Leksyon 160
Moroni 10:8–26, 30–34
Pasiuna
Human itudlo kon unsaon ang pag-angkon og saksi sa kamatuoran sa tanang mga butang pinaagi sa Espiritu Santo, giawhag ni Moroni kadtong kinsa mobasa sa iyang mga pulong sa pagdawat ug pag-ila sa espirituhanon nga mga gasa. Gitapos ni Moroni ang rekord sa Basahon ni Mormon pinaagi sa pag-awhag sa tanang mga tawo sa pagduol ngadto ni Kristo, maghupot sa matag maayong gasa nga Iyang gitanyag, ug maghingpit pinaagi Kaniya.
Mga Sugyot alang sa Pagtudlo
Moroni 10:8–26
Nagtudlo si Moroni mahitungod sa mga gasa sa Espiritu ug ang ilang katuyoan diha sa buhat sa Ginoo
Dapita ang mga estudyante sa paghunahuna og panahon nga gitabangan sila sa Langitnong Amahan sa pagbuhat og usa ka butang nga dili unta nila mahimo sa ilang kaugalingon. Hangyoa ang mga estudyante sa pagbasa sa hilum sa Moroni 10:8, nga mangita sa mga pulong nga naghulagway sa espirituhanon nga mga abilidad o mga panalangin nga gihatag sa Dios ngadto sa matinud-anon (“mga gasa sa Dios”). Ipasabut nga kasagaran kita nag-refer niini nga mga gasa isip mga gasa sa Espiritu o espirituhanon nga mga gasa.
-
Sumala sa Moroni 10:8, ngano nga ang Dios naghatag og mga gasa sa Espiritu ngadto sa Iyang mga anak? (Human sa tubag sa mga estudyante, isulat ang mosunod nga kamatuoran diha sa pisara: Ang Dios naghatag og mga gasa sa Espiritu alang sa kaayohan sa Iyang mga anak. Kinahanglan nimong ipasabut nga niining kinatibuk-ang kahulugan, ang kaayohan nagpasabut sa pagpanalangin o pagtabang.)
Hangyoa ang mga estudyante sa pagbasa og hilum sa Moroni 10:9–16, nga mangita sa mga gasa sa Dios nga gihulagway ni Moroni niini nga mga bersikulo. Mahimo nimong isugyot nga markahan sa mga estudyante unsay ilang nakit-an.
-
Hain nga mga gasa ang inyong giila niini nga mga bersikulo? (Samtang nagtubag ang mga estudyante, mahimo nimong isulat sa pisara ang ilang mga tubag.)
-
Unsa nga mga ehemplo niini nga mga gasa ang inyong nakita diha sa Simbahan?
-
Kanus-a kamo nakakita og mga tawo nga nakadawat og mga panalangin tungod kay gigamit sa uban ang ilang espirituhanon nga mga gasa? (Mahimo nga mangandam ka sa pagpakigbahin og ehemplo nga imong nakita.)
-
Unsaon sa mga gasa sa Espiritu sa paghatag og kaayohan sa tawo kinsa nagdawat niini?
Dapita ang usa ka estudyante sa pagbasa og kusog sa Moroni 10:19, 24. Hangyoa ang klase sa pagsunod, nga mangita og babag sa pagdawat ug sa pag-ila sa espiritwal nga mga gasa.
-
Unsa nga babag sa pagdawat ug pag-ila sa espirituhanon nga mga gasa ang inyong nadiskobre?
-
Ngano kaha nga ang mga tawo nga anaa sa kahimtang sa pagkawalay pagtuo dili makaila o makadawat sa gahum ug sa mga gasa sa Dios?
Dapita ang mga estudyante sa pagbasa og hilum sa Moroni 10:25–26, nga mangita sa unsay mahitabo ngadto niadtong kinsa modumili sa mga gasa ug gahum sa Dios. Hangyoa sila sa pagreport kon unsay ilang nakit-an.
Dapita ang pipila ka mga estudyante sa pagpuli-pulig basa og kusog gikan sa Moroni 10:20–23. Hangyoa ang klase sa pagsunod, nga mangita sa mga panalangin sa pagbaton og hugot nga pagtuo, paglaum, ug gugmang putli. (Sa dili pa magbasa ang mga estudyante, mahimo nimong ipasabut nga ang mga pulong “maayo ngari kanako” diha sa Moroni 10:23 nagpasabut sa mga butang nga anaa sa panag-uyon sa kabubut-on sa Dios.)
-
Unsa nga mga panalangin ang gitudlo ni Moroni nga moabut niadtong kinsa adunay hugot nga pagtuo, paglaum, ug gugmang putli?
Samtang ang mga estudyante nagtubag, isulat ang mosunod nga baruganan diha sa pisara: Kon kita adunay hugot nga pagtuo, makahimo kita sa pagbuhat unsay gusto nga ipabuhat sa Manluluwas kanato. Mahimo nimong isugyot nga markahan nila kini nga baruganan diha sa Moroni 10:23.
-
Sa inyong hunahuna sa unsa nga paagi ang duha ka mga baruganan diha sa pisara may kalabutan sa usag usa? (Kon kita adunay hugot nga pagtuo, ang Dios mohatag kanato sa mga gasa nga atong gikinahanglan aron himoon ang buhat nga Iyang ipabuhat kanato.)
-
Sa unsa nga paagi ang pagkahibalo niining duha ka mga baruganan nagtabang kaninyo karon ug sa umaabut?
Isulat sa pisara ang mosunod nga dili kompleto nga pamahayag. Aron matabangan ang mga estudyante nga mahibalo kon sa unsa nga paagi ang saad nga makita diha sa Moroni 10:23 natuman o mahimong matuman sa ilang mga kinabuhi, hatagi sila og pipila ka minuto sa pagkompleto og usa sa mga pamahayag diha sa mga notebook o mga scripture study journal:
Akong nasinati ang saad sa Moroni 10:23 sa dihang …
Ang saad nga makita diha sa Moroni 10:23 makatabang kanako kon …
Human sa igo nga panahon, dapita ang pipila ka mga estudyante sa pagpakigbahin kon unsay ilang gisulat ngadto sa usa ka kauban.
Moroni 10:30–34
Nagdapit si Moroni sa tanan nga moduol ngadto ni Jesukristo ug magpahingpit diha Kaniya
Isulat ang pulong nga Kahingpitan diha sa pisara. Sa ubos niini, isulat ang Posible o imposible?
Dapita ang mga estudyante sa pagpakigbahin sa ilang mga hunahuna kabahin sa pangutana diha sa pisara. Human sa mubo nga paghisgot, hangyoa ang usa ka estudyante sa pagbasa og kusog sa 3 Nephi 12:48.
-
Unsay gisulti sa Manluluwas nga mao ang katapusang tumong alang kanatong tanan? (Aron mahimong hingpit.) Sa unsa nga paagi kini posible?
Human ang mga estudyante nakigbahin sa ilang mga panabut, dapita ang usa ka estudyante sa pagbasa sa mosunod nga pagpasabut ni Presidente James E. Faust sa Unang Kapangulohan:
“Ang kahingpitan usa ka mahangturong tumong. Samtang kita dili mahingpit dinhi sa mortalidad, ang pagpaningkamot niini usa ka sugo, nga sa katapusan, pinaagi sa Pag-ula, atong masunod” (“This Is Our Day,” Ensign, Mayo 1999, 19).
Ipasabut nga bisan og ang kahingpitan dili makab-ut niini nga kinabuhi, sa kadugayan kita mahimong mahingpit. Gitudlo ni Moroni kon unsay atong mabuhat aron mahimong hingpit pinaagi sa Pag-ula ni Jesukristo. Kopyaha ang mosunod nga tsart diha sa pisara, dili iapil ang mga tubag diha sa parentises.
|
Unsay akong kinahanglan gayud nga buhaton … |
Unsay mga saad sa Dios … |
|---|---|
|
(Ang mga tubag mahimong maglakip nga kita kinahanglan gayud nga moduol ngadto ni Jesukristo; mangita ug modawat sa maayong mga gasa; molikay sa dautang mga gasa ug mahugaw nga mga butang; molimud sa atong mga kaugalingon sa tanang pagkadili diosnon; ug higugmaon ang Dios sa tibuok natong gahum, hunahuna, ug kusog.) |
(Ang mga tubag mahimong maglakip nga Siya motuman sa Iyang mga pakigsaad; ang Iyang grasya igo alang kanato; mahingpit kita diha ni Jesukristo; madawat nato ang grasya sa Dios; mabalaan kita ug madawat ang kapasayloan sa atong mga sala; ug mahimo kitang balaan, walay lama.) |
Hangyoa ang mga estudyante sa pagpangita sa Moroni 10:30–33 alang sa mga pulong nga naghulagway unsay atong kinahanglan gayud nga buhaton ug unsay gisaad sa Dios nga buhaton sa pagtabang kanato nga mahimong putli ug hingpit. Dapita ang usa ka estudyante sa pagrekord sa mga tubag sa mga estudyante diha sa angay nga mga kolum sa tsart. Ipasabut nga ang pulong nga grasya nag-refer sa sagradong panabang ug kalig-on nga atong nadawat tungod sa Pag-ula ni Jesukristo.
-
Unsa nga pahayag ang inyong isulat ubos niini nga tsart sa pag-summarize kon unsay gitudlo ni Moroni mahitungod sa pagkahimong putli ug hingpit? (Ang mga estudyante mahimong mogamit og lahi nga mga pulong, apan ang ilang mga tubag kinahanglan nga maghatag sa mosunod nga kamatuoran: Samtang kita moduol ngadto ni Kristo, kita mahimong putli ug mahingpit pinaagi sa Iyang Pag-ula.)
Kon posible, hatagi ang mga estudyante og kopya sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Dapita ang usa ka estudyante sa pagbasa og kusog sa pamahayag samtang ang uban mosunod. Sa dili pa mobasa ang estudyante, awhaga ang klase sa pagpaminaw og maayo, maghunahuna kon unsay ilang mahimo sa pagduol ngadto ni Jesukristo isip resulta sa pagtuon sa Basahon ni Mormon niini nga tuig.
“Kanang katapusan, kinaulahian, nag-inusarang hangyo sa sukaranang bato sa atong relihiyon ug ang labing husto nga basahon sukad nga nasulat mao ang dili paghikap sa mahugaw nga butang; kini kinahanglan nga mahimong balaan ug walay lama; kini kinahanglan nga mahimong putli. Ug kanang kaputli moabut lamang pinaagi sa dugo nianang Kordero kinsa midala sa atong mga kasubo ug mipas-an sa atong mga kagul-anan, ang Kordero kinsa gisamdan tungod sa atong mga kalapasan ug gibun-og tungod sa atong mga kadautan, ang Kordero kinsa gitamay ug gipasakitan, apan kinsa wala nato tahura (tan-awa sa Mosiah 14). …
“Kaputli—pinaagi sa dugo sa Kordero. Kana mao ang gipangamuyo niini nga basahon” (“A Standard unto My People” [pakigpulong ngadto sa CES religious educators, Ago. 9, 1994], 13–14, si.lds.org).
Hangyoa ang mga estudyante sa pag-ila og mga pulong diha sa Moroni 10:32–33 nga naghatag og gibug-aton nga mahimo lamang kita nga hingpit “diha ni Kristo,” o pinaagi sa makalimpyo nga gahum ug grasya sa Iyang Pag-ula.
-
Ngano nga atong gikinahanglan ang Pag-ula ni Jesukristo aron mahimong putli ug hingpit?
-
Unsa nga mga pulong diha sa Moroni 10:32–33 ang inyong makit-an nga nga makapadasig samtang kamo naninguha alang sa kaputli ug sa mahangturong katuyoan sa pagkahingpit?
Dapita ang mga estudyante sa pagpili og usa o duha sa mga pulong gikan sa unang kolum sa tsart diha sa pisara. Hatagi sila og pipila ka minuto sa pagsulat diha sa mga notebook o mga scripture study journal og bisan unsa nga hunahuna o mga impresyon nga sila aduna kon unsaon nila sa pag-uswag niini nga mga area.
Tapusa kini nga leksyon pinaagi sa pagbasa sa Moroni 10:34 ngadto sa klase. Hangyoa ang mga estudyante sa pagsunod, nga mangita og ebidensya nga si Moroni may hugot nga pagtuo ug paglaum diha ni Jesukristo. Human nila mareport kon unsay ilang nakit-an, dapita ang mga estudyante sa pagsulat og bisan unsa nga mga hunahuna o mga impresyon nga sila aduna samtang gitapos nila ang kurso sa pagtuon niini nga tuig sa Basahon ni Mormon. Ikonsiderar ang pagdapit sa mga estudyante sa pagpakigbahin kon unsay ilang gisulat uban sa klase. Ipamatuod ang mga panalangin nga gisaad sa Langitnong Amahan kanila kon sila moduol ngadto ni Jesukristo pinaagi sa pagsunod sa Iyang mga pagtulun-an ug sa pagpakita og hugot nga pagtuo diha sa Iyang Pag-ula. Awhaga ang mga estudyante sa paghimo sa ilang pagtuon sa Basahon ni Mormon nga usa ka tibuok nga kinabuhing paninguha.
Ribyu sa Moroni
Paghatag og pipila ka panahon sa pagtabang sa mga estudyante sa pagribyu sa basahon ni Moroni. Hangyoa sila sa paghunahuna mahitungod sa unsay ilang nakat-unan gikan niini nga basahon, sa seminary ug sa ilang personal nga scripture study. Kon gikinahanglan, dapita sila sa lakbit nga pagribyu sa pipila ka mga summary sa kapitulo sa Moroni aron sa pagtabang kanila nga mahinumdom. Human sa igo nga panahon, dapita ang pipila ka mga estudyante sa pagpakigbahin og usa ka butang gikan sa Moroni nga nakapadasig kanila o nakatabang kanila sa pagbaton og mas dako nga hugot nga pagtuo diha ni Jesukristo.
Komentaryo ug Background nga Impormasyon
Moroni 10:8–19. Mga Gasa sa Espiritu Santo
Gihulagway ni Elder Bruce R. McConkie ang mga katuyoan ug mga rason sa pag-angkon og espirituhanong mga gasa:
“[Ang katuyoan sa espirituhanon nga mga gasa] mao ang paglamdag, pag-awhag, ug paghatag og kaayohan sa matinud-anon aron sila makapanunod og kalinaw niini nga kinabuhi ug magiyahan ngadto sa kinabuhing dayon sa kalibutan nga umaabut. Ang ilang presensya usa ka kalig-unan sa pagkabalaan sa buhat sa Ginoo; diin kini dili makit-an, niana ang Simbahan ug ang gingharian sa Dios wala diha. Ang saad mao nga kini dili gayud pagahunungon gani hangtud ang kalibutan magpabilin sa kahimtang niini karon gawas sa pagkawalay pagtuo (Moro. 10:19), apan kon ang hingpit nga adlaw moabut ug ang mga santos makabaton og kahimayaan, wala nay kinahanglan alang niini. Ingon nga gipahayag kini ni Pablo, ‘Kon ang hingpit moabut na, nan, ang dili hingpit igahiklin na lang unya.’ (1 Cor. 13:10)
“Ang matinud-anon nga mga tawo gipaabut nga mangita sa mga gasa sa Espiritu uban sa tibuok nilang mga kasingkasing. Gikinahanglan nila nga ‘[tinguhaon] pag-ayo ang labi pa ka dagkong mga hiyas’ (1 Cor. 12:31; D. & P. 46:8), sa ‘pagtinguha sa mga hiyas nga espirituhanon’ (1 Cor. 14:1), ‘sa pagpangayo sa Dios, kinsa naghatag nga walay pagpugong.’ (D. & P. 46:7; Mat. 7:7–8). Nga ngadto sa uban kini mahatag aron makabaton niadtong tanan nga mga gasa, nga adunay pangulo, aron nga matag sakop mahatagan og kaayohan pinaagi niana.’ (D. & P. 46:29.)” (Mormon Doctrine, 2nd ed. [1966], 314).
Si Elder Marvin J. Ashton sa Korum sa Napulog Duha ka mga Apostoles mitudlo:
“Usa sa dako kaayong mga trahedya sa kinabuhi, para kanako, mao nga kon ang usa ka tawo, nagbutang sa iyang kaugalingon isip usa ka tawo kinsa walay mga talento o mga gasa. …
Gikan sa Doktrina ug mga Pakigsaad 46:11–12, kita aduna niini nga kamatuoran: ‘Kay dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios.’
“‘Ngadto sa uban gihatag ang usa, ug ngadto sa uban gihatag ang lain, nga ang tanan makaangkon og kaayohan pinaagi niana.’
“Ang Dios naghatag sa matag usa kanato og usa o daghan pa nga linain nga mga talento. … Kini anaa ra kanato ang pagpangita ug pagsalig diha sa mga gasa nga gihatag sa Dios kanato. …
“Ang Dios buhi. Siya nagpanalangin kanato og mga gasa. Samtang kita nagpalambo ug nakigbahin sa hinatag sa Dios kanato nga mga gasa ug kaayohan gikan sa mga gasa niadtong naglibut kanato, ang kalibutan mahimong mas maayong lugar ug ang buhat sa Dios mas mokusog ang pagpadayon” (“There Are Many Gifts,” Ensign, Nob. 1987, 20, 23).
Moroni 10:22. “Ang kawalay paglaum moabut tungod sa kadautan.”
Gipakigbahin ni Presidente Ezra Taft Benson kini nga panabut kabahin sa panginahanglan sa pagbuhat og maayo aron sa paglikay sa kawalay paglaum:
“Diha sa Basahon ni Mormon atong mabasa nga ang kawalay paglaum moabut tungod sa kadautan.’ (Moro. 10:22.) ‘Kon nagbuhat ako og maayo bation ko ang kamaayo, miingon si Abraham Lincoln, ‘ug kon nagbuhat ako og ngil-ad bation ko ang kangil-ad.’ Ang sala nagbitad sa tawo sa ubos ngadto sa kasubo ug kawalay paglaum. Samtang ang tawo mahimong motilaw og pipila ka temporaryo nga kalipay diha sa sala, ang resulta mao ang pagkawalay kalipay. Ang pagkadautan dili mahitabo nga mahimo nga kalipay.’ (Alma 41:10.) Ang sala magmugna og kawalay pakig-uyon sa Dios ug makapaluya sa espiritu. Busa, maayo sa usa ka tawo ang pag-eksamin sa iyang kaugalingon aron mahibaloan nga siya anaa sa pakig-uyon sa tanang mga balaod sa Dios. Ang matag balaod nga gisunod nagdala og piho nga panalangin. Ang matag balaod nga gilapas nagdala og piho nga kalaglagan. Kadtong kinsa nabug-atan sa kawalay paglaum kinahanglan nga moduol ngadto sa Ginoo, tungod kay masayon ang iyang yugo ug magaan ang iyang luwan. (Tan-awa sa Mat. 11:28–30.)” (“Do Not Despair,” Ensign, Okt. 1986, 2).
Moroni 10:34. Panamilit ni Moroni
Gipakigbahin ni Elder Jeffrey R. Holland sa Korum sa Napulog Duha ka mga Apostoles ang mosunod nga mga hunahuna sa panapos nga mga pulong ni Moroni diha sa Basahon ni Mormon:
“Kaputli. Pagkabalaan. Ang kinaiya ug konsensya nga walay lama. Ang tanan niini pinaagi sa grasya ni Kristo, nga naglimpyo sa atong mga garment, nagbalaan sa atong mga kalag, nagluwas kanato gikan sa kamatayon, ug nagpahiuli kanato ngadto sa atong balaang mga gigikanan.
“Uban sa iyang katapusang girekord nga paginhawa gipamatuod ni Moroni ang iyang kaugalingong lig-on nga pagtuo sa mao nga balaang katubsanan. …
“Sa ingon ang Basahon ni Mormon natapos, naglupad ingon og kini uban ni Moroni, diha sa saad sa Balaang Pagkabanhaw. [Tan-awa sa Pinadayag 14:6.] Kana ang labing angay, alang niining sagradong tugon—gisulat sa mga propeta, gihatud sa mga anghel, gipanalipdan sa Dios—nagsulti ingon og usa nga ‘nagsinggit gikan sa patay,’nag-awhag sa tanan sa pagduol ngadto ni Kristo ug magpakahingpit diha kaniya, usa ka proseso nga matapos diha sa kahingpitan sa celestial nga himaya” (Christ and the New Covenant: The Messianic Message of the Book of Mormon [1997], 339).