Leksyon 89

Alma 31

Pasiuna

Nahibaloan ni Alma nga ang usa ka grupo nga mga masupilon nga Nephite nga gitawag og mga Zoramite nangahisalaag gikan sa kamatuoran sa ebanghelyo ug nahitumpawak ngadto sa sayop nga mga binuhatan. Nasubo niining mga report sa kadautan, si Alma nagdala og usa ka grupo sa mga misyonaryo aron sa pagtudlo sa pulong sa Dios ngadto sa mga Zoramite. Si Alma ug ang iyang mga kompanyon nakaobserbar sa pagsimba, materyalismo, ug garbo sa mga Zoramite nga hingpit nang mibiya sa kamatuoran. Matinguhaong nag-ampo si Alma nga ang Ginoo mohupay kaniya ug sa iyang mga kompanyon samtang sila nagsagubang niini nga hagit ug nga sila magmalampuson sa pagdala sa mga Zoramite balik ngadto sa Ginoo.

Mga Sugyot alang sa Pagtudlo

Alma 31:1–7

Si Alma ug ang iyang mga kompanyon mibiya sa Zarahemla aron sa pagsangyaw sa pulong sa Dios ngadto sa mga Zoramite nga hingpit nang mibiya sa kamatuoran

Hangyoa ang mga estudyante sa paghunahuna mahitungod sa unsay ilang buhaton kon ang usa ka higala o sakop sa pamilya nagsugod sa pagkahilayo gikan sa pagsunod sa ebanghelyo.

• Unsa ang inyong buhaton aron matabangan kining tawo nga mabalik ngadto sa Simbahan? Unsaon ninyo pagpukaw sa tinguha diha sa tawo aron mosunod sa kasugoan? Kang kinsa kamo modangop alang sa tabang sa pakigtambayayong sa inyong sakop sa pamilya o higala?

Sultihi ang mga estudyante nga ang leksyon karon maghatag og gibug-aton kon giunsa ni Alma ug sa uban sa pagpaningkamot sa pagtabang sa usa ka grupo sa katawhan nga nahilayo sa ebanghelyo. Dapita ang usa ka estudyante sa pagbasa og kusog sa Alma 31:1–4. Hangyoa ang klase sa pagpangita sa mga problema ni Alma ug sa uban mahitungod sa mga Zoramite.

• Unsa ang mga gibati ni Alma sa dihang iyang nadunggan ang kadautan sa mga Zoramite?

• Nganong ang mga Nephite nagsugod sa pagkahadlok tungod sa mga Zoramite?

Hangyoa ang mga estudyante sa paghunahuna nga sila adunay oportunidad sa pagtambag ni Alma kon unsaon sa pagsulbad ang iyang mga problema mahitungod sa mga Zoramite. Pangutan-a ang mga estudyante unsa ang ilang isugyot nga iyang buhaton. Dapita ang usa ka estudyante sa pagbasa og kusog sa Alma 31:5. Hangyoa ang klase sa pagpangita sa unsay nahibaloan ni Alma nga labing epektibo nga paagi sa pagtabang sa mga Zoramite.

• Unsa ang nadesisyunan ni Alma nga buhaton sa pagtabang sa mga Zoramite?

• Sa pagpaningkamot aron matabangan ang mga tawo nga mag-usab, ngano man nga ang pulong sa Dios mas gamhanan kay sa pwersa o sa laing mga paagi?

Base sa Alma 31:5, unsa ang atong makat-unan mahitungod sa gahum sa pulong sa Dios diha sa atong mga kinabuhi? (Ang mga estudyante mahimong mogamit og lain-laing mga pulong, apan siguroha nga ilang mailhan ang mosunod nga kamatuoran: Samtang magtuon kita sa pulong sa Dios, kini mogiya kanato sa pagbuhat sa matarung. Mahimo nimong isulat kining kamatuoran diha sa pisara.)

Aron matabangan ang mga estudyante nga mas makasabut sa gahum sa pulong sa Dios sa pagtabang kanato nga mobuhat unsa ang matarung, ipakigbahin ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. (Mahimo nimong isulat kining pamahayag diha sa pisara o andamon kini isip usa ka handout.)

President Boyd K. Packer

“Ang tinuod nga doktrina, kon masabtan, makapausab sa mga kinaiya ug pamatasan.

“Ang pagtuon sa mga doktrina sa ebanghelyo mas daling makapalambo sa kinaiya kay sa pagtuon sa kinaiya nga mopalambo og kinaiya. … Mao nga gihatagan gayud nato og gibug-aton ang pagtuon sa mga doktrina sa ebanghelyo” (“Little Children,” Ensign, Nob. 1986, 17).

Dapita ang mga estudyante sa pag-istorya mahitungod sa usa ka panahon nga sila o ang tawo nga ilang kaila nakabaton og mas dakong tinguha sa pagbuhat unsa ang matarung tungod sa kasulatan o mga pagtulun-an sa mga lider sa Simbahan.

I-summarize ang Alma 31:6–7 pinaagi sa pagsulti sa mga estudyante nga isip resulta sa kamasaligon ni Alma sa gahum sa pulong sa Dios, siya ug ang uban pang pito miadto aron sa pagsangyaw sa mga Zoramite.

Alma 31:8–23

Ang mga Zoramite nag-ampo ug nagsimba sa sayop nga paagi

Sultihi ang mga estudyante nga sa dihang si Alma ug ang iyang mga kompanyon miadto sa mga Zoramite, sila nakaobserbar sa katawhan nga nagsimba sa Dios sa makapahingangha nga paagi.

Dapita ang mga estudyante sa pagbasa sa hilum sa Alma 31:8–11, nga motino sa mga pulong nga naghulagway sa pagsimba sa mga Zoramite. Ipasabut nga sa footnote 10a nagsugyot nga ang mga pulong nga “mga kahimoan sa simbahan” may kalabutan sa mga ordinansa ingon man ang “pag-ampo ug pangamuyo ngadto sa Dios sa matag adlaw.”

• Sumala sa bersikulo 10, unsa ang binuhatan sa mga Zoramite nga nakapahimo nilang daling madutlan sa tintasyon?

• Unsa ang atong makat-unan gikan sa mga Zoramite nga pakyas sa “pagpadayon sa pag-ampo ug pangamuyo ngadto sa Dios matag adlaw”? (Mahimong magkalain-lain ang mga tubag sa mga estudyante, apan kinahanglan nilang ipahayag nga ang atong inadlaw nga mga paningkamot sa pag-ampo ug pagtuman sa mga sugo molig-on kanato batok sa tintasyon. Mahimo nimong isulat kini nga baruganan diha sa pisara. Mahimo usab nimong isugyot nga ang mga estudyante mosulat niini diha sa ilang mga kasulatan tupad sa Alma 31:9–11.)

• Kanus-a ninyo nakita nga ang inadlaw nga pag-ampo makatabang kanato sa pagbatok sa tintasyon?

Isip kabahin sa panaghisgutan sa mga estudyante niining pangutana, basaha ang mosunod nga pamahayag ni Elder Rulon G. Craven sa Seventy:

“Atol sa milabayng katuigan adunay mga panahon nga gihangyo ko sa mga Kaigsoonan aron makighimamat sa mahinulsulon nga mga miyembro sa Simbahan ug mag-interbyu nila alang sa pagpahiuli sa ilang mga panalangin sa templo. Sa kanunay nahimo gayud kining usa ka makapatandog nga espirituhanong kasinatian sa pagpahiuli sa mga panalangin niadtong maanindot nga mga tawo nga naghinulsol. Nakapangutana ko sa pipila kanila, ‘Unsa ang nahitabo sa inyong kinabuhi nga maoy hinungdan sa temporaryong pagkawala sa inyong pagkamiyembro sa Simbahan?’ Sa luhaan nga mga mata sila mitubag: ‘Wala ko misunod sa sukaranang mga baruganan sa ebanghelyo: pag-ampo, regular nga pagtambong sa simbahan, pagserbisyo sa simbahan ug pagtuon sa ebanghelyo. Dayon nagpadala ko ngadto sa mga tintasyon ug nawala ang giya sa Balaang Espiritu’” (“Temptation,” Ensign, Mayo 1996, 76).

Dapita ang usa ka estudyante sa pagbasa og kusog sa Alma 31:12–14. Dayon dapita ang laing estudyante sa pagbasa og kusog sa Alma 31:15–18. Sa dili pa mobasa ang ikaduha nga estudyante, hangyoa ang klase sa paghunahuna mahitungod kon unsaon nila sa pagtubag kon makadungog sila og tawo nga nag-ampo sa ingon niining paagiha.

• Unsa ang mahimo ninyong problema kon kamo makadungog og tawo nga mag-ampo sa ingon niining paagiha?

• Unsa ang pipila ka sayop nga mga doktrina nga gimemorya sa mga Zoramite sa ilang mga pag-ampo?

• Unsa ang mga kinaiya sa mga Zoramite ngadto sa ubang tawo? (Mahimo nimong idirekta ang pagtagad sa mga estudyante kon kapila gibalik-balik ang mga pulong nga kami ug kanamo diha sa pag-ampo sa mga Zoramite.)

Dapita ang usa ka estudyante sa pagbasa og kusog sa Alma 31:19–23. Hangyoa ang klase sa pagsunod ug pangitaon ang dugang mga problema sa sumbanan sa pag-ampo sa mga Zoramite. Hangyoa ang mga estudyante nga moreport sa unsay ilang nakit-an.

• Unsa kaha nga mga kausaban ang gikinahanglang himoon sa mga Zoramite aron ang ilang pagsimba mahimong adunay balaang pagtahud ug ikahimuot sa Ginoo?

Ipasabut nga mosimba kita sa Dios pinaagi sa paghatag Kaniya sa atong gugma, balaang pagtahud, ug debosyon. (Mahimo nimong ilista kining mga elemento sa pagsimba diha sa pisara.) Kinahanglan nga masimbahon kita dili lang sa atong kinaiya ug mga lihok kon kita mag-ampo, magpuasa, ug magtambong sa Simbahan apan diha sa atong kinaiya ug mga lihok sa tibuok adlaw. Awhaga ang mga estudyante sa pagtimbang-timbang sa gitutokan ug pagkasinsero sa ilang kaugalingong pagsimba.

Hangyoa ang mga estudyante sa pag-ila sa lain-laing mga paagi nga kita tukmang makasimba sa Dios. Tuguti og igong panahon alang sa ilang pagpakigbahin sa mga ideya. Mahimo nimo kining ipasulat sa usa ka estudyante diha sa pisara.

• Unsa ang angay natong kinaiya kon kita magsimba? Unsaon nato nga mapabilin kana nga kinaiya sa tibuok adlaw?

Aron matabangan ang mga estudyante nga makasabut kon sa unsang paagi nga ang atong kinaiya makaapekto sa atong pagsimba, dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Ang pagsimba kanunayng naglakip sa mga lihok, apan ang tinuod nga pagsimba kanunayng may kalabutan sa partikular nga kinaiya sa hunahuna.

“Ang kinaiya sa pagsimba mao ang hinungdan sa atong lawom nga mga pagbati sa pagkamaunungon, pagpasidungog, ug kahingangha. Ang pagsimba nag-uban sa gugma ug balaang pagtahud diha sa usa ka kahimtang sa debosyon nga modala sa atong mga espiritu nga mas duol ngadto sa Dios” (Pure in Heart [1988], 125).

Dapita ang mga estudyante sa pagsulat diha sa mga notebook o scripture study journal og usa ka mubo nga pagtimbang-timbang sa ilang kasamtangang personal nga sumbanan sa pagsimba ug sa ilang kinaiya sa pagsimba sa mosunod nga mga kategoriya: inadlaw nga personal nga pag-ampo, inadlaw nga personal nga pagtuon sa kasulatan, pagkamasulundon sa mga sugo, ug pagtambong sa simbahan ug pag-ambit sa sakrament kada semana. Hangyoa ang mga estudyante sa pagpahimo og tumong aron molambo ang ilang inadlaw nga personal nga pagsimba.

Awhaga ang mga estudyante sa paghimo og tumong sa paggamit sa unsay ilang nakat-unan

Si Presidente Thomas S. Monson mitudlo sa kaimportante sa pagdapit sa mga estudyante sa paglihok sa unsa ang ilang nakat-unan diha sa classroom: “Ang katuyoan sa pagtudlo sa ebanghelyo … dili ang ‘pagbu-bu og impormasyon’ ngadto sa hunahuna sa mga sakop sa klase. … Ang tumong mao ang pagdasig sa mga indibidwal sa paghunahuna, pagbati, ug dayon adunay buhaton mahitungod sa buhi nga mga baruganan sa ebanghelyo. …

“Akong nadungog ug akong makalimtan;

“Akong nakita ug akong mahinumduman;

“Akong buhaton ug akong makat-unan” (sa Conference Report, Okt. 1970, 107–8).

Alma 31:24–38

Nag-ampo si Alma alang sa kusog ug kalampusan sa pagdala sa mga Zoramite balik ngadto sa Ginoo

Dapita ang mga estudyante sa pagbasa sa hilum sa Alma 31:24–25, nga mangita sa mga kinaiya ug mga pamatasan nga kauban sa pagbiya sa mga Zoramite sa kamatuoran. Hangyoa ang mga estudyante nga moreport sa unsay ilang nakit-an.

Ipasabut nga sa dihang nakita ni Alma ang kadautan sa mga Zoramite, nag-ampo siya. Hangyoa ang mga estudyante nga magpares-pares. Patun-i sa managpares ang Alma 31:26–35 ug pahisguti ang mosunod nga mga pangutana. (Mahimo nimong ihatag kining mga pangutana isip usa ka handout o isulat kini sa pisara sa dili pa magsugod ang klase.)

• Unsa man ang gitumong sa pag-ampo sa mga Zoramite? (Ilang gitumong ang ilang mga kaugalingon.)

• Unsa man ang gitumong sa pag-ampo ni Alma? (Iyang gitumong ang pagtabang sa uban. Bisan kon siya nag-ampo alang sa iyang kaugalingon ug sa iyang mga kompanyon, nangayo siya og kusog sa pagserbisyo sa mga Zoramite.)

• Unsa nga mga elemento sa pag-ampo ni Alma ang ganahan ninyong iapil sa inyong personal nga mga pag-ampo?

Isulat sa pisara ang mosunod:

Kon mag-ampo kita ug molihok inubanan sa pagtuo, …

Ipasabut nga human si Alma nag-ampo alang sa panabang sa mga Zoramite, siya ug ang iyang mga kompanyon misugod sa pagserbisyo, “wala maghunahuna sa ilang mga kaugalingon” (Alma 31:37). Hangyoa ang mga estudyante sa pagbasa sa hilum sa Alma 31:36–38, nga mangita sa mga panalangin nga miabut ngadto ni Alma ug sa iyang mga kompanyon samtang ilang nadawat ang mga panalangin sa priesthood ug gisangyaw ang ebanghelyo. (Mahimo nimong ipasabut nga sa Alma 31:36, ang mga pulong nga “mipandong sa iyang mga kamot diha kanila” nagpasabut sa pagpatong sa mga kamot. Tan-awa sa footnote 36b)

• Unsa nga mga panalangin ang miabut ni Alma ug sa iyang mga kompanyon tungod sa ilang mga pag-ampo ug mga lihok?

Base sa unsay atong nakat-unan gikan sa ehemplo ni Alma ug sa iyang mga kompanyon, unsaon ninyo pagkompleto ang pamahayag diha sa pisara? (Ang mga estudyante mahimong mohatag og pipila ka lain-laing mga tubag nga tinuod. I-summarize ang ilang mga tubag pinaagi sa pagkompleto sa pamahayag sa pisara: Kon kita mag-ampo ug molihok inubanan sa pagtuo, ang Ginoo molig-on kanato sa atong mga pagsulay.)

Ipasabut nga sunod sa iyang pag-ampo, si Alma ug ang iyang mga kompanyon mipakita sa ilang pagtuo pinaagi sa pagbuhat ug pagsalig sa Ginoo nga mosangkap kanila samtang sila nagserbisyo Kaniya. Dapita ang mga estudyante sa pagsunod sa ehemplo ni Alma sa pag-ampo inubanan sa pagtuo.

Komentaryo ug Background nga Impormasyon

Alma 31:22. “Ang binalik-balik nga pag-ampo”

Si Elder Joseph B. Wirthlin sa Korum sa Napulog Duha ka mga Apostoles naghisgot sa kaimportante sa sinsero nga pag-ampo:

“Ang inyo bang mga pag-ampo ingon og nagbalik-balik ug bation ninyo nga parehas ra? Nakaampo ba kamo sukad nga dili sinsero, ang mga pulong nga gilitok naingon sa demakina? Laayon ba kamo usahay samtang kamo nag-ampo?

“Ang mga pag-ampo ba nga wala mangayo og dako sa inyong hunahuna makakuha og dakong pagtagad gikan sa atong Langitnong Amahan? Kon inyong namatngunan ang inyong kaugalingon nga nagbalik-balik na ang inyong mga pag-ampo, hunong ug paghunahuna. Pamalandungi sa makadiyot ang mga butang nga kamo mapasalamaton gayud. Pangitaa kini. Dili kini kinahanglan nga nindot kaayo o mahimayaon. Usahay kinahanglan natong ipahayag ang atong pagpasalamat sa gagmay ug yanong mga butang sama sa alimyon [scent] sa ulan, ang lami sa inyong paborito nga pagkaon, o ang tingog sa usa ka minahal” (“Improving Our Prayers,” Ensign, Mar. 2004, 26).

Alma 31:26–35. Pag-ampo alang sa uban

Si Elder David A. Bednar sa Korum sa Napulog Duha ka mga Apostoles mipamatuod sa mga panalangin nga moabut samtang kita mag-ampo alang sa uban:

“Mangamuyo sa Langitnong Amahan alang sa mga panalangin nga atong gitinguha sa atong personal nga mga kinabuhi mao ang maayo ug angay. Hinoon, ang pag-ampo sa matinguhaon nga paagi alang sa uban, niadtong kinsa atong gihigugma ug niadtong matamayon nga naggamit kanato, usab usa ka importante nga butang sa makahuluganon nga pag-ampo. … Ang pag-ampo alang sa uban sa tanang kusog sa atong mga kalag modugang sa atong kapasidad sa pagpaminaw ug pagsunod sa tingog sa Ginoo” (“Pag-ampo sa Kanunay,” Ensign o Liahona, Nob. 2008, 43).