Leksyon 37
2 Nephi 27
Pasiuna
Nag-refer kanunay sa mga pulong ni Isaias, nanagna si Nephi nga ang Ginoo “mobuhat og usa ka kahibulongan nga buhat ug usa ka katingalahan” sa katapusang mga adlaw. Kining mahinungdanong buhat mao ang Pagpahiuli sa ebanghelyo ni Jesukristo. Ang sentro sa panagna ni Nephi mao ang pag-abut sa Basahon ni Mormon. Gipanagna ni Nephi nga dunay mga saksi nga makakita sa Basahon ni Mormon ug mopamatuod sa katinuod niini. Mipamatuod usab siya bahin sa sukaranang tahas sa Basahon ni Mormon diha sa buhat sa Ginoo sa ulahing mga adlaw—nga mahimo kining milagruso nga gasa sa kalibutan. (Pahinumdom: Ang 2 Nephi 27 susama gayud sa Isaias 29. Sa edisyon sa Mga Santos sa Ulahing mga Adlaw sa Biblia, ang mga footnote diha sa Isaias 29 nagtanyag og makatabang nga mga ideya alang sa pagtuon sa duha ka mga kapitulo.)
Mga Sugyot alang sa Pagtudlo
2 Nephi 27:1–5
Nanagna si Nephi nga sa katapusang mga adlaw ang yuta mapuno sa pagkadautan
Ipakita ang mosunod nga mga aytem: usa ka sudlanan sa deodorant, usa ka toothpaste, ug usa ka bar o sudlanan sa sabon. Ipasabut nga ang matag aytem gituyo aron mahimong solusyon sa usa ka problema. Hangyoa ang mga estudyante sa pag-ila sa problema nga tuyo nga sulbaron sa matag aytem. (Mahimo nimong pilion ang paggamit sa ubang mga aytem nga makonsiderar nga mga solusyon sa piho nga mga problema.)
Ipasabut nga ang panagna ni Nephi diha sa 2 Nephi 27 naghisgot sa mga problema nga anaa sa atong panahon. Nagtudlo siya nga ang mga tawo mapandol sa espirituhanong paagi tungod sa ilang kadautan, nga mag-antus sila sa espirituhanong pagkabuta, ug nga ilang isalikway ang mga propeta. Nanagna usab si Nephi bahin sa unsay buhaton sa Dios aron masulbad kini nga mga problema.
Dapita ang pipila ka estudyante nga magpuli-puli sa pagbasa og kusog sa 2 Nephi 27:1–5. Hangyoa ang klase sa pagpangita sa mga pulong nga naghulagway sa pipila ka mga problema sa katapusang mga adlaw. Hangyoa ang pipila ka mga estudyante sa pagpakigbahin sa unsay ilang nahibaloan. Aron matabangan ang mga estudyante nga maanalisar kini nga mga pulong, mahimo nimong ipangutana ang mosunod:
-
Sa inyong hunahuna unsa man ang gipasabut sa “mahubog sa pagkadautan”?
-
Diha sa 2 Nephi 27:3, ang ubang mga tawo sa katapusang mga adlaw gipahisama sa usa ka gigutom nga tawo nga nagdamgo nga nagkaon o sa usa ka giuhaw nga tawo nga nagdamgo nga nag-inom apan nahigmata ug mibati nga ang iyang kalag walay sulod. Unsay atong makat-unan gikan niini? (Ang pagkaon o pag-inom diha sa damgo dili makahatag og malungtarong katagbawan ug walay mahimo, kay ang kagutom o kauhaw magpabilin human sa damgo. Sa samang paagi, kadtong kinsa “nakig-away batok sa Bukid sa Zion” walay malungtarong katagbawan, ni makahimo sila og bisan unsang butang nga makahuluganon.)
-
Sa inyong hunahuna unsa kaha ang gipasabut sa mga pulong nga “kamo mipiyong sa inyong mga mata”?
Aron matabangan ang mga estudyante nga matino ang mga kamatuoran sa ebanghelyo diha sa 2 Nephi 27:1–5, dapita sila sa pag-summarize sa unsay ilang nakat-unan gikan niining mga bersikulo. Isulat sa pisara ang ilang mga tubag. Siguroha nga masabtan sa mga estudyante nga sa katapusang mga adlaw, daghang mga tawo ang mapuno sa kadautan ug mosalikway sa mga propeta.
-
Sa inyong hunahuna nganong importante man nga masayud bahin niining panagna ug sa katumanan niini?
2 Nephi 27:6–23
Si Nephi nanagna bahin sa pag-abut sa Basahon ni Mormon
Dapita ang mga estudyante sa pagbasa og hilum sa 2 Nephi 27:6–7. Hangyoa sila sa pagpangita og butang nga ihatag sa Ginoo aron matabangan nga masulbad ang espirituhanong mga problema sa mga tawo sa katapusang mga adlaw.
-
Unsa ang ihatag sa Ginoo?
-
Unsa ang sulod sa basahon?
-
Sa inyong hunahuna unsa nga basahon ang gihulagway niini nga mga bersikulo? (Aron matabangan ang mga estudyante nga makatubag niining pangutana, mahimo kang mosugyot nga tan-awon nila sa mga scripture reference nga gilista diha sa 2 Nephi 27:6, footnote b. Mahimo usab nimong ipasabut nga ang mga pulong nga “kanila nga nahikatulog” nagpasabut sa mga nangamatay nga mga propeta kinsa mihipos sa mga rekord nga nahimong Basahon ni Mormon.)
Iisa ang usa ka kopya sa Basahon ni Mormon. Ipasabut nga gipagawas sa Ginoo kini nga basahon aron makatabang sa pagkorihir sa mga problema sa katapusang mga adlaw ug sa pagdala og kahayag ngadto sa mangitngit nga kalibutan. Gipadayag sa Ginoo ngadto sa karaang mga propeta ang mga detalye kalabut sa pag-abut sa Basahon ni Mormon. Girekord ni Nephi kining mga detalye diha sa 2 Nephi 27. Ipasabut nga usa ka susamang panagna makita diha sa Isaias 29. (Mahimo nimong ipasabut nga ang ubang mga tawo mihagit sa Basahon ni Mormon pinaagi sa pagpangutana nganong wala maghisgot niini ang Biblia. Ipasabut nga ang panagna diha sa Isaias 29 nagpakita nga sa pagkatinuod ang Biblia nagpamatuod sa Basahon ni Mormon.)
Dapita ang usa ka estudyante sa pagbasa og kusog sa 2 Nephi 27:12–14. Hangyoa ang klase sa pagpangita kon kinsay giingon ni Nephi nga tugutan nga makakita sa basahon.
-
Kinsa man ang tulo ka mga saksi nga gitugutan nga makakita sa Basahon ni Mormon “pinaagi sa gahum sa Dios”? (Oliver Cowdery, David Whitmer, ug Martin Harris. Tan-awa sa “Ang Pagpamatuod sa Tulo ka mga Saksi,” Basahon ni Mormon.)
Ipasabut nga gihisgutan ni Nephi nga dunay “pipila” ka tawo nga tugutan usab nga makakita sa basahon.
-
Sa inyong hunahuna kinsa kaha kining ubang mga saksi? (Mahimo nimong pahinumduman ang mga estudyate bahin sa walo ka dugang nga mga saksi sa Basahon ni Mormon. Tan-awa sa “Ang Pagpamatuod sa Walo ka mga Saksi,” Basahon ni Mormon.)
Ipasabut nga ang 2 Nephi 27:14 naghisgot nga ang Ginoo “motukod [moestablisar] sa iyang pulong” diha “sa mga ba-ba sa ingon ka daghan nga mga saksi nga iyang nakita nga maayo.”
-
Sa inyong hunahuna unsa man ang gipasabut ni Nephi sa dihang miingon siya nga ang mga saksi moestablisar sa pulong sa Dios? (Kadtong nakadawat ug modawat sa pulong sa Dios pinaagi sa Basahon ni Mormon mopakigbahin niini sa uban ug mopamatuod sa katinuod niini.)
-
Kinsa kaha kining mga saksi?
-
Aron matabangan ang mga estudyante nga makasabut nga mahimo usab sila nga mga saksi sa katinuod sa Basahon ni Mormon, mahimo nimo silang dapiton sa pagsulat sa ilang mga ngalan diha sa margin sunod sa 2 Nephi 27:14. Sa unsang paagi nga ang matag miyembro sa Simbahan, lakip ninyo, makatabang sa pag-establisar sa kamatuoran sa Basahon ni Mormon?
-
Kanus-a ninyo napakigbahin ang inyong pagpamatuod bahin sa Basahon ni Mormon ngadto sa uban?
Sa nag-unang leksyon, mahimong giawhag nimo ang mga estudyante sa pagpakigbahin sa ilang mga pagpamatuod bahin sa Basahon ni Mormon ngadto sa laing tawo. Kon nahimo nimo, i-follow up kana nga assignment pinaagi sa pagdapit sa pipila ka mga estudyante sa pagpakigbahin sa unsay ilang nabuhat. Awhaga ang mga estudyante nga magpadayon sa pagpangita og mga oportunidad sa pagpakigbahin sa ilang mga pagpamatuod bahin sa Basahon ni Mormon ngadto sa uban, lakip niadtong sakop sa laing tinuohan.
Kopyaha ang mosunod nga tsart diha sa pisara. (Aron maka-save og panahon, mahimo nimo kining buhaton sa dili pa magsugod ang klase.)
|
Panagna ni Nephi kon unsay buhaton sa tawo |
Ngalan sa tawo |
Ang katumanan sa panagna | |
|---|---|---|---|
|
Unang Tawo (“dili maalamon”) | |||
|
Ikaduhang Tawo (“lain”) | |||
|
Ikatulong Tawo (“maalamon”) |
Ipares-pares ang mga estudyante. Ipasabut nga ang matag partner magtuon sa panagna kalabut sa pag-abut sa Basahon ni Mormon ingon man usab sa katumanan niana nga panagna. Ipakopya sa mga estudyante ang tsart diha sa ilang mga scripture study journal o mga class notebook ug ipasulat ang mga tubag gamit ang gihatag nga mga scripture reference. (Mahimo usab nimong ipasabut nga ang pulong nga mga sinulat [characters], nga makita diha sa Joseph Smith—Kasaysayan 1:63–65, nagpasabut sa sinulat nga gikulit diha sa bulawang mga palid diin gihubad ang Basahon ni Mormon.) Kon mahuman na ang mga estudyante, dapita sila nga ipakigbahin sa klase ang ilang mga tubag.
-
Sumala sa 2 Nephi 27:15 ug Joseph Smith—Kasaysayan 1:64, kinsa man ang maalamon nga tawo nga gidad-an ni Martin Harris sa mga pulong sa basahon? (Charles Anthon.)
-
Sa unsang mga paagi nga ang usa ka tawo nga walay pormal nga edukasyon, sama ni Joseph Smith, mas angayan nga mohubad sa Basahon ni Mormon kay sa usa ka iskolar sama ni Charles Anthon?
Ipabasa og hilum sa mga estudyante ang 2 Nephi 27:20–21, nga mangita sa mga pulong nga gibalik-balik sa matag bersikulo. (“Ako makahimo sa pagbuhat sa akong kaugalingon nga buhaton.”)
-
Unsa ang kahulugan sa mga pulong nga “Ako makahimo sa pagbuhat sa akong kaugalingon nga buhaton”?
-
Sa unsang paagi nga ang Pagpahiuli sa ebanghelyo ug ang pag-abut sa Basahon ni Mormon usa ka pagkumpirmar nga ang Dios makahimo sa pagbuhat sa Iyang kaugalingon nga buhat?
-
Unsa ang pipila ka mga baruganan nga gitudlo niining mga bersikulo? (Samtang mopakigbahin ang mga estudyante sa ilang mga ideya, hatagi og gibug-aton nga ang pag-abut sa Basahon ni Mormon usa ka paagi nga matuman sa Dios ang Iyang buhat sa ulahing mga adlaw.)
-
Sa unsang paagi nga ang katumanan niining panagna makapalig-on sa inyong pagpamatuod bahin sa Basahon ni Mormon ug sa tahas niini sa Pagpahiuli sa Simbahan sa Ginoo?
2 Nephi 27:24–35
Nanagna si Nephi bahin sa positibo nga epekto sa gipahiuli nga ebanghelyo ni Jesukristo ug sa Basahon ni Mormon
Basaha og kusog ang 2 Nephi 27:24–26 samtang magsunod ang mga estudyante diha sa ilang mga kasulatan.
-
Nakahinumdom ba mo nga nakadungog na niining mga pulong sa una? Kon mao, diin man? (Kon maglisud sa pagtubag ang mga estudyante, ipasabut nga ang Ginoo migamit sa susamang mga pulong sa dihang nakigsulti Siya ngadto ni Joseph Smith didto sa Sagradong Kakahoyan; tan-awa sa Joseph Smith—Kasaysayan 1:19.)
Iisa ang usa sa mga butang nga imong gipakita sa sinugdanan niini nga leksyon, ug pahinumdumi ang mga estudyante nga gihimo kini aron makasulbad og usa ka piho nga problema.
-
Diha sa 2 Nephi 27:25, unsa nga mga problema ang giingon sa Ginoo nga maanaa sa katawhan sa ulahing mga adlaw? (Mahimo nimong isulat sa pisara ang mga tubag sa mga estudyante.)
Pahinumdumi ang mga estudyante sa ubang espirituhanong mga problema sa ulahing mga adlaw nga gihisgutan diha sa 2 Nephi 27:5. (Mahimo nimong idugang ang kadautan, espirituhanong pagkabuta, ug pagsalikway sa mga propeta ngadto sa lista diha sa pisara.)
-
Sa unsang paagi nga ang Basahon ni Mormon ug ang pagpahiuli sa ebanghelyo ni Jesukristo makatabang sa pagsulbad niining mga problema?
Hangyoa ang mga estudyante sa pagbasa og hilum sa 2 Nephi 27:29–30, 34–35, nga mangita sa mga paagi nga giingon sa Ginoo nga ang gipahiui nga ebanghelyo ug ang Basahon ni Mormon makapanalangin sa kinabuhi sa mga katawhan sa ulahing mga adlaw. Dapita ang usa ka estudyante sa paglista niining mga panalangin diha sa pisara.
-
Sumala sa 2 Nephi 27:29, ang Basahon ni Mormon makatabang nga “ang mga mata sa buta … makakita gikan sa kangiub ug gikan sa kangitngit.” Sa inyong hunahuna unsa man ang gipasabut niini?
Tabangi ang mga estudyante nga makasabut nga ang Basahon ni Mormon ug ang gipahiuli nga ebanghelyo ni Jesukristo makadala og hingpit nga kalipay ug panabut niadtong magtuon ug modawat niini. Awhaga ang mga estudyante sa pagpangita og solusyon sa ilang mga hagit diha sa Basahon ni Mormon ug sa pagpakigbahin sa ilang mga pagpamatuod bahin sa Basahon ni Mormon ngadto sa uban.
Komentaryo ug Background nga Impormasyon
2 Nephi 27:1–2. “Pagkadautan ug tanan nga matang sa pagkasalawayon”
Si Presidente Boyd K. Packer sa Korum sa Napulog Duha ka mga Apostoles mipahayag og kabalaka bahin sa mikaylap nga pagkaut-ot sa moralidad ug sa espirituhanong kapeligro nga naglibut kanato sa katapusang mga adlaw:
“Wala koy nahibaloan sa kasaysayan sa Simbahan o sa kasaysayan sa kalibutan nga ikatandi sa atong kasamtangang mga kahimtang. Walay nahitabo sa Sodoma ug Gomorra nga molabaw pa sa pagkadautan ug pagka-imoral nga naglibut kanato karon.
“Mga pulong sa pagpasipala, pagkabulgar, ug panamastamas madungog bisan asa. Dili matukib nga pagkadautan ug pagtuis nga kaniadto gihimo sa tago; karon giplastada na, gani gihatagan pa og legal nga proteksyon.
“Sa Sodoma ug Gomorra kining mga butanga didto ra sa maong dapit. Karon mikaylap na kini sa tibuok kalibutan, ug ania na kini taliwala kanato” (“The One Pure Defense” [pakigpulong ngadto sa mga CES religious educator, Peb. 6, 2004], 4, si.lds.org).
2 Nephi 27:10–11. “Kay ang basahon pagasilyohan”
Si Elder Neal A. Maxwell sa Korum sa Napulog Duha ka mga Apostoles namulong bahin sa mga kasulatan nga ipadayag pa:
“Daghan pang mga sinulat nga kasulatan ang moabut kanato, lakip na niadtong kang Enoch (tan-awa sa D&P 107:57), tanang mga sinulat ni Apostol Juan (tan-awa sa Ether 4:16), ang mga rekord sa nawala nga mga tribo sa Israel (tan-awa sa 2 Nephi 29:13), ug gibana-bana nga two-thirds sa mga palid sa Basahon ni Mormon nga gisilyohan: ‘Ug ang adlaw moabut nga ang mga pulong sa basahon nga gisilyohan pagabasahon diha sa ibabaw sa atup sa mga kabalayan; ug sila basahon pinaagi sa gahum ni Kristo; ug ang tanan nga mga butang ipadayag ngadto sa mga katawhan bisan hain taliwala sa mga katawhan, nga bisan kanus-a mahimo ngadto sa katapusan sa yuta’ (2 Nephi 27:11). Karon hayahay ra kitang magdala og mga quadruple combination sa mga kasulatan, apan usa ka adlaw, kay daghan pang mga kasulatan ang moabut, mahimong magguyod kita og gamayng pula nga mga karomata nga magsugwak sa mga basahon” (A Wonderful Flood of Light [1990], 18).
2 Nephi 27:14. Ang mga saksi moestablisar sa pulong sa Ginoo
Si Elder Jeffrey R. Holland sa Korum sa Napulog Duha Ka mga Apostoles mipakigbahin sa iyang lig-on nga pagsaksi sa Basahon ni Mormon:
“Ako mopamatuod nga ang usa dili makaangkon sa kinahugtan nga pagtuo niining buluhaton sa ulahing mga adlaw … gawas lang kon siya mohangop sa kabalaan sa Basahon ni Mormon ug ni Ginoong Jesukristo, kinsa mao ang gipamatud-an niini. …
“… Wala ako didto sa pundok sa mga Nephite kinsa nakahikap sa samad sa nabanhaw nga Ginoo. … Apan ang akong pagpamatuod niini nga rekord ug ang kalinaw nga gidala niini ngadto sa kasingkasing sa tawo sama ra ka kinahanglanon ug klaro kaayo sama sa ilaha. Sama kanila, ‘[akong] gihatag ang [akong pangalan] ngadto sa kalibutan, sa pagsaksi ngadto sa kalibutan nianang [akong] nakita.’ Ug sama kanila, ‘[ako] dili mamakak, Dios ang saksi niini.’ [“Ang Pagpamatuod sa Tulo ka mga Saksi,” Basahon ni Mormon; emphasis gidugang.]
“Akong gipangayo nga ang akong pagpamatuod sa Basahon ni Mormon ug tanan nga nalakip niini, nga gihatag karon ubos sa akong kaugalingong panumpa ug opisina, marekord pinaagi sa mga tawo dinhi sa yuta ug sa mga anghel sa langit. … Gusto nakong maklaro gayud nga sa pagbarug unya nako atubangan sa hukmanan sa Dios nga ako gayud mipahayag ngadto sa kalibutan, sa pinakadirekta nga pagkasulti ako makapahayag, nga ang Basahon ni Mormon tinuod, nga miabut kini sa paagi nga giingon ni Joseph nga miabut” (“Kasiguroan alang sa Kalag,” Ensign o Liahona, Nob. 2009, 89–90).