Leksyon sa Home-Study
3 Nephi 1–11:17 (Unit 24)
Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 3 Nephi 1–11:17 (unit 24) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.
Day 1 (3 Nephi 1)
Samtang nagtuon ang mga estudyante mahitungod sa katumanan sa mga panagna ni Samuel ang Lamanite kalabut sa pagkatawo ni Jesukristo, ilang nakat-unan nga ang Ginoo motuman sa tanang mga pulong nga Iyang gisugo nga ipamulong sa Iyang mga propeta. Gikan sa mga ehemplo niadtong kinsa nagmatinud-anon bisan kon ang dili matuohon nagplano sa paglaglag kanila, nakat-unan sa mga estudyante nga kon kita magsagubang sa mga bakak ni Satanas, makapili kita nga motuo diha ni Jesukristo ug magpabiling matinud-anon. Ang pagsukol sa pipila ka batan-ong Lamanite nagpakita sa mga estudyante nga kon kita magpadala sa tintasyon, ang atong ehemplo makahatag og negatibong epekto diha sa pagtuo ug pagkamatarung sa uban.
Day 2 (3 Nephi 2–5)
Samtang nagtuon sa pagkunhod sa pagkamatarung sa mga katawhan, naobserbaran sa mga estudyante nga kon makalimot kita sa espirituhanong mga kasinatian, mas dali kitang madutlan sa mga tintasyon ug mga panglingla ni Satanas. Samtang nag-analisar sila sa malinglahon nga sulat ni Giddianhi ngadto ni Lachoneus, nadiskubrihan sa mga estudyante kon unsaon ni Satanas ug sa iyang mga sumusunod ang paggamit sa pag-ulog-ulog, bakak nga mga saad, ug sa mga hulga aron sa pagpahisalaag sa mga katawhan. Nakat-unan sa mga estudyante gikan sa mga Nephite ug mga Lamanite kinsa malampuson nga midepensa sa ilang mga kaugalingon batok sa mga tulisan ni Gadianton nga kon kita mangandam sa atong kaugalingon sa espiritwal ug temporal nga paagi, ang Ginoo molig-on kanato sa pagbuntog sa mga hagit. Samtang ang mga estudyante nagbasa mahitungod sa mga Nephite nga nanagdayeg sa Ginoo alang sa ilang kaluwasan, ilang nakat-unan nga ang pag-ila sa kaayo ug kalooy sa Dios sa atong kalingkawasan gikan sa mga kalisdanan makatabang kanato nga magpabiling mapainubsanon. Ang mga paningkamot sa mga Nephite sa pagsangyaw sa ebanghelyo ug ang pamahayag ni Mormon sa iyang katungdanan naghulagway nga isip mga disipulo ni Jesukristo, kita adunay responsibilidad sa pagtudlo sa uban sa dalan padulong sa kinabuhing dayon.
Day 3 (3 Nephi 6–10)
Samtang nagbasa ang mga estudyante mahitungod sa unsang paagi nga ang mga Nephite ug mga Lamanite midailos pag-usab ngadto sa kadautan, sila nakadiskobre nga kon kita magmapahitas-on, naghatag kita og mas dakong gahum ni Satanas sa pagtintal kanato ug modala kanato sa pagpakasala. Apan ang matinud-anon nga ehemplo sa pipila ka mga tawo nagpakita nga makapili kita nga mamahimong mapainubsanon ug matinud-anon bisan pa sa atong mga kahimtang. Sa dihang ang gobyerno sa Nephite nagkabulag-bulag, kadtong misunod ni Nephi mipakita nga kon kita maghinulsol ug mosunod sa mga sulugoon sa Ginoo, makatagamtam kita sa impluwensya sa Espiritu Santo sa atong kinabuhi. Human sa makalilisang nga kalaglagan, ang tanang mga katawhan sa tibuok yuta nakadungog sa tingog ni Jesukristo nga nagpahayag diha sa kangitngit nga kon kita moduol ngadto Kaniya uban sa masulub-on nga kasingkasing ug mahinulsulon nga espiritu, Siya moayo kanato ug mohatag kanato og kinabuhing dayon.
Day 4 (3 Nephi 11:1–17)
Samtang ang mga estudyante nagtuon sa pagpahibalo sa Amahan kang Jesukristo, ilang nadiskubrihan nga ang Espiritu Santo kasagaran makigsulti kanato pinaagi sa atong mga pagbati. Nakat-unan usab nila nga samtang kita nagkat-on kon unsaon sa pagpaminaw sa tingog sa Ginoo pinaagi sa Espiritu Santo, makasabut kita sa komunikasyon nga Iyang ihatag kanato. Gikan sa istorya sa Manluluwas sa pagsugod sa Iyang pangalagad sa mga Nephite, nakat-unan sa mga estudyante nga si Jesukristo nagdapit kanatong tanan aron makadawat og personal nga pagpamatuod nga Siya mao ang atong Manluluwas ug sa higayon nga makadawat kita niana nga pagpamatuod, kita adunay responsibilidad sa pagpamatuod Kaniya.
Pasiuna
Ang kalihokan alang sa 3 Nephi 1–7 niini nga leksyon nagpasabut sa pipila ka mga doktrina ug mga baruganan nga makatabang sa mga estudyante nga mas masabtan kon unsay gipasabut nga makabig sa ebanghelyo ni Jesukristo. Ang mga kalihokan sa pagtudlo alang sa 3 Nephi 8–10 moandam sa mga estudyante sa pagpamalandong sa ilang mga pagpamatuod sa Manluluwas samtang sila nagkat-on mahitungod sa Iyang pagpakita ngadto sa kaliwatan ni Lehi diha sa 3 Nephi 11.
Mga Sugyot alang sa Pagtudlo
3 Nephi 1–7
Ang mga timailhan ug mga katingalahan nagpahibalo sa pagkatawo ni Jesukristo; ang mga katawhan nagbalik-balik tali sa pagkamatarung ug pagkadautan hangtud ang pangagamhanan nailog
Pagdrowing og linya sama sa mosunod diha sa pisara:
Ipangutana: Base sa inyong mga pagtuon niining miaging semana, sa unsang paagi nga kining linya nagrepresentar sa mga Nephite diha sa 3 Nephi 1–7? (Mahimo nimong dapiton ang mga estudyante sa pagribyu sa mga ulohan sa kapitulo sa 3 Nephi 1–7 aron sa pagpahinumdom kanila kon sa unsang paagi nga ang mga Nephite nag-usab-usab tali sa pagkamatarung ug pagkadautan gikan sa A.D. 1 hangtud A.D. 33.)
Aron matabangan ang mga estudyante nga maghunahuna mahitungod sa unsay matudlo sa 3 Nephi 1–7 ngari kanato mahitungod sa pagkahimong tinuod nga makabig ngadto kang Jesukristo ug sa Iyang ebanghelyo, dapita ang usa ka estudyante sa pagbasa og kusog sa mosunod nga pamahayag ni Presidente Marion G. Romney sa Unang Kapangulohan. (Kon mahimo, panghatagi og kopya ang matag estudyante, ug hangyoa sila sa pagbadlis sa mga pulong nga ilang gibati nga labing maayo nga naghulagway sa usa ka nakabig nga tawo.)
“Ang pagkakabig usa ka espirituhanon ug moral nga kausaban. Ang nakabig nagpasabut nga dili basta lamang nga pagdawat ni Jesus ug sa iyang mga pagtulun-an apan usa usab ka makapadasig nga pagtuo diha kaniya ug sa iyang ebanghelyo. … Sa tawo nga tinud-anay nga nakabig sa hingpit, ang tinguha alang sa mga butang nga sukwahi sa ebanghelyo ni Jesukristo sa pagkatinuod namatay na. Ug busa ang napuli mao ang gugma sa Dios, uban ang hugot nga determinasyon sa pagsunod sa iyang mga sugo” (sa Conference Report, Guatemala Area Conference 1977, 8).
Ipangutana: Unsa nga mga pulong ang inyong gibati nga labing maayong naghulagway sa usa ka nakabig nga tawo?
Drowinga ang mosunod nga tsart diha sa pisara, o andama kini isip usa ka handout alang sa mga estudyante:
|
Mga Gituohan ug mga Buhat Nga Moresultasa Pagkakabig |
Mga Gituohan ug mga Buhat Nga Mopahuyang sa Pagkakabig | |
|---|---|---|
I-assign ang matag estudyante sa usa sa mga tudling sa kasulatan gikan sa tsart. Hatagi ang mga sakop sa klase og panahon sa pagsiksik sa ilang naka-assign nga mga tudling sa mga gituohan ug mga buhat nga mahimong moresulta o mopahuyang sa pagkakabig. Daghan sa mga baruganan nga mahimong makit-an sa mga estudyante kay anaa diha sa Summary sa mga Leksyon sa Daily Home-Study alang sa day 1–3 sa sinugdanan niining leksyon. Samtang moreport ang mga estudyante sa unsay ilang nakit-an, isulat ang ilang mga tubag diha sa pisara, o awhaga sila sa pagsulat niini diha sa ilang mga handout. Tabangi ang mga estudyante nga makagamit sa mga baruganan nga ilang nakit-an pinaagi sa pagpangutana sama sa mosunod kalabut sa usa o duha sa mga kamatuoran nga nahibaloan sa mga estudyante:
-
Sa unsang paagi nga kamo o inyong kaila nagpakabuhi sumala niana nga kamatuoran o nakasinati niana nga baruganan?
-
Base sa kamatuoran nga inyong nadiskubrihan, unsa ang inyong ikatambag aron matabangan ang usa ka tawo nga mas makabig ug magmakanunayon sa espirituhanon nga paagi?
3 Nephi 8–11:17
Ang dako nga kalaglagan ug kangitngit naghatag og timaan sa kamatayon ni Jesukristo; human sa Iyang Pagkabanhaw, Siya mibisita sa mga kaliwatan ni Lehi
Dapita ang usa ka estudyante sa pag-summarize sa mga panghitabo diha sa 3 Nephi 8 ug ipakigbahin sa klase ang bisan unsa nga mga pagbati o pag-aghat nga iyang nasinati samtang nagtuon niining kapitulo sa miaging semana. Hangyoa ang usa ka estudyante sa pagbasa sa 3 Nephi 8:20–23. Dapita ang klase sa pagpasabut nganong ang timailhan niining mga bersikulo naghulagway sa tukma nga timaan sa kamatayon ni Jesukristo. Sa paghatag og gibug-aton sa kangitngit nga nasinati sa mga Nephite, mahimo nimong gamiton ang mosunod nga kalihokan:
Hatagi ang matag estudyante og usa ka flashlight, ug palunga ang mga suga sa kwarto. (Kon kulang ang inyong flashlight, mahimong magsalo ang mga estudyante.) Hangyoa ang mga estudyante sa pagpasiga sa ilang mga flashlight, ug dapita ang pipila kanila nga magpuli-puli sa pagbasa og kusog sa 3 Nephi 9:13–20. Hangyoa ang klase sa pagsunod, nga mangita sa mga kamatuoran nga nakat-unan sa mga tawo mahitungod ni Jesukristo samtang sila nakasinati sa kangitngit human sa Iyang kamatayon. Sa pagpasiga og balik sa suga, i-summarize diha sa pisara ang mga kamatuoran nga nahibaloan sa mga estudyante. Hatagi og gibug-aton ang mosunod nga mga baruganan: Si Jesukristo mao ang kahayag ug kinabuhi sa kalibutan. Kon moduol kita kang Jesukristo uban sa masulub-on nga kasingkasing ug mahinulsulon nga espiritu, Siya modawat kanato, moayo kanato, ug mohatag kanato og kinabuhing dayon.
I-summarize ang 3 Nephi 11:1–7 pinaagi sa pagpasabut nga ang mga katawhan kinsa nakalahutay sa kalaglagan nagpundok didto sa templo sa Bountiful.
Ipakita ang hulagway nga Jesus Nagtudlo didto sa Kasadpan nga Katungang Bahin sa Kalibutan (06048; Libro sa mga Hulagway sa Ebanghelyo [2009], nu. 82) o Jesus Nang-ayo sa mga Nephite (Libro sa mga Hulagway sa Ebanghelyo, nu. 83). Dapita ang mga estudyante sa pag-visualize sa 3 Nephi 11:8–17 samtang imo kining basahon ngadto kanila. Hunonga panagsa ang imong pagbasa, ug dapita ang mga estudyante sa pagpakigbahin kon unsay gibati samtang nag-visualize sila niining kasinatian, ilabi na sa nasinati sa “tagsa-tagsa” ka mga Nephite uban sa Manluluwas, sama sa gihulagway sa 3 Nephi 11:15.
Human sa pagbasa sa 3 Nephi 11:8–17, pangutan-a ang mga estudyante sa mosunod. Dapita sila sa paggahin og pipila ka higayon nga pamalandungan sa hilum ang mga pangutana sa dili pa sila motubag. (Siguroha ang paggahin og igong panahon alang sa mga estudyante sa pagtubag niining mga pangutana aron dili nila bation nga magdali-dali samtang sila namalandong niining mga pangutana ug mopakigbahin sa ilang mga pagbati ug mga pagpamatuod.)
-
Kon kamo naapil sa mga Nephite ug adunay oportunidad nga mahikap ang samad sa Manluluwas, unsa kaha ang inyong isulti ngadto Kaniya?
-
Sa dihang si Jesukristo mipaila sa Iyang Kaugalingon ngadto sa mga Nephite, ngano kaha nga importante nga Siya mihatag og pagtagad sa “pait nga kopa”? (3 Nephi 11:11).
-
Unsa man ang “pait nga kopa” nga gipasabut ni Jesukristo? (Tan-awa sa D&P 19:16–19.)
Ipakigbahin ang imong pagpamatuod sa Manluluwas ug ang kahayag nga miabut sa imong kinabuhi samtang ikaw misunod Kaniya. (Mahimo usab nimong awhagon ang mga estudyante sa paghinumdom sa mga pagbati nga ilang nasinati atol niining leksyon ug irekord kini diha sa ilang personal nga journal diha sa panimalay.)
Sunod nga Unit (3 Nephi 11:18–16:20)
Dapita ang mga estudyante sa pagkonsiderar sa mosunod nga mga pangutana samtang magtuon sila sa sunod nga unit: Ako bang gikonsiderar si bisan kinsang tawo nga akong kaaway? Kon mao, giunsa nako pagtratar ang mao nga mga tawo? Unsa nga mga hiyas ang gibati sa Dios nga importante sa akong kinabuhi? Mahimo ra ba ang paghukom sa ubang tawo? Ang mga estudyante makapangita sa mga tubag niining mga pangutana samtang magtuon sila sa pulong sa Manluluwas diha sa unit 25.