Librarya
Leksyon 105: Alma 59–63

Leksyon 105

Alma 59–63

Pasiuna

Si Kapitan Moroni nagmaya diha sa kalampusan ni Helaman sa pagbawi sa pipila ka mga siyudad sa mga Nephite nga nailog sa mga Lamanite. Hinoon, sa dihang nakahibalo siya nga ang siyudad sa Nephihah nasakop sa mga Lamanite, nasuko siya sa pangagamhanan tungod sa wala nila pagpadala og mga tabang. Sa usa ka sulat ngadto ni Pahoran, ang labaw nga maghuhukom, nagbangutan siya sa pag-antus sa mga matarung ug mibadlong kang Pahoran tungod walay pag-abag sa kawsa sa kagawasan. Wala mahibaloi ni Moroni, nga si Pahoran mikagiw ngadto sa yuta sa Gideon tungod sa pagrebelde sa Nephite nga king-men. Si Pahoran wala masilo sa pagpanton ni Moroni; hinoon, gikalipay niya ang gugma ni Moroni mahitungod sa kagawasan. Ang Ginoo mipalig-on sa mga Nephite, ug sila si Moroni, Pahoran, ug ang ilang katawhan milupig sa king-men ug sa mga Lamanite. Human sa pipila ka tuig sa gubat, ang mga Nephite nakasinati na usab og kalinaw, ug si Helaman mitukod pag-usab sa Simbahan.

Mga Sugyot alang sa Pagtudlo

Alma 59

Ang mga Nephite nawad-an og usa ka lig-on nga kota, ug si Kapitan Moroni nagbangutan tungod sa kadautan sa mga tawo

Sa dili pa magklase, isulat diha sa pisara ang mosunod nga pamahayag ni Presidente Ezra Taft Benson (gikan sa The Teachings of Ezra Taft Benson [1988], 285):

“Mas maayo nga mangandam ug magpugong kay sa mag-ayo ug maghinulsol” (Presidente Ezra Taft Benson).

Mahimong imo na kining nakutlo nga pamahayag isip kabahin sa leksyon diha sa Alma 49–51. Kon imo ning gibuhat, ikonsiderar ang pagblangko sa dapit sa pipila ka mga pulong inig sulat nimo niini sa pisara. Hangyoa ang mga estudyante nga sulatan ang mga blangko.

Dapita ang mga estudyante sa pagsulti og mga panahon sa ilang mga kinabuhi o sa mga kinabuhi sa tawo nga ilang kaila sa dihang ang pagpangandam nakatabang nga malikayan ang pagkasagmuyo o kagul-anan.

Pahinumdumi ang mga estudyante nga sa bag-ohay lang nga mga leksyon ilang natun-an ang mga kapitulo mahitungod sa gubat tali sa mga Nephite ug mga Lamanite. Dapita ang mga estudyante sa pagbasa sa hilum sa Alma 59:5–11 nga maghunahuna kon sa unsang paagi nga ang pamahayag diha sa pisara may kalabutan sa sitwasyon nga gihulagway niining mga bersikulo.

  • Unsa ang hinungdan nga ang mga Lamanite milupig sa siyudad sa Nephihah? (Ang pagkadautan sa mga tawo sa Nephihah.)

  • Unsa ang inyong nakita niining mga bersikulo nga may kalabutan sa pamahayag nga nasulat diha sa pisara?

Kon ang mga estudyante dili maghisgot sa mosunod nga pamahayag sa Alma 59:9, ipasabut kini ngadto kanila: “Labaw pa ka sayon ang pagpanalipod sa dakbayan sa pagkahulog ngadto sa mga kamot sa mga Lamanite kay sa pagkuha pag-usab niini gikan kanila.” Mahimo nimong isugyot nga markahan sa mga estudyante kini nga mga pamahayag diha sa ilang mga kasulatan. Aron matabangan ang mga estudyante nga makahunahuna kon unsaon sa paggamit niining kamatuoran diha sa ilang mga kinabuhi, hangyoa sila sa pagkomparar sa mga siyudad niining istorya ngadto sa ilang mga kaugalingon ug sa espirituhanon nga mga gubat nga ilang nasinati. Dayon ipangutana ang usa o mas daghan sa mosunod :

  • Sa unsang paagi kini nga kamatuoran may kalabutan ngari kanato? (Tabangi ang mga estudyante nga makita nga mas sayon ug mas maayo nga magpabilin nga matinud-anon kay sa pagbalik sa pagtuo human mahisalaag.)

  • Nganong ang pagpabilin nga matinud-anon sa Simbahan mas sayon kay sa pagbalik ngadto sa Simbahan human sa usa ka panahon nga nahimong dili kaayo aktibo?

  • Nganong mas sayon ang pagpatunhay sa usa ka pagpamatuod kay sa pagpabalik sa usa ka pagpamatuod human sa pagkahisalaag?

Dapita ang mga estudyante sa pagpamalandong og mga paagi nga ang kaaway ug ang iyang mga sumusunod mahimong moataki kanila. Awhaga sila sa pagsulat diha sa ilang mga notebook o scripture study journal mahitungod kon unsa ang ilang mahimo aron sa pagpangandam alang sa espirituhanon nga mga gubat.

Alma 60–62

Si Moroni nasayop sa pag-akusar ni Pahoran, kinsa mitubag uban sa gugma ug pagtahud

Basaha og kusog ang Alma 59:13. Siguroha nga makasabut ang mga estudyante nga si Moroni nasuko tungod kay siya naghunahuna nga ang pangagamhanan wala magpakabana, o walay panginlabut, mahitungod sa kagawasan sa katawhan. Sa iyang kasuko, misulat siya ngadto ni Pahoran, ang labaw nga maghuhukom sa Zarahemla. Dapita ang pipila ka estudyante nga magpuli-puli sa pagbasa og kusog sa Alma 60:6–11.

  • Unsa ang giakusar ni Kapitan Moroni ngadto ni Pahoran?

  • Unsa nga mga emosyon ang inyong mabati sa mga akusasyon ni Moroni?

Isulat ang mosunod nga pakisayran sa kasulatan diha sa pisara: Alma 60:17–20, 23–24. Dapita ang mga estudyante nga basahon sa hilum kining mga bersikulo. Awhaga sila sa paghunahuna kon sa unsang paagi nga ilang mabati ang dapit ni Pahoran.

  • Sa unsa nga mga paagi nga ang mga pag-akusar ni Kapitan Moroni nakapasakit kaayo ngadto ni Pahoran?

Dapita ang pipila ka estudyante nga magpuli-puli sa pagbasa og kusog sa Alma 60:33–36. Hangyoa ang klase sa pagsunod, nga mangita sa unsay mga pagpangandam nga buhaton ni Kapitan Moroni kon si Pahoran dili motubag ngadto sa iyang mga hangyo. Human sa pagtugot sa mga estudyante sa pagreport unsa ang ilang nakit-an, hangyoa sila sa pag-ila sa mga pulong niining mga bersikulo nga nagpakita sa mga rason o motibo ni Moroni alang sa iyang mga hangyo.

Dapita ang mga estudyante sa pagbasa sa hilum sa Alma 61:1–5 aron sa pagdiskubre kon nganong wala makadawat si Moroni og dugang nga mga kalig-on.

  • Unsa nga impormasyon ang gipakigbahin ni Pahoran ngadto ni Moroni?

  • Unsa ang pipila ka mga paagi nga ang mga tawo motubag kon sila sayop nga giakusahan sa mga butang?

  • Nasulayan na ba ninyo sukad nga naakusahan sa mga butang sa sayop nga paagi? Unsa ang inyong gibati sa mga akusasyon ug sa nag-akusar?

Dapita ang mga estudyante sa pagbasa sa hilum sa Alma 61:9–10, 15–18, nga mangita sa bisan unsang butang nga nagpadayag og katalagsaon sa kinaiya ni Pahoran. Human sa igong panahon, pagtawag og pipila ka estudyante sa pagpakigbahin sa unsay ilang nakit-an.

  • Unsa nga mga leksyon ang atong makat-unan gikan sa reaksyon ni Pahoran sa mga pag-akusar ni Moroni? (Tabangi ang mga estudyante sa pag-ila sa mosunod nga mga baruganan: Mahimo kitang mopili nga dili masilo pinaagi sa mga pulong ug mga aksyon sa uban. Ang uban nga mga kamatuoran nga mahimong mailhan sa mga estudyante maglakip nga kinahanglan nga atong likayan ang paghimo og dili mabination nga mga paghukom bahin sa ubang tawo ug nga sa higayon nga mahiusa kita diha sa pagkamatarung sa uban, kita mas lig-on sa atong mga gubat batok sa dautan. Mahimo nimong isulat kining mga kamatuoran sa pisara.)

  • Unsaon nato sa pagpili nga dili masilo?

Ikonsiderar ang pagpangutana sa mga estudyante kon andam ba sila sa pagpakigbahin sa bisan unsa sa ilang mga kasinatian sa pagpili nga dili masilo sa dihang ang mga tawo misulti og dili mabination o dili tinuod nga mga butang mahitungod kanila. Mahimong ikaw usab mokonsiderar sa pagpakigbahin og usa ka kasinatian sa imong kaugalingon. Ipamatuod ang kaimportante sa pagpasaylo sa uban tungod sa ilang mga pulong o mga aksyon batok kanato. Awhaga ang mga estudyante sa pagsunod sa ehemplo ni Pahoran.

Dapita ang usa ka estudyante sa pagbasa og kusog sa Alma 62:1. Hangyoa ang klase sa pag-ila kon unsa ang gibati ni Moroni sa dihang siya nakadawat sa tubag ni Pahoran.

Ipasabut nga bisan tuod nga si Kapitan Moroni nasayop sa iyang mga pasangil ni Pahoran, siya mitudlo og tinuod nga mga baruganan nga magamit nato sa atong mga kinabuhi. Dapita ang usa ka estudyante sa pagbasa og kusog sa Alma 60:23 Ipasabut nga sa mga pulong ni Moroni mahitungod sa paglimpyo sa “sulod sa sudlanan” mahimong magamit ni bisan kinsa nga nagkinahanglan sa paghinulsol. Ipasabut nga ang sudlanan usa ka butang nga masudlan, sama sa tasa o panaksan. Pagbutang og yuta o lapok sa sulod ug gawas sa usa ka tasa (kon naa, labing maayong gamiton ang tin-aw nga tasa). Hangyoa ang mga estudyante kon ganahan ba silang moinum gikan sa tasa. Limpyohi ang gawas sa tasa ug pangutan-a ang mga estudyante kon komportable na ba silang moinom gikan niini.

  • Kon atong hunahunaon ang atong mga kaugalingon isip mga sudlanan, unsa kaha ang ipasabut sa paglimpyo sa sulod, sa sudlanan?

Basaha ang mosunod nga pamahayag ni Presidente Ezra Taft Benson:

“Kinahanglan natong limpyohan ang sulod sa sudlanan (tan-awa sa Alma 60:23), nga magsugod sa atong mga kaugalingon, dayon sa atong mga pamilya, ug sa katapusan sa Simbahan” (“Cleansing the Inner Vessel,” Ensign, Mayo 1986, 4).

  • Nganong importante nga kita mahimong limpyo sa sulod (unsay dili makita sa mga tawo) ingon man sa gawas (unsay makita sa mga tawo)?

  • Nganong importante nga limpyohan ang sulod sa sudlanan sa atong mga kinabuhi sa dili pa kita mahimong epektibo sa hingpit diha sa gingharian sa Ginoo?

I-summarize ang Alma 62:1–38 pinaagi sa pagpasabut nga si Kapitan Moroni nagdala og gamay sa iyang kasundalohan aron sa pagtabang ni Pahoran sa pagpapahawa sa mga king-men sa Zarahemla. Dayon, uban sa ilang hiniusang kasundalohan ug sa tabang sa ubang puwersa sa mga Nephite, si Moroni ug Pahoran mibawi sa nahabilin nga mga siyudad nga nawala ngadto sa mga Lamanite. Ilang giabug ang mga Lamanite gikan sa yuta ug miestablisar og kalinaw tali sa mga tawo.

  • Unsa ang pipila ka hagit nga masinati sa mga indibidwal ug mga pamilya human sa panahon sa gubat?

Dapita ang mga estudyante sa pagbasa sa hilum sa Alma 62:39–41 aron makita kon sa unsang paagi nga ang mga Nephite naapektuhan sa mga pagsulay sa gubat.

Samtang maghisgot ang mga estudyante niining pangutana, sila mahimong motubag sama niini:

Ang atong matarung nga mga pag-ampo makahimo og usa ka positibo nga epekto sa atong mga komunidad.

Sa mga panahon sa kalisdanan, ang uban nga mga tawo mopaubos sa ilang mga kaugalingon sa atubangan sa Dios samtang ang uban mahimong magmagahi.

  • Sa inyong hunahuna nganong ang ubang mga tawo mas mopaduol sa Ginoo kon sila makasinati og mga pagsulay? Nganong ang ubang mga tawo mopalayo sa Ginoo kon sila makasinati og mga pagsulay? (Tabangi ang mga estudyante sa pagsabut nga sa mga panahon sa kalisdanan, ang atong mga pagpili motino kon kita mopaduol ba sa Ginoo.)

  • Samtang nagbasa kamo sa mga kapitulo sa Basahon ni Mormon mahitungod sa mga gubat, unsay gitudlo niini diha kaninyo mahitungod sa pagkahimong usa ka disipulo ni Jesukristo sa mga panahon sa gubat o panagbingkil?

Alma 63

Daghang mga Nephite mibiyahe ngadto sa yuta sa amihanan nga bahin

I-summarize ang mga pulong ni Mormon dinhi niining kapitulo pinaagi sa pagpasabut nga daghang mga Nephite misugod sa paglalin ngadto sa amihanan, pinaagi sa biyahe sa yuta ug sa dagat. Si Shiblon mihatag sa sagradong mga rekord ngadto ni Helaman. Si Kapitan Moroni namatay, ug ang iyang anak nga lalaki nga si Moronihah nangulo sa kasundalohan nga mipaatras sa laing pagpang-ataki sa Lamanite.

Mahimo nimong tapuson kining leksyon pinaagi sa pagsulti mahitungod sa usa ka tawo kinsa nakasinati og kalisdanan ug kasakit ug mipili sa pagbaton og humok nga kasingkasing ug mipalambo og pagsalig diha sa Dios. Ikonsiderar ang pagpakigbahin og personal nga kasinatian.

Pagribyu sa Alma

Paggahin og pipila ka panahon aron sa pagtabang sa mga estudyante sa pagribyu sa basahon ni Alma. Hangyoa sila sa paghunahuna mahitungod kon unsa ang ilang nakat-unan gikan niining basahon, sa seminary ug diha sa ilang personal nga pagtuon sa kasulatan. Kon gikinahanglan, dapita sila sa pagribyu sa pipila ka summary sa kapitulo sa Alma aron matabangan sila nga makahinumdom. Human sa igong panahon, pagdapit og pipila ka estudyante sa pagpakigbahin sa ilang mga hunahuna ug mga pagbati mahitungod sa usa ka butang diha sa basahon nga ilang nagustuhan.

Komentaryo ug Background nga Impormasyon

Alma 61. Pagtubag niadtong kinsa nakasilo o nakapasakit kanato

Si Presidente James E. Faust sa Unang Kapangulohan mipaambit og usa ka istorya nga naghulagway sa kaimportante sa dili paghambin og ngil-ad nga pagbati ngadto niadtong kinsa mosulay sa pagpasilo o pagpasakit kanato:

“Sa matahum nga bungtod sa Pennsylvania, usa ka mapahinungurong grupo sa mga Kristiyano ang nagpuyo og yanong kinabuhi nga walay awto, elektrisidad, o moderno nga kahimanan. Motrabaho sila pag-ayo ug nagpuyo nga mahilum, malinawong kinabuhi nga layo sa kalibutan. Sagad sa ilang pagkaon nagagikan sa kaugalingon nilang mga uma. Ang kababayen-an manahi ug maggansilyo sa ilang mga sinina, nga ligdong ug yano. Naila sila isip mga tawong Amish.

“Usa ka 32 anyos nga drayber sa trak sa gatas nagpuyo uban sa iyang pamilya sa ilang komunidad sa Nickel Mines. Dili siya Amish, apan ang iyang rota sa pagkuha og mga gatas adto sa daghang umahan sa gatas sa mga Amish, diin naila siya nga ang hilumon nga tigkuha og gatas. Sa miaging Oktubre kalit siyang nawad-an sa maayong pangisip ug kabuot. Sa iyang nahasol nga hunahuna iyang gibasol ang Dios sa kamatayon sa iyang unang anak ug uban pang wala mapamatud-i nga panumduman. Masuk-anon siyang miataki sa eskwelahang Amish nga walay rason, gibuhian ang mga batang lalaki ug ang mga dagko, ug gihigot ang 10 ka mga batang babaye. Iyang gipamusil ang mga batang babaye, mikalas sa lima ug miangol sa lima. Dayon nagpakamatay siya.

“Kining makakurat nga kapintas mimugna og grabe nga pagbangutan sa mga Amish apan walay kasuko. Nasakitan sila apan wala masilag. Ang ilang pagpasaylo diha-diha. Silang tanan naghiusa sa pagtinguha nga motabang sa nag-antus nga pamilya sa tigkuha og gatas. Samtang ang pamilya sa tigkuha og gatas nagpundok sa iyang panimalay pagka-ugma human sa pagpamusil, usa ka silingang Amish miduol, migakos sa amahan sa namatay nga namusil, ug miingon, ‘Pasayloon mo namo.’ [Diha sa Joan Kern, “A Community Cries,” Lancaster New Era, Okt. 4, 2006, p. A8.] Ang mga lider sa Amish mibisita sa asawa ug mga anak sa tigkuha og gatas aron sa pagpadangat sa ilang simpatiya, sa ilang pagpasaylo, sa ilang tabang ug sa ilang gugma. Mga katunga sa mga nanghatud sa lubong sa tigkuha og gatas mga Amish. Ug unya, ang Amish midapit sa pamilya sa tigkuha og gatas sa pagtambong sa tulumanon sa haya sa mga batang babaye nga nangamatay. Usa ka tulukibong kalinaw ang mipatigbabaw diha sa Amish samtang ang ilang hugot nga pagtuo mipatunhay kanila panahon niining krisis.

“Usa ka lokal nga residente larino kaayong nakahulagway sa mga panghitabo niining mao nga trahedya dihang miingon siya, ‘Kita tanang nag-istorya sa samang pinulongan, ug dili lang kay sa Iningles, apan usa ka pinulongan sa pag-amuma, usa ka pinulongan sa panagdait, [ug] usa ka pinulongan sa pagserbisyo. Ug, oo, usa ka pinulongan sa pagpasaylo.’ [Diha sa Helen Colwell Adams, “After That Tragic Day, a Deeper Respect among English, Amish?” Sunday News, Okt. 15, 2006, p. A1.] Usa kadto ka katingalahan nga pagbu-bu sa ilang hingpit nga hugot nga pagtuo sa mga pagtulun-an sa Ginoo diha sa Wali sa Bukid: ‘Higugmaa ninyo ang inyong mga kaaway ug pag-ampo kamo alang sa mga magalutos kaninyo.’ [Mateo 5:44.]

“Ang pamilya sa tigkuha og gatas kinsa mipatay sa lima ka mga batang babaye miluwat sa mosunod nga mga pamahayag ngadto sa publiko:

“‘Ngadto sa among Amish nga mga higala, mga kasilinganan, ug sa lokal nga komunidad:

“‘Ang among pamilya buot nga ang matag usa kaninyo masayud nga kami mapasalamaton kaayo sa pagpasaylo, kabuotan, ug kapuangod nga inyong gipadangat kanamo. Ang inyong gugma alang sa among pamilya nakatabang sa paghatag og pag-alim nga gikinahanglan namo pag-ayo. Ang mga pag-ampo, mga bulak, mga kard, ug mga gasa nga inyong nahatag nakatandog sa among mga kasingkasing nga dili gani mahulagway sa mga pulong. Ang inyong kalooy mituhop lapas pa sa among pamilya, lapas pa sa among komunidad, ug nag-usab sa among kalibutan, ug tungod niini kami sinsero nga magpasalamat kaninyo.

“‘Palihug sayri nga ang among mga kasingkasing nagmagul-anon sa tanang nanghitabo. Kami puno sa kasubo alang sa among Amish nga mga silingan kinsa among gihigugma ug padayon nga higugmaon. Kami nasayud nga aduna pay daghang malisud nga mga adlaw alang sa tanang mga pamilya nga nawad-an og mga minahal, ug busa kami magpadayon sa paglaum ug pagsalig sa Dios sa tanang kahupayan, samtang kitang tanan magtinguha sa pag-ugmad og balik sa atong mga kinabuhi.’ [“Amish Shooting Victims,” www.800padutch.com/amishvictims.shtml.]

“Giunsa man sa tibuok grupo sa mga Amish pagpakita sa ingon nga pagpadayag sa pagpasaylo? Kini tungod sa ilang hugot nga pagtuo sa Dios ug pagsalig sa Iyang pulong, diin kabahin sa ilang pagkatawo. Ilang gitan-aw ang ilang mga kaugalingon isip mga disipulo ni Kristo ug gusto nga mosunod sa Iyang mga ehemplo.

“Pagkadungog niini nga trahedya, daghang mga tawo ang mipadala og kwarta ngadto sa mga Amish aron sa pagbayad sa pag-atiman sa panglawas sa lima nga nakalingkawas nga mga batang babaye ug alang sa gasto sa lubong sa lima nga napatay. Isip dugang sa pagpakita sa ilang pagkadisipulo, ang mga Amish mihukom sa pagpaambit sa uban nga kwarta sa biyuda sa tigkuha og gatas ug sa iyang tulo ka mga anak tungod kay sila usab mga biktima niining mapait nga trahedya” (“Ang Makaalim nga Gahum sa Pagpasaylo,” Ensign o Liahona, Mayo 2007, 67–68).

Alma 62:41. Pagtubag sa kalisdanan

Nagpasabut ngadto sa Alma 62:39–41, si Presidente Boyd K. Packer sa Korum sa Napulog Duha ka mga Apostoles mitudlo:

“Ang samang pagsulay sa samok nga mga panahon mahimong adunay sukwahi nga epekto diha sa mga indibidwal. …

“Sigurado nga kamo nakaila og pipila kansang mga kinabuhi napuno sa kalisdanan kinsa nahupay ug napalig-on ug nahashas pinaagi niini, samtang ang uban naghambin og mapait ug samaran ug dili malipayon nga pagbati” (“The Mystery of Life,” Ensign, Nob. 1983, 18).

Si Elder Dallin H. Oaks sa Korum sa Napulog Duha ka mga Apostoles mipasabut nga kita magpili kon sa unsang paagi nga kita motubag sa kalisdanan:

“Sigurado nga kining dako nga mga kalisdanan dili mahimo kon wala ang pipila ka mahangturon nga katuyoan o epekto. Kini makapabalik sa atong kasingkasing ngadto sa Dios. … Bisan kon ang mga kalisdanan mopahamtang og mortal nga kalisdanan, kini mahimo usab nga mga pamaagi sa paggiya sa mga lalaki ug babaye ngadto sa mahangturon nga mga panalangin.

“Ang dinagko nga mga kalisdanan sama sa natural nga mga kalamidad ug mga gubat ingon og dinala na sa mortal nga kasinatian. Kita sa kinatibuk-an dili makapugong niini, apan atong maila kon unsaon nato kini sa pagtubag. Sama pananglit, ang mga kalisdanan sa gubat ug pagserbisyo sa militar, diin nahimong espirituhanon nga pagkadaut sa pipila, nahimong espirituhanong pahigmata sa uban. Ang Basahon ni Mormon naghulagway sa kalahian:

“‘Apan tan-awa, tungod sa hilabihan ka dugay sa gubat tali sa mga Nephite ug sa mga Lamanite daghan ang nahimo nga tig-a, tungod sa hilabihan ka dugay sa gubat; ug daghan ang nahumok tungod sa ilang mga kasakit, nga sa ingon sila mipaubos sa ilang mga kaugalingon sa atubangan sa Dios, gani sa kinahiladman sa pagkamapainubsanon’ (Alma 62:41).

“Nabasa nako ang susama nga kalainan human sa makadaut nga bagyo nga miguba og liboan ka mga panimalay didto sa Florida pipila ka tuig ang milabay. Usa ka istorya sa balita nga mikutlo sa duha ka lain-laing mga tawo kinsa nag-antus sa samang trahedya ug nakadawat og samang panalangin: ang matag usa sa ilang panimalay hingpit nga naguba, apan ang matag usa ka sakop sa ilang mga pamilya naluwas sa kamatayon o pagkaangol. Miingon ang usa nga kining trahedya nakaguba sa iyang pagtuo; sa unsang paagi, nangutana siya, makatugot ba ang Dios nga mahitabo kini? Ang lain miingon nga ang kasinatian nakapalig-on sa iyang pagtuo. Ang Dios buotan kaayo ngadto kaniya, miingon siya. Bisan ang panimalay sa pamilya ug mga kabtangan nangawala, ang ilang mga kinabuhi naluwas ug mahimo silang magtukod pag-usab sa panimalay. Alang sa usa, ang katunga sa baso walay sulod. Alang sa lain, ang katunga sa baso naay sulod. Ang gasa sa moral nga kabubut-on makapagahum sa matag usa kanato sa pagpili kon sa unsang paagi kita molihok kon kita nag-antus og kalisdanan” (“Adversity,” Ensign, Hulyo 1998, 7–8).

Alma 63:4–10. Si Hagoth ug ang iyang mga kaliwatan

Ang mga propeta sa ulahing mga adlaw nag-ingon nga ang katawhan ni Hagoth nanimuyo sa mga isla nga karon gitawag og New Zealand.

Ngadto sa mga Santos sa New Zealand, si Presidente Joseph F. Smith miingon, “Kamong mga kaigsoonan gikan sa New Zealand, gusto ko nga masayud kamo nga kamo naggikan sa katawhan ni Hagoth” (kinutlo ni Spencer W. Kimball sa Joseph Fielding McConkie ug Robert L. Millet, Doctrinal Commentary on the Book of Mormon, vol. 3 [1991], 329).

Diha sa pagpahinungod nga pag-ampo sa Hamilton New Zealand Temple, si Presidente David O. McKay miingon, “Kami nagpadayag sa pagpasalamat ngadto niining tambok nga yuta sa mga Isla, Ikaw migiya sa mga kaliwatan sa Amahan ni Lehi, ug mihimo nila nga mauswagon” (“Dedicatory Prayer Delivered by Pres. McKay at New Zealand Temple,” Church News, Mayo 10, 1958, 2).

Si Presidente Spencer W. Kimball miingon: “Makatarunganon lang ang pag-ingon nga si Hagoth ug ang iyang mga kaubanan mga disenuybe ka mga siglo diha sa mga isla, gikan sa mga 55 B.C. ngadto sa 1854 sa wala pa ang ebanghelyo miabut kanila. Nawala nila ang tanang yano ug bililhon nga mga butang nga gidala sa Manluluwas sa yuta, tungod kay sila diha na sa mga isla sa dihang ang Kristo natawo sa Jerusalem” (Temple View Area Conference Report, Pebrero 1976, 3; gikutlo sa Joseph Fielding McConkie ug Robert L. Millet, Doctrinal Commentary on the Book of Mormon, vol. 3, 329).