Leksyon 84

Alma 21–22

Pasiuna

Ang igsoon nga lalaki ni Ammon nga si Aaron mitudlo sa mga Amalekite, apan gisalikway nila ang iyang mensahe mahitungod sa Pag-ula ni Jesukristo. Dayon nagsangyaw siya sa Middoni, diin siya ug ang pipila sa iyang kaubanan gipangbilanggo. Nagpabilin silang matinud-anon sa ilang panahon sa kalisdanan, ug mipadayon sila sa ilang misyon sa pagpakigbahin sa ebanghelyo human si Ammon ug si Haring Lamoni mipagawas kanila. Pagkahuman nga ang amahan ni Lamoni naandam pinaagi sa ehemplo ni Ammon, nakat-on siya gikan ni Aaron kon unsaon nga mahimong “matawo sa Dios” (Alma 22:15). Ang amahan ni Lamoni nakat-on nga pinaagi sa paghinulsol sa iyang mga sala siya mahimong makaila sa Dios ug sa katapusan makadawat og kinabuhing dayon.

Tabangi ang mga estudyante nga makagamit sa mga doktrina ug mga baruganan

Mainampoon nga motino kon unsaon sa pagtabang sa mga estudyante sa pag-ila ug paggamit sa doktrina ug mga baruganan sa usa ka leksyon sumala sa ilang tagsa-tagsa ka mga sirkumstansya.

Mga Sugyot alang sa Pagtudlo

Alma 21

Si Aaron ug ang iyang kaigsoonan nagsangyaw sa ebanghelyo bisan pa sa mga pagsulay ug pagkabilanggo

Pangutana sa mga estudyante kon nabati ba nila nga sila naghimo sa ilang labing maayo sa pagsunod sa mga sugo ug sa gihapon nagsagubang og mga hagit o mibati og kasagmuyo. Dapita sila sa paghisgot og pipila ka mga sitwasyon diin ang katawhan mahimong mobati niining paagiha.

Ipasabut nga samtang si Ammon nagmalampuson sa pagtudlo ni Haring Lamoni ug sa iyang katawhan, si Aaron ug ang iyang mga kaubanan nakasugat og hilabihan nga kalisdanan sa lahi nga bahin sa yuta. Samtang nagtuon ang mga estudyante sa ehemplo ni Aaron ug sa iyang mga kaubanan, awhaga sila sa pagpangita sa mga leksyon nga makatabang nila kon sila mag-atubang og mga hagit o mobati og kasagmuyo.

Isulat ang mosunod nga mga pakisayran diha sa pisara: Alma 21:1–4; Alma 21:5–8; Alma 21:9–11; Alma 21:12–15; ug Alma 20:29–30. Bahina ang klase ngadto sa upat ka grupo. I-assign ang matag grupo og usa sa mga tudling nga gisulat sa pisara. Hangyoa ang mga estudyante sa pagpangandam sa paghatag og mubo nga summary sa gi-assign nila nga mga tudling ug sa paghulagway sa bisan unsang kalisdanan nga gisagubang ni Aaron ug sa iyang mga kaubanan. Human sa pipila ka minuto, dapita ang mga estudyante gikan sa matag grupo sa pagpakigbahin sa unsay ilang nakit-an.

• Giunsa paglahutay ni Aaron ug sa iyang kaigsoonan ang ilang mga pagsulay? (Tan-awa sa Alma 20:29; 21:9, 12, 15.)

• Usa sa mga pagsulay nga giatubang ni Aaron mao ang oposisyon gikan sa mga Amalekite samtang nagtudlo siya kanila (tan-awa sa Alma 21:5–10). Unsa ang atong mahimo kon ang tawo gustong makiglantugi kanato mahitungod sa relihiyon o mohagit sa atong tinuohan?

Pahinumdumi ang mga estudyante sa pangutana sa sinugdanan niini nga leksyon. Si Aaron ug ang iyang kaigsoonan mitrabaho pag-ayo sa pagbuhat sumala sa gisugo sa Ginoo kanila, apan sila nag-atubang gihapon og mga kalisdanan. Hangyoa ang mga estudyante sa pagkonsiderar sa hilum kon unsa ang ilang bation kon ilang masinati unsa ang nasinati ni Aaron ug sa iyang mga kaubanan. Unsa kaha ang gusto nilang buhaton human sa pag-antus ug sa pagkabilanggo nga layo sa panimalay tungod sa ebanghelyo? Tingali imo silang pangutan-on kon gusto ba nilang mopauli.

Isulat sa pisara ang mosunod nga baruganan: Kon kita matinud-anong mopadayon sa atong mga pagsulay, ang Ginoo motabang kanato sa paghimo sa Iyang buhat. Dapita ang usa ka estudyante sa pagbasa og kusog sa Alma 21:16–17. Hangyoa ang uban sa klase sa pagsunod, mangita kon giunsa pagtabang sa Ginoo si Aaron ug ang iyang mga kaigsoonan nga mahimo ang Iyang buhat. Dapita ang mga estudyante sa pagreport unsa ang ilang nakit-an.

Aron matabangan ang mga estudyante nga magamit ang baruganan nga nasulat sa pisara, pangutana nila unsa nga matang sa buhat nga ang Dios mipabuhat kanila karon ug unsa kaha nga mga hagit ang ilang giatubang samtang sila naningkamot sa pagtuman niini nga buhat. (Mahimo nimong ipasabut nga agig dugang sa misyonaryo nga buhat, ang mga estudyante makaapil sa buhat sa Dios pinaagi sa pagtambong sa mga miting sa Simbahan, pagtuman sa mga calling ug assignment, sa pag-alagad sa uban, pagpalig-on sa ilang mga pagpamatuod, ug mahimong mas mahisama ni Kristo.)

Dapita ang mga estudyante sa pagpakigbahin kon giunsa nila sa pagkahibalo nga ang baruganan nga imong gisulat sa pisara tinuod. Mahimo nimong ipakigbahin ang imong pagpamatuod mahitungod kon unsaon sa pagtabang sa Ginoo kanato nga matuman ang Iyang buhat kon kita matinud-anon nga mopadayon sa mga pagsulay. Pangayo sa mga estudyante og mga pananglitan sa mga panahon sa umaabut kon sila maghunahuna nga tingali magkinahanglan sila nga magpadayon sa mga pagsulay kon sila mohimo sa buhat sa Ginoo.

I-summarize ang Alma 21:18–23 pinaagi sa pagpasabut nga human sa pagtabang sa pagpagawas ni Aaron ug sa iyang kaigsoonan gikan sa bilanggoan, si Ammon ug Lamoni mibalik ngadto sa yuta sa Ishmael, diin mipadayon sila sa pagsangyaw sa ebanghelyo. Si Lamoni mihatag og pagtugot sa kagawasan sa relihiyon ngadto sa iyang katawhan.

Alma 22

Si Aaron nagtudlo sa ebanghelyo ngadto sa amahan ni Lamoni, kinsa nagtuo ug natawo sa Dios.

Isulat sa pisara ang mosunod nga mga pangutana:

Nganong gusto ninyo nga makadawat og kinabuhing dayon?

Unsa may andam ninyong undangon aron madawat ang kinabuhing dayon?

Ipasabut nga “ang kinabuhing dayon, o kahimayaan, mao ang pagpanunod sa dapit sa labing taas nga ang-ang sa celestial nga gingharian, diin kita mopuyo sa atubangan sa Dios ug magpadayon isip mga pamilya (tan-awa sa D&P 131:1–4). … Kini nga gasa nahimong posible pinaagi sa Pag-ula ni Jesukristo” (Matinud-anon sa Tinuhoan: Usa ka Pakisayran sa Ebanghelyo [2004], 103). Sultihi og kadali ang mga estudyante kon nganong gusto nimo nga makadawat og kinabuhing dayon. Sa imong pagbuhat sa ingon, mahimo nimong ipakita ang litrato sa imong pamilya ug hulagway sa Manluluwas. Dayon hangyoa ang mga estudyante sa pagpamalandong sa mga pangutana nga naa sa pisara samtang sila magtuon og dungan sa Alma 22.

Dapita ang usa ka estudyante sa pagbasa og kusog sa Alma 22:1.

• Unsa ang inyong mahinumduman mahitungod sa amahan ni Lamoni gikan sa miaging leksyon? (Mahimo nimong dapiton ang usa ka estudyante sa pag-summarize sa Alma 20.)

• Sumala sa Alma 20:27, unsa ang gihangyo sa amahan ni Lamoni nga buhaton ni Ammon? (Tudloan siya.)

I-summarize ang Alma 22:2–3 pinaagi sa pagpasabut nga bisan tuod ang amahan ni Lamoni gusto nga makita si Ammon ug magpatudlo niya, matinguhaon gihapon siyang makakat-on sa dihang si Aaron ang miabut ngadto kaniya.

Dapita ang usa ka estudyante sa pagbasa og kusog sa Alma 22:5–6. Hangyoa ang klase sa pagsunod, nga mangita kon unsay gustong mahibaloan sa amahan ni Haring Lamoni. Hangyoa sila sa pagreport unsay ilang nakit-an.

Bahina ang klase ngadto sa gagmayng mga grupo. Dapita sila sa pagbasa og dungan sa Alma 22:7–14 ug maghimo og lista sa mga doktrina nga gitudlo ni Aaron ngadto sa amahan ni Lamoni. (Sama pananglit, tingali maghisgut sila nga siya nagtudlo sa Paglalang, sa Pagkapukan, ug sa Pag-ula.) Human matipon sa mga grupo ang ilang mga nalista, hangyoa ang usa ka estudyante nga ipakigbahin sa klase ang lista sa mga doktrina nga gihimo sa iyang grupo. Mahimo nimong hangyoon ang mga estudyante sa pagsulat sa lista diha sa pisara. Dayon dapita ang ubang mga estudyante sa pagsulat og bisan unsang ikadugang nga mga doktrina nga nalista sa grupo.

• Sa unsang paagi nga kining mga doktrina nakatubag sa pangutana sa hari sa Alma 22:6?

Dapita ang mga estudyante sa pagsiksik sa hilum sa Alma 22:15, nga mangita sa unsay andam biyaan sa amahan ni Haring Lamoni aron makadawat og hingpit nga kalipay ug kinabuhing dayon.

• Unsa ang inyong mga nahunahunaan samtang nagkonsiderar kon unsay andam biyaan sa hari?

Ipasabut nga bisan og ang hari andam sa pagbiya sa tanan niyang mga kabtangan, si Aaron mitudlo kaniya sa mas dakong sakripisyo nga iyang gikinahanglang himoon. Dapita ang usa ka estudyante sa pagbasa og kusog sa Alma 22:16. Hangyoa ang klase sa pagpaminaw sa unsay gisulti ni Aaron sa gikinahanglan nga buhaton sa hari.

• Unsay giingon ni Aaron nga gikinahanglang buhaton sa hari? (Maghinulsol sa iyang mga sala ug mag-ampo ngadto sa Dios uban sa hugot nga pagtuo.)

Dapita ang usa ka estudyante sa pagbasa og kusog sa Alma 22:17–18. Hangyoa ang klase sa pagsunod, nga mangita sa tubag sa hari sa gitudlo ni Aaron.

• Giunsa sa pagpakita sa hari ang iyang tinguha aron makadawat og kinabuhing dayon?

• Sa inyong hunahuna unsay gipasabut sa “mobiya” sa atong mga sala? Ngano kaha nga mahinungdanon ang paghinulsol sa tanan natong mga sala, dili lang ang pipila niini? (Tabangi ang mga estudyante nga makasabut nga magkinahanglan kini og panahon alang sa usa ka tawo sa paghinulsol sa tanan niyang mga sala.)

• Unsa ang atong makat-unan gikan sa amahan ni Haring Lamoni mahitungod sa pagpangandam alang sa kinabuhing dayon? (Samtang ang mga estudyante mahimong mogamit og lain-laing mga pulong, siguroha nga sila makasabut sa mosunod nga kamatuoran: Kita kinahanglan gayud nga andam mobiya sa tanan natong mga sala aron makaandam sa kinabuhing dayon. Mahimo kang mosugyot nga markahan sa mga estudyante ang mga pulong nga “ako mobiya sa tanan kong mga sala aron makaila kanimo” sa Alma 22:18.)

Hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Ang ebanghelyo ni Jesukristo naghagit kanato sa pagbag-o. ‘Paghinulsol’ mao ang pirme nga mensahe niini, ug ang paghinulsol nagpasabut sa pagsalikway sa tanan natong mga binuhatan—ma-personal, pamilya, kaliwat, ug sa nasudnon—nga kanang sukwahi sa mga sugo sa Dios. Ang katuyoan sa ebanghelyo mao ang pag-usab sa kasagarang mga nilalang ngadto sa celestial nga lungsuranon, ug kana nagkinahanglan og kausaban” (“Repentance and Change,” Ensign o Liahona, Nob. 2003, 37).

Ipasabut nga ang pipila ka mga tawo naghunahuna kon sila tinuod ba nga makahinulsol ug mausab. Ang uban nangutana kon ang Ginoo mopasaylo ba kanila. Aron matabangan ang mga estudyante kinsa mahimong adunay mga problema niini, basaha ang mosunod nga pamahayag ni Sister Elaine S. Dalton, ang kinatibuk-ang presidente sa Young Women:

“May kinahanglan bang usbon sa inyong kinabuhi? Mahimo ninyo kini. Makahinulsol mo tungod sa walay katapusang pag-ula sa Manluluwas. Gihimo Niya kini alang nimo ug nako nga mag-usab, nga maputli ug malimpyo pag-usab, ug mahisama Kaniya. Ug misaad Siya nga kon atong buhaton, dili na Siya mohinumdom sa atong mga sala ug sayop.”(“Karon ang Panahon sa Pagtindog ug Pagpakita!” Ensign o Liahona, Mayo 2012, 124).

Ipasabut nga samtang kita mopakita og hugot nga pagtuo ug maghinulsol sa atong mga sala, mahimo kitang angayan sa pagdawat sa mga ordinansa ug mga pakigsaad sa priesthood nga makatabang kanato nga makaandam alang sa kinabuhing dayon.

Dapita ang mga estudyante sa pagsulat sa ilang mga class notebook o mga scripture study journal sa ilang mga tubag sa mosunod nga pangutana. (Mahimo nimong isulat ang pangutana sa pisara o basahon kini sa hinay aron ang mga estudyante makasulat niini.)

• Gikan sa inyong nakat-unan mahitungod sa unsay gikinahanglan aron makadawat og kinabuhing dayon, unsa ang inyong gibati nga pangayoon sa Ginoo kaninyo karon aron mas mahiduol kamo ngadto Kaniya?

Kon ang mga estudyante adunay igong panahon sa pagpamalandong ug pagsulat, ipangutana:

• Unsa nga mga ebidensya nga inyong nakita nga ang hari nakabig ngadto sa Ginoo? (Pahinumdumi ang mga estudyante nga ang hari nagbag-o gikan sa gustong mopatay sa iyang kaugalingong anak ngadto sa pagkaandam nga mobiya sa tibuok niyang gingharian ug sa tanan niyang mga sala aron matawo sa Dios.)

I-summarize ang Alma 22:19–21 pinaagi sa pagpasabut nga human ang hari nabuntog sa Espiritu, ang iyang mga sulugoon midagan ug gisultian ang rayna sa tanan nga nahitabo. Nasuko siya ug mimando sa mga sulugoon sa pagpatay kang Aaron ug sa iyang mga kaigsoonan. Nahadlok sa gahum sa Nephite nga mga misyonaryo, ang mga sulugoon mibalibad. Ang rayna nahadlok usab apan determinado nga ipapatay ang mga Nephite. Mimando siya sa mga sulugoon sa pag-adto ug magdala sa mga tawo aron sa pagpatay ni Aaron ug sa iyang kaubanan.

Hangyoa ang mga estudyante sa pagbasa sa hilum sa Alma 22:22–26, nga mangita sa gibuhat ni Aaron ug sa hari aron ang rayna ug ang uban makabig usab ug makasinati sa kalipay. Tapusa pinaagi sa pagpakigbahin sa imong pagpamatuod bahin sa paghinulsol ug sa panalangin sa pagbag-o pinaagi sa Pag-ula ni Jesukristo.

Ribyu sa Scripture Mastery

Ang kabatan-onan makakat-on sa paggamit sa mga kasulatan aron sa pagtudlo sa mga kamatuoran sa ebanghelyo. Bahina ang mga estudyante nga magpares, ug dapita ang matag parisan sa pagpangandam og usa ngadto sa duha ka minuto nga presentasyon diin sila magtudlo sa nag-unang doktrina nga imong gi-assign nila. Hangyoa sila sa paggamit sa labing minos usa ka scripture mastery passage sa pagtudlo sa doktrina. Hangyoa usab sila sa pagkonsiderar sa paggamit og mga pagpasabut, mga pananglitan, kasinatian, ug pagpamatuod sa ilang pagtudlo. Ang duha ka estudyante sa matag parisan kinahanglang moapil sa mga presentasyon. Human sa igong panahon sa pagpangandam, paghangyo og duha o tulo ka parian sa pagtudlo sa klase. Ikonsiderar ang paghangyo sa uban nga parisan sa paghimo sa ilang presentasyon atol sa umaabut nga mga debosyonal o human sa usa ka mubo nga leksyon.

Pahinumdom: Kon kamo wala nay panahon alang niini nga kalihokan isip kabahin sa leksyon, mahimo nimo kining gamiton sa laing adlaw. Alang sa ubang mga kalihokan sa pagribyu, tan-awa ang appendix sa katapusan niining manwal.

Komentaryo ug Background nga Impormasyon

Alma 21:16–17. “Sila nakadala og daghan ngadto sa kahibalo sa kamatuoran”

Si Aaron ug ang iyang kaubanan milahutay og daghang mga kalisdanan sa wala pa sila nakatabang sa uban nga mobalik ngadto sa Ginoo. Si Presidente Thomas S. Monson mitudlo:

“Ang pagtabang, ang pagtudlo, ang pagtandog sa bililhong mga kalag nga giandam sa Amahan alang sa Iyang mensahe usa ka dako nga buluhaton. Ang kalampusan talagsa ra nga yano. Sa kinatibuk-an kini giunhan sa mga luha, pagsulay, pagsalig, ug pagpamatuod” (“Tears, Trials, Trust, Testimony,” Ensign, Mayo 1987, 43).

(Alma 22:18.) “Ako mobiya sa tanan kong mga sala aron makaila kanimo”

Sama sa amahan ni Lamoni, kita kinahanglan gayud nga andam mosakripisyo sa tanang butang aron matawo sa Dios. Sa Lectures on Faith, atong makat-unan ang kaimportante sa pagsakripisyo sa atong mahangturon nga pag-uswag:

“Atong maobserbaran dinhi, nga ang usa ka relihiyon nga nag-ingon nga wala kinahanglana ang pagsakripisyo sa tanang butang wala gayuy igong gahum sa pagpalambo sa pagtuo nga gikinahanglan sa kinabuhi ug kaluwasan; kay, gikan sa unang pagpakabuhi sa tawo, ang hugot nga pagtuo gikinahanglan ngadto sa pagtagamtam sa kinabuhi ug kaluwasan nga dili gayud maangkon kon wala ang pagsakripisyo sa tanang yutan-on nga mga butang. Kini pinaagi sa sakripisyo, ug niini lamang, nga ang Dios mi-orden nga ang tawo kinahanglang makatagamtam sa kinabuhing dayon, ug kini pinaagi sa pagsakripisyo sa tanang yutan-ong mga butang nga ang tawo sa pagkatinuod nakahibalo nga sila nagbuhat sa mga butang nga ikahimuot sa mata sa Dios. Kon ang usa ka tawo mihalad og sakripisyo sa tanan nga anaa kaniya tungod og alang sa kamatuoran, nga dili mabalaka sa iyang kinabuhi, ug nagtuo sa Dios nga siya gitawag sa paghimo niini nga sakripisyo tungod kay nagtinguha siya sa pagbuhat sa iyang kabubut-on, siya nasayud gayud, labing siguro, nga ang Dios mohimo ug modawat sa iyang sakripisyo ug halad, ug nga siya wala, gani wala magkawang sa iyang tinguha nga makakita kaniya. Ubos niini nga mga kahimtang, sa ingon, maangkon niya ang hugot nga pagtuo nga gikinahanglan alang kaniya sa paghupot og kinabuhing dayon” (Lectures on Faith [1985], 69).

(Alma 22:18.) “Siya nalup-og ingon og patay”

Ang hari “nalup-og ingon og patay” (Alma 22:18) sa dihang siya nakadawat og pagpabati sa Espiritu nga hilabihan ka gamhanan nga kini ang hinungdan sa pagkawala sa iyang pisikal nga kusog. Siya nakasinati og susama ngadto sa iyang anak nga si Lamoni, kinsa ingon og namatay apan sa pagkatinuod nakasinati “sa kahayag sa himaya sa Dios” hangtud sa punto nga kini “nakabuntog sa iyang kinaiyanhon nga bayanan, ug siya giagak ngadto sa Dios” (Alma 19:6).