4 Nephi 1–Mormon 8:11 (Unit 28)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante dihang gitun-an nila ang 4 Nephi 1–Mormon 8:11 (unit 28) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (4 Nephi 1)

Samtang gitun-an sa mga estudyante ang mga kondisyon tali sa mga Nephite atol sa dul-an 200 ka tuig nga panahon human mibisita ang Manluluwas, ilang nakat-unan nga kon ang katawhan magtambayayong aron makabig ngadto sa Ginoo, magkahiusa sila ug makasinati og dakong kalipay. Nailhan usab nila nga ang garbo makahimo og pagbahin-bahin ug modala ngadto sa dakong kadautan.

Day 2 (Mormon 1–2)

Gikan sa ehemplo sa matarung nga kinabuhi ni Mormon, nakat-unan sa mga estudyante ang kabahin sa mga hiyas sa pagkamasarangon ug dali nga makaobserbar. Nakat-unan nila nga makapili kita nga magpakabuhing matarung bisan niining dautan nga katilingban. Gikan sa ehemplo sa pagkadautan sa Nephite nga katawhan, nasabtan sa mga estudyante ang mosunod nga mga baruganan: Ang kadautan ug kawalay pagtuo makapahilayo sa mga gasa sa Ginoo ug sa impluwensya sa Espiritu Santo. Kon ang atong kasub-anan sa sala mopadulong sa paghinulsol, modala kini kanato ngadto kang Kristo uban sa mapaubsanon nga kasingkasing. Ang kasub-anan nga alang lamang sa mga sangputanan sa sala modala ngadto sa kapildihan (o mohunong sa atong pag-uswag paingon sa mahangturon nga kinabuhi).

Day 3 (Mormon 3–6)

Samtang gitun-an nila ang pagkamapailubon sa Ginoo ngadto sa mga Nephite, nakat-unan sa mga estudyante nga ang Ginoo naghatag kanato og igong mga kahigayunan sa paghinulsol sa atong mga sala. Bisan pa man, nagdumili ang mga Nephite sa paghinulsol ug gusto mobalos sa mga Lamanite. Tungod kay ang Ginoo nagdili sa pagtinguha nga manimalos, mipili si Mormon nga dili na mangulo sa Nephite nga kasundalohan. Ang resulta sa mga paningkamot sa mga Nephite nga manimalos nakapahimo sa mga estudyante sa pagsabut nga ang paghukom sa Dios mobuntog sa mga dautan. Nakasaksi si Mormon sa tibuok kalaglagan sa iyang katawhan ug naguol sa ilang pagkapukan.

Day 4 (Mormon 7:1–8:11)

Gitapos ni Mormon ang iyang rekord pinaagi sa pagpamulong ngadto sa kaliwatan sa mga Lamanite. Nakat-unan sa mga estudyante nga ang Ginoo nagtanyag og katubsanan sa tanang katawhan kinsa modawat sa mga baruganan ug mga ordinansa sa Iyang ebanghelyo. Namatay si Mormon, ug misulat si Moroni sa mga kahimtang human sa pagkalaglag sa mga Nephite. Gikan sa ehemplo ni Moroni, nakat-unan sa mga estudyante nga bisan og sila nag-inusara, makapili sila nga magpabilin nga matinud-anon.

Pasiuna ngadto sa Leksyon

Niini nga leksyon, maribyu sa mga estudyante ang pagkalaglag sa mga Nephite ug magkat-on kabahin sa tinguha ni Mormon alang sa iyang katawhan nga “gakson diha sa mga bukton ni Jesus” (Mormon 5:11). Makat-on ang mga estudyante kon unsaon pagdapit ang paggakus sa Ginoo sa ilang kaugalingon nga mga kinabuhi. Gikan sa pagdumili sa mga Nephite sa paghinulsol, ang mga estudyante makasabut sa makaguol nga mga sangputanan nga masinati sa katawhan kon dili sila maghinulsol.

Mga Sugyot alang sa Pagtudlo

4 Nephi 1–Mormon 4

Ang katawhan nga Nephite mapukan gikan sa pagkamatarung ug kalipay ngadto sa pagkadautan

Hangyoa ang mga estudyante sa pagdeterminar kon pila ka tuig ang kasaysayan sa Nephite nga ilang gitun-an karon nga semana. Tabangi sila sa paggamit sa mga petsa diha sa kapitulo nga mga summary o sa ubos sa pahina sa 4 Nephi 1 ug Mormon 8 aron mahibaloan kini. (Kini nga mga kapitulo naglangkob og hapit 400 ka tuig, o sobra sa ikatulo nga bahin sa kasaysayan sa mga Nephite.)

Hangyoa ang katunga sa klase sa paggamit sa ilang mga kasulatan ug mga scripture study journal aron sa pagribyu sa ilang nakat-unan kabahin sa kalipay sa mga Nephite sa 4 Nephi 1. Ipagamit sa katunga sa klase ang Mormon 1–2 ug ang ilang mga scripture study journal aron sa pagribyu kinsa si Mormon ug nganong gidayeg kaayo siya. Hangyoa ang matag grupo sa pag-summarize sa ilang nakat-unan. Dayon dapita ang mga grupo sa pagpresentar sa ilang mga summary.

Pangutan-a ang mga estudyante: Unsa ang usa ka kamatuoran nga imong nakat-unan sa pagtuon niini nga mga kapitulo, ug nganong importante kini diha kanimo?

Ipasabut nga bisan sa mga paningkamot ni Mormon sa pagtabang sa mga Nephite sa pagpangandam sa ilang kaugalingon sa espirituhanon nga paagi alang sa gubat, nagdumili sila sa paghinulsol ug sa dangup ngadto sa Ginoo. Isip resulta sa ilang pagkadautan, gipasagdan sila sa ilang kaugalingon nga kalig-on ug ang mga Lamanite misugod sa pagbuntog kanila (tan-awa sa Mormon 3–4).

Mormon 5:8–24

Gipasabut ni Mormon nga ang rekord sa Basahon ni Mormon gisulat aron sa pagdani sa katawhan sa pagtuo kang Jesukristo

Pangutan-a ang mga estudyante kon nakabati ba sila og kaguol alang sa usa ka tawo nga kinahanglang mag-antus sa mga sangputanan sa usa ka sayop nga pagpili. Mahimo kang mopakigbahin og angay (ug wala maghukom) nga ehemplo sa kaguol nga imong nabati alang sa usa ka tawo kinsa miantus og negatibo nga mga sangputanan tungod sa usa ka pagpili nga iyang gihimo. Ipasabut nga misulat si Mormon nga ang katawhan sa katapusan nga mga adlaw maguol samtang magbasa sila sa kalaglagan sa mga Nephite.

Dapita ang mga estudyante sa pagbasa sa hilum nga paagi sa Mormon 5:10–11, nga mangita kon unsay gisulti ni Mormon nga makalipay unta sa mga Nephite. Human makatubag ang mga estudyante, ipangutana ang mosunod:

Sa imong hunahuna unsa man ang gipasabut sa “gakson diha sa mga bukton ni Jesus”? (Ang pulong nga gakson nagpasabut nga gunitan og maayo o walay kabalaka, usa ka lihok sa pagprotektar ug pagbati.)
Sumala sa Mormon 5:11, unsay atong mabuhat aron makadawat niini nga matang sa paggakos? (Pinaagi sa paghinulsol kita mahimong “gakson diha sa mga bukton ni Jesus.” Isulat kini nga baruganan diha sa pisara.)

Basaha o dapita ang usa ka estudyante sa pagbasa sa mosunod nga pamahayag ni Elder Kent F. Richards sa Seventy. Hangyoa ang klase sa pagpaminaw sa unsay gipasabut sa “gakson diha sa mga bukton ni Jesus.”

“Ang tanan nga moduol mahimong ‘gakson diha sa mga bukton ni Jesus.’ [Mormon 5:11.] Ang tanang kalag mamaayo sa Iyang gahum. Ang tanang kasakit mahimong mahupay. Diha Kaniya, kita ‘makakaplag og pahulay alang sa [atong] mga kalag.’ [Mateo 11:29.] Ang atong mortal nga mga kahimtang mahimong dili mausab diha-diha dayon, apan ang atong kasakit, kabalaka, pag-antus, ug kahadlok mahimong matuhop diha sa Iyang kalinaw ug makaayo nga tambal” (“Ang Pag-ula Moayo sa Tanang Kasakit,” Ensign o Liahona, Mayo 2011, 17).

Dapita ang mga estudyante sa paghunahuna og panahon nga sila mibati nga “[gigakos] diha sa mga bukton ni Jesus” isip resulta sa paghinulsol. Hangyoa sila sa pagpamalandong unsa ang ilang kinahanglan nga buhaton aron gakson diha sa Iyang mga bukton karon. Ipamatuod ang makahupay ug mapanalipdanon nga mga resulta sa paghinulsol.

Aron sa paghulagway og laing baruganan sa Mormon 5, pagbutang og usa ka kork o laing molutaw nga butang diha sa planggana sa tubig. Pagtawag og duha o tulo ka mga estudyante sa pagtayhop niini sa managlahing direksyon. Ipangutana unsay impluwensya sa kork kon asa kini padulong. Awhaga ang mga estudyante, sa ilang pagpadayon sa pagtuon, sa pagtan-aw kon sa unsang paagi kini nga kork susama sa mga Nephite.

Isulat diha sa pisara: Kon magdumili kita sa paghinulsol … Dayon dapita ang usa ka estudyante sa pagbasa og kusog sa Mormon 5:2, 16–19 samtang ang klase mangita og mga sangputanan sa pagdumili sa mga Nephite sa paghinulsol. Hangyoa ang mga estudyante sa paggamit sa unsay ilang nakita niini nga mga bersikulo aron makompleto ang han-ay sa mga pulong diha sa pisara. Samtang motubag sila, mahimo kang mangutana sa pipila sa mosunod nga mga pangutana aron pagtabang sa mga estudyante nga makasabut sa ubang mga pulong diha sa mga bersikulo:

Diha sa bersikulo 16, unsa kaha ang gipasabut sa “walay Kristo ug Dios niini nga kalibutan”? (Ang pagpuyo nga walay pagtuo kang Jesukristo o sa Langitnong Amahan ug wala ang Ilang impluwensya ug paggiya.)
Unsa kaha ang gipasabut sa “gipadpad ingon og tahup tungod sa ka kusog sa hangin”? (Mormon 5:16). (Mahimo kang mopasabut nga ang tahup nag-refer sa mga sagbut ug mga panit sa lugas nga gipalid sa hangin panahon sa paggiuk.)
Unsa kaha ang imong bation kon anaa ka sa kadagatan sakay sa walay angkla nga barko, walay lawig o timon? Sa unsang paagi kini nga sitwasyon susama sa kondisyon sa mga Nephite?

Ipasabut nga ang Mormon 5 nagtudlo nga kon magdumili kita sa paghinulsol, mopalayo ang Espiritu ug mawala kanato ang giya gikan sa Ginoo. Isulat kini nga baruganan sa pisara aron makompleto ang pamahayag nga imong gisugdan pagsulat sa sayo pa. Dapita ang mga estudyante sa pagpamalandung og mga panahon sa ilang kinabuhi nga nakasinati sila niini nga baruganan.

Mahimo nimong ipatandi sa mga estudyante ang kalainan sa duha ka baruganan nga gisulat sa pisara pinaagi sa pagpangutana sa mosunod: Sa duha ka kamatuoran nga gisulat sa pisara, sa unsang paagi ang resulta sa paghinulsol lahi sa resulta sa pagdumili sa paghinulsol?

Dapita ang mga estudyante sa pagbasa sa hilum sa Mormon 5:22–24, og mangita kon unsay gidapit ni Mormon nga atong buhaton aron dili kita mahisama sa mga Nephite sa iyang panahon. Mahimo nimong awhagon ang mga estudyante nga markahan ang unsay ilang nakit-an.

Ipamatuod ang kamatuoran sa duha ka baruganan nga anaa sa pisara.

Mormon 6:1–8:11

Human nakasaksi sa katapusang kalaglagan sa iyang katawhan, misulat si Mormon ngadto sa kaliwatan sa Lamanite ug dayon namatay, mibiya sa iyang anak nga si Moroni nga nag-inusara

Dapita ang mga estudyante sa pag-summarize sa katapusang kalaglagan sa mga Nephite, gamit ang mga ulohan sa kapitulo sa Mormon 6–8 kon gikinahanglan.

Dapita ang mga estudyante sa pagbasa og hilum ug pagpamalandung sa Mormon 7:10, ang katapusan nga mga pulong nga gisulat ni Mormon sa wala pa siya mamatay.

Sunod nga Unit (Mormon 8:12–Ether 3)

Nakigsulti si Moroni ni Jesukristo ug gipakita sa atong panahon. Unsay gipasidaan ni Moroni kanato? Ang igsoon ni Jared adunay hugot nga pagtuo usab. Nakakita siya kang Jesukristo ug nag-atubang nga nakigsulti Kaniya. Sa unsang paagi nga ang kahibalo nga si Moroni ug ang igsoon ni Jared nakakita ug nakigsulti ni Kristo nakatabang kanimo sa pagsalig sa ilang mga pulong?