Leksyon sa Home-Study

Pagtuon sa mga Kasulatan–Overview sa Basahon ni Mormon (Unit 1)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod mao ang summary sa mga panghitabo, mga doktrina, ug mga baruganan nga nakat-unan sa mga estudyante sa dihang nakompleto nila ang upat ka mga leksyon sa estudyante sa home-study alang sa unit 1. Ang pagkasayud sa unsay gitun-an sa mga esudyante makatabang kanimo nga makaandam sa klase. Ang summary dili kabahin sa leksyon ug dili angay nga ipakigbahin sa mga estudyante. Tungod kay ang leksyon nga imong itudlo alang sa unit 1 naghisot lamang sa pipila niini nga mga doktrina ug mga baruganan, ikaw mahimong madasig sa pagribyu o paghisgot og lain sumala sa mga pag-aghat sa Espiritu ug sa mga panginahanglan sa imong mga estudyante.

Day 1 (Pagtuon sa mga Kasulatan)

Nakat-on ang mga estudyante og mga pamaagi nga motabang nila sa pagsabut sa panghitabo ug dapit sa mga kasulatan, unsaon pagtuon ug pag-ila sa mga kamatuoran sa ebanghelyo, ug unsaon paggamit sa mga doktrina ug mga baruganan sa ebanghelyo sa ilang kinabuhi.

Day 2 (Ang Plano sa Kaluwasan)

Kini nga leksyon usa ka mubo nga overview sa plano sa kaluwasan. Ang Basahon ni Mormon nagtudlo nga ang plano sa Langitnong Amahan gidisenyo nga mohatag sa Iyang mga anak og mahangturon nga kaluwasan ug kalipay. Si Jesukristo mao ang pinakamahinungdanon nga bahin sa plano sa kaluwasan, ug ang Iyang Pag-ula mao ang makapalihok sa plano alang sa tanang mga anak sa Dios. Samtang mopili kita nga mosunod sa plano sa Dios, nag-andam kita nga modawat og kinabuhing dayon.

Day 3 (Ulohan nga Pahina, Pasiuna, ug mga Pagpamatuod sa mga Saksi)

Ang pasiuna nga mga materyal sa Basahon ni Mormon nagtabang sa pagpanghimatuod sa katuyoan niini ug sa pagpasabut sa katinuod ug kabalaan sa gigikanan niini. Ang ulohan nga pahina nagtudlo nga ang Basahon ni Mormon usa ka saksi nga si Jesus mao ang Kristo. Samtang kita magbasa, mamalandong ug mag-ampo mahitungod sa Basahon ni Mormon, ang Espiritu Santo mosaksi nga kini tinuod, nga si Jesus mao ang Kristo, nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo sa yuta.

Day 4 (Overview sa Basahon ni Mormon)

Ang pagpamatuod ni Propeta Joseph Smith nakatabang sa mga estudyante sa paglig-on sa ilang pagpamatuod nga ang Basahon ni Mormon mitungha pinaagi sa gasa ug gahum sa Dios. Gipanalipdan sa Ginoo ang Basahon ni Mormon nga motungha sa ulahing mga adlaw. Nakita sa mga tagsulat sa Basahon ni Mormon ang atong panahon ug misulat kon unsay makatabang gayud kanato. Gi-awhag ang mga estudyante nga maghunahuna og ilang mga pangutana ug mangita og mga tubag samtang magtuon sila sa Basahon ni Mormon.

Pasiuna

Ang leksyon karong semanaha naghatag og gibug-aton sa responsibilidad sa matag estudyante sa iyang pagkat-on sa ebanghelyo. Naghatag usab kini og gibug-aton sa pinakamahinungdanon nga tahas sa Basahon ni Mormon sa pagtabang sa mga estudyante nga makabaton og pagpamatuod kang Jesukristo ug sa Iyang Simbahan. Samtang ikaw nagtudlo, tabangi ang mga estudyante nga makasabut sa importansya sa makugihon nga pagtuon niining sagrado nga basahon sa kasulatan ug sa mga panalangin nga mopuno sa ilang mga kinabuhi kon mobuhat sila sa ingon.

Mga Sugyot alang sa Pagtudlo

Pagtuon sa mga Kasulatan

Mahimo nimong sugdan pinaagi sa pagpangutana sa mga estudyante sa mosunod:

• Unsay kalahian tali sa usa ka tawo kinsa nagbasa sa Basahon ni Mormon ug makaangkon og pagpamatuod ug sa usa ka tawo kinsa nagbasa niini ug wala makaangkon og pagpamatuod? (Ang uban nagbasa lamang og mga pulong; ang uban nagbasa uban ang hugot nga pagtuo, may tinuod nga katuyoan, ug ang ilang mga kasingkasing abli ngadto sa Espiritu Santo.)

• Sa unsang paagi ang usa ka tawo makakat-on og espirituhanon nga mga kamatuoran? (Ikonsiderar nga ilista ang tubag sa mga estudyante diha sa pisara. Balika kini nga lista human mabasa ang pamahayag ni Elder David A. Bednar sa ubos.)

Isulat sa pisara ang mosunod nga pamahayag, ipabilin ang gibadlisan nga mga pulong: “Pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.”

Ribyuha kon unsay nakat-unan sa mga estudyante karong semanaha pinaagi sa pagdapit kanila sa pagsulat diha sa mga blangko. Kon nagkinahanglan sila og tabang, ipabasa nila ang Doktrina ug mga Pakigsaad 88:118. Pangutan-a sila unsay gipasabut sa pagpangita sa pagtulun-an pinaagi sa pagtuon ug pinaagi sa hugot nga pagtuo. Samtang maghisgot ka niini, siguroa nga makasabut sila nga ang pagkat-on pinaagi sa pagtuon ug pinaagi sa hugot nga pagtuo nagkinahanglan og indibidwal nga paningkamot.

Aron matabangan ang mga estudyante nga makasabut kon nganong gikinahanglan ang paningkamot ug buhat aron makat-on sa ebanghelyo, ipabasa sa usa ka estudyante ang mosunod nga pamahayag ni Elder David A. Bednar sa Korum sa Napulog Duha ka mga Apostoles. Dapita ang mga estudyante nga maminaw sa unsay mahitabo kon kita maningkamot sa espirituhanon nga pagkat-on.

“Ang usa ka tigkat-on nga naggamit sa kabubut-on pinaagi sa paglihok sumala sa sakto nga mga baruganan nagbukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati” (“Seek Learning by Faith,” Ensign, Sep. 2007, 64).

Pangutan-a ang mga estudyante: Unsay gisulti ni Elder Bednar nga mahitabo sa usa ka tigkat-on kinsa naningkamot sa espirituhanon nga pagkat-on?

Dapita ang mga estudyante sa pagpakigbahin sa ilang mga kasinatian sa dihang mihimo sila og espesyal nga paningkamot sa espirituhanon nga paagi ug mibati og paglambo sa pakig-uban sa Espiritu Santo isip resulta. Mahimo nimong idugang ang imong pagpamatuod nga ang atong mga paningkamot sa pagtuon sa ebanghelyo sa mainampuong paagi modapit sa Espiritu Santo ngadto sa proseso sa pagkat-on.

Pangutan-a ang mga estudyante: Unsay piho nga mga butang nga mahimo nimong buhaton karong tuiga sa “pagpangita sa pagtulun-an … pinaagi sa pagtuon ug usab pinaagi sa hugot nga pagtuo”?

Ang Plano sa Kaluwasan

Ribyuha ang nagkalain-lain nga mga pangalan sa plano sa kaluwasan pinaagi sa paghangyo sa mga estudyante nga isulat sa pisara ang mga pangalan nga ilang narekord diha sa ilang mga scripture study journal alang sa assignment 1 sa ilang day 2 nga leksyon. Kon nagkinahanglan sila og tabang, papaklia sila ngadto sa katugma nga pahina diha sa ilang mga giya sa pagtuon.

Mahimo kang mangutana: Unsay gitudlo niini nga mga pangalan diha ninyo mahitungod sa katuyoan sa plano sa kaluwasan? (Ang plano sa Langitnong Amahan gidisenyo nga mohatag sa Iyang mga anak og mahangturon nga kaluwasan ug kalipay.)

Ipasabut nga sa tibuok tuig adunay daghang mga oportunidad nga makat-on kon sa unsang paagi ang mga kamatuoran nga atong makat-unan gikan sa Basahon ni Mormon mohaum sa plano sa kaluwasan sa Langitnong Amahan. Mahimo kang mohangyo sa mga estudyante nga pangitaon ug markahan diha sa ilang mga kasulatan ang mga baruganan nga may kalabutan sa plano sa kaluwasan samtang magtuon sila karong tuiga. Hunahunaa ang paghatag og pipila ka mga ehemplo sa unsay tingali ilang makit-an samtang nagtuon sila. Awhaga ang mga estudyante sa pagpakigbahin uban sa klase kon unsay ilang makit-an sulod sa tuig.

Ulohan nga Pahina, Pasiuna, ug mga Pagpamatuod sa mga Saksi

Dapita ang mga estudyante sa pag-apil sa usa ka role play pinaagi sa paghunahuna nga naghatag sila og usa ka kopya sa Basahon ni Mormon ngadto sa usa ka tawo kinsa dili miyembro sa Simbahan.

Bahina ang klase ngadto sa duha ka grupo, ug paandama ang matag grupo alang sa role play pinaagi sa paghisgot sa mga pangutana nga gi-assign sa ilang grupo. Tingali makatabang nga isulat sa pisara ang mga pangutana sa dili pa magsugod ang klase o hatagan ang matag estudyante og kopya sa mga pangutana. Awhaga ang mga estudyante nga pangitaon ug markahan ang impormasyon nga sa ilang paminaw importante nga ipakigbahin kon magtudlo mahitungod sa Basahon ni Mormon.

Mga Pangutana alang sa Group 1:

1. Unsa ang Basahon ni Mormon? (Tan-awa sa pasiuna, paragraph 1–3.)

2. Unsa ang katuyoan sa Basahon ni Mormon? (Tan-awa ang ulohan nga pahina, paragraph 2.)

3. Unsa nga mga panalangin ang moabut gikan sa pagpakabuhi pinaagi sa mga lagda o mga baruganan nga gitudlo sa Basahon ni Mormon? (Tan-awa sa pasiuna, paragraph 6.)

Mga Pangutana alang sa Group 2:

1. Giunsa pagtungha sa Basahon ni Mormon? (Tan-awa sa pasiuna, paragraph 4–5.)

2. Unsaon nato pagkahibalo nga ang Basahon ni Mormon tinuod? (Tan-awa sa pasiuna, paragraph 8.)

3. Unsa pay lain natong mahibaloan pinaagi sa gahum sa Espiritu Santo? (Tan-awa sa pasiuna, katapusan nga paragraph.)

Human mahatagan og panahon sa pagpangadam ang mga estudyante, pagpili og usa ka estudyante nga morepresentar og usa ka tawo kinsa dili miyembro sa Simbahan. Paghangyo og usa ka boluntaryo gikan sa matag grupo nga mohatag og kopya sa Basahon ni Mormon nianang tawhana. Awhaga ang mga estudyante nga gamiton ang mga tubag sa mga pangutana nga gitun-an sa ilang grupo sa pagtudlo sa unang estudyante mahitungod sa Basahon ni Mormon.

Sa dihang mahuman na sila sa role play, ikonsiderar ang pagpangutana sa uban diha sa klase kon unsay dugang pang impormasyon nga tingali ilang ikapakigbahin kon sila kadtong tawo nga mihatag sa kopya sa Basahon ni Mormon. Mahimo usab kang mangutana: Unsay inyong nakat-unan o nahinumduman mahitungod sa Basahon ni Mormon sa panahon niini nga kalihokan?

Samtang motubag ang mga estudyante, siguroa nga makasabut sila nga ang Basahon ni Mormon usa ka saksi nga si Jesus mao ang Kristo. Ipasabut gayud ang importansya sa paghatag og pagtagad kon sa unsang paagi ang Basahon ni Mormon nagpamatuod kang Jesukristo. Agig dugang, ipasabut nga ang pagtuon sa Basahon ni Mormon motabang kanila nga makasabut sa doktrina ug mga baruganan sa ebanghelyo ni Jesukristo ug mopalig-on sa ilang pagpamatuod sa Iyang Simbahan.

Pahinumdumi ang mga estudyante nga nakita sa mga tagsulat sa Basahon ni Mormon ang atong panahon ug misulat kon unsay makatabang gayud kanato. (Tan-awa sa Mormon 8:35).

Pangutan-a ang mga estudyante: Unsay inyong nakat-unan karong semanaha nga makaapekto sa pamaagi sa inyong pagtuon sa Basahon ni Mormon?

Dapita ang pipila ka mga estudyante sa pagpakigbahin kon unsay ilang plano sa pagtuman sa ilang responsibilidad sa pagbasa sa Basahon ni Mormon sulod sa school year. Tapusa pinaagi sa pagpakigbahin sa imong mga gibati ug pagpamatuod mahitungod sa Basahon ni Mormon ug sa unsang paagi ang pagtuon niini nakaapekto sa imong kinabuhi.

Sunod nga Unit (1 Nephi 1–6, 9)

Pangutan-a ang mga estudyante kon sukad aduna ba silay nahibaw-an nga usa ka husto nga butang apan ang pagbuhat sa ingon daw lisud o gani imposible. Ipasabut nga sa umaabut nga semana ilang madiskubrihan nga si Nephi miatubang niana nga matang sa hagit, ug makat-on sila giunsa niya sa pagsalig sa Dios aron matuman ang daw imposible.