Mormon 8:12–41

Pasiuna

Human misulat kabahin sa kalaglagan sa iyang katawhan ug ang kamatayon sa iyang amahan, si Moroni nanagna sa pag-abut sa Basahon ni Mormon ug mipahimangno sa mga sangputanan sa pagsalikway niini. Nakita ni Moroni nga ang rekord sa Nephite moabut sa panahon sa dakong kadautan, sa dihang daghan ang mahigugma sa kalibutanon nga mga kabtangan kay sa Dios. Mipamatuod siya nga ang Basahon ni Mormon bililhon kaayo taliwala sa kakuyaw sa espirituhanon nga mga kahimtang nga mahitabo sa katapusang mga adlaw.

Mga Sugyot alang sa Pagtudlo

Mormon 8:12–32

Si Moroni nanagna sa pag-abut sa Basahon ni Mormon

Sa dili pa magklase, andama ang pagpakita sa mga butang o mga hulagway nga nagrepresentar sa mga pag-uswag sa teknolohiya. Sa pagsugod sa klase, ipatumong ang atensyon sa mga estudyante ngadto sa display. Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson:

“Gusto kong mamulong kabahin sa usa sa labing mahinungdanon nga gasa nga gihatag nganhi sa kalibutan sa modernong panahon. Ang gasa nga akong gihunahuna mas importante kay sa bisan unsa nga imbensyon nga nahimo sa kapanahunan sa industriya ug teknolohiya. Kini nga gasa mas bililhon sa katawhan kay sa bisan unsa nga talagsaong mga kauswagan nga atong nakita sa modernong medisina. Kini mas bililhon ngadto sa katawhan kay sa kalambuan sa paglupad sa eroplano o pagbiyahe sa kawanangan. Mosulti ko sa gasa sa …” (“The Book of Mormon—Keystone of Our Religion,” Ensign, Nob. 1986, 4).

Gusto ka ba sa gasa nga gihisgutan ni Presidente Benson? Ngano man?
Sa imong hunahuna unsa kaha ang gasa?

Ipasabut nga mitudlo si Moroni bahin niini nga gasa. Hangyoa ang mga estudyante sa pagbasa sa Mormon 8:12 aron mahibaloan kon unsa ang gasa. Tabangi ang mga estudyante nga makasabut nga ang mga pulong nga “kini nga rekord” nagpasabut sa Basahon ni Mormon. Ipasabut nga misulti si Presidente Benson sa gasa sa Basahon ni Mormon.

Aron sa pagtabang sa mga estudyante nga makasabut sa bili sa Basahon ni Mormon, dapita sila sa pagbasa sa hilum sa Mormon 8:13–16. Sa dili pa sila mobasa, hangyoa sila sa pagpangita unsa ang gitudlo ni Moroni kabahin sa bili sa Basahon ni Mormon. Dayon pangutan-a ang pipila o ang tanan sa mosunod nga mga pangutana aron pagtabang kanila sa paghisgut ug pagtuki unsa ang ilang nakita:

Ang ubang mga tawo mohunahuna sa bili sa kwarta sa bulawang mga palid. Sumala sa Mormon 8:14, unsang aspeto sa mga palid ang “adunay dako nga bili”? (Tabangi ang mga estudyante nga mahibalo nga tungod ang Ginoo dili motugot ni bisan kinsa nga “makaangkon og bahandi” gikan sa bulawan nga mga palid, ang mga palid mismo “walay bili.” Bisan pa man, ang natala sa mga palid “adunay dako nga bili.”)
Miingon si Moroni nga ang Basahon ni Mormon mapagawas lamang sa usa ka tawo kinsa adunay “mata nga bug-os ngadto sa himaya [sa Dios]” (Mormon 8:15). Sa imong hunahuna unsa man kaha ang gipasabut niini? (Samtang ang mga estudyante maghisgut niini nga pangutana, mahimo kang modapit kanila sa pagbasa sa Joseph Smith—Kasaysayan 1:46, nga naglangkob sa ulahi nga mga instruksyon ni Moroni ngadto kang Joseph Smith, sa wala pa niya gidala ang Basahon ni Mormon.)
Sa Mormon 8:16, sa unsang paagi ang deskripsyon ni Moroni sa pag-abut sa Basahon ni Mormon nakatabang sa pagpasabut sa dakong bili sa basahon?

Sumala sa natala sa Mormon 8:17–21, mipahimangno si Moroni niadtong kinsa manghimaraut o mosupak sa Basahon ni Mormon. Dapita ang mga estudyante sa pagbasa niini nga mga bersikulo ug sa pagpangita sa mga pahimangno ni Moroni.

Unsa ang mga pahimangno ni Moroni niadtong mosalikway o mohimaraut sa Basahon ni Mormon?
Unsa nga kamatuoran ang imong makat-unan gikan sa Mormon 8:22? Sa unsang paagi nga ang pag-abut sa Basahon ni Mormon sa katapusang mga adlaw makatabang sa pagpatuman sa walay katapusan nga mga katuyoan sa Ginoo?

Ipasabut nga ang Mormon 8:23–25 naglangkob sa mga pulong ni Moroni kabahin sa mga pag-ampo sa matinud-anong mga Santos nga nag-una kaniya. Namulong siya kabahin nila nga nangamuyo ngadto sa Ginoo “gikan sa abug.” Hangyoa ang mga estudyante sa pagbasa sa hilum niini nga tudling, nga mangita sa giampo sa mga Santos sa karaang Amerika kabahin sa Basahon ni Mormon.

Alang kang kinsa nag-ampo ang karaang mga Santos? (Nag-ampo sila alang sa ilang mga kaigsoonan—nagpasabut sa mga Lamanite ug sa ilang kaliwatan—ug alang sa tawo nga modala sa Basahon ni Mormon—nagpasabut ni Propeta Joseph Smith.)

Ipasabut nga gihulagway ni Moroni ang mga kondisyon nga mahitabo sa diha nga ang Basahon ni Mormon moabut. Dayon hangyoa sila sa paghunahuna sa ilang kaugalingon sa lugar ni Moroni, nagpuyo sa sobra na sa 1,600 ka tuig ang milabay ug nakadawat og panan-awon sa atong kapanahonan.

Dapita ang mga estudyante sa pagsulat og paragraph sa mga notebook o mga scripture study journal, nga naghulagway sa espiritwal nga mga kondisyon sa atong kapanahonan. Kon nakagahin na og oras ang mga estudyante sa pagsulat, dapita sila sa pagpakigbahin sa ilang nasulat. Dayon hangyoa ang mga estudyante sa pagbasa sa hilum sa Mormon 8:26–32 ug sa pagkompara sa ilang mga paragraph ngadto sa mapanagnaon nga deskripsyon ni Moroni sa atong kapanahonan. Ipares-pares ang mga estudyante. Hangyoa ang matag pares nga mopakigbahin og pipila ka mga pagkasusama ug kalainan tali sa ilang deskripsyon ug sa deskripsyon ni Moroni.

Unsa ang inyong nakit-an nga tukma kabahin sa deskripsyon ni Moroni sa atong kapanahonan?

Isulat ang mosunod nga summary sa mga panagna ni Moroni diha sa pisara: Ang Basahon ni Mormon moabut pinaagi sa gahum sa Dios sa panahon sa hilabihang pagkadautan. Kon nagpakita ka og mga butang o mga litrato nga nagrepresentar og teknolohikal o medikal nga mga imbensyon, ikonsiderar sa pagbutang og kopya sa Basahon ni Mormon tapad niini. Aron matabangan ang mga estudyante sa pagpamalandong ug pagpamatuod sa bili sa Basahon ni Mormon sa ilang kinabuhi, pangutana sama sa mosunod:

Sa unsang paagi ang Basahon ni Mormon makatabang kanato nga makasugakod sa kadautan sa atong panahon?
Sa unsang paagi nga ang Basahon ni Mormon mas bililhon kay sa teknolohikal o medikal nga mga imbensyon?
Nganon kaha nga ang Basahon ni Mormon “usa sa labing mahinungdanon nga gasa nga gihatag nganhi sa kalibutan sa modernong panahon,” sigon sa gisulti ni Presidente Benson?
Kon ang usa ka higala mangutana nimo ngano nga ang Basahon ni Mormon bililhon kanimo, unsa man ang imong itubag?

Mormon 8:33–41

Nakita ni Moroni ang katapusang mga adlaw ug gipanghimaraut ang espiritwal nga kadautan sa atong panahon

Hangyoa ang usa ka estudyante sa pagbasa og kusog sa Mormon 8:35. Sa dili pa siya mobasa, ipasabut nga niini nga bersikulo, nakigsulti si Moroni direkta kanato.

Sa unsang paagi kini nga bersikulo nakaimpluwensya sa paagi sa atong pagbasa sa Basahon ni Mormon?

Kon nahisgutan na sa mga estudyante kini nga pangutana, basaha ang mosunod nga pamahayag ni Presidente Ezra Taft Benson, diin siya namulong kabahin sa mga propeta sa Basahon ni Mormon:

“Kon sila nakakita sa atong panahon, ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, ‘Nganong gidasig man sa Ginoo si Mormon (o ni Moroni o ni Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpakabuhi niining panahona?’” (“The Book of Mormon—Keystone of Our Religion,” 6).

Awhaga ang mga estudyante sa pagsunod niini nga tambag samtang tun-an nila ang uban pang mga pulong ni Moroni sa Mormon 8.

Hangyoa ang mga estudyante sa paghunahuna og usa ka panahon sa dihang nakabantay sila og usa ka tawo nga nanginahanglan—sa temporal, emosyonal, sosyal, o espirituhanon nga paagi. Dapita sila sa pagkonsiderar unsa ang ilang gibuhat niana nga tawo—o, kon wala nila tabangi, unsa unta ang ilang buhaton. Dapita usab sila sa pagpamalandung ngano nga mipili sila sa pagtabang o sa dili pagtabang.

Dapita ang pipila ka mga estudyante sa pagpuli-puli og basa og kusog sa Mormon 8:33–41. Hangyoa ang klase sa pagsunod, nga mangita sa mga rason nga ang uban nga mga tawo sa katapusang mga adlaw dili motabang niadtong nanginahanglan.

Ngano kaha nga ang ubang mga tawo sa katapusang mga adlaw dili motabang niadtong nanginahanglan? (Ang mga tubag mahimong maglakip og garbo, pagkadautan, mas nahigugma sa kwarta ug nindot nga mga sinina kay sa niadtong nanginahanglan, ug nagtinguha sa pagdayeg sa kalibutan.)
Sa Mormon 8:38, si Mormon naggamit sa pulong nga mga mahugaw. Unsa man ang pipila ka mga impluwensya sa kalibutan karon nga mahimong makonsiderar nga mga mahugaw? (Ang mga tubag mahimong maglakip og garbo, pornograpiya, ug ang gugma sa kwarta.)

Hangyoa ang mga estudyante sa pagsulat og sentence nga nag-summarize sa ilang nakat-unan gikan sa Mormon 8:36–41 kabahin sa atong responsibilidad sa pag-atiman sa kabus ug niadtong nanginahanglan. Dapita ang duha o tulo ka estudyante sa pagbasa sa ilang mga sentence ngadto sa klase. Bisan og ang mga pulong sa mga estudyante magkalahi, kinahanglan nilang mahibaloan ang mosunod nga kamatuoran: Patubagon kita sa Dios kon giunsa nato pagtratar ang kabus ug kadtong nanginahanglan.

Unsa kaha ang pipila ka komon kaayo nga mga panginahanglan sa inyong eskwelahan o komunidad? Unsay mabuhat sa kabatan-onan sa Simbahan aron makatabang og atiman sa mga tawo nga anaa niini nga mga panginahanglan? (Tabangi ang mga estudyante nga makasabut nga wala gipaabut gikan kanila nga mohatag sa ilang kwarta ug panahon sa matag takus nga kawsa o sa matag tawo nga mangayo og tabang. Sa ilang mga pamilya ug sa Simbahan, ang kabatan-onan makadawat og daghang oportunidad sa pagtabang niadtong nanginahanglan. Agig dugang, mahimo silang mosunod sa giya sa Espiritu aron sa paghatag og serbisyo sa ilang kaugalingon.)
Sa imong hunahuna unsa ang mahimo sa kabatan-onan sa Simbahan sa pag-atiman sa mga kabus? (Kon ang mga estudyante dili maghisgot og mga halad sa puasa, mahimo nimong hatagan og gibug-aton ang pagbayad og mga halad sa puasa pinaagi sa pagbasa sa mga paragraph ubos sa “Dominggo sa Puasa” sa Matinud-anon sa Tinuhoan: Usa ka Pakisayran sa Ebanghelyo [2004], mga pahina 210.)

Sunod niini nga panaghisgut, dapita ang mga estudyante sa pagsulat sa mga notebook o sa mga scripture study journal kabahin sa usa o duha ka mga butang nga ilang mabuhat sa pag-atiman sa kabus ug niadtong nanginahanglan. Mahimo silang mosulat og mga sugyot nga ilang nadunggan sa klase o ilang kaugalingon nga mga ideya. Dapita sila sa pagsulat og usa ka tumong sa pagbuhat og usa niining mga butanga sa umaabot nga mga semana. Awhaga sila sa pagtuman sa ilang mga tumong.

Komentaryo ug Background nga Impormasyon

Mormon 8:14–18. “Bulahan siya nga modala niini nga butang ngadto sa kahayag”

Nanagna si Moroni ni Propeta Joseph Smith, kinsa gipili sa pagdala sa Basahon ni Mormon ngadto sa kalibutan (tan-awa sa Mormon 8:15–16). Daghan pang karaan nga mga propeta nahibalo usab kang Joseph Smith ug nag-ampo alang sa iyang kalampusan sa paghubad ug pagmantala sa bulawan nga mga palid, sa ingon nagtuman sa mga katuyoan sa Dios (tan-awa sa Mormon 8:23–25; D&P 10:46). Si Presidente Boyd K. Packer sa Korum sa Napulog Duha ka mga Apostoles misulti sa tahas ni Joseph Smith sa pagpatungha sa Basahon ni Mormon:

“Ang kamatuoran mao nga, sa yanong pagkasulti, siya usa ka propeta sa Dios—walay sobra ug walay kulang bisan gamay!

“Ang mga kasulatan wala maggikan kang Joseph Smith apan gipaagi kaniya. Siya ang agianan sa mga pinadayag nga gihatag. …

“Si Propeta Joseph Smith usa ka bata gikan sa umahan nga wala ka-eskwela. Ang pagbasa sa pipila sa iyang nangaging mga sulat nga orihinal nagpakita kaniya nga daw dili hanas sa spelling ug grammar ug sa ekspresyon.

“Nga ang mga pinadayag miabut pinaagi kaniya sa bisan unsa nga porma sa literaryo nga pagkahapsay milagro gayud” (“We Believe All That God Has Revealed,” Ensign, Mayo 1974, 94).

Mormon 8:37–38. Sa unsang paagi ang pag-atiman sa mga kabus ug nanginahanglan may kalabutan sa mahangturon nga kalipay?

Si Bishop H. David Burton, Presiding Bishop, mipamatuod sa mahangturon nga mga sangputanan sa pag-atiman sa mga kabus ug nanginahanglan:

“Ang katuyoan, mga saad, ug mga baruganan nga nagsuporta sa pag-atiman sa mga kabus ug nanginahanglan molapas pa sa mga utlanan sa mortalidad. Kining sagrado nga buhat dili lamang makatabang ug makapanalangin niadtong mga nag-antus o nanginahanglan. Isip mga anak sa Dios, dili nato mapanunod sa hingpit ang kinabuhing dayon nga walay hingpit nga pagpamuhunan pinaagi sa pag-amuma sa usag usa samtang nia kita sa yuta. Pinaagi lamang sa mabinationg paagi sa pagsakripisyo ug pagtugyan sa atong kaugalingon ngadto sa uban kita makakat-on sa mga baruganang celestial sa sakripisyo ug pagpahinungod.” (“Ang Makapabalaan nga Buhat sa Welfare,” o Liahona, Mayo 2011, 82).