Leksyon 35
2 Nephi 25
Pasiuna
Nagpadayon sa paghatag og gibug-aton sa kaimportante sa mga panagna ni Isaias, gipasabut ni Nephi nga si bisan kinsa nga dunay espiritu sa panagna makasabut ug makapasalamat sa mga pulong ni Isaias. Gipakigbahin niya ang katuyoan sa iyang pagsulat: “aron sa pagdasig sa among mga anak, ug usab sa among mga kaigsoonan, sa pagtuo kang Kristo, ug aron makig-uli sa Dios” (2 Nephi 25:23). Gidapit niya ang tanan nga motuo kang Jesukristo ug “mosimba kaniya uban sa tanan [nila] nga gahum, hunahuna, ug kusog, ug sa tibuok [nila] nga [mga] kalag” (2 Nephi 25:29).
Mga Sugyot alang sa Pagtudlo
2 Nephi 25:1–8
Nagtudlo si Nephi nga masabtan nato ang mga pulong ni Isaias kon mabatunan nato ang espiritu sa panagna
Pag-display og kandado nga dili maabli kon walay yawe (o pagdrowing og hulagway sa usa ka kandado ug yawe diha sa pisara). Ipasabut nga kon ang mga tawo ganahang ipabilin nga luwas ang bililhong kabtangan, kasagaran ila kining kandaduhan. Mahimong hipuson nila ang bugtong yawe sa kandado, o mahimong ihatag nila ang duplicate sa yawe ngadto sa usa ka sinaligan nga higala o sakop sa pamilya.
Ipasabut nga nasayud si Nephi nga ang mga panagna ni Isaias “bililhon kaayo” (2 Nephi 25:8). Hinoon, wala niya kini ipabiling sekreto. Gitudlo pa gani niya ang yawe alang ni bisan kinsa nga gustong moabli sa kahulugan sa mga pulong ni Isaias. Dapita ang usa ka estudyante sa pagbasa sa unang sentence sa 2 Nephi 25:4. Hangyoa ang klase sa pagpangita sa yawe aron masabtan ang mga pulong ni Isaias.
-
Unsa nga yawe ang inyong nakit-an? (“Ang espiritu sa panagna.”)
Aron matabangan ang mga estudyante nga makasabut kon unsay gipasabut sa pagbaton “sa espiritu sa panagna,” basaha ang mosunod nga pamahayag gikan sa Giya ngadto sa mga Kasulatan:
“Ang usa ka panagna naglangkob og balaanon nga dinasig nga mga pulong o mga sinulat, diin ang usa ka tawo modawat pinaagi sa pagpadayag gikan sa Espiritu Santo. Ang pagpamatuod ni Jesus mao ang espiritu sa panagna (Pin. 19:10). Ang panagna mahimong may kalabutan sa nangagi, sa karon, o sa umaabut. Kon ang usa ka tawo managna, siya mamulong o magsulat niana diin ang Dios buot kaniya nga masayud, alang sa iyang kaayohan o sa kaayohan sa uban. Ang tagsa-tagsa mahimo nga makadawat sa panagna o pagpadayag alang sa ilang kaugalingon nga kinabuhi” (Giya ngadto sa mga Kasulatan, “Pagpanagna, Panagna,” scriptures.lds.org).
Tabangi nga makita sa mga estudyante nga ang ilang panabut sa mga pulong ni Isaias molambo samtang sila (1) nagtinguha sa giya sa Espiritu Santo ug (2) nagbaton og pagpamatuod bahin ni Jesukristo ug tinguha nga magkat-on bahin Kaniya. Kon ilang isipon ang mga pulong ni Isaias niining paagiha, nga kanunayng mangita sa mga paagi nga ang iyang mga panagna nagpamatuod bahin sa Manluluwas, makakat-on sila kon unsay gusto sa Dios nga ilang mahibaloan, alang sa ilang kaayohan o alang sa kaayohan sa uban.
Ipasabut nga gipakigbahin ni Nephi ang ubang mga ideya nga makapalambo sa atong panabut bahin sa mga pulong ni Isaias. Hangyoa ang mga estudyante sa pagbasa og hilum sa 2 Nephi 25:1, nga mangita sa rason nganong daghan sa katawhan ni Nephi ang nakabantay nga ang mga panagna ni Isaias lisud sabton.
-
Unsa ang inyong nakit-an? (Wala sila masayud “mahitungod sa matang sa pagpanagna taliwala sa mga Judeo.”)
-
Base sa unsay inyong nabasahan sa mga pulong ni Isaias, unsa ang pipila ka mga characteristic sa mga panagna sa karaang Judeo? (Ang mga tubag mahimong maglakip nga si Isaias ug ang ubang mga propeta migamit og simbolismo ug balaknong pinulongan.)
-
Kon magbasa kamo sa mga pulong ni Isaias, nganong makatabang man nga makahibalo niining matang sa pagpanagna?
Ipasabut nga laing makatabang nga ideya makita diha sa 2 Nephi 25:5–6. Dapita ang usa ka estudyante sa pagbasa og kusog niining mga bersikulo. Hangyoa ang klase sa pagpangita sa mga kasinatian ni Nephi nga nakatabang kaniya aron masabtan ang mga pulong ni Isaias.
-
Sa inyong hunahuna ngano nga nakatabang man ni Nephi nga nakapuyo siya sa Jerusalem? Base sa inyong nabasahan sa mga pulong ni Isaias, sa inyong hunahuna nganong bintaha man alang ni Nephi nga “nakakita sa mga butang sa mga Judeo” ug “nasayud mahitungod sa mga dapit nga nag-alirong” sa Jerusalem?
-
Unsa ang atong mabuhat aron makaangkon og kahibalo bahin niining mga butanga? (Atong matun-an ang kultura, kasaysayan, ug heyograpiya sa karaang Israel.)
Basaha ang 2 Nephi 25:7–8 ngadto sa mga estudyante. Samtang magbasa ka, ipasabut nga ang panagna ni Isaias bililhon kaayo ngari kanato sama sa atong nakita nga kini natuman na. Sa paghulagway niini nga kamatuoran, ipangutana:
-
Sa miaging pipila ka adlaw, unsa nga mga panagna nga atong natun-an ang natuman na? (Mahimong mahinumduman sa mga estudyante ang mga panagna bahin sa Templo sa Salt Lake [tan-awa sa 2 Nephi 12:2–3], ang pagkatawo ni Jesukristo [tan-awa sa 2 Nephi 19:6], ug Joseph Smith [tan-awa sa 2 Nephi 21:1, 10].) Sa unsang mga paagi nga kining mga panagna mahimong mas makahuluganon kon inyong makita nga kini natuman na?
Sa pagtapos niining bahin sa leksyon, ipahayag ang imong pagsalig nga ang mga estudyante makapalambo sa ilang panabut sa mga pulong ni Isaias samtang magtinguha sila sa espiritu sa panagna. Ipasabut nga makapalambo sila sa ilang panabut pinaagi sa pagtuon bahin sa matang sa pagpanagna sa karaang Judeo ug sa kultura, kasaysayan, ug heyograpiya sa karaang Israel.
2 Nephi 25:9–19
Nanagna si Nephi bahin sa pagkatibulaag ug pagpundok sa mga Judeo
I-summarize ang 2 Nephi 25:9–19 pinaagi sa pagsulti nga si Nephi nanagna kalabut sa mga Judeo ug sa ilang yutang natawhan sa Jerusalem ug sa naglibut nga mga dapit. Miingon siya nga ang mga Judeo nga nabihag ngadto sa Babelon human sa pagkalaglag sa Jerusalem mobalik ngadto sa “yuta sa ilang kabilin” (tan-awa sa 2 Nephi 25:9–11). Si Jesukristo, ang Mesiyas, magpuyo taliwala kanila, apan daghan ang mosalikway Kaniya ug molansang Kaniya (tan-awa sa 2 Nephi 25:12–13). Human sa kamatayon ug Pagkabanhaw sa Manluluwas, ang Jerusalem pagalaglagon pag-usab, ug ang mga Judeo pagakatagon ug tibulaagon ug pagasilutan pinaagi sa ubang mga nasud (tan-awa sa 2 Nephi 25:14–15). Sa katapusan motuo sila kang Jesukristo ug sa Iyang Pag-ula, ug ang Ginoo mopahiuli kanila “gikan sa ilang pagkawala ug pagkapukan nga kahimtang” (tan-awa sa 2 Nephi 25:16–19).
2 Nephi 25:20–30
Nagpamatuod si Nephi bahin ni Jesukristo
Hangyoa ang mga estudyante sa paghunahuna kon unsaon kaha nila pagtubag sa usa ka tawo kinsa nag-ingon nga ang mga Santos sa Ulahing mga Adlaw wala motuo ni Jesukristo. Mahimo nimong dapiton ang usa o duha ka mga estudyante sa pagsulti sa daklit bahin sa ilang mga kasinatian sa dihang ang ubang mga tawo mihagit sa ilang pagtuo diha ni Jesukristo. Samtang magbasa ug maghisgot ang mga estudyante sa 2 Nephi 25:20–30, dapita sila nga mangita sa mga tudling nga ilang mapakigbahin sa ingon niana nga mga sitwasyon.
Hangyoa ang usa ka estudyante sa pag-ila sa “matarung nga paagi” diha sa 2 Nephi 25:28–29. Human nga ilang makita nga “ang matarung nga paagi mao ang pagtuo diha kang Kristo ug dili molimud kaniya,” isulat sa pisara ang Nganong ang pagtuo diha kang Jesukristo mao ang matarung nga paagi. Hangyoa ang mga estudyante sa pagsiksik sa 2 Nephi 25:20, 23–26, nga mangita sa mga rason nganong ang pagtuo diha kang Jesukristo mao ang matarung nga paagi. Dapita sila sa pagsulat sa ilang mga tubag diha sa pisara ubos sa ulohan nga imong gisulat. Ang mga tubag mahimong maglakip sa mosunod:
Ang kaluwasan moabut pinaagi lamang ni Jesukristo.
Tungod ni Jesukristo, kita maluwas pinaagi sa grasya human sa tanan nga atong mabuhat.
Pinaagi sa Pag-ula sa Manluluwas, makadawat kita og kapasayloan sa atong mga sala.
Dapita ang usa ka estudyante sa pagbasa og kusog sa 2 Nephi 25:23 ug 2 Nephi 10:24. Ipasabut nga kining mga bersikulo naglakip sa pulong nga pakig-uli, nga nagpasabut nga ipahiangay o ipahiuyon ang mga tawo o mga butang ngadto sa usag usa.
-
Niining duha ka mga bersikulo, giawhag kita sa mga propeta sa pagpakig-uli sa atong kaugalingon ngadto sa Dios. Sa inyong hunahuna unsa man ang gipasabut niini?
Ipasabut nga kining duha ka mga bersikulo naglakip usab sa pulong nga grasya. Ang grasya mao ang gasa gikan sa Langitnong Amahan nga gihatag pinaagi sa Iyang Anak, si Jesukristo. Ang pulong nga grasya, sumala sa gigamit diha sa mga kasulatan, nagpasabut sa makaabag nga gahum ug espirituhanon nga pagpaayo nga gitanyag sa kalooy ug gugma ni Jesukristo.
-
Unsa man ang gitudlo diha sa 2 Nephi 10:24 ug 25:23 bahin sa relasyon tali sa grasya ug sa atong mga paningkamot?
Dapita ang mga estudyante sa paggamit sa unsay ilang nakat-unan pinaagi sa pagsulat sa mga tubag sa mosunod nga pangutana diha sa ilang mga scripture study journal o mga class notebook. Mahimo nimong isulat ang pangutana diha sa pisara.
-
Unsa ang kahulugan niini nganha kaninyo nga maluwas pinaagi sa grasya?
Aron matabangan ang mga estudyante nga makasabut sa pamahayag ni Nephi diha sa 2 Nephi 25:24–25 nga ang balaod nahimong patay ngadto sa iyang katawhan, ipasabut nga ang balaod ni Moises maoy iyang gipasabut. Kana nga balaod, uban sa sistema sa mga seremonyas, mga ritwal, mga simbolo, ug mga sugo, lakip na ang pagsakripisyo sa mga hayop, gibuhat pa gihapon sa panahon ni Nephi. Nasayud si Nephi ug ang uban nga ang balaod matuman pinaagi sa Pag-ula ni Jesukristo. Human sa Pag-ula, wala na kinahanglana nga ang mga disipulo sa Manluluwas motuman sa balaod ni Moises. Apan ang matinud-anong mga Nephite nagpadayon sa pagtuman sa balaod niining higayuna, bisan kon nasayud nga ang kasamtangang balaod mailisan na sa umaabut nga adlaw.
Sa dihang miingon si Nephi nga ang balaod nahimo nang patay ngadto kaniya ug sa uban, gipasabut niya nga ang balaod dili makaluwas kanila. Mituman sila sa balaod tungod kay gusto nila nga magmasulundon ug tungod kay nasayud sila nga ang balaod mitudlo kanila ngadto kang Jesukristo, nga magdala kanila og kaluwasan.
-
Unsa may atong makat-unan gikan sa 2 Nephi 25:23–26 bahin sa mga rason nganong kinahanglan kitang motuman sa mga sugo?
-
Unsay inyong buhaton aron “[m]aghisgot kang Kristo” ug “[m]alipay diha kang Kristo”? (2 Nephi 25:26). Unsay inyong buhaton aron makatabang sa uban nga motuo kang Kristo?
Hangyoa ang mga estudyante sa pagpakigbahin og mga tudling nga ilang nakit-an nga makatabang kanila nga matubag ang pangangkon nga ang mga Santos sa Ulahing mga Adlaw wala motuo ni Jesukristo. Hangyoa sila sa pagsulti kon nganong ganahan sila niadtong mga tudling.
Ipahayag ang imong pagpamatuod bahin sa mga kamatuoran nga inyong nahisgutan karon. Mahimo usab nimong hatagan og oportunidad ang mga estudyante nga mopakigbahin og pagpamatuod bahin niining mga kamatuoran.
Scripture Mastery—2 Nephi 25:23, 26
Pahinumdom: Ikonsiderar ang paggamit sa mosunod nga ideya sa pagtudlo atol sa katapusang seksyon niini nga leksyon. Kon wala kay panahon sa paggamit niini nga ideya niini nga leksyon, mahimo nimo kining gamiton sa laing leksyon isip usa ka pagribyu.
Aron matabangan ang mga estudyante nga mamemorya ang 2 Nephi 25:26, usa sa mga bersikulo diha sa scripture mastery passage, isulat sa pisara ang mosunod:
Naghisgot
Nalipay
Nagsangyaw
Nanagna
Nagsulat
Nga ang among mga anak …
Sa unsa nga tinubdan …
Alang sa kapasayloan …
Dapita ang mga estudyante sa paggamit sa mga word cue diha sa pisara sa pag-recite sa 2 Nephi 25:26. Human mabalik-balik ang bersikulo sa pipila ka higayon, pangutan-a kon duna bay tawo diha sa klase nga andam nga mosulay sa pag-recite sa bersikulo gikan sa hunahuna. Dayon dapita ang nahabiling mga estudyante sa pag-recite og dungan nga dili motan-aw sa pisara. Sa pagtapos, mahimo nimong isugyot nga dunay bili ang pagpaminaw og maayo kon ang mga ginikanan, mga lider, ug mga magtutudlo maningkamot sa pag-agni kanato nga motan-aw ngadto sa Manluluwas.
Hatagi og usa ka piraso nga papel ang matag estudyante. Dapita ang mga estudyante sa paghimo og sulat ngadto sa ilang umaabut nga mga anak, nga mag-awhag kanila nga i-sentro ang ilang kinabuhi diha ni Jesukristo. Mahimong ibutang sa mga estudyante ang ilang mga sulat diha sa ilang mga kasulatan aron pagpreserbar niini alang sa umaabut.
Komentaryo ug Background nga Impormasyon
2 Nephi 25:23. Ang doktrina sa grasya
“Ang importante nga ideya sa pulong [grasya] mao ang balaang paagi sa tabang o kalig-on, nga gihatag pinaagi sa buhong nga kalooy ug gugma ni Jesukristo.
“Pinaagi sa grasya ni Ginoong Jesus, nga nahimong posible pinaagi sa Iyang maulaon nga sakripisyo, nga ang tawo mabuhi ngadto sa pagka-imortal, ang matag tawo makadawat sa iyang lawas gikan sa lubnganan sa usa ka kahimtang sa walay katapusan nga kinabuhi. Pinaagi usab kini sa grasya sa Ginoo nga ang mga indibidwal, pinaagi sa hugot nga pagtuo sa pag-ula ni Jesukristo ug sa paghinulsol sa ilang mga sala, nga makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi. Kini nga grasya mao ang makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa ilang labing maayo nga kaugalingong mga paningkamot.
“Ang balaanong grasya gikinahanglan sa matag kalag agig sangputanan sa pagkapukan ni Adan ug tungod usab sa mga kahuyang ug mga kakulian sa tawo. Bisan pa man niana, ang grasya dili paigo kon wala ang hingpit nga paningkamot sa bahin sa modawat. Mao nga ania ang pagpasabut, ‘Pinaagi sa grasya kami maluwas, human sa tanan nga atong mabuhat’ (2 Ne. 25:23). Tinuod gayud nga ang grasya ni Jesukristo maoy nakapahimong posible sa kaluwasan” (Bible Dictionary, “Grace”).
Miingon si Elder M. Russell Ballard sa Korum sa Napulog Duha ka mga Apostoles:
“Ang akong pagpamatuod nganha kaninyo mao nga ang kasiguroan, kalinaw, hingpit nga kalipay, ug seguridad nga atong gitinguha makita lamang diha sa pagdawat ug tinud-anay nga pagtuo sa kinabuhi ug misyon ni Jesukristo, ang Anak sa Labawng Makagagahum nga Dios. Sa paghangup nato sa Iyang mga pagtulun-an, gitugyan nato ang tanan natong mga sala, maghinulsol kita, ug mobuhat sa tanan natong mahimo nga moduol Kaniya sa tinuod nga diwa sa pagkadisipulo, hingpit nga nasayud nga pinaagi kini sa Iyang grasya nga kita maluwas, bisan pa man human sa tanan natong mabuhat. Ug sa paghatag nato sa atong kaugalingon ngadto kang Kristo, sa hingpit ug kompleto nga paagi, makaplagan nato ang kasiguroan, kalinaw, hingpit nga kalipay, ug seguridad diha Kaniya” (sa “Latter-day Counsel,” Ensign, Hunyo 2001, 74).
2 Nephi 25:26. “Kami nalipay diha kang Kristo”
Si Presidente Gordon B. Hinckley nahinumdom nga ang kahibalo nga naangkon pinaagi sa Pagpahiuli nagtugot kanato nga tinud-anay nga malipay diha sa atong Manluluwas:
“Isip usa ka Simbahan kita dunay mga kritiko, daghan kini sila. Moingon sila nga wala kita motuo sa tradisyunal nga Kristo sa Kristiyanismo. Dunay kamatuoran ang pipila sa ilang gisulti. Ang atong hugot nga pagtuo, ang atong kahibalo wala gibase sa karaang tradisyon, sa mga gituohan nga miabut tungod sa limitado nga panabut ug tungod sa hapit walay kinutuban nga mga panaghisgot sa mga tawo nga misulay sa pagkab-ot og depinisyon sa nabanhaw nga Kristo. Ang atong hugot nga pagtuo, ang atong kahibalo miabut tungod sa pagsaksi sa usa ka propeta niini nga dispensasyon kinsa nakakita diha sa iyang atubangan sa bantugan nga Dios sa universe ug sa Iyang Hinigugmang Anak, ang nabanhaw nga si Ginoong Jesukristo. Sila nakigsulti kaniya. Siya nakigsulti Kanila. Mipamatuod siya sa dayag, sa tukma, ug sa direkta nga paagi bahin niana nga mahinungdanong panan-awon. Usa kadto ka panan-awon bahin sa Labawng Makagagahum ug sa Manunubos sa kalibutan, mahimayaon lapas pa sa atong panabut apan piho ug tukma diha sa kahibalo nga gidala niini. Gikan kini niana nga kahibalo, nga lig-ong naestablisar isip resulta sa modernong pagpadayag, nga kami, diha sa mga pulong ni Nephi, ‘naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga [kami ug] ang among mga anak mahimo nga masayud sa unsa nga tinubdan [kami] mahimo nga mangita alang sa kapasayloan sa [among] mga sala’ (2 Ne. 25:26)” (“We Look to Christ,” Ensign, Mayo 2002, 90–91).