Alma 49–51

Pasiuna

Ang mga pagpangandam ni Moroni sa pagdepensa mahinungdanon sa pagpanalipod sa mga Nephite batok sa ilang mga kaaway. Ang mga Nephite nagmalampuson sa pagdepensa sa ilang mga kaugalingon batok sa mga Lamanite hangtud ang rebelyon ug kadautan sa ilang kaugalingong katawhan nagpahuyang kanila. Si Morianton ug ang king-men mitinguha og pagkabahin-bahin ug misulsol og panagbingkil diha sa mga katawhan. Misulay si Moroni sa pagwagtang sa pagkabahin-bahin ug panagbingkil ug mi-establisar og kalinaw.

Mga Sugyot alang sa Pagtudlo

Alma 49; 50:1–24

Ang mga Nephite nagtukod og mga kota, miuswag, ug nagpatunhay sa ilang mga kagawasan

Basaha ang mosunod nga sitwasyon diha sa imong klase ug ipangutana ang kauban nga mga pangutana (o paghimo og imong kaugalingon nga sitwasyon ug mga pangutana):

Usa ka batan-ong lalaki gibati og kakapoy apan dili gustong matulog, mao nga misugod siya sa pagsiksik sa Internet. Nakamatngon siya nga natintal sa pag-abli og mga site nga naglangkob og pornograpiya nga mga hulagway.

Unsa nga mga pagpangandam nga unta himoon niining batan-ong lalaki aron malikayan kining tintasyon?
Unsa ang iyang buhaton aron makalikay sa umaabut nga tintasyon?

Ipasabut ngadto sa mga estudyante nga samtang magtuon sila sa Alma 49–51, mahimo silang mangita kon sa unsang paagi nga ang mga pagpangandam nga gihimo ni Kapitan Moroni batok sa mga Lamanite ikakomparar sa mga pagpangandam nga angay natong himoon batok sa mga tintasyon ni Satanas karon.

Ipasabut nga samtang si Amalickiah nagsulsol sa kasundalohan sa Lamanite sa pagpakiggubat, si Kapitan Moroni nagpalig-on sa mga siyudad sa mga Nephite. Dapita ang mga estudyante sa pagbasa sa hilum sa Alma 49:1, 6–7. Hangyoa sila sa pagkonsiderar kon sa unsang paagi nga ang mga pagpangandam ni Kapitan Moroni sa paglahutay batok sa mga Lamanite mahimong ipahisama sa atong panginahanglan sa pagpangandam sa mga pag-ataki ni Satanas. Dapita ang mga estudyante sa pagbasa sa hilum sa Alma 49:2–4; 50:1–6, nga mangita kon sa unsang paagi nga ang mga Nephite nangandam alang sa umaabut nga pagpang-ataki sa mga Lamanite.

Kon kamo usa ka sundalo nga Lamanite, unsa kaha ang inyong bation kon inyong makita kining mga kota sa unang higayon?

Dapita ang pipila ka estudyante nga magpuli-puli sa pagbasa og kusog sa Alma 49:8–12. Hangyoa ang klase sa pagsunod, nga mangita kon giunsa sa pagtubag sa mga Lamanite ang mga pagpangandam sa mga Nephite.

Unsa ang gibuhat sa mga Lamanite sa dihang nakita nila nga gipalig-on ang Ammonihah? (Sila misibog.)

Hangyoa ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan:

“Si Satanas mao ang atong labing dako nga kaaway ug nagtrabaho sa gabii ug adlaw aron sa pagdaut kanato. Apan dili kita angay nga maparalisa tungod sa kahadlok sa gahum ni Satanas. Siya walay gahum batok kanato gawas kon kini atong tugutan. Usa gayud siya ka talawan, ug kon kita mobarug nga lig-on siya moatras” (“Be Not Afraid,” Ensign, Okt. 2002, 4).

Dapita ang pipila ka estudyante nga magpuli-puli sa pagbasa og kusog sa Alma 49:18–20, 23. Hangyoa ang klase sa pagsunod ug ikonsiderar kon unsaon kaha nato sa paggamit ang pagpangandam sa mga Nephite alang sa gubat isip usa ka sumbanan sa pagtabang kanato nga maandam alang sa atong espirituhanon nga mga gubat batok ni Satanas.

Si Kapitan Moroni naghago sa pagpanalipod sa mga Nephite gikan sa mga Lamanite. Sa unsang paagi nga ang atong mga lider naghago aron sa pagpanalipod ug pagdepensa kanato batok sa kaaway?
Unsa ang atong mahimo aron makatukod og taas nga espirituhanong mga paril batok sa mga tintasyon ni Satanas? (Ang mga tubag mahimong maglakip sa makahuluganon nga inadlaw nga pag-ampo, inadlaw nga pagtuon sa kasulatan, regular nga pagtambong sa Simbahan, pagserbisyo sa uban, ug pagpuasa.)

Ikonsiderar ang pagdapit og mga estudyante sa pagtubag sa mosunod nga mga pangutana diha sa ilang mga notebook o scripture study journal. (Mahimo nimong isulat kining mga pangutana diha sa pisara sa dili pa magklase.)

Unsaon ninyo paghulagway ang inyong inadlaw nga mga paningkamot sa pagpalig-on sa inyong espirituhanong mga paril nga proteksyon?
Pagpili og usa ka butang nga inyong gibuhat sa pagpalig-on sa inyong kaugalingon sa espirituhanon nga paagi o usa ka butang nga wala ninyo buhata. Unsay inyong mahimo aron madugangan ang kaepektibo niana nga kalihokan sa pagpalig-on sa inyong kaugalingon batok sa yawa?

Dapita ang usa ka estudyante sa pagbasa og kusog sa Alma 49:28–30. Hangyoa ang klase sa pag-ila kon kinsa, gawas ni Moroni, ang naghago sa pagpanalipod sa mga Nephite batok sa mga Lamanite. Ipasabut og maayo nga pinaagi sa pagtabang sa mga Nephite nga magpabiling matarung, si Helaman ug ang iyang mga kaigsoonan mitabang kanila nga madawat ang mga panalangin ug proteksyon sa Ginoo.

Hatagi ang mga estudyante og panahon sa pagtuon sa Alma 50:10–12. Dayon pahisguti nila ang mosunod nga mga sitwasyon uban sa usa ka klasmeyt. (Kon mahimo, pag-andam og usa ka handout nga adunay mga sitwasyon sa dili pa magklase. Kon kini dili posible, basaha og tagsa-tagsa ang mga sitwasyon, hatagi ang matag usa og igong panahon alang sa pagpanaghisgot.)

Si Moroni “miguba sa tanan nga mga kota sa mga Lamanite.” Unsaon kaha sa usa ka batan-ong babaye “pagguba” sa usa ka sitwasyon sa pagpanglibak kon siya makigpundok uban sa iyang mga higala diha sa tingpaniudto?
Si Moroni mipalig-on og usa ka linya, o utlanan, tali sa mga Nephite ug sa mga Lamanite. Unsaon kaha sa usa ka batan-ong lalaki ug sa batan-ong babaye pagpalig-on sa linya tali sa pagsunod sa balaod sa kaputli ug sa pagtabok ngadto sa imoralidad?
Ang mga kasundalohan ni Moroni nagtukod og mga kota aron luwas ang iyang katawhan batok sa ilang mga kaaway. Usa ka batan-ong lalaki nakaamgo nga dako na kaayo ang nausik nga panahon sa paggamit sa social media (online o pinaagi sa pagpadala og mensahe sa text). Kini nga pamatasan ingon og nagpakunhod sa iyang kabalaka alang sa iyang pamilya, ug siya mibaliwala sa iyang mga responsibilidad diha sa panimalay. Unsa ang iyang mahimo aron sa pagpalig-on ug pagsiguro sa iyang pakigrelasyon uban sa iyang pamilya?

Dapita ang pipila ka mga estudyante sa pag-summarize unsa ang ilang nakat-unan gikan sa mga lihok ni Kapitan Moroni mahitungod kon unsaon nato pagdepensa ang atong mga kaugalingon batok sa mga pagpang-ataki sa mga kaaway. Siguroha nga masabtan sa mga estudyante nga kon kita mangandam sa atong mga kaugalingon, makabarug kita sa mga pag-ataki (mga tintasyon) gikan sa mga kaaway. Mahimo nimong isulat kini nga baruganan diha sa pisara.

Dapita ang usa ka estudyante sa pagbasa og kusog sa Alma 50:1. Pangutan-a ang klase:

Tungod sa mga kalampusan sa mga pagpangandam ni Kapitan Moroni, unsa ang dugang pagtulun-an nga atong makat-unan gikan niining bersikulo? (Si Moroni “wala mohunong” sa paghimo og mga pagpangandam; mipadayon siya sa paglig-on sa iyang mga depensa, bisan kon daw wala pay dinalian nga pagpanghulga.)

Aron matabangan ang mga estudyante sa pag-ila sa panginahanglan alang sa padayon nga espirituhanong pagpalig-on, basaha ang mosunod nga pamahayag ni Presidente Henry B. Eyring sa Unang Kapangulohan:

“Samtang ang mga pwersa sa atong palibut nagkagrabe, ang bisan unsang espirituhanong kusog nga sa makausa igo lang mahimong dili na paigo. Ug bisan unsang kalamboan sa espirituhanong kusog nga sa makausa naghunahuna ta nga posible, mas dakong kalamboan ang pagahimoon aron magamit nato. Ang panginahanglan sa espirituhanong kusog ug ang oportunidad sa pag-angkon niini magkadako diin kon atong baliwalaon mahimo kitang mamiligro” (“Always,” Ensign, Okt. 1999, 9).

Isulat sa pisara ang mosunod:

Ako mangandam aron makalahutay sa tintasyon pinaagi sa …

Ako mobarug nga lig-on kon …

Dapita ang mga estudyante sa pagkompleto niining mga pamahayag diha sa ilang mga notebook o scripture study journal. Human og sulat sa mga estudyante, basaha ang mosunod nga pamahayag ni Presidente Ezra Taft Benson. (Mahimo nimong isugyot nga ang mga estudyante mosulat niining pamahayag diha sa ilang mga kasulatan duol sa Alma 50:10–12.)

“Mas maayo nga mangandam ug magpugong kay sa mag-ayo ug maghinulsol” (The Teachings of Ezra Taft Benson [1988], 285).

Sa inyong hunahuna nganong tinuod man kini nga pamahayag? Kanus-a mo nakakita og usa ka ehemplo sa baruganan nga gitudlo niini nga pamahayag?

Ipasabut nga ang pagpangandam sa mga Nephite misangput og pipila ka tuig nga dakong kauswagan ug kalinaw. Ipasabut nga samtang si Amalickiah mihimaraut sa Dios tungod sa iyang kapildihan, ang mga Nephite “mipasalamat sa Ginoo nga ilang Dios” (Alma 49:28).

Dapita ang mga estudyante sa paghunahuna nga aduna silay usa ka higala kinsa nagpuyo sa usa ka dapit diin grabe ang gubat. Gibati niya nga imposible nga makaplagan ang kalinaw ug kalipay tungod sa kasamok nga naglibut kaniya. Isulat ang mosunod nga pakisayran sa kasulatan diha sa pisara: Alma 50:18–23. Dapita ang mga estudyante sa pagbasa niining tudling ug pagpaugmad og tubag nga ilang mahimo ngadto sa ilang higala. Hangyoa ang pipila ka estudyante sa pagpakigbahin kon unsa ang ilang isulti. Usa ka kamatuoran nga mahimo nilang ilakip sa ilang mga tubag mao nga ang pagkamatinud-anon ngadto sa Dios nagdala og kalipay, bisan taliwala sa kagubot. (Mahimo nimong isulat sa pisara kini nga baruganan.) Tabangi ang mga estudyante nga masabtan nga kining kamatuoran magamit dili lamang sa gubat apan ngadto usab sa personal nga mga hagit sama sa problema sa kwarta, pagkawala sa trabaho, pagkamatay sa usa ka minahal, samok nga mga relasyon sa mga sakop sa pamilya, ug natural nga mga katalagman.

Sumala sa Alma 50:18–23, nganong ang mga Nephite nakasinati og usa ka panahon sa kalipay?
Kanus-a nga higayon nga inyong nabati nga ang Ginoo milugway sa Iyang gahum ug mga panalangin nganha kaninyo tungod sa pagkamasulundon ug sa pagpalig-on sa inyong kaugalingon batok sa tintasyon?
Kanus-a ang Ginoo mipanalangin kaninyo o sa tawo nga inyong nailhan og kauswagan, kalinaw, ug kalipay taliwala sa malisud nga mga panahon? (Human makatubag ang mga estudyante, ikonsiderar ang pagpakigbahin sa usa ka ehemplo gikan sa imong kinabuhi.)

Alma 50:25–40; 51

Ang mga depensa sa mga Nephite nahuyang ug si Moroni mibadlong sa rebelyon tali sa iyang katawhan

(Pahinumdom: Tungod sa katas-on sa leksyon, mahimo nimong i-summarize ang nahabilin sa materyal. Kon imong buhaton, ipasabut nga ang Alma 50:25–40 naglangkob sa istorya bahin sa rebelyon ug kamatayon ni Morianton ug ang pagkapili ni Pahoran isip labaw nga maghuhukom. Ang Alma 51 nagsulti mahitungod sa usa ka grupo nga gitawag og king-men kinsa misulay sa pag-usab sa balaod aron motugot sa usa ka hari nga mangulo sa mga Nephite. Napakyas sila sa ilang pagsulay. Sa ilang kasuko tungod sa ilang kapakyasan, ang king-men mibalibad sa paghupot sa ilang mga hinagiban sa dihang si Amalickiah ug ang mga Lamanite miabut aron sa pakiggubat batok sa mga Nephite. Sumala sa balaod, si Moroni misugo nila sa paghupot sa ilang mga armas o pagasilutan. Ang kasundalohan ni Amalickiah misakop sa daghang siyudad sa mga Nephite ug mipatay og daghang mga Nephite. Samtang si Amalickiah nagtinguha sa pagsakop sa yuta sa Bountiful, iyang gikahinagbo si Teancum ug ang iyang kasundalohan. Si Teancum mipatay ni Amalickiah ug mipugong sa pagsulong sa mga kasundalohan sa Lamanite.)

Isulat ang mosunod nga pamahayag sa pisara: Sa paghiusa lig-on kitang makabarug, sa pag-iyahay dali kitang mapukan.

Dapita ang mga estudyante sa pagbasa sa hilum sa Alma 50:25–26, nga mangita sa pulong sa matag bersikulo nga naghulagway sa hinungdan sa pagkabahin-bahin sa mga Nephite.

Unsay hinungdan sa pagkabahin-bahin sa mga tawo?

I-summarize ang nahabilin sa Alma 50 pinaagi sa pagpasabut nga si Morianton ug ang iyang katawhan misulay sa pagbiya sa mga Nephite ug miikyas ngadto sa yuta dapit sa Amihanan. Gikahadlokan ni Moroni nga kining panag-iyahay mosangput ngadto sa pagkawala sa kagawasan sa mga Nephite. Mipadala siya og mga sundalo, nga gipamunoan sa usa ka tawo nga ginganlan og Teancum, aron sa pagpugong sa katawhan ni Morianton sa pagbiya. Ang kasundalohan ni Teancum mipugong sa mga katawhan ni Morianton nga maabut nila ang ilang padulngan, ug napatay si Morianton. Ang nahabilin sa iyang katawhan “[mi]pakigsaad sa pagpatunhay sa kalinaw” (Alma 50:36). Sa wala madugay human sa rebelyon ni Morianton, usa ka makuyaw nga politikanhong pagkabahin-bahin ang namugna diha sa katawhan ni Nephi. Ang uban sa mga Nephite gustong motangtang ni Pahoran gikan sa trono ug pulihan siya sa usa ka hari. Ang uban nga mga tawo gustong ipabilin ang sistema sa pangagamhanan sa ilang mga maghuhukom.

Dapita ang mga estudyante sa pagsiksik sa Alma 51:5–6 alang sa mga pangalan niining duha ka managsukwahi nga mga grupo (king-men ug freemen). Hatagi ang mga estudyante og panahon sa pag-ila diha sa Alma 51:8 sa mga motibo sa king-men.

Isulat ang mosunod nga kamatuoran diha sa pisara: Ang pagkabahin-bahin ug panagbingkil makaguba sa atong kalinaw.

Sa unsang paagi nga kining baruganan napakita diha sa mga istorya kalabut sa pagkabahin-bahin ug panagbingkil nga narekord sa Alma 50 ug 51?
Unsa ang inyong mabuhat sa inyong pamilya, sa inyong mga higala, o diha sa inyong komunidad aron sa pagsulbad sa panagbingkil?
Kanus-a nga higayon nga inyong nakita ang mga panalangin nga miabut gikan sa panaghiusa nga nagpalig-on sa usa ka pamilya o usa ka korum o klase?

Ipamatuod kadtong mga kamatuoran nga imong ganahan nga ipasabut og maayo. Pahinumdumi ang mga estudyante nga ang mosunod nga pipila ka mga leksyon mohatag kanila og daghang oportunidad sa pag-ila sa mga baruganan ug makakat-on sa mga leksyon gikan sa mga gubat tali sa mga Nephite ug sa mga Lamanite.