga importante alang sa matag usa kanato nga mahibalo?

Dapita ang mga estudyante sa pagpangita sa hilum sa Mosiah 4:9–11, nga mangita alang sa unsay atong kinahanglan gayud nga buhaton sa pagbaton og kapasayloan sa atong mga sala. Human sa igong panahon, ipakigbahin sa mga estudyante ang unsay ilang nakit-an. Ikonsiderar ang pagsulat sa ilang mga tubag diha sa pisara. Ang mga tubag mahimong mag-apil nga kita kinahanglan nga maghinumdom sa pagkahalangdon sa Dios, magpaubos sa atong mga kaugalingon, mag-ampo matag adlaw, ug magbarug nga makanunayon sa hugot nga pagtuo.

Hunahunaa ang pagpangutana sa mosunod aron sa pagtabang sa mga estudyante sa pagpalawom sa ilang pagsabut ug paggamit unsay ilang nabasa.

• Gitudlo ni Haring Benjamin nga kita kinahanglan gayud nga “motuo sa Dios” (Mosiah 4:9). Gipamulong usab niya ang pagtagamtan sa gugma sa Dios ug kanunay hinumduman “ang pagkahalangdon sa Dios” (Mosiah 4:11). Unsa nga mga kasinatian ang nakatabang kaninyo sa pag-amgo nga ang Dios tinuod ug gamhanan ug nga Siya nahigugma kaninyo?

• Sa unsa nga paagi nga ang paghinumdom sa gahum, kaayo, ug gugma sa Dios nag-impluwensya sa atong pagkaandam nga mosunod Kaniya?

Basaha og kusog ang Mosiah 4:12 ngadto sa mga estudyante. Hangyoa sila sa pag-ila dinhi niini nga bersikulo sa mga panalangin nga moabut ngadto niadtong kinsa nagbuhat sa unsay gitudlo diha sa Mosiah 4:5–11.

Ipasabut nga ang Mosiah 4:13–16 naglangkob og paghulagway ni Haring Benjamin sa mga katawhan kinsa nagbaton og kapasayloan sa ilang mga sala. Bahina ang klase ngadto sa tulo ka grupo. Hangyoa ang unang grupo sa pagsiksik sa Mosiah 4:13, ang ikaduhang grupo sa pagsiksik sa Mosiah 4:14–15, ug ang ikatulong grupo sa pagsiksik sa Mosiah 4:16. Ipabasa sa matag estudyante ang ilang gi-assign nga bersikulo o mga bersikulo sa tinagsa ug ipaila ang mga kinaiya ug mga kalidad nga gihulagway ni Haring Benjamin niadtong kinsa naninguha sa pagbaton og kapasayloan sa ilang mga sala.

Human sa igo nga panahon, dapita ang mga estudyante sa pagreport sa unsay ilang nakit-an. Samtang sila naghimo sa ingon, hatagi og gibug-aton ang kamatuoran nga kon kita magpaubos sa atong mga kaugalingon diha sa atubangan sa Dios ug maningkamot sa pag-ugmad og Kristohanong mga hiyas, kita makabaton og kapasayloan sa atong mga sala. Tabangi ang mga estudyante sa paggamit sa unsay ilang nakat-unan pinaagi sa pagpangutana og usa o duha sa mosunod nga mga pangutana kon ang matag kinaiya o kalidad gihisgutan.

• Ngano sa inyong hunahuna kini nga kinaiya (o kalidad) makatabang sa pagbaton og kapasayloan sa atong mga sala?

• Kanus-a kamo nakakita og mga panig-ingnan niini nga mga kinaiya (o kalidad)?

Migamit si Haring Benjamin og gamhanang pag-agid-agid nga makatabang sa mga estudyante sa pagdayeg sa mga panalangin nga ilang nadawat gikan sa Ginoo ug awhaga sila sa pag-ugmad sa mga hiyas nga ilang natun-an diha sa Mosiah 4:13–16. Hangyoa ang mga estudyante sa pagbasa sa hilum sa Mosiah 4:16–23.

• Sumala ni Haring Benjamin, sa unsa nga paagi nga kitang tanan makililimos?

• Sa unsa nga paagi kini nga pagsabut nagtabang kanato nga mahimong mas maloloy-on ngadto sa uban?

• Alang niadtong dili makahimo sa paghatag ngadto sa mga makililimos, o alang niadtong kinsa adunay diyutay nga ikahatag, unsa nga tambag ang gipakigbahin ni Haring Benjamin diha sa Mosiah 4:24–26?

• Sa Simbahan karon, sa unsa nga paagi ang paghatag og mga halad sa puasa nagtabang kanato sa pagsunod sa tambag diha sa Mosiah 4:26? Sa unsa nga paagi ang mga kabatan-onan nag-apil sa mga halad sa puasa? (Ang mga tubag mahimong maglakip nga sila makapuasa, ang pipila mahimong moamut sa mga halad sa puasa, ug ang tighupot sa Aaronic nga Pagkapari sa ubang bahin sa kalibutan mangolekta sa mga halad sa puasa gikan sa mga miyembro sa ward o branch.)

Ipasabut nga sa tanang mga maayong butang nga kita gihangyo sa pagbuhat, usahay mahagiton ang pagpangita og balanse sa atong mga kinabuhi. Ipabasa og kusog sa usa ka estudyante ang Mosiah 4:27.

• Unsa sa inyong hunahuna ang kahulugan sa pagbuhat sa tanang mga butang diha sa “kaalam ug kahusay”?

• Sa unsa nga paagi kini nga tambag makatabang kaninyo?

Dapita ang usa ka estudyante sa pagbasa og kusog sa Mosiah 4:29–30. Ipasabut nga ang Mosiah 4:30 usa ka scripture mastery passage. Mahimo nimong awhagon ang mga estudyante sa pagmarka niini nga tudling sa lahi nga paagi aron dali nilang madumduman kini.

• Unsa ang relasyon tali sa atong mga hunahuna, mga pulong ug mga buhat? Unsa ang atong mahimo sa pagbantay sa atong mga kaugalingon? Sa unsa nga paagi kita makatabang sa usag usa?

Ang Mosiah 4:30 usa ka scripture mastery passage. Refer ngadto sa ideya sa pagtudlo diha sa katapusan sa leksyon aron sa pagtabang sa mga estudyante sa ilang pagkahanas niini nga tudling.

Hunahunaa ang paghatag sa mga estudyante og pipila ka minuto sa pagsulat diha sa ilang mga scripture study journal mahitungod kon giunsa sa mga baruganan diha sa Mosiah 4:9–30 pagtabang kanila samtang sila naningkamot sa pagbaton og kapasayloan sa ilang mga sala. Ipamatuod ang gugma sa Ginoo alang sa matag usa kanila ug sa Iyang tinguha alang kanila sa paghinulsol ug pagbaton og kapasayloan sa ilang mga sala.

Pagsulat og mga panghunahuna

Giawhag ni Elder Richard G. Scott sa Korum sa Napulog Duha ka mga Apostoles ang mga estudyante sa pagsulat og mga panghunahuna nga ilang nadawat: “Pagpalambo og kahanas sa pagkat-on pinaagi sa unsay inyong nakita ug ilabi na sa unsay giaghat sa Espiritu Santo nga inyong bation. … Isulat diha sa usa ka luwas nga dapit ang importanting mga butang nga inyong nakat-unan gikan sa Espiritu. Inyong mahibaloan nga samtang inyong gisulat ang bililhon nga mga panghunahuna, kasagaran mas daghan pa ang moabut” (“To Acquire Knowledge and the Strength to Use It Wisely,” Ensign, Hunyo 2002, 32).

Scripture Mastery—Mosiah 4:30

Aron matabangan ang mga estudyante sa pagkakita sa relasyon tali sa mga hunahuna, mga pulong, ug mga buhat, ingon nga gipahayag diha sa Mosiah 4:30, basaha ang mosunod nga pamahayag ni Presidente Ezra Taft Benson:

“Paghunahuna og limpyo nga mga hunahuna. Kadtong kinsa naghunahuna og limpyo nga mga hunahuna dili maghimo og mahugaw nga mga buhat. Dili lamang kamo responsable diha sa atubangan sa Dios alang sa inyong mga lihok apan usab alang sa pagpugong sa inyong mga hunahuna. Busa pagpuyo nga kamo dili maulaw kon ang inyong mga hunahuna ug mga lihok mahimong ipakita diha sa tilon sa inyong simbahan. Ang karaan nga pinulongan tinuod gihapon nga magtanom kamo og mga hunahuna ug inyong anihon ang mga lihok, magtanom kamo og mga lihok ug inyong anihon ang mga batasan, magtanom kamo og mga batasan ug inyong anihon ang kinaiya, ug ang inyong kinaiya nagtino sa inyong mahangturon nga padulngan. ‘Kay maingon nga siya nagahunahuna sa sulod sa iyang kaugalingon, sa ingon niana mao man siya’” (sa Conference Report, Oct. 1964, 60; nagkutlo sa Proverbio 23:7).

Ipasabut nga ang kahayag ug kangitngit dili makaukopar sa samang lugar sa samang higayon. Ang kahayag mobugaw sa kangitngit. Sama pananglit, angay nga musika, makabayaw nga visual nga mga imahe, maayo nga mga kalihokan, ug limpyo nga mga hunahuna ug mga pulong modapit sa Espiritu nganhi sa atong mga kinabuhi ug moduot sa dili maayo nga mga hunahuna sa gawas sa atong mga salabutan. Tabangi ang mga estudyante sa pagsabut nga sila makaaway sa kangitngit pinaagi sa pagpuno sa ilang mga kinabuhi og kahayag.

• Unsay atong mabuhat sa paghupot sa atong mga hunahuna, mga pulong, ug mga buhat nga limpyo?

Awhaga ang mga estudyante sa paghimo og piho nga mga plano sa pagpuno sa ilang mga kinabuhi og kahayag. Mahimo nimong pasulaton sila sa ilang mga plano diha sa ilang mga scripture study journal.

Dugang nga mga Ideya sa Pagtudlo

Mosiah 4:16–26. Pag-atiman alang niadtong mga nanginahanglan—usa ka hiyas sa disipulo ni Jesukristo

Diha sa kinatibuk-ang kahulugan sa pagpalambo sa Kristohanong mga hiyas nga giingon diha sa Mosiah 4, hangyoa ang mga estudyante sa paghunahuna mahitungod sa mga kasinatian nga sila aduna sa pagtabang niadtong mga nanginahanglan. Mahimo nimong isugyot nga ilang hunahunaon ang serbisyo nga ilang nahatag. Mahimo nimong pangutan-on ang mga tighupot sa Aaronic nga Pagkapari sa paghunahuna mahitungod sa ilang mga kahago sa pagkolekta og mga halad sa puasa.

• Ngano sa inyong hunahuna nga ang pag-atiman sa mga kabus ug timawa kabahin sa pagkadisipulo ni Jesukristo?

• Sa unsa nga paagi nga ang inyong mga kasinatian sa pagserbisyo niadtong mga nanginahanglan mitabang kaninyo nga mas maduol ngadto ni Jesukristo?

Basaha ang mosunod nga pamahayag ni Bishop H. David Burton, Presiding Bishop sa Simbahan:

Ang katuyoan, mga saad, ug mga baruganan nga nagsuporta sa pag-atiman sa mga kabus ug timawa molapas pa sa mga utlanan sa mortalidad. Kining sagrado nga buhat dili lamang makatabang ug makapanalangin niadtong mga nag-antus o nanginahanglan. Isip mga anak sa Dios, dili nato mapanunod sa hingpit ang kinabuhing dayon nga walay hingpit nga pagpamuhunan pinaagi sa pag-amuma sa usag usa samtang nia kita sa yuta. Pinaagi lamang sa mabinationg paagi sa pagsakripisyo ug pagtugyan sa atong kaugalingon ngadto sa uban nga kita makakat-on sa mga baruganang celestial sa sakripisyo ug pagpahinungod” (“Ang Makapabalaan nga Buhat sa Welfare,” Ensign o Liahona, Mayo 2011, 82).

Mosiah 4:30. Bantayi ang inyong mga hunahuna, mga pulong, ug mga buhat

Aron matabangan ang mga estudyante sa paggamit sa tambag diha sa Mosiah 4:30 sa pagbantay sa ilang mga hunahuna, basaha ang mosunod nga pag-agid-agid ug tambag gikan ni Presidente Boyd K. Packer sa Korum sa Napulog Duha ka mga Apostoles.

Samtang nagkat-on kamo sa pagkontrol sa inyong mga hunahuna, inyong mabuntog ang mga batasan, bisan ang makauulaw nga mga batasan. Makabaton kamo og kaisug, makabuntog sa kahadlok, ug makabaton og malipayon nga kinabuhi. Giingnan ako … sa nagtubo pa ako nga ang mga hunahuna kinahanglang pugngan, apan walay usa nga nagsulti kanako kon unsaon. Naghunahuna ako bahin niini sa milabay nga mga katuigan ug nakahukom nga ang hunahuna sama sa usa ka entablado. Sa panahon nga kita nagmata ang kurtina giablihan. Kanunay adunay gihimo diha sa entablado. Tingali usa ka komedya, usa ka trahedya, nindot o bati, maayo o dautan; apan sa kanunay adunay pipila ka dula nga gihimo sa entablado sa inyong hunahuna.

“Nakamatikod ba kamo nianang dili maayong hunahuna nga mosulod gikan sa wala nga bahin sa entablado ug makadapit sa inyong pagtagad sa tunga-tunga sa bisan unsa nga pasundayag ug walay tinuod nga tinguha sa inyong bahin? … Kon kamo motugot kanila nga mopadayon, ang tanang mga hunahuna sa bisan unsa nga hiyas mobiya sa entablado. … Unsay inyong buhaton sa panahon sama niini, kon ang entablado sa inyong hunahuna gikontrolar sa yawa sa dili limpyo nga hunahuna … ? Kon kamo makabutang sa inyong hunahuna og limpyo ug mapuslanon nga mga hunahuna, nan walay luna kining mapugsanon nga mga yawa, ug sila mobiya.”

Mipadayon si Presidente Packer sa pagsugyot og usa ka paagi sa pagduot sa ngil-ad nga mga hunahuna sa gawas sa atong mga salabutan:

“Pagpili og paborito nga himno o kanta, … kanang adunay mga pulong nga makapabayaw ug musika nga may balaang pagtahud, usa nga makapahimo ninyo nga mobati og butang nga sama sa inspirasyon. Adunay daghang matahum nga mga kanta nga kapilian. Tinguhaa ang giya sa Espiritu sa inyong pagpili. Praktisa ang kanta diha sa inyong hunahuna pag-ayo. Sag-uloha kini. Bisan og kamo walay praktis sa musika, kamo makahunahuna og yano nga musika. Karon gamita kini isip dalan nga sundon sa inyong mga hunahuna. Himoa kini nga emerhensya nga dalan.

“Kon kamo makakita sa nagpahipi nga mga aktor gikan sa utlanan sa inyong hunahuna ngadto sa entablado sa inyong hunahuna, ibutang dayon ang CD, ingon ta sa pagkasulti. Makapausab kini sa inyong tibuok kahimtang.

“Tungod kay ang musika makapabayaw ug limpyo, ang dautan nga mga hunahuna mawala. Tungod kay ang hiyas, pinaagi sa pagpili, dili makig-uban sa kahugawan, ang dautan dili makaantus sa presensya sa kahayag. Sa tukmang panahon inyong mamatikdan ang inyong kaugalingon nga nag-hum sa musika sa inyong kaugalingon, awtomatik na lang, sa pagbugaw sa dili takus nga mga hunahuna” (“Takus nga Musika, Takus nga mga Hunahuna,” Liahona, Abr. 2008, 31–35).

Dapita ang mga estudyante sa paghimo og plano sa pagkuha sa ngil-ad nga mga hunahuna nga mokamang ngadto sa ilang mga salabutan. Ang ilang mga plano mahimong mag-apil og daghang mga ideya, sama sa paghunahuna og usa ka himno o kanta sa Primary, pag-recite og kasulatan, o paghunahuna sa Manunubos. Dapita ang pipila ka mga estudyante sa pagpakigbahin sa ilang mga plano. Awhaga ang mga estudyante sa pagpraktis sa ilang plano.