Leksyon 96

Alma 39

Pasiuna

Si Alma mibadlong sa iyang nahisalaag nga anak nga lalaki nga si Corianton, kinsa mibiya sa pagpangalagad ug nakahimo og sekswal nga sala. Gitudlo ni Alma kaniya ang kabug-at sa iyang mga binuhatan ug mipadayag og kasagmuyo nga si Corianton sad-an sa ingon nga bug-at nga sala. Mimando si Alma sa iyang anak nga lalaki sa paghunong sa pagsunod sa mga dautang tinguha sa iyang mga mata ug maghinulsol. (Tambag ni Alma ngadto kang Corianton bahin sa ubang mga hilisgutan sa mga kapitulo 40–42.)

Mga Sugyot alang sa Pagtudlo

Alma 39:1–8

Gipasabut ni Alma ngadto sa iyang anak nga lalaki nga si Corianton ang kabug-at sa sekswal nga sala

Isulat sa pisara ang mosunod nga pangutana: Ngano nga ang ubang mga sala mas bug-at kay sa uban?

Dapita ang mga estudyante sa pagkonsiderar sa hilum sa mga tubag niini nga pangutana. Isugyot nga ang tambag ni Alma nga narekord diha sa Alma 39 makatabang nato nga masabtan ang bug-at nga kinaiyahan sa piho nga mga sala.

Dapita ang mga estudyante sa pagtan-aw sa pahibalo ibabaw sa ulohan sa kapitulo 39. Hangyoa sila sa pag-ila kinsa ang nag-istorya niining kapitulo ug kang kinsa siya namulong (si Alma mao ang nag-istorya ngadto sa iyang anak nga lalaki nga si Corianton). Ipasabut nga si Corianton mikuyog sa iyang igsoon nga lalaki nga si Shiblon ug ni Alma sa pagsangyaw sa ebanghelyo sa mga Zoramite, apan natumpawak siya sa pagpakasala. Ipasabut nga ang pagsabut kon unsa ang sayop nga nabuhat ni Corianton makatabang sa mga estudyante nga mas masabtan ang tambag ni Alma ngadto kaniya dinhi niining kapitulo ug sa mosunod nga tulo ka mga kapitulo.

Dapita ang usa ka estudyante sa pagbasa og kusog sa Alma 39:1–5. Hangyoa ang klase sa pagpangita kon unsay nabuhat ni Corianton nga sayop. (Mahimong gikinahanglan nimong ipasabut nga ang pulong babaye nga nagbaligya sa iyang dungog sa bersikulo 3 nagpasabut sa usa ka babaye nga imoral o prostitute.)

• Unsa man ang gibuhat ni Corianton nga sayop? Hain sa iyang mga sala ang labing bug-at? (Sekswal nga pagka-imoral.)

• Taliwala sa mga Zoramite, gipanghambog ni Corianton ang iyang kusog ug kaalam (tan-awa sa Alma 39:2). Sa unsang mga paagi nga ang mapahitas-on nga kinaiya mosangput ngadto sa bug-at nga mga sala sama sa sekswal nga imoralidad? Unsa ang pipila ka modernong mga ehemplo sa mapahitas-on nga mga kinaiya ang nagtudlo sa mga tawo sa paghimo og sekswal nga sala? (Samtang maghisgot ang mga estudyante niining mga pangutana, ipasabut nga kon ang mga tawo nga tigpanghambog, sa kasagaran ilang masobrahan sa pagbana-bana ang ilang kaugalingong kusog, lakip ang ilang abilidad sa pagpakgang sa tintasyon. Pipila ka modernong mga ehemplo niini mao ang sayo nga pakig-date o pakig-date sa usa lang ka tawo.)

Hangyoa ang mga estudyante nga basahon sa hilum ang Alma 39:5, nga mangita kon giunsa sa pagpasabut ni Alma ang kabug-at sa sekswal nga sala. (Mahimong makatabang ang pagpasabut nga ang pulong pagkasalawayon nagpasabut sa butang nga malapason, dautan, o ngil-ad.)

• Unsa ang bation sa Ginoo mahitungod sa sekswal nga sala? (Samtang motubag ang mga estudyante, tabangi sila nga maila ang kamatuoran nga ang sekswal nga sala usa ka salawayon sa panan-aw sa Ginoo.)

• Sa inyong hunahuna ngano nga ang kabug-aton sa pakighilawas sa dili pa minyo ug pagpanapaw nabutang sa sunod sa pagpatay?

Aron matabangan ang mga estudyante nga makasabut sa sumbanan sa Ginoo ug sa mga saad nga nalakip sa sekswal nga kaputli, dapita sila nga basahon sa hilum ang unang duha ka mga paragraph sa seksyon nga giulohan og “Sekswal nga Kaputli” sa Alang sa Kalig-on sa mga Kabatan-onan. Hangyoa sila sa pagpangita sa mga tubag sa mosunod nga pangutana samtang sila nagbasa. (Mahimo nimong isulat ang mga pangutana diha sa pisara. Mahimo usab nimong isugyot nga markahan sa mga estudyante ang mga tubag nga ilang nakit-an diha sa booklet.)

• Unsa ang mga kaayohan sa pagpabiling putli sa sekswal nga paagi?

Pagkahuman nga ang mga estudyante nakagahin og panahon sa pagbasa ug pagreport sa mga tubag nga ilang nakit-an, hangyoa sila nga basahon sa hilum ang nahabiling seksyon sa “Sekswal nga Kaputli”, nga mangita sa mga tubag sa mosunod nga pangutana:

• Unsa ang mga sumbanan nga gitakda sa Ginoo alang nato aron magpabiling putli sa sekswal nga paagi?

Dapita ang mga estudyante sa pagpamalandong kon unsa nga mensahe nga ilang gibati ang gusto sa Ginoo nga ilang makat-unan gikan sa ilang nabasahan. Ipamatuod ang kabug-at sa sekswal nga sala ug ang mga panalangin nga moabut isip putli sa sekswal nga paagi.

Ipasabut nga pinaagi sa pagtambag sa iyang anak nga lalaki mahitungod sa sensitibo nga isyu, si Alma nagtuman sa iyang katungdanan isip usa ka ginikanan. Hangyoa ang mga estudyante sa pagkonsiderar kon unsaon unta nila sa pagtubag sa tambag sa ilang mga ginikanan o sa mga lider sa Simbahan kalabut sa sekswal nga kaputli. Dapita sila nga basahon sa hilum ang Alma 39:7–8, nga mangita kon unsa ang katuyoan ni Alma sa pagtudlo ni Corianton sa kabug-at sa sekswal nga sala.

• Unsa ang rason ni Alma alang sa pagtudlo ni Corianton sa kabug-at sa iyang sala? (Aron matabangan si Corianton nga maghinulsol aron dili siya mobarug nga sad-an sa atubangan sa Dios.)

• Unsa ang angay natong itubag kon adunay tawo nga magdapit nato sa paghinulsol?

Aron matabangan ang mga estudyante nga masabtan kon ngano nga ang mga ginikanan, sama ni Alma, modapit sa ilang mga anak sa paghinulsol, basaha ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

Elder D. Todd Christofferson

“Ang pagdapit sa paghinulsol usa ka pagpahayag sa gugma. … Kon kita dili modapit sa uban sa pag-usab o kon kita wala momando og paghinulsol sa atong kaugalingon, pakyas kita sa mahinungdanong katungdanan nga kita obligado ngadto sa usag usa ug sa atong kaugalingon. Ang ginikanan nga motugot ra sa ilang mga anak nga makasala, ang walay pagpakabana nga higala, ang mahadlokon nga lider sa Simbahan sa tinuoray mas nagpakabana sa ilang kaugalingon kay sa kaayohan ug kalipay niadtong ila untang matabangan. Oo, ang tawag sa paghinulsol usahay gitan-aw nga dili matugtanon o makapasilo, ug gani gikasilagan, apan giniyahan sa Espiritu, sa tinuoray kini usa ka buhat sa tiunay nga pagpangga” (“Ang Balaanong Gasa sa Paghinulsol,” Ensign o Liahona, Nob. 2011, 38).

Alma 39:9–19

Si Alma miawhag ni Corianton sa paghinulsol

Sa pagpaila sa tambag ni Alma nga gihatag sa iyang anak nga lalaki mahitungod kon unsaon sa paghinulsol ug moduol sa Ginoo, isulat ang mosunod sa pisara: Ang paghinulsol naglakip sa …

Ang Alma 39:9 usa ka scripture mastery passage. I-refer ngadto sa mga ideya sa pagtudlo diha sa katapusan sa leksyon aron matabangan ang mga estudyante sa ilang pag-master niining tudling.

Dapita ang pipila ka estudyante nga magpuli-puli sa pagbasa og kusog sa Alma 39:9–13. Ipahunong sa kada bersikulo aron ipangutana sa mga estudyante ang mosunod nga mga pangutana:

Alma 39:9

• Unsay gipasabut sa “pagbiya sa inyong mga sala”? (Mohunong sa paghimo niini.)

• Unsa ang kalabutan sa mga pulong nga “ayaw na pagsunod sa mga tinguha nga dautan sa imong mga mata” ug “wad-a sa imong kaugalingon kini nga mga butang” sa pagbiya sa sala? (Tingali makatabang ang pagpasabut nga sa atong panahon ang mga pulong “tinguha nga dautan sa imong mga mata” mahimong nagpasabut sa mga imahe ug ang lingaw-lingaw nga sa laing paagi dunay kalabutan sa pornograpiya. Sa paghatag og gibug-aton sa kakuyaw sa pornograpiya, ikonsiderar ang pagpangutana sa mga estudyante sa pagbasa sa tambag diha niining hilisgutan sa pahina 12 sa Alang sa Kalig-on sa mga Kabatan-onan. Tingali mahimo usab nimong ipasabut nga ang mga pulong “wad-a sa imong kaugalingon” nagpasabut sa paggamit og pakontrolar sa kaugalingon o pag-master sa kaugalingon; tan-awa sa footnote 9b.)

• Unsa ang mga paagi nga ang mga batan-on nga mga Santos sa Ulahing mga Adlaw makagamit sa pagkontrolar sa kaugalingon sa mga butang nga may kalabutan sa sekswal nga kaputli ug makalikay sa pagsunod sa tinguha nga dautan sa ilang mga mata? (Aron matabangan ang mga estudyante nga mahisgutan kini nga pangutana sa dugang detalye, mahimo nimong ihulagway ang pipila ka sitwasyon nga may kalabutan sa kultura ug mga kahimtang sa imong mga estudyante. Sama pananglit, mahimong mosulti ka sama sa mosunod: Usa ka batan-ong babaye nga Santos sa Ulahing mga Adlaw mihukom nga “wad-on sa iyang kaugalingon,” apan ang usa ka batan-ong lalaki nga iyang nagustuhan midapit kaniya ngadto sa dili tarung nga party. Unsaon niya sa pagtubag?)

Ipasabut nga ang Alma 39:9 usa ka scripture mastery passage. Mahimo kang mosugyot nga markahan sa mga estudyante kini nga tudling diha sa ilang mga kasulatan aron sayon nila kining matultolan.

Alma 39:10

• Sa unsa nga mga paagi nga ang pagtinguha og esprituhanon nga pag-amuma—posible gikan sa ginikanan, mga lider sa Simbanan, mga igsoon, o sinaligan nga mga higala—makatabang nato sa paghinulsol?

Alma 39:11

• Unsay gipasabut sa “ayaw itugot ang imong kaugalingon nga malingla”? (Mahimong gikinahanglan nimong ipasabut nga ang pulong itugot nagpasabut sa pagpaundayon.)

• Unsa ang pipila ka “kawang o binuang” nga mga butang nga inyong nakita nga nagganoy sa mga tawo karon?

Alma 39:12

• Unsay gipasabut sa paglikay sa pagkadautan? (Paglikay sa sala.)

Alma 39:13

Ipasabut nga ang paghinulsol nangahulugan nga “mobalik sa iyang kasingkasing ug kabubut-on sa Dios”(tan-awa sa Giya ngadto sa mga Kasulatan, “Hinulsol”). Sa mga kasulatan, ang mga pulong “balik ngadto sa Ginoo” kasagaran nagpasabut og paghinulsol.

• Sa inyong hunahuna, unsa ang gipasabut sa “mobalik sa Ginoo uban sa tibuok nimo nga hunahuna, gahum, ug kusog”?

Pahinumdumi ang mga estudyante nga atol sa misyon ngadto sa mga Zoramite, ang gawi ni Corianton miresulta nga pipila ka tawo dili motuo sa mga pulong ni Alma (tan-awa sa Alma 39:11).

• Kon ang atong mga sala nakaapekto sa uban, unsa ang kinahanglan natong buhaton isip usa ka bahin sa atong paghinulsol? (Angkunon o ikumpisal ang atong mga kasaypanan niadtong atong napasakitan ug magtinguha sa pag-ayo sa kasakit.)

Isulat ang mosunod nga kamatuoran sa pisara: Ang paghinulsol naglakip sa pag-angkon ug pagbiya sa atong mga sala ug pagbalik ngadto sa Ginoo uban sa tibuok natong hunahuna, gahum, ug kusog. Mahimong mosugyot ka nga isulat sa mga estudyante kini nga pamahayag diha sa ilang mga kasulatan duol sa Alma 39:13. Dapita ang mga estudyante sa pagsulat diha sa mga notebook o scripture study journal mahitungod kon unsa ang ilang gibati sa gustong ipabuhat sa Ginoo kanila aron sa pagpabalik sa ilang mga kasingkasing ug mga kabubut-on ngadto Kaniya sa mas hingpit nga paagi.

Aron ipasabut og maayo ang katungdanan sa Manluluwas diha sa proseso sa paghinulsol, hangyoa ang usa ka estudyante sa pagbasa og kusog sa Alma 39:15–16, 19. Hangyoa ang klase sa pagpangita sa mga pulong nga gibalik sa tulo ka higayon niining mga bersikulo. (Ang mga pulong mao ang “malipayon nga mga balita,” diin mahimo nimong ipasabut nga nangahulugan og “maayong mga balita.”)

• Unsa nga “malipayon nga mga balita” ang gitudlo ni Alma sa iyang anak nga lalaki? (Lakip sa mga tubag nga gihatag sa mga estudyante kinahanglan ang kamatuoran nga si Jesukristo mianhi aron sa pagkuha sa mga sala sa kalibutan. Mahimo nimong isulat kini diha sa pisara.)

• Nganong ang pag-anhi ni Jesukristo maayo nga mga balita alang kang Corianton? (Samtang tubagon kining pangutana sa mga estudyante, mahimo nimo silang sultihan nga si Corianton sa kaulahian naghinulsol sa iyang mga sala ug mibalik sa pagkamisyonaryo [tan-awa sa Alma 49:30].)

Ikonsiderar ang pagpakigbahin uban sa klase kon sa unsang paagi nga ang mensahe sa Pag-ula ni Jesukristo nahimong “malipayon nga mga balita” alang kanimo o niadtong imong kaila. Idugang ang imong pagpamatuod kalabut sa mga baruganan nga nahisgutan sa klase gikan sa Alma 39. Awhaga ang mga estudyante sa pagsunod sa mga pag-aghat nga mahimong ilang nadawat atol sa leksyon aron sa pagpanalipod sa ilang kaputli ug pagbalik ngadto sa Ginoo pinaagi sa paghinulsol.

Scripture Mastery—Alma 39:9

Bahina ang klase ngadto sa mga grupo nga tinagup-at o tinagilma. Hatagi ang matag grupo og usa ka dice ug usa ka lapis. (Kon walay dice, himoa ang kalihokan pinaagi sa pagbutang og unom ka gagmayng mga piraso sa papel, ang matag usa ginumeruhan og 1 hangtud sa 6, isulod sa usa ka sobre o laing sudlanan.) Ang matag estudyante magkinahanglan usab og usa ka blangko nga piraso sa papel. Hangyoa ang matag grupo sa mga estudyante sa paglingkod nga magdug-ol libut sa lamesa o magsirkulo. Dapita sila sa pag-abli sa ilang mga kasulatan sa Alma 39:9.

Ipasabut nga ang tuyo sa kalihokan mao ang mahimong unang tawo sa grupo nga makasulat sa Alma 39:9 sa kinatibuk-an niini. Hinoon, tungod kay usa lang ang lapis sa kada grupo, usa lang ka tawo sa grupo ang makasulat sa usa ka higayon. Ang usa ka tawo mahimong angayan sa paggamit sa lapis kon makakuha og 1 sa pag-itsa sa dice.

Dapita ang mga sakop sa matag grupo nga magpuli-puli sa pag-itsa sa dice (o pagkuha og usa ka piraso nga papel ug dayon ibalik kini). Kon ang tawo nga naka-itsa (o nakapili) sa 1, siya ang makakuha sa lapis ug magsugod sa pagsulat, isulti og kusog ang matag pulong samtang gisulat kini. Sa laing bahin, ang uban diha sa grupo magpuli-puli sa pag-itsa sa dice aron mahimong angayan sa paggamit sa lapis. Kon ang laing estudyante diha sa grupo nakaitsa og 1, kana nga tawo mokuha sa lapis gikan sa nakauna og sulat ug magsugod sa pagsulat sa bersikulo diha sa iyang papel samtang nagsulti sa mga pulong. Ang nakauna og sulat moapil og balik sa grupo sa pag-itsa sa dice. Kon ang mga estudyante mahimong angayan sa paggamit sa lapis ug nakasulat na og usa ka bahin sa bersikulo, kinahanglang basahon nila og kusog ang bahin nga ilang gisulat sa dili pa mosulat og dugang sa bersikulo. (Kini ang makapabalik-balik nga makatabang sa mga estudyante sa pagmemorya sa bersikulo.) Ang kalihokan matapos kon ang usa ka estudyante sa matag grupo nakasulat na sa Alma 39:9 sa kinatibuk-an niini.

Hangyoa ang klase sa pagdungan og sulti sa bersikulo human sa kalihokan.

Pahinumdom: Tungod sa matang ug katas-on niining leksyon, mahimo nimong gamiton kining kalihokan sa laing adlaw, kon aduna kay sobra nga oras.

Komentaryo ug Background nga Impormasyon

Alma 39:3. Mga sangputanan sa sekswal nga sala

Si Elder Jeffrey R. Holland sa Korum sa Napulog Duha ka mga Apostoles namulong sa gibug-aton ug sangputanan sa sekswal nga sala:

“Pinaagi sa pagsangon sa ingon nga kabug-aton ngadto sa pisikal nga gana nga ingon ka malukpanon nga gihatag, unsa ang gusto nga isulti sa Dios ngari kanato mahitungod sa dapit niini sa Iyang plano alang sa tanang lalaki ug babaye? Ako motug-an kaninyo nga mao gayud kana ang Iyang gibuhat—sa pagkomentaryo mahitungod sa plano sa kinabuhi mismo. Klaro nga ang Iyang kinadak-an nga kabalaka kalabut sa mortalidad mao nga kon giunsa sa usa ka tawo pagsulod sa kalibutan ug kon unsaon sa tawo paggawas niini. Nagtakda Siya og higpit kaayo nga mga limitasyon niining mga butanga. …

“Ang lawas usa ka mahinungdanong bahin sa kalag. Kini nga pagkalahi ug importante kaayo nga doktrina sa mga Santos sa Ulahing mga Adlaw nagpasabut nganong ang sekswal nga sala bug-at kaayo. Among gipamahayag nga kon ang usa ka tawo nga mogamit sa hinatag sa Dios nga lawas sa lain nga walay balaanong pagtugot nag-abuso sa kinauyokan nga tumong ug mga proseso sa kinabuhi, ‘ang labing importante’ sa kinabuhi, sumala sa giingon ni Presidente Boyd K. Packer [tan-awa sa Ensign Hulyo 1972, 113]. Sa paggamit sa lawas sa lain—nga nagpasabut sa paggamit sa iyang kalag—ang tawo mipasipala sa Pag-ula ni Kristo, nga miluwas niana nga kalag ug diin mihimong posible sa gasa sa kinabuhing dayon. Ug kon ang usa ka tawo mobugal-bugal sa Anak sa Pagkamatarung, ang tawo misulod sa ganghaan sa kainit ug ang kasilaw molabaw pa sa adlaw sa udtong tutok. Dili gayud kamo makalikay nga masunog kon kini inyong buhaton.

“Palihug, ayaw gayud pag-ingon: ‘Kinsa gyud ang masakitan niini? Nganong ako walay gamayng kagawasan? Ako makalapas karon ug unya maghinulsol.’ Palihug ayaw pagpalabi sa pagbinuang ug kapintas. Kamo dili mahimong walay tulubagon sa ‘paglansang pag-usab ni Kristo.’ [Tan-awa sa Mga Hebreohanon 6:6.] ‘Likayi ang pakighilawas,’ miingon si Pablo [tan-awa sa 1 Mga Taga-Corinto 6:18], ug likayi ang ‘bisan unsa nga butang nga sama niini,’ ang Doktrina ug mga Pakigsaad midugang [tan-awa sa D&P 59:6; emphasis gidugang]. Ngano man? Nan, alang sa usa ka rason tungod sa dili mabana-bana nga pag-antus sa lawas ug espiritu nga naantus sa Manluluwas sa kalibutan aron kita mahimong makalikay [tan-awa ilabi na sa D&P 19:15–20]. Kita nakautang Kaniya og usa ka butang tungod niana. Sa tinud-anay, kita nakautang Kaniya sa tanang butang tungod niana. Miingon si Pablo ‘Kamo dili na inyo sa inyong kaugalingon.’ ‘Kay gipalit na kamo sa usa ka bili: busa himayaa ninyo ang Dios diha sa inyong lawas, ug sa inyong espiritu, nga iya sa Dios.’ [1 Mga Taga-Corinto 6:19–20; emphasis gidugang; tan-awa usab sa b. 13–18.] Sa sekswal nga kalapasan ang kalag mao ang magaid—ang lawas ug ang espiritu. …

“Sa mga butang sa tawhanong kasuod, kamo kinahanglan nga maghulat! Kinahanglan maghulat kamo hangtud nga kamo makahatag sa tanang butang, ug kamo dili makahatag sa tanang butang hangtud kamo legal ug naminyo pinasikad sa balaod. Sa paghatag nga nahisupak sa balaod nianang dili inyo (hinumdumi, ‘kamo dili na inyo sa inyong kaugalingon’) ug ang paghatag lamang sa tipik nianang dili masundan sa paghatag sa tibuok sa inyong kaugalingon, mao ang pagrisgo sa emosyonal nga pagkadaut. Kon kamo magpadayon sa pisikal nga pagtagbaw nga walay pagtugot sa langit, kamo nagdagan sa kakuyaw sa ingon nga espirituhanon, panghunahuna ug emosyonal nga kadaut nga mahimong makahuyang ninyo nga ang inyong paghandum sa pisikal nga kasuod ug ang inyong abilidad sa paghatag sa kinasingkasing nga debosyon ngadto sa usa ka mas matuod nga gugma, sa kaulahian. Kamo mahimong moabut nianang mas matuod nga takna sa gi-orden nga gugma, sa tinuod nga panag-uban, sa pagdiskubre lamang sa inyong gikahadlokan nga unta ang inyong giampingan nawala na, ug nga pinaagi lamang sa grasya sa Dios nga mabalik ang unsay nawala sa hinay-hinay. Sa adlaw sa inyong kasal ang pinakanindot nga gasa nga imong ikahatag sa mahangturon nimong kompanyon mao ang imo gayud nga kaugalingon—limpyo ug putli ug takus usab niana nga kaputli” “Personal Purity,” Ensign, Nob. 1998, 76).

Alma 39:6. Unsa ang sala nga walay kapasayloan?

Si Propeta Joseph Smith mihatag og dugang nga kahibalo mahitungod sa sala nga walay kapasayloan:

“Ang tanang sala mapasaylo, gawas sa sala batok sa Espiritu Santo; tungod kay si Jesus moluwas sa tanan gawas sa mga anak sa kapildihan. Unsa gayud ang mabuhat sa usa ka tawo nga dili na mapasaylo sa sala? Kinahanglan nga nadawat niya ang Espiritu Santo, ang kalangitan naabli alang kaniya, ug nakaila sa Dios, ug dayon nakasala batok kaniya. Human ang tawo makasala batok sa Espiritu Santo, walay paghinulsol alang kaniya. Siya kinahanglan nga mosulti nga ang adlaw wala mosidlak samtang nakita niya kini, siya kinahanglan nga molimud ni Jesukristo bisan og ang kalangitan naablihan ngadto kaniya, ug ilimud ang plano sa kaluwasan nga ang iyang mga mata nagtan-aw sa kamatuoran niini; ug sukad niana nga panahon nagsugod siya nga mahimong kaaway. Kini mao ang nahitabo sa kadaghanan sa mga mibiya sa kamatuoran sa Simbahan ni Jesukristo sa mga Santos sa Ulahing mga Adlaw” (sa History of the Church, 6:314).

Ang usa ka indibidwal kinsa nakadawat sa pagsaksi sa Espiritu Santo ug unya mapukan o mahimong dili kaayo aktibo sa Simbahan dili sad-an sa sala nga walay kapasayloan.

Alma 39:13. Paghinulsol: mao ang “pagbalik ngadto sa Dios”

Si Elder Neil L. Andersen sa Korum sa Napulog Duha ka mga Apostoles mihulagway sa paghinulsol isip usa ka pagbalik o pagduol og usab ngadto sa Dios:

“Kon kita makasala, kita mopalayo gikan sa Dios. Kon kita maghinulsol, kita mobalik ngadto sa Dios.

“Ang pagdapit sa paghinulsol dili kanunay nga usa ka tingog sa pagkastigo apan hinoon usa ka mahigugmaon nga hangyo sa pagbalik ug sa ‘pagduol og usab’ ngadto sa Dios (“Paghinulsol … Aron Ako Moayo Kaninyo,” Ensign o Liahona, Nob. 2009, 40).

Alma 39:15. Si Jesukristo mokuha sa mga sala sa kalibutan

Si Elder D. Todd Christofferson sa Korum sa Napulog Duha ka mga Apostoles mipasabut kon unsaon nato nga makabaton og access ngadto sa mga panalangin sa Pag-ula:

“Ang paghinulsol lamang ang modala ngadto sa mas maayo nga kinabuhi. Ug, siyempre, pinaagi lamang sa paghinulsol nga atong maangkon ang maulaong grasya ni Jesukristo ug kaluwasan. Ang paghinulsol usa ka balaang gasa, ug kinahanglan nga adunay pahiyom sa atong mga nawong kon kita maghisgot niini. Motudlo kini nato ngadto sa kagawasan, pagsalig, ug kalinaw. Imbis mopakgang sa pagmaya, ang gasa sa paghinulsol mao ang hinungdan sa tinuod nga pagmaya.

“Ang paghinulsol posible lamang tungod sa Pag-ula ni Jesukristo. Ang Iyang walay katapusang sakripisyo ang ‘modala og mga kahigayunan sa mga tawo nga sila mahimo nga makabaton og hugot nga pagtuo ngadto sa paghinulsol’ (Alma 34:15). Ang paghinulsol mao ang gikinahanglan nga kondisyon, ug ang grasya ni Kristo mao ang gahum diin ang ‘kalooy motagbaw sa mga gipangayo sa kaangayan’ (Alma 34:16). …

“… Ang paghinulsol nagkinahanglan og tinuoray nga katuyoan ug kaandam sa pagpadayon, bisan sa mga kasakit. Ang mga pagsulay sa paghimog listahan sa piho nga mga lakang sa paghinulsol mahimong makatabang sa uban, apan mahimo usab kining modala ngadto sa paagi nga wala sa hunahuna, listahan lang sa mga lakang sa paghimo nga walay tinuod nga pagbati o kausaban. Ang tinuod nga paghinulsol dili taphaw lang. Ang Ginoo mihatag og duha ka mahinungdanong mga kinahanglanon: ‘Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila’ (D&P 58:43)” (“Ang Balaanong Gasa sa Paghinulsol,” Ensign o Liahona, Nob. 2011, 38, 40).