Leksyon 126
3 Nephi 17
Pasiuna
Sa dihang matapos na ang unang adlaw sa Manluluwas nga kauban ang mga Nephite, nasabtan Niya nga kadaghanan wala gayud masabti sa hingpit ang Iyang mga pulong. Siya mitudlo kanila kon unsaon sa pagdawat og dugang salabutan, ug Siya mipasabut sa kaimportante sa pag-ampo ug pagpamalandong. Ang mga katawhan nanghilak sa dihang Iyang gipahibalo nga Siya mobiya na. Napuno sa kalooy, ang Manluluwas mipabilin og diyutay pa nga panahon aron sa pag-ayo sa masakiton, sa pag-ampo alang sa mga katawhan, ug sa pagpanalangin sa ilang mga anak. Ang mga Nephite sa kalipay.
Mga Sugyot alang sa Pagtudlo
3 Nephi 17:1–3
Si Jesus nagsugo sa mga Nephite nga pamalandungan ang Iyang mga pulong ug mag-ampo alang sa pagsabut
Dapita ang mga estudyante sa paghunahuna sa ilang mga kaugalingon sa mosunod nga sitwasyon: Ikaw ug ang usa ka higala naglingkod diha sa atubangang mga lingkuranan sa kinatibuk-ang komperensya o komperensya sa rehiyon diin ang propeta namulong. Samtang anaa kamo didto, kamong duha nakahigayon og himamat kaniya. Sa dihang nahuman na ang komperensya, ikaw ug ang imong higala namauli.
-
Unsa kaha ang hisgutan ninyo sa imong higala human sa miting?
Pahinumdumi ang mga estudyante nga si Jesukristo nagtudlo sa mga Nephite kon unsay posibling mahitabo sa tibuok adlawa. Samtang Siya nangandam sa pagbiya, Iyang nasabtan nga wala kaayo masabti sa mga tawo kon unsay Iyang gitudlo. Dapita ang mga estudyante sa pagbasa og hilum sa 3 Nephi 17:1–3, nga mangita kon unsay gisulti sa Manluluwas nga buhaton sa mga Nephite aron makaangkon og dugang pagsabut. (Mahimo nimong isugyot nga markahan sa mga estudyante kon unsay ilang nakit-an.) Human makareport ang mga estudyante sa unsay ilang nakit-an, ipangutana:
-
Unsay buot ipasabut sa pagpamalandong?
Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw kon unsay iyang gitudlo mahitungod sa unsay gipasabut sa pagpamalandong.
“Ang pagbasa, pagtuon, ug pagpamalandong dili pareho. Mahimo kitang mobasa sa mga pulong ug tingali makakuha og mga ideya. Magtuon kita ug tingali makadiskubre og mga sundanan ug mga koneksyon sa kasulatan. Apan kon mamalandong kita, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (“Pagserbisyo uban sa Espiritu,” Ensign o Liahona, Nob. 2010, 60).
-
Sa inyong hunahuna sa unsang paagi ang pagpamalandong ug ang pag-ampo mahimong magtinabangay aron tabangan kita nga makasabut kon unsay atong makat-unan sa simbahan o sa seminary?
Ipasabut ang instruksyon sa Manluluwas diha sa 3 Nephi 17:3 nga ang mga Nephite kinahanglan “i-andam ang [ilang] mga hunahuna alang sa ugma,” sa dihang Siya mobalik aron sa pagtudlo kanila sa pag-usab.
-
Unsa ang mabuhat sa usa ka tawo sa pagpangandam sa iyang hunahuna sa dili pa motambong sa simbahan o sa seminary?
-
Unsa ang kalainan kon atong andamon ang atong mga hunahuna alang sa ingon nga oportunidad sa pagkat-on?
Aron matabangan ang mga estudyante nga makaila sa usa ka baruganan nga gitudlo diha sa 3 Nephi 17:1–3, isulat ang mosunod nga dili kompleto nga pamahayag diha sa pisara, ug hangyoa ang mga estudyante sa pagkompleto niini base sa unsay ilang nakat-unan.
Pinaagi sa pagpamalandong ug pag-ampo ngadto sa Amahan, kita maka …
Bisan og ang mga estudyante mahimong mogamit og lain-laing mga pulong, kinahanglan silang makaila sa mosunod nga baruganan: Pinaagi sa pagpamalandong ug pag-ampo ngadto sa Amahan, kita makadawat og labaw nga panabut.
Isulat ang mosunod diha sa pisara:
Andamon ang akong hunahuna sa dili pa ko motambong sa simbahan o sa seminary
Mamalandong kon unsay akong madunggan diha sa simbahan o sa seminary
Mag-ampo kon unsay akong madunggan diha sa simbahan o sa seminary
Dapita ang mga estudyante sa pagpili og usa sa mga aksyon nga gisulat diha sa pisara. Hatagi sila og panahon sa paghunahuna mahitungod sa (1) giunsa nila kini pagbuhat ug (2) sa unsang paagi kini nakatabang kanila nga makat-on pa og dugang gikan sa ilang kasinatian sa simbahan o sa seminary. Dapita ang pipila ka mga estudyante sa pagpakigbahin sa ilang mga hunahuna diha sa klase. Awhaga ang mga estudyante sa pagkonsiderar kon unsaon kaha nila sa pagpalambo sa usa sa tulo ka mga aspeto ug sa paghimo og mga plano kon unsaon nila paghimo niini. Mahimo nimong isugyot nga isulat ang ilang mga plano diha sa mga notebook o mga scripture study journal. Sultihi ang mga estudyante nga ang sunod nga bahin sa leksyon makahatag kanila og usa ka oportunidad nga makapraktis sa pagpamalandong.
3 Nephi 17:4–25
Ang Manluluwas miayo sa masakiton diha sa mga Nephite, nag-ampo ngadto sa Amahan alang sa mga katawhan, ug mipanalangin sa ilang mga anak
Ipakita ang litrato nga Jesus Nagtudlo didto sa Kasadpang Bahin sa Kalibutan (62380; Libro sa mga Hulagway sa Ebanghelyo [2009], nu. 82). Dapita ang usa ka estudyante sa pagbasa sa 3 Nephi 17:4. Ipasabut ang mga pulong nga “karon mobalik Ako ngadto sa Amahan.” Hangyoa ang mga estudyante sa paghunahuna nga bag-o lang nilang gikauban ang Manluluwas sulod sa usa ka adlaw ug Siya mipahibalo nga kinahanglan na Siyang mobiya. Dapita ang pipila ka estudyante sa pagpakigbahin kon unsay ilang bation niining sitwasyon. Dapita ang usa ka estudyante sa pagbasa og kusog sa 3 Nephi 17:5, ug hangyoa ang klase sa pag-ila kon giunsa pagtubag sa mga Nephite sa dihang ang Manluluwas mipadayag sa Iyang tuyo sa pagbiya.
Ipasabut nga kon dili pa tungod sa matarung nga mga tinguha sa mga Nephite, ang mga panghitabo nga narekord sa 3 Nephi 17 ug 18 dili gayud unta mahitabo. Ang mosunod nga kalihokan gidesinyo aron sa pagtabang sa mga estudyante nga mas hingpit nga masabtan ang gugma ni Jesukristo alang sa Iyang mga katawhan ug sa pagtabang kanila sa independenteng pagpangita sa mga kamatuoran diha sa mga kasulatan kabahin sa kinaiya ni Jesukristo. Isulat ang mosunod nga mga pakisayran sa kasulatan diha sa pisara, ug hangyoa ang mga estudyante sa pagkopya niini diha sa ilang mga notebook o mga scripture study journal:
Basaha ang mosunod nga pamahayag ni Presidente Ezra Taft Benson:
“Ang tawo mao ang labing talagsaon ug labing bulahan ug malipayon kansang kinabuhi labing duol sa sumbanan ni Jesukristo. Wala kini kalabutan sa yutan-ong katigayunan, gahum, o dungog. Ang bugtong tinud-anay nga sukdanan sa kamaayo, kabulahan, ug kamalipayon mao ang kon unsa ka duol ang kinabuhi nga nahisama sa Agalon, nga si Jesukristo. Siya mao ang matarung nga dalan, ang hingpit nga kamatuoran, ug ang abunda nga kinabuhi” (“Jesus Christ—Gifts and Expectations,” Ensign, Dis. 1988, 2).
Hatagi ang mga estudyante og 5 ngadto sa 10 ka minuto aron tun-an sa hilum ang matag tudling sa kasulatan nga imong gisulat sa pisara. Dapita sila sa pag-ila sa mga kamatuoran mahitungod sa kinaiya sa Manluluwas. Samtang magtuon sila, kinahanglan makakita sila og labing minos usa ka kamatuoran sa matag usa sa tudling sa kasulatan. Hangyoa sila sa pagsulat sa mga kamatuoran nga ilang makit-an.
Kon mahuman na ang mga estudyante sa pagtuon, dapita ang pipila kanila sa pagsulat sa pisara, ubos sa tukma nga pakisayran sa kasulatan, og usa ka kamatuoran nga ilang nakat-unan mahitungod sa Manluluwas. Kon makompleto na sa mga estudyante kini nga kalihokan, ipangutana ang mosunod:
-
Nganong importante man alang kanato nga mahibalo niining mga kamatuoran mahitungod sa Manluluwas?
-
Unsa nga ebidensya ang inyong nakita nga ang Manluluwas sensitibo ngadto sa atong mga panginahanglan ug mga tinguha?
-
Unsa nga mga bahin niining istorya ang labing nakapadani kaninyo? Ngano man?
-
Ngano kaha nga ang mga tawo napuno man sa kalipay? (Tan-awa sa 3 Nephi 17:18.)
-
Ngano kaha nga ang kalipay sa Manluluwas hingpit nianang panahona? (Tan-awa sa 3 Nephi 17:20.)
Hangyoa ang mga estudyante sa pag-summarize unsa ang ilang nakat-unan gikan sa 3 Nephi 17:6–25. Ang mga estudyante mahimong mohatag og lain-laing mga tubag. Tingali usa ka kamatuoran nga mahimo nilang mailhan mao nga ang Manluluwas mobati og dakong kalooy alang kanato. Isulat kini nga kamatuoran diha sa pisara. Mahimo nimong isugyot nga isulat sa mga estudyante kining kamatuoran, o ang laing kamatuoran nga ilang nailhan, diha sa margin sa ilang kasulatan duol sa 3 Nephi 17:6.
Aron matabangan ang mga estudyante nga makaila kon sa unsang paagi nga ang pagsabut sa kinaiya ni Jesukristo makatabang kanato nga mapalambo ang atong pagtuo, basaha ang mosunod nga pamahayag:
“Mahimo nimong magamit ang hugot nga pagtuo diha ni Kristo kon ikaw adunay kasiguroan nga Siya anaa, usa ka tinuod nga ideya sa Iyang kinaiya, ug kasayuran nga ikaw naningkamot sa pagsunod sumala sa Iyang kabubut-on” (Matinud-anon sa Tinuhoan: Usa ka Pakisayran sa Ebanghelyo [2004], 49).
-
Sa unsang paagi nga ang pagsabut sa manggiloy-on nga kinaiya sa Manluluwas makatabang ninyo sa paggamit sa hugot nga pagtuo diha Kaniya?
Itudlo ang mga pulong nga “gitakbuyan sa tanan nga matang sa sakit” sa 3 Nephi 17:9.
-
Unsa nga matang sa mga balatian ang tingali nalakip sa mga mitakboy nga “tanan nga matang sa sakit”? (Tanang matang sa pisikal, emosyonal, mental ug espiritwal nga mga balatian.)
Hangyoa ang mga estudyante sa pagpamalandong og mga paagi diin sila mahimong “gitakbuyan” ug unsa ang ilang ihangyo sa Manluluwas aron mamaayo sila kon Siya personal nga mopanalangin kanila. Pahinumdumi sila nga bisan tuod nga ang Manluluwas wala dinhi aron personal nga mangalagad kanato, ang Iyang gahum sa pagpanalangin ug pagpang-ayo anaa pinaagi sa priesthood.
-
Kang kinsa kamo moadto alang sa mga panalangin sa priesthood?
-
Kanus-a ang katapusang higayon nga kamo mibati sa makaayo nga impluwesya sa Manluluwas diha sa inyong kinabuhi?
Pahinumdumi ang mga estudyante sa baruganan mahitungod sa papamalandong nga ilang nahisgutan diha sa pagsugod sa klase. Isugyot nga usa sa paagi nga sila makapamalandong mao ang pinaagi sa pag-visualize sa ilang mga kaugalingon sa mga sitwasyon nga gihulagway diha sa mga istorya sa kasulatan nga ilang gibasa. Dapita ang mga estudyante nga ilang i-visualize ang ilang kaugalingon taliwala sa mga Nephite sa panahon sa mga panghitabo nga gisaysay diha sa 3 Nephi 17. Hatagi og panahon ang mga estudyante sa pagsulat diha sa mga notebook o mga scripture study journal mahitungod sa unsay tingali ang ilang nadungog, nakita, nabati, ug nakat-unan kon sila diha pa taliwala sa mga Nephite ug nakig-inter-aksyon ngadto sa Manluluwas nianang higayuna. Mahimo nimong isugyot nga sila mosulat mahitungod sa usa ka kasakit nga ilang ihangyo nga ayuhon sa Manluluwas. Kon mahuman na sila sa pagsulat, ikonsiderar ang pagdapit og pipila ka mga estudyante nga basahon ngadto sa klase kon unsay ilang gisulat. Siguroa nga nakasabut sila nga dili sila angayng mobati nga obligado sa pagpakigbahin sa bisan unsang butang nga personal o pribado kaayo.
Human nga ang pipila ka mga estudyante nakahimo sa pagpakigbahin sa unsay ilang gisulat, mahimo kang magdapit og usa o duha kanila sa pagpakigbahin kon giunsa nila pagkahibalo nga si Jesukristo nahigugma ug adunay kalooy alang kanila. Awhaga ang mga estudyante sa pagpamalandong niini nga leksyon ug sa pagsalig diha sa kalooy sa Manluluwas samtang sila mosalig Kaniya alang sa tabang sa ilang mga tinguha, mga kahuyang, mga kasakit, ug mga pagsulay.