3 Nephi 17–22 (Unit 26)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 3 Nephi 17–22 (unit 26) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (3 Nephi 17)

Samtang ang mga estudyante nagtuon sa mga pulong ni Jesukristo ngadto sa pundok sa mga Nephite, ilang nakat-unan nga pinaagi sa pagpamalandong ug pag-ampo ngadto sa Amahan, makadawat kita og mas dakong pagsabut sa mga pagtulun-an sa Manluluwas. Ang Manluluwas mitubag sa gitinguha sa mga Nephite nga Siya magpabilin pa og diyutay uban kanila pinaagi sa pag-ayo sa ilang mga masakiton ug pagpanalangin sa ilang mga anak. Samtang ang mga estudyante nagbasa niining mga panghitabo, ilang nakat-unan nga si Jesukristo mobati og dakong kalooy alang kanato.

Day 2 (3 Nephi 18)

Ang Manluluwas mipahigayon sa sakrament ngadto sa pundok sa mga katawhan. Nakat-unan sa mga estudyante nga kon moambit kita sa sakrament, kita nagsaksi ngadto sa Amahan nga kita andam sa pagbuhat sa tanan nga Iyang gisugo kanato ug nga kita kanunayng mohinumdom ni Jesukristo. Nakat-unan usab nila nga kon kita moambit sa sakrament ug kanunayng mohinumdom sa Manluluwas, makabaton kita sa Iyang Espiritu uban kanato. Ang mga pagtulun-an sa Manluluwas mahitungod sa pag-ampo nakatabang sa mga estudyante nga makasabut nga kon kita magmabinantayon ug mag-ampo kanunay ngadto sa Amahan, kita makahimo sa pagbatok sa mga tintasyon ni Satanas. Ila usab nga nakat-unan nga kon kita mangalagad sa uban, makatabang kita kanila sa pagduol ngadto kang Kristo.

Day 3 (3 Nephi 19)

Human mibiya ang Manluluwas sa katapusan sa Iyang unang adlaw uban sa mga Nephite, ang mga disipulo mitudlo sa mga katawhan. Nag-ampo sila ug nakadawat sa Espiritu Santo. Nakat-unan sa mga estudyante nga ang atong matarung nga mga tinguha ug mga pag-ampo makapasarang kanato nga mapuno sa Espiritu Santo. Ang Manluluwas mipakita pag-usab, ug Siya mipasalamat sa Amahan sa paglimpyo sa Iyang mga disipulo. Nakat-unan sa mga estudyante nga kon kita mopakita og hugot nga pagtuo diha kang Jesukristo, kita mahimong putli ug mahiusa uban ni Jesukristo, ingon nga Siya usa uban sa Amahan.

Day 4 (3 Nephi 20–22)

Si Jesukristo mipahigayon pag-usab sa sakrament. Nakat-unan sa mga estudyante nga kon takus kita nga moambit sa sakrament, mapuno kita sa Espiritu Santo. Ang Manluluwas mitudlo dayon sa mga Nephite nga ang Amahan motuman sa Iyang pakigsaad sa pagpundok sa balay ni Israel sa ulahing mga adlaw. Nakat-unan usab sa mga estudyante nga isip binhi ni Abraham, kita adunay responsibilidad sa pagpanalangin sa tanang katawhan sa yuta pinaagi sa pagpakigbahin sa ebanghelyo ngadto kanila.

Pasiuna

Kini nga leksyon makatabang sa mga estudyante nga masabtan ang kalumo ug kalooy nga gibati sa Manluluwas alang sa Iyang katawhan. Dugang pa, samtang ang mga estudyante nagribyu sa tambag sa Ginoo nga mag-ampo, mahimo silang maghunahuna og mga paagi sa paghimong mas makahuluganon sa ilang mga pag-ampo nga personal ug sa pamilya.

Mga Sugyot alang sa Pagtudlo

3 Nephi 17

Ang Manluluwas miayo sa masakiton, nag-ampo ngadto sa Amahan alang sa mga katawhan, ug mipanalangin sa ilang mga anak

Dapita ang mga estudyante sa paghunahuna sa labing maamumahon nga tawo nga ilang nailhan. Dayon ipangutana: Kinsa ang inyong gihunahuna? Sa unsang paagi nga kining tawhana nagpakita og gugma alang sa uban ug alang kaninyo?

I-display ang mga litrato nga Jesus Nang-ayo sa mga Nephite (Libro sa mga Hulagway sa Ebanghelyo [2009], nu. 83) ug Gipanalanginan ni Jesus mga Bata nga Nephite (Libro sa mga Hulagway sa Ebanghelyo, nu. 84). Dayon ipangutana: Unsa ang inyong nakat-unan mahitungod sa gugma sa Manluluwas alang sa mga katawhan atol sa inyong pagtuon sa Basahon ni Mormon niining milabayng semana?

Isulat ang mosunod nga kamatuoran diha sa pisara: Nabati sa Manluluwas ang dakong kalooy alang kanato. Ubos niini nga pamahayag, isulat ang mosunod nga pakisayran sa kasulatan: 3 Nephi 17:7, 9, 11, 15–17, 21, 24. Dapita ang mga estudyante sa pagribyu niining mga bersikulo ug pagpili og usa nga nagpakita sa kamatuoran nga nahisulat diha sa pisara. Human sa igong panahon, mahimo ninyong ipangutana ang mosunod:

Sa unsang paagi nga ang bersikulo nga inyong napili nagpakita nga nabati sa Manluluwas ang dakong kalooy alang kanato?
Unsay inyong nakat-unan mahitungod sa Manluluwas nga Siya mialagad ngadto sa mga katawhan sa “tinagsa-tagsa”? (3 Nephi 17:21).
Sa unsang paagi nga ang pagkahibalo mahitungod sa kalooy sa Manluluwas nakatabang kaninyo sa pagpakita og mas dakong pagtuo diha Kaniya ug mobati og mas dakong gugma alang Kaniya?

3 Nephi 18–19

Si Jesus mitudlo sa mga katawhan sa pag-ampo kanunay ngadto sa Amahan ug magtigum sa kanunay

Ipares-pares ang mga estudyante, ug hangyoa ang matag pares sa paglista og lima sa labing lisud nga mga tintasyon nga sa ilang pagtuo maoy giatubang sa mga kabatan-onan karon. Kon mahuman na sila, dapita ang matag pares sa pagbasa sa 3 Nephi 18:15–20 ug pangitaon ang tambag nga gihatag sa Manluluwas alang sa pagbuntog sa mga tintasyon. Hangyoa ang pipila ka mga estudyante sa pagpakigbahin og usa ka baruganan nga ilang nakit-an dinhi niining mga bersikulo. Usa ka baruganan nga tingali ilang makit-an mao nga kon kita magmabinantayon ug mag-ampo sa kanunay ngadto sa Amahan, kita makahimo sa pagbuntog sa mga tintasyon ni Satanas.

Pangutan-a ang mga estudyante sa mosunod:

Unsa kaha ang angayng bantayan sa usa ka batan-on aron makasugakod sa usa sa mga tintasyon nga inyong nalista?
Unsa ang mahimong i-ampo sa usa ka batan-on nga makatabang kaniya nga makasugakod sa usa sa mga tintasyon nga naa sa inyong lista? Sa unsang paagi nga ang pag-ampo sa Langitnong Amahan makatabang kaninyo nga magpabiling lig-on?

Aron matabangan ang mga estudyante nga mapalig-on ang ilang mga pagpamatuod bahin sa pag-ampo sa pamilya, dapita ang usa ka estudyante sa pagbasa og kusog sa 3 Nephi 18:21. Dayon ipangutana: Unsa nga mga panalangin ang inyong nadawat gikan sa pag-ampo uban sa inyong pamilya?

Dapita ang usa ka estudyante sa pagbasa sa mosunod nga istorya gikan ni Presidente James E. Faust sa Unang Kapangulohan, kinsa namulong bahin sa gahum sa pag-ampo sa pamilya:

“Ang pag-ampo sa pamilya usa ka gamhanan ug nagpaluyong impluwensya. Atol sa malisud nga panahon sa Ikaduhang Gubat sa Kalibutan, ang usa ka 500 libras nga bomba nahagsa sa gawas sa gamayng balay ni Brother Patey, usa ka batan-ong amahan didto sa Liverpool, England, apan ang bomba wala mobuto. Ang iyang asawa namatay na man, mao nga nag-inusara siya nga nagpadako sa iyang lima ka mga anak. Siya mipundok nila niining lisud nga panahon nga nagkinahanglan kaayo alang sa pag-ampo sa pamilya. Silang ‘tanan nag-ampo … nga kinasingkasing ug sa dihang nahuman na sila sa pag-ampo, ang mga bata miingon: “Papa, kita mamaayo ra. Mamaayo ra kita dinhi sa balay karong gabhiuna.”

“‘Ug mao nga nangatulog na sila, hunahunaa, uban nianang makalilisang nga bomba nga anaa lang gyud sa gawas sa pultahan nga ang katunga nalubong sa yuta.’ …

“‘Pagkasunod buntag ang … tibuok kasilinganan gibakwit sulod sa kwarentay-otso ka oras ug ang bomba sa katapusan nakuha na. …

“‘Sa pagpamalik na si Brother Patey nangutana sa foreman sa A.R.P. Squad: “Unya, unsa man ang inyong nasuta?”

“‘”Mr. Patey, among nasusi ang bomba gawas sa inyong pultahan ug nasuta nga andam na kining mobuto sa bisan unsang oras. Dili kini depektibo. Naglibug mi kon nganong wala kini mobuto.”‘ Ang milagroso nga mga butang mahitabo kon ang mga pamilya dungan nga mag-ampo” (“The Lifeline of Prayer,” Ensign, Mayo 2002, 61).

Pangutan-a ang mga estudyante sa mosunod, nga mobati sa mga estudyante kansang mga pamilya tingali wala mag-ampo og dungan:

Unsa ang inyong mahimo aron matabangan ang inyong pamilya nga adunay mas makanunayon ug makahuluganon nga pag-ampo sa pamilya?
Giunsa ninyo pagplano aron ang pag-ampo sa pamilya mahimong usa ka prayoridad sa inyong umaabut nga pamilya?

Ipasabut nga sa dihang ang Manluluwas mibalik alang sa ikaduhang adlaw sa pagtudlo sa mga Nephite, sumala sa narekord sa 3 Nephi 19, giawhag na usab Niya ang mga disipulo nga Nephite sa pag-ampo. Dapita ang usa ka estudyante sa pagbasa og kusog sa 3 Nephi 19:9, 13, ug ipapangita sa mga estudyante kon unsa ang gi-ampo sa mga disipulo. Ipangutana: Unsa nga baruganan ang atong makat-unan gikan sa kasinatian sa mga disipulo nga mga Nephite? (Ang mosunod mao ang usa ka paagi nga ang mga estudyante mahimong mopahayag niining baruganan: Ang atong matarung nga mga tinguha ug mga pag-ampo makapasarang kanato nga mapuno sa Espiritu Santo.)

Dayon ipangutana sa mga estudyante: Kanus-a kamo sinserong nagtinguha ug nag-ampo alang sa pakig-uban sa Espiritu Santo? Sa unsang paagi kamo napanalanginan sa pagbuhat sa ingon?

3 Nephi 20–22

Sa ulahing mga adlaw, sugdan sa Dios ang pagpundok sa balay ni Israel

Ipasabut nga human sa pagtudlo sa mga Nephite mahitungod sa pag-ampo, ang Manluluwas misugod sa pagtudlo kanila mahitungod sa panagpundok sa balay ni Israel sa ulahing mga adlaw. Dapita ang usa ka estudyante sa pagbasa sa 3 Nephi 21:9. Hangyoa ang klase sa pagsunod, nga mangita sa mga pulong nga naghulagway sa buhat sa Ginoo. Dayon ipangutana:

Unsa kaha ang gipasabut sa “usa ka mahinungdanon ug kahibulongan nga buhat”? (Ang Pagpahiuli sa ebanghelyo ni Jesukristo, nga naglakip sa pagtungha sa Basahon ni Mormon.)
Sa inyong opinyon, unsa nga bahin ang mahinungdanon ug kahibulongan sa Pagpahiuli sa ebanghelyo ni Jesukristo?

Hangyoa ang mga estudyante sa pagribyu sa 3 Nephi 21:10–11 ug sa paghunahuna mahitungod kon kinsa ang gihulagway sa Ginoo nga “akong sulugoon.” Ipangutana: Unsa nga mga pulong ang makatabang ninyo nga makahibalo nga ang Ginoo naghulagway ni Propeta Joseph Smith? Dayon i-display ang litrato nga Joseph Smith sa Bilanggoan sa Liberty (Libro sa mga Hulagway sa Ebanghelyo, nu. 97).

Ipangutana: Sa unsang paagi nga gipakita sa Dios pinaagi ni Joseph Smith nga ang Iyang “kaalam mas labaw pa kay sa kamaliputon sa yawa”?

Sa pagtapos, dapita ang mga estudyante sa pagpakigbahin sa ilang mga pagpamatuod bahin ni Propeta Joseph Smith ug sa Pagpahiuli sa ebanghelyo. Ipakigbahin ang imong pagpamatuod ngadto sa imong mga estudyante bahin niining mga butanga.

Sunod nga Unit (3 Nephi 23–30)

Dapita ang mga estudyante sa paghunahuna nga ang Manluluwas misulti kanila nga Siya mohatag sa bisan unsa nga ilang gitinguha. Ipasabut nga samtang magtuon sila sa 3 Nephi 23–30 sa umaabut nga semana, ilang makat-unan ang mahitungod sa napulog duha ka mga tawo kinsa nakasinati niini ug unsa ang ilang gihangyo.