Leksyon 152: Moroni 1–3

Leksyon 152

Moroni 1–3

Pasiuna

Human niya matapos ang iyang pagpamubo sa mga palid ni Ether, si Moroni nagtuo nga siya dili na magsulat pa. Apan, nadasig siya nga “mosulat og dugang nga pipila ka mga butang, nga tingali mahimo kining bililhon ngadto sa [iyang] mga kaigsoonan ang mga Lamanite, sa ubang umaabut nga adlaw, sumala sa kabubut-on sa Ginoo” (Moroni 1:4). Ang iyang mga pulong nanghimatuod sa iyang pagkamatinud-anon ngadto ni Jesukristo, ug kini usab nag-outline og importanting mga ordinansa sa ebanghelyo.

Mga Sugyot alang sa Pagtudlo

Moroni 1

Bisan asa na lang miadto si Moroni alang sa kaluwasan sa iyang kinabuhi ug nagpadayon sa iyang pagsulat

Dapita ang usa ka estudyante sa pagbasa og kusog sa mosunod nga istorya nga giistorya sa usa ka batan-ong babaye kinsa nanalipud alang sa iyang mga gituohan diha sa eskwelahan:

“Ang akong magtutudlo diha sa atubangan sa klase, nagsulti mahitungod sa usa ka mubo nga talan-awon sa usa ka salida nga hapit na namo tan-awon. … Ang akong magtutudlo … sa walay kabalaka mipasabut nga … ang salida adunay pangdagkong tawo nga rating. Nakuratan ko. … Wala gayud ako maghunahuna nga kini mahitabo.

“Milingkod ako sa akong lingkuranan, naghunahuna kon unsay angay nakong buhaton. Usa ka hunahuna ang kanunay nga misulod sa akong ulo: Kita gihangyo sa dili pagtan-aw og makadaot nga mga salida. Misulay ako sa pagpangatarungan nga tungod kay ako anaa sa eskwelahan, ang bahin sa salida nga among tan-awon angay ra. Apan ang hunahuna sa dili pagtan-aw og makadaot nga salida mipatigbabaw sa akong mga katarungan.

Sa kalmang paagi akong gipataas ang akong kamot, ug atubangan sa tibuok klase, mihangyo akong molingkod sa gawas sa kwarto samtang nagsalida. Gibati nako nga ang tanang mga mata diha kanako samtang akong giirog ang akong lingkuranan ug gidala ang akong basahon. Nakita nako ang mga hitsura sa ilang mga nawong; wala lamang gayud sila makasabut.

Samtang naglingkod sa pasilyo, gibati nako ang dakong kalipay. Nahibalo ako nga gibuhat nako ang husto nga butang, walay pagsapayan kon unsay gisulti sa akong mga kauban o magtutudlo. Gibati usab nako nga mas nalig-on. Nahibalo ako nga dili ako angay nga motan-aw og dili maayong bahin sa salida tungod lamang kay ang akong magtutudlo ang mipresentar niini kanamo.

“… Nagtuo ako nga kon kita mag-atubang og mga higayon sa kasakit ug kita mobarug alang niini, mahimo kitang mas lig-on kay sa kita milingkod lang ug mitugot niini nga mahitabo.

“Kini usa ka kalig-on sa sulod nga makaplagan pinaagi sa atong Manluluwas. Kon kita motan-aw ngadto Kaniya sa panahon sa atong mga kalisud, malig-on kita. Ang atong hugot nga pagtuo Kaniya makatabang kanato sa pag-tubang og kalisdanan” (Catherine Hall, “Standing Up, Standing Out,” New Era, Peb. 2012, 11).

Dapita ang mga estudyante sa pagbasa og hilum sa Moroni 1:1–3 , mangita sa giunsa ni Moroni pagbarug nga nag-inusara sa iyang hugot nga pagtuo. Hangyoa sila sa pagreport kon unsay ilang nakit-an. Ikonsiderar ang pagpangutana sa mosunod:

Unsay ipasabut niini nganha kaninyo sa “dili paglimud ni Kristo?”
Kanus-a ka o ang usa ka tawo nga imong kaila nagpakita og determinasyon sa pagsunod ni Jesukristo samtang anaa sa kalisdanan?

Ipasabut nga bisan tuod ang mga ehemplo ni Moroni ug sa batan-ong babaye diha sa istorya gamhanan kaayo nga mga ehemplo sa dili paglimud ni Jesukristo, ang matag usa kanato makahimo og gagmay nga mga desisyon matag adlaw nga nagpakita sa samang hugot nga pagtuo, pakamasulundon, ug tinguha sa “dili paglimud ni Kristo.”

Unsa ang pipila ka mga paagi kamo makasunod sa ehemplo ni Moroni? (Ang mga estudyante mahimong mosugyot nga sila mahimong dili maulaw sa ebanghelyo ug sa mga sumbanan niini, mosunod sa mga sugo, mopakita og matarung nga ehemplo, ug mopabilin nga lig-on sa pagpamatuod ni Jesukristo bisan og ang uban dili.)

Dapita ang mga estudyante sa pagbasa og kusog sa Moroni 1:4 Hangyoa ang klase sa pagsunod, mangita sa mga rason kon nganong gipili ni Moroni ang pagpadayon sa pagsulat. Human og report sa mga estudyante unsay ilang nakit-an, ipasabut nga misulat si Moroni alang sa kaayohan sa mga kaliwat niadtong kinsa nagtinguha sa paghunos sa iyang kinabuhi.

Unsay atong makat-unan gikan sa tinguha ni Moroni sa pagtabang sa mga Lamanite? (Kita makapakita sa atong pasalig sa pagsunod ni Jesukristo pinaagi sa pagpili sa pagpakita og gugma ngadto sa atong mga kaaway.)

Ipasabut nga ang pasalig ni Moroni ngadto ni Jesukristo migiya kaniya sa pagsulat mahitungod sa pipila ka importanting mga aspeto sa Simbahan nga gituohan niya “nga bililhon” (Moroni 1:4). Dapita ang mga estudyante sa pagkonsiderar kon sa unsa nga paagi ang Moroni 2–3 tingali mahimo nga bililhon ngadto kanila samtang gitun-an nila kini nga mga kapitulo.

Moroni 2

Girekord ni Moroni ang mga panudlo ni Jesukristo sa pagtugyan sa gasa sa Espiritu Santo

Dapita ang usa ka batan-ong lalaki sa pagduol ngadto sa atubangan sa klase. Hangyoa ang klase sa paghunahuna nga kining batan-ong lalaki sa umaabut isip usa ka full-time nga misyonaryo. Siya ug ang iyang companion nagtudlo sa ebanghelyo sa usa ka tawo ug ang tawo nakahukom nga magpabunyag. Ang batan-ong lalaki sa imong klase gidapit sa pagpahigayon sa ordinansa sa pagkumpirma, nga naglakip sa paghatag sa gasa sa Espiritu Santo. Pangutan-a ang batan-ong lalaki sa mosunod:

Unsa kaha ang imong buhaton sa pagpangandam sa pagpahigayon niini nga ordinansa? (Human matubag sa batan-ong lalaki, dapita ang nahibilin sa klase sa pagpakigbahin usab sa ilang mga hunahuna.)

Ipasabut nga sa dihang ang nabanhaw nga Manluluwas mibisita sa mga Nephite, “siya mihikap pinaagi sa iyang kamot sa mga tinun-an kinsa siya mipili” ug “mihatag kanila og gahum sa pagtugyan sa Espiritu Santo” (3 Nephi 18:36–37). Gilakip ni Moroni sa iyang rekord ang pipila sa mga panudlo sa Manluluwas ngadto sa napulog duha ka mga tinun-ang Nephite kon unsaon sa paghatag sa gasa sa Espiritu Santo. Dapita ang usa ka estudyante sa pagbasa og kusog sa Moroni 2:1–3, ug hangyoa ang klase sa pagpangita sa mosunod nga impormasyon.

Unsay kinahanglang buhaton sa tawo nga nagpahigayon sa ordinansa aron maandam
Unsaon sa pagpahigayon ang ordinansa

Human mabasa sa mga estudyante ang mga bersikulo, ipangutana ang pipila o ang tanan sa mosunod:

Sumala sa footnote b alang sa Moroni 2:2, unsa nga priesthood ang gikinahanglan sa pagtugyan sa gasa sa Espiritu Santo? (Ang Melchizedek nga Pagkapari.)
Unsa ang kinahanglan nga buhaton sa usa ka tighupot sa Melchizedek nga Pagkapari aron maandam sa paghatag sa gasa sa Espiritu Santo? (Kinahanglan siyang “motawag sa ngalan sa Amahan pinaagi sa ngalan ni [Jesukristo] sa hugot nga pag-ampo.”)
Sa unsa kaha nga paagi ang pag-ampo makatabang sa usa ka tawo sa pag-andam sa pagpahigayon og ordinasa sa priesthood?
Unsaon sa pagpahigayon sa ordinansa sa kumpirma? (Pinaagi sa pagpandong sa mga kamot pinaagi sa ngalan ni Jesukristo. Ipasabut nga alang sa bahin niini nga ordinansa, ang mga tighupot sa Melchizedek nga Pagkapari kinahanglan mogamit og piho nga mga pulong. Ang mga full-time missionary gihatagan og gagmayng handbook nga may mga instruksyon kon unsaon sa pagpahigayon ang mga ordinansa ug mga panalangin sa priesthood.)

Mahimo nimong i-summarize kutob sa unsay nakat-unan sa mga estudyante pinaagi sa pagsulat sa mosunod nga kamatuoran diha sa pisara: Ang mga tighupot sa Melchizedek nga Pagkapari nagtugyan sa gasa sa Espiritu Santo diha sa gibunyagan nga mga miyembro sa Simbahan pinaagi sa pagpandong sa mga kamot.)

Moroni 3

Nagrekord si Moroni sa mga panudlo ni Jesukristo sa pag-orden og mga priest ug mga teacher

Usa ka adlaw o duha sa dili pa itudlo kini nga leksyon, mahimo nimong ikonsiderar ang paghangyo sa usa ka batan-ong lalaki sa pagbasa sa iyang priesthood line of authority ngadto sa klase. (O mahimo kang mangandam sa pagbasa sa imong line of authority o line of authority sa usa ka miyembro sa pamilya o sa usa ka priesthood lider sa inyong ward o branch.) Ipasabut nga ang usa ka priesthood line of authority nagsubay sa gigikanan sa tighupot sa priesthood authority ngadto ni Jesukristo. Ang mga tighupot sa Melchizedek Priesthood mahimong mohangyo og rekord sa ilang line of authority pinaagi sa pagkontak sa mga punoang buhatan o buhatang administriba sa ilang area. Ang Simbahan dili mohatag og rekord sa mga line of authority alang sa mga tighupot sa Aaronic Priesthood. Bisan pa niana, kon ang usa ka Aaronic Priesthood gi-orden pinaagi sa usa ka tighupot sa Melchizedek Priesthood, mahimo siyang makahibalo mahitungod sa line of authority sa tawo kinsa mi-orden kaniya.

Hangyoa ang estudyante sa pagbasa sa iyang line of authority ngadto sa klase (o sa pagbasa sa line of authority nga imong gidala sa klase). Dapita siya sa pagpakigbahin unsa ang kahulugan niini ngadto kaniya nga mahibalo nga siya makasubay sa gigikanan sa iyang priesthood authority lahus ngadto ni Jesukristo (o ipakigbahin ang imong kaugalingon nga mga pagbati mahitungod sa mga tighupot sa priesthood nga makahimo sa pagsubay sa gigikanan sa ilang authority ngadto sa Manluluwas).

Aron matabangan ang mga estudyante nga masabtan nga ang awtoridad sa pagpahigayon sa tanang mga katungdanan nagagikan ni Jesukristo ug sa Langitnong Amahan, dapita ang usa ka estudyante sa pagbasa sa mosunod nga pahayag ni Elder Jeffrey R. Holland sa Korum sa Napulog Duha ka mga Apostoles:

“Ang pagbuhat nga may balaanong awtoridad nagkinahanglan og labaw pa kay sa pagsabutsabot sa mga tawo. Kini dili mahimo pinaagi sa teolohikal nga pagbansay o pagkatinugyanan gikan sa kongregasyon. Dili, diha sa hinatagan og awtoridad nga buhat sa Dios kinahanglan nga adunay gahum nga mas dako kay sa niana nga gipanag-iya na sa mga tawo diha sa mga lingkuranan sa simbahan o diha sa mga kadalanan o diha sa mga seminary—usa ka kamatuoran nga nahibaloan sa daghang matinuoron nga relihiyosong mga tigpangita ug bukas nga gidawat sulod sa mga henerasyon nga midangat ngadto sa Pagpahiuli. …

“… Kita dinhi sa gipahiuli nga Simbahan ni Jesukristo makasubay sa linya sa katungod sa priesthood [priesthood line of authority] nga gihuptan sa pinakabag-o nga deacon sa ward, sa bishop nga nangulo kaniya, ug sa propeta nga nangulo kanatong tanan. Kana nga linya masubay sa walay pagkaputol nga kadena ngadto sa mga anghel nga mianhi gikan sa Anak sa Dios Mismo, nga nagdala niining dili hitupngang gasa gikan sa langit” (“Ang Atong Talagsaong Hiyas,” Ensign o Liahona, Mayo 2005, 44).

Nganong importante alang kaninyo nga mahibalo nga ang matag tighupot sa priesthood niini nga Simbahan makasubay sa iyang awtoridad balik ngadto ni Jesukristo?

Dapita ang usa ka estudyante sa pagbasa og kusog sa Moroni 3:1–4. Hangyoa ang klase sa pagsunod, mangita sa unsa nga paagi ang mga indibidwal gi-orden ngadto sa mga katungdanan sa priesthood.

Sa unsa nga paagi ang mga indibidwal gi-orden ngadto sa katungdanan sa priesthood? Ang mga indibidwal gi-orden ngadto sa katungdanan sa priesthood pinaagi sa pagpandong sa mga kamot pinaagi niadtong adunay awtoridad.)
Nganong kinahanglan kini alang sa indibidwal nga ma-orden ngadto sa usa ka katungdanan sa priesthood pinaagi sa usa ka tawo kinsa sa karon naghupot niana nga katungdanan, o mas dako nga katungdanan, diha sa priesthood?

Hangyoa ang mga tighupot sa priesthood diha sa klase sa daklit nga pagpasabut sa ilang mga katungdanan. Pangutan-a ang klase:

Kanus-a kamo napanalanginan tungod kay usa ka tighupot sa priesthood mituman sa iyang mga responsibilidad?

Dapita ang pipila ka mga estudyante sa pagpakigbahin sa ilang mga pagbati mahitungod sa giunsa sa priesthood pagpanalangin ang ilang mga kinabuhi. Mahimo usab nimong ipakigbahin kon sa unsang paagi napanalanginan ang imong kinabuhi tungod sa priesthood.

Ribyu sa Scripture Mastery

Hatagi ang mga estudyante og lista sa tanang 25 ka scripture mastery nga mga reference diha sa Basahon ni Mormon ug tunga sa palid nga papel. Hangyoa ang mga estudyante sa pagsulat sa mga numero 1,2, ug 3 diha sa ilang mga papel. Dayon basaha ang mga ehemplo sa ubos (o pag-andam og pipila sa imong kaugalingon nga mahimong may kalabutan sa mga panginahanglan ug interes sa mga estudyante nga imong gitudloan). Sunod sa matag numero diha sa ilang mga papel, ipasulat sa mga estudyante ang scripture mastery passage nga ilang gihunahuna nga mao ang labing tukma nga paris alang sa ehemplo nga imong gibasa. Dayon hangyoa sila sa pagpakigbahin sa ilang mga tubag. Tungod kay mahimong molabaw sa usa ka posibling magkatukma, dapita ang mga estudyante sa pagpasabut kon ngano nga ilang gipili ang piho nga mga tudling.

Nangita ka og kalig-on sa pagbuntog og piho nga malisud nga tintasyon. (Posible nga mga tubag : Helaman 5:12 ug 3 Nephi 18:15, 20–21.)
Samtang nagtuon ka sa mga kasulatan ug naghunahuna mahitungod sa usa ka hagit sa imong kinabuhi, nadawat nimo ang direksyon mahitungod sa unsay buhaton. (Posible nga tubag: 2 Nephi 32:3.)
Gibati nimo ang gibug-aton gikan sa pipila ka mga higala nga moapil ka sa mga kalihokan nga supak sa mga sugo sa Dios. Nagsulti sila kanimo nga kini nga mga kalihokan mga kabahin sa pagkabatan-on ug paglingaw-lingaw. (Posible nga mga tubag: Mosiah 4:30; Alma 37:35; 41:10.)

Komentaryo ug Background nga Impormasyon

Moroni 2. Mga tighupot sa priesthood tali sa mga kaliwat ni Lehi

Gitudlo ni Presidente Joseph Fielding Smith:

“Ang mga Nephites mga kaliwat ni Joseph. Nadiskobrehan kini ni Lehi sa dihang nagbasa sa mga palid nga tumbaga. … Walay mga Levite kinsa mikuyog ni Lehi ngadto sa Kasadpang Katunga nga Bahin sa Kalibutan. Ubos niini nga mga kondisyon ang mga Nephite ang nangatungdanan pinaagi sa gahum sa Melchizedek nga Pagkapari gikan sa mga panahon ni Lehi ngadto sa mga panahon sa pagpakita sa atong Manluluwas taliwala kanila. …

“Sa dihang ang Manluluwas miadto sa mga Nephite, gitukod niya ang Simbahan diha sa kahingpitan niini taliwala kanila. … Busa kita may kapasikaran diha sa pagtuo nga dili lamang ang kahingpitan sa Melchizedek nga Pagkapari gitugyan, apan ang Aaronic usab, sama nga kita aduna niini sa Simbahan karon; ug kini nga Aaronic nga Pagkapari mipabilin uban kanila gikan niini nga panahon hangtud, nga pinaagi sa kadautan, ang tanan nga priesthood gihunong. Mahimo kitang mosalig nga sa mga panahon ni Moroni ang mga Nephite mi-orden og mga teacher ug mga priest diha sa Aaronic Priesthood; apan sa wala pa ang pagbisita sa Manluluwas sila nangatungdanan pinaagi diha sa Melchizedek nga Pagkapari” (Answers to Gospel Questions, comp. Joseph Fielding Smith Jr., 5 vols. [1957–66], 1:124, 126).

Moroni 2:1 Ang napulog duha ka mga Nephite mialagad ba isip mga Apostoles?

Si Propeta Joseph Smith mitudlo:

“Kini nga basahon [Ang Basahon ni Mormon] nagsulti kanato nga ang atong Manluluwas mihimo sa Iyang pagpakita dinhi niini nga kontinente human sa Iyang pagkabanhaw; … nga sila dihay mga Apostoles, mga Propeta, mga Pastor, mga Teacher, ug mga Evangelista; sama nga han-ay, sama nga priesthood, sama nga mga ordinansa, mga gasa, mga gahum, ug mga panalangin, ingon nga gipahimuslan diha sa silangan nga kontinente” (History of the Church, 4:538).

Si Presidente Joseph Fielding Smith mipasabut:

“Samtang sa matag higayon ang Napulog Duha ka mga Nephite gihisgutan isip mga disipulo, ang kamatuoran nagpabilin nga sila gitugahan og balaang awtoridad nga mahimong linain nga mga saksi alang ni Kristo taliwala sa ilang kaugalingon nga mga katawhan. Busa, sila sa pagkatinuod mga apostoles ngadto sa kaliwat nga Nephite” (Doctrines of Salvation, comp. Bruce R. McConkie, 3 vols. [1954–56], 3:158).