Pasiuna saAng Basahon ni Mosiah
Ngano nga kinahanglang tun-an kini nga basahon?
Sa ilang pagtuon sa basahon ni Mosiah, mabasa sa mga estudyante ang gamhanan nga mga pagpamatuod kabahin sa misyon ni Jesukristo. Makat-unan usab nila ang mahitungod sa mga katawhan kinsa giluwas sa Ginoo gikan sa pagkaulipon sa sala o gikan sa pisikal mga pagpanglupig. Dugang pa niana, makat-unan sa mga estudyante kon sa unsa nga paagi ang matarung nga mga paningkamot sa mga indibidwal sama ni Haring Benjamin, Abinadi, ug Alma midala og hilabihan nga mga panalangin ngadto sa uban. Sa bali, makat-unan sa mga estudyante kon sa unsa nga paagi ang dili maayo nga mga pagpili sa mga indibidwal sama ni Zeniff ug sa iyang anak nga lalaki nga si Haring Noah midala og ngil-ad nga mga sangputanan diha sa ilang mga kaugalingon ug sa ilang mga katawhan.
Kinsa ang nagsulat niini nga basahon?
Gitipon ug gimubo ni Mormon ang mga rekord sa ubang daghan nga mga manunulat aron mahimo ang basahon ni Mosiah. Ang basahon gipangalan ni Mosiah, kinsa anak nga lalaki ni Haring Benjamin. Si Mosiah usa ka propeta, manalagna, tigpadayag, ug hari kinsa nagmando sa Zarahemla nga gibana-bana gikan sa 124 B.C. ngadto sa 91 B.C. Ginganlan siya sunod sa iyang apohan nga lalaki nga si Mosiah, kinsa usa usab ka hari sa Zarahemla (tan-awa sa Omni 1:12–13, 19).
Mikuha si Mormon gikan sa daghang mga rekord aron sa pagtipon sa basahon ni Mosiah. Gimubo ug gikutlo niya gikan sa rekord nga gitipigan ni Mosiah diha sa dagkong mga palid ni Nephi, nga nagdetalye sa kasaysayan sa mga Nephite diha sa yuta sa Zarahemla (tan-awa sa Mosiah 1–7; 25–29). Gikuha usab niya gikan sa rekord ni Zeniff, nga nag-istorya sa kasaysayan sa mga katawhan ni Zeniff gikan sa panahon nga sila mibiya sa Zarahemla hangtud sila mibalik (tan-awa sa Mosiah 7–22). Sa pagdugang, gikutlo ug gimubo ni Mormon gikan sa mga bahin sa mga sinulat ni Alma, kinsa mipatunhay sa mga pulong ni Abinadi ug mitipig og rekord sa iyang kaugalingon nga mga katawhan (tan-awa sa Mosiah 17:4; 18; 23–24).
Para kang kinsa kini nga basahon gisulat ug ngano?
Wala itunong ni Mormon ang basahon ni Mosiah ngadto sa piho nga mga tawo o ipahayag kon nganong gisulat niya kini nga basahon. Hinoon, ang basahon ni Mosiah nagtabang sa kahulugan sa labing mahinungdanong mga katuyoan sa Basahon ni Mormon—sa pagsaksi nga si Jesus mao ang Kristo ug sa pagpahibalo sa mga pakigsaad sa Ginoo (tan-awa sa ulohang pahina sa Basahon ni Mormon). Ang basahon ni Mosiah naglakip sa duha ka batid nga mga pamulong kabahin sa misyon ni Jesukristo: sa mga pulong ni Haring Benjamin diha sa Mosiah 2-5 ug sa mga pulong ni Abinadi diha sa Mosiah 12-16. Agi og dugang, ang basahon ni Mosiah balik-balik nga naghulagway sa importansya sa paghimo ug pagsunod sa mga pakigsaad uban sa Ginoo (tan-awa sa Mosiah 5:5–9; 18:5–10; 21:31–32; 24:13–15; 25:16–18; 26:20).
Kanus-a ug diin kini gisulat?
Ang orihinal nga mga rekord nga gigamit isip mga tinubdan alang sa basahon ni Mosiah ingon og gisulat tali sa 200 B.C. ug 91 B.C. Gimubo ni Mormon kadto nga mga rekord sa mga panahon tali sa A.D. 345 ug A.D. 385. Wala girekord ni Mormon kon hain siya sa dihang iyang gisulat kini nga basahon.
Unsa ang pipila ka mga butang nga nakalahi niini nga basahon?
Ang Mosiah mao ang unang basahon diha sa Basahon ni Mormon nga usa ka minubo gikan sa dagkong mga palid ni Nephi. Kini naghatag og mga pagtulun-an kalabut sa mga abilidad sa usa ka manalagna (tan-awa sa Mosiah 8:13–18; 28:10–17). Agi og dugang, ang basahon ni Mosiah usa ka talagsaon sa pagsaysay niini sa mga kasinatian ug mga panaw sa nagbulag nga mga grupo sa Nephite—kadtong diha sa yuta sa Zarahemla, kadtong kinsa gimandoan ni Zeniff, Noah, ug Limhi diha sa yuta sa Nephi, ug kadtong kinsa milayas gikan sa yuta sa Nephi uban ni Alma. Aron makat-unan pa og dugang ang mahitungod niini nga mga grupo, mahimo kang mo-refer ngadto sa kinatibuk-ang pagpasabut sa mga panaw diha sa Mosiah 7–24, nga makita diha sa appendix sa katapusan niini nga manwal.
Ang basahon ni Mosiah naghulagway sa paghiusa sa mga katawhan nga gipangulohan ni Limhi ug Alma uban sa mga Nephite diha sa yuta sa Zarahemla (tan-awa sa Mosiah 25:1–13). Kini naghatag og mga detalye mahitungod sa pagdumala sa Simbahan ni Jesukristo sa tibuok yuta sa Zarahemla (tan-awa sa Mosiah 25:14–24; 26). Sa katapusan, ang basahon ni Mosiah nagpaila sa pagmando sa mga maghuhukom (tan-awa sa Mosiah 29).
Outline
Mosiah 1–5 Si Haring Benjamin nagtudlo sa iyang anak nga lalaki nga si Mosiah isip iyang manununod ug naghatag og istorya sa iyang pagmando. Nagtudlo si Benjamin kabahin ni Jesukristo ug nagdapit sa iyang mga katawhan sa pagsulod ngadto sa usa ka pakigsaad uban sa Dios.
Mosiah 6–8 Si Mosiah nagsugod sa iyang pagmando. Si Ammon ug laing15 nangita sa mga kaliwat sa mga katawhan ni Zeniff diha sa yuta sa Nephi. Nagkita si Ammon ug si Haring Limhi, usa ka apong lalaki ni Zeniff, ug nahibaloan kon sa unsang paagi ang mga katawhan nadala ngadto sa pagkaulipon.
Mosiah 9–17 Usa ka kasaysayan sa mga katawhan ni Zeniff gihatag. Human sa kamatayon ni Zeniff, ang iyang anak nga lalaki nga si Noah nagmando sa dinautan. Nagpamatuod si Abinadi kabahin ni Jesukristo ug nag-awhag ni Haring Noah ug sa iyang mga katawhan sa paghinulsol. Gipatay si Abinadi pinaagi sa kalayo.
Mosiah 18–20 Si Alma, usa ka pari ni Haring Noah, naghinulsol. Nagtudlo siya sa ebanghelyo ug milayas uban sa iyang mga sumusunod ngadto sa kamingawan. Ang mga Nephite nga diha sa yuta sa Nephi giatake sa mga Lamanite ug gibutang ubos sa pagkaulipon. Gipatay si Noah sa iyang mga katawhan ug gipulihan sa iyang anak nga lalaki nga si Limhi.
Mosiah 21–22 Si Limhi ug ang iyang mga katawhan naghinulsol. Ang Ginoo nagluwas kanila gikan sa pagkaulipon, ug si Ammon naggiya kanila ngadto sa yuta sa Zarahemla.
Mosiah 23–24 Si Alma ug ang iyang mga sumusunod nagtukod sa siyudad sa Helam. Gibutang sila ubos sa pagkaulipon sa mga Lamanite ug gilutos ni Amulon ug sa iyang mga kaigsoonan, mga pari kaniadto ni Haring Noah. Ang Ginoo nagluwas ni Alma ug sa iyang mga katawhan ug naggiya kanila ngadto sa yuta sa Zarahemla.
Mosiah 25–29 Ang mga Nephite naghiusa ubos sa pagmando ni Mosiah, ug si Alma nagdumala sa Simbahan. Ang anak nga lalaki ni Alma nga si Alma (kasagarang gitawag og Alma nga Batan-on) ug ang anak nga mga lalaki ni Mosiah nakabig. Sa wala pa ang iyang kamatayon, gisugdan ni Alma ang paghari sa mga maghuhukom.