Leksyon 4

Ulohan nga Pahina, Pasiuna, ug mga Pagpamatuod sa mga Saksi

Pasiuna

Samtang nagtudlo ka sa Basahon ni Mormon, tabangi ang mga estudyante nga makadiskubre sa mga kamatuoran nga mopaduol kanila sa Dios. Gikan sa sinugdanan sa basahon, klaro nga tuyo sa mga tagsulat sa Basahon ni Mormon nga kini mopamatuod nga si Jesus mao ang Kristo. Nagpamatuod usab ang basahon sa pakigsaad sa Dios uban sa balay ni Israel ug nagpahayag sa panginahanglan alang sa tanang mga anak sa Dios nga mohimo ug mohupot og sagrado nga mga pakigsaad. Samtang mainampuong magtuon ang mga estudyante sa Basahon ni Mormon, makaangkon sila og mas dako nga pagpamatuod sa ebanghelyo ni Jesukristo ug sa Pagpahiuli sa Iyang Simbahan diha sa ulahing mga adlaw. Makakat-on usab sila sa pagpakita og mas hugot nga pagtuo diha kang Jesukristo ug sa Iyang Pag-ula.

Mga Sugyot alang sa Pagtudlo

Ang mga sugyot alang sa pagtudlo niini nga leksyon mahimong modangat og mas taas nga panahon sa pagtudlo kay sa gigahin nga panahon alang sa imong klase. Hunahunaa sa mainampuong paagi kon hain nga mga bahin ang labing gikinahanglan sa imong klase.

Ulohan nga Pahina

Dapita ang mga estudyante sa pagpakli ngadto sa ulohang pahina sa Basahon ni Mormon. Kini nga pahina nagsugod sa mga pulong nga “Ang Basahon ni Mormon, usa ka asoy nga sinulat pinaagi sa kamot ni Mormon diha sa mga palid nga kinuha gikan sa mga palid ni Nephi.” Si Propeta Joseph Smith mipasabut sa gigikanan sa ulohang pahina:

“Ang ulohang pahina sa Basahon ni Mormon usa ka literal nga paghubad, nga gikuha gikan sa katapusang pahina, sa wala nga bahin sa … basahon sa mga palid, diin naglangkob sa talaan nga nahubad, … ug … ang maong ulohang pahina dili usa ka moderno nga komposisyon, ingon man kanako o sa laing tawo kinsa nabuhi o buhi niini nga henerasyon” (diha sa History of the Church, 1:71).

Pagpuli sa pangalan

Ang pagdapit sa mga estudyante nga ipuli ang ilang kaugalingong mga pangalan alang sa usa nga anaa sa usa ka bersikulo sa kasulatan makatabang nga mahimong mas personal ang mga pagtulun-an sa mga kasulatan. Samtang mobasa ang mga estudyante sa ilang kaugalingong mga pangalan isip bahin sa usa ka kasulatan, mas sayon nilang makonsiderar kon sa unsang paagi ang doktrina o baruganan diha sa bersikulo magamit sa ilang kaugalingon.

Dapita ang mga estudyante nga basahon ang ulohang pahina sa Basahon ni Mormon sa hilum nga paagi. Hangyoa sila nga mangita sa mga pulong nga namahayag sa mga katuyoan sa Basahon ni Mormon. (Mahimo kang mohatag sa mga estudyante og usa ka timailhan nga kining mga katuyoan gipahayag isip mga butang nga ang Basahon ni Mormon “mopakita” ngadto sa mobasa niini.) Dapita ang pipila ka mga estudyante nga isulat sa pisara ang ilang mga makit-an. Kon mahuman na sila, hangyoa ang mga estudyante nga basahon pag-usab ang ikaduhang paragraph ngadto sa ilang kaugalingon, ipuli ang ilang kaugalingong mga pangalan sa “salin sa balay ni Israel.”

• Sa dihang nabasa na ninyo ang Basahon ni Mormon, hain sa mga katuyoan niini ang natuman na diha sa inyong kinabuhi? Sa unsang paagi kini natuman?

• Sa unsang paagi kini nagtabang kaninyo nga masayud nga kadtong nakigsaad sa Ginoo dili “isalikway sa kahangturan”?

Sultihi ang mga estudyante nga mahimong adunay mga panahon nga mobati sila nga nag-inusara o nga sila “gisalikway.”

• Nganong importante man nga mahibaloan nga atol niining mga panahona kamo wala “isalikway sa kahangturan”?

• Sa unsang paagi nga kining saad usa ka pagpahayag sa gugma sa Dios alang kaninyo?

Aron matabangan ang mga estudyante nga mahatagan og bili ang unang katuyoan sa Basahon ni Mormon, hangyoa ang usa ka estudyante sa pagbasa sa mosunod nga pamahayag ni Presidente Ezra Taft Benson:

President Ezra Taft Benson

“Ang dako kaayo nga misyon sa Basahon ni Mormon, ingon nga narekord diha sa ulohan nga pahina, mao “ang pagpamatuod ngadto sa Judeo ug sa Hentil nga si Jesus mao ang Kristo, ang Dios sa kahangturan, nagpaila sa iyang kaugalingon ngadto sa tanan nga mga nasud.”

“Ang matinuoron nga tigpangita sa kamatuoran makaangkon og pagpamatuod nga si Jesus mao ang Kristo samtang siya magmainampoon sa pagpamalandong sa dinasig nga mga pulong sa Basahon ni Mormon.

“Labaw sa katunga sa tanang mga bersikulo diha sa Basahon ni Mormon nagtumong ngadto sa atong Ginoo. Pipila ka matang sa pangalan ni Kristo ang nahisgutan og mas kadaghan pa matag bersikulo diha sa Basahon ni Mormon kay sa diha sa Bag-ong Tugon.

“Gihatagan Siya og labaw sa usa ka gatos ka lainlaing mga pangalan diha sa Basahon ni Mormon. Kadto nga mga pangalan adunay piho nga kahulugan sa paghulagway sa Iyang balaan nga kinaiya” (“Come unto Christ,” Ensign, Nob. 1987, 83).

Ipakigbahin ang imong pamatuod nga ang Basahon ni Mormon usa ka saksi nga si Jesus mao ang Kristo.

Pasiuna sa Basahon ni Mormon

Drowinga diha sa pisara ang litrato sa usa ka arko (tan-awa ang kauban nga hulagway), o paghimo og modelo sa usa ka arko gikan sa kahoy o sa laing mga materyales.

arch of stones

Hangyoa ang usa ka estudyante sa pagbasa og kusog sa pamahayag ni Joseph Smith diha sa pasiuna sa Basahon ni Mormon (tan-awa ang ika-unom nga paragraph). Mahimo nimong isugyot nga markahan sa mga estudyante ang pamahayag diha sa ilang mga kasulatan.

• Unsa ang silbi sa usa ka sukaranang bato?

Ipasabut nga ang sukaranang bato mao ang sentrong bato diha sa kinatas-an sa arko. Kon tukuron ang usa ka arko, ang duha ka daplin tukuron uban ang mga sangga aron hawiran kini. Ang haw-ang diha sa kinatas-an sa arko mainampingong sukdon, ug ang sukaranang bato silsilon aron hingpit kining mohaum. Kon mapahaum na ang sukaranang bato, makabarug ang arko nga walay mga sangga.

• Unsay mahitabo sa arko kon tangtangon ang sukaranang bato? (Kon naggamit ka og usa ka modelo, ipakita pinaagi sa pagtangtang sa sukaranang bato.)

• Sa unsang paagi ang Basahon ni Mormon nagsilbi nga usa ka sukaranang bato kalabut sa gipahiuli nga ebanghelyo?

Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson. (Mahimo nimong andamon ang pamahayag diha sa usa ka handout alang sa mga estudyante aron isukip diha sa ilang mga kasulatan. Kon dili, mahimo nimong dapiton ang mga estudyante nga isulat ang pamahayag ni Presidente Benson diha sa ilang mga kasulatan, diha sa ibabaw o sa ubos sa unang pahina sa pasiuna.)

“Adunay tulo ka mga pamaagi diin ang Basahon ni Mormon nahimong sukarang bato sa atong relihiyon. Kini mao ang sukarang bato sa atong pagsaksi kang Kristo. Kini mao ang sukarang bato sa atong doktrina. Kini mao ang sukaranang bato sa pagpamatuod” (“The Book of Mormon—Keystone of Our Religion,” Ensign, Nob. 1986, 5).

Aron matabangan ang mga estudyante nga makasabut sa unsang paagi ang Basahon ni Mormon mao ang sukaranang bato sa pagpamatuod, dapita ang usa ka estudyante sa pagbasa sa mosunod nga pamahayag ni Presidente Benson:

“Ang Basahon ni Mormon mao ang sukaranang bato sa pagpamatuod. Sama nga ang arko malumpag kon tang-tangon ang sukaranang bato, mao usab ang tanan diha sa Simbahan mobarug o mapukan uban sa pagkatinuod sa Basahon ni Mormon. … Kon tinuod ang Basahon ni Mormon … dayon ang usa ka tawo kinahanglan gayud nga modawat sa mga pag-angkon sa Pagpahiuli ug sa tanang kauban niini” (“The Book of Mormon—Keystone of Our Religion,” 6).

• Sa unsang paagi ang inyong pagpamatuod sa Basahon ni Mormon naka-impluwensya sa inyong pagpamatuod sa mga doktrina ug mga baruganan sa ebanghelyo?

• Sa unsang paagi ang Basahon ni Mormon mipaduol ninyo ngadto sa Dios?

Mahimo nimong i-istorya kon sa unsang paagi ang imong pagtuon sa Basahon ni Mormon nakapalig-on sa imong pagpamatuod ug mipaduol nimo ngadto sa Dios.

Pag-role-play

Ang role play makatabang sa mga estudyante nga mapraktis ang paggamit sa mga solusyon sa ebanghelyo sa tinuorayng mga sitwasyon sa kinabuhi. Mas malampuson ang role play kon hatagan nimo ang mga sumasalmot og igo nga impormasyon ug panahon sa pagpangandam. Samtang mag role play ang mga estudyante, lagmit makahimo sila og mga sayop. Pagmabination sa ilang mga pagbati ug mga kinaiya, ug pag-amping nga dili manaway sa ilang mga sayop. Sa katapusan sa role play, makatabang nga pangutan-on ang mga tig-obserbar kon aduna bay laing mga ideya nga tingali ilang gisugyot kon sila usab mga sumasalmot.

Dapita ang mga estudyante nga moapil diha sa usa ka role play. Hangyoa sila sa paghunahuna nga naghatag sila og usa ka kopya sa Basahon ni Mormon ngadto sa usa ka tawo kinsa dili miyembro sa Simbahan. Tabangi sila sa pagpangandam alang sa role play pinaagi sa pagbahin kanila ngadto sa duha ka grupo. Hangyoa ang unang grupo nga basahon ang mga paragraph 2–4 sa pasiuna sa Basahon ni Mormon. Hangyoa ang ikaduhang grupo nga basahon ang mga paragraph 5–8. Papangitaa ang duha ka grupo alang sa impormasyon nga sa ilang paminaw importante nga ipakigbahin kon nagtudlo mahitungod sa Basahon ni Mormon.

Human mahatagan ang mga estudyante og panahon sa pagtuon ug pagpangandam, dapita ang usa ka estudyante nga moduol sa atubangan sa klase aron mohimo sa tahas sa usa ka tawo kinsa dili miyembro sa Simbahan. Hangyoa usab ang usa ka estudyante gikan sa kada usa sa duha ka grupo nga moduol sa atubangan sa klase. Ipasabut nga kining duha ka estudyante molihok isip magkauban nga misyonaryo. Gamiton nila ang materyal nga nadiskubrehan sa ilang grupo diha sa pasiuna nga maoy itudlo sa unang estudyante mahitungod sa Basahon ni Mormon.

Kon mahuman na ang mga estudyante sa role play, mahimo nimong pangutan-on ang uban sa klase kon aduna bay dugang nga mga butang gikan sa pasiuna nga tingali ilang ipakigbahin kon sila pa ang napili nga motudlo.

Mahimo nimong ipasabut nga ang Basahon ni Mormon wala mangangkon nga mohatag og kasaysayan sa tanang mga katawhan kinsa mipuyo sa karaang panahon sa Kasadpang Bahin sa Kalibutan. Kini usa ka rekord sa mga kaliwat lamang ni Lehi (ang mga Nephite ug mga Lamanite) ug mga katawhan ni Jared. Mahimong adunay laing mga tawo kinsa mipuyo sa mga kayutaan sa Kasadpang Bahin sa Kalibutan sa wala pa, sa panahon sa, ug human sa mga panghitabo nga narekord diha sa Basahon ni Mormon.

Dapita ang mga estudyante nga basahon ang Moroni 10:3–5 sa hilum nga paagi.

• Sumala ni Moroni, unsaon nato pagkahibalo nga tinuod ang Basahon ni Mormon?

Hangyoa ang mga estudyante nga basahon ang mga paragraph 8–9 diha sa pasiuna sa Basahon ni Mormon. Hangyoa sila sa pag-ila og tulo ka dugang mga kamatuoran diin sila makaangkon og usa ka saksi kon ilang dawaton ang hagit ni Moroni.

Ipamatuod ngadto sa mga estudyante nga samtang kita magbasa, mamalandong ug mag-ampo mahitungod sa Basahon ni Mormon, ang Espiritu Santo mosaksi nga kini tinuod, nga si Jesus mao ang Kristo, nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo sa yuta.

Mga Pagpamatuod sa Tulo ka mga Saksi ug sa Walo ka mga Saksi

Hangyoa ang mga estudyante sa paghunahuna nga nakasaksi sila og usa ka tawo nga nangawat og usa ka bililhon nga butang gikan sa balay sa ilang silingan.

• Sa pagsulbad sa usa ka krimen, nganong bililhon man nga adunay usa ka saksi?

• Nganong makatabang man kon adunay labaw pa sa usa ka saksi?

Hangyoa ang mga estudyante sa pagbasa sa “Ang Pagpamatuod sa Tulo ka mga Saksi” sa hilum nga paagi. Dapita sila nga mangita sa mga pulong nga labing makahuluganon ngadto kanila. Mahimo nimong isugyot nga markahan nila kini nga mga pulong.

• Hain nga mga pulong ang inyong gimarkahan? Nganong makahuluganon man kini diha kaninyo? (Mahimo nimong ipasabut nga ang tingog sa Dios namahayag ngadto sa Tulo ka mga Saksi nga ang mga palid nahubad pinaagi sa gasa ug gahum sa Dios.)

Hangyoa ang usa ka estudyante sa pagbasa og kusog sa “Ang Pagpamatuod sa Walo ka mga Saksi”. Dapita ang uban pa sa klase nga maminaw alang sa mga kalainan tali sa mga pagpamatuod sa Tulo ka mga Saksi ug sa Walo ka mga Saksi.

• Unsa nga mga kalainan ang inyong namatikdan?

Dapita ang mga estudyante sa pagsulat sa ilang kaugalingong mga saksi sa o mga pagbati mahitungod sa Basahon ni Mormon. Mahimo silang mosulat diha sa ilang mga scripture study journal o sa blangko nga pahina diha sa ilang mga kasulatan. Tingali mobati ang pipila ka mga estudyante nga wala pa sila masayud nga tinuod ang Basahon ni Mormon. Awhaga sila nga maninguha sa pagbaton og usa ka pagpamatuod karong tuiga.

Pagtabang sa mga estudyante nga makabaton og usa ka pagpamatuod

Usa ka pamaagi sa pagtabang sa mga estudyante nga makabaton og usa ka pagpamatuod mao ang pag-awhag kanila nga mopakigbahin sa ilang mga pagbati mahitungod sa ebanghelyo ngadto sa uban, lakip ang mga miyembro sa pamilya ug mga higala, gawas sa klase. Si Presidente Boyd K. Packer sa Korum sa Napulog Duha ka mga Apostoles mitudlo: “Ah, kon makatudlo ako kaninyo niining usa ka baruganan. Ang pagpamatuod makaplagan diha sa pagpamatuod niini! …

“Importante gayud ang pagdawat og saksi gikan sa imong nabasa o sa gisulti sa laing tawo; ug kana usa ka mahinungdanon nga sinugdanan. Importante usab nga mokumpirmar ang Espiritu diha sa imong dughan nga ang imong gipamatuod tinuod” (“The Candle of the Lord,” Ensign, Ene. 1983, 54–55).

Komentaryo ug Background nga Impormasyon

Ulohan nga Pahina

Ang mosunod nga mga depinisyon makatabang samtang nagtuon sa ulohan nga pahina sa Basahon ni Mormon.

Ang Balay ni Israel nagpasabut nga mga kaliwat ni Abraham, Isaac, ug Jacob. Ang apo ni Abraham nga si Jacob, kansang ngalan giilisan ngadto sa Israel, adunay napulog duha ka anak nga mga lalaki. Ang ilang mga kaliwat nailhan nga napulog duha ka mga tribo sa Israel. Isip kaliwat ni Abraham, ang balay ni Israel mao usab ang mga katawhan sa pakigsaad sa Ginoo. Karon, ang balay ni Israel naglakip niadtong kinsa mohimo og mga pakigsaad uban sa Ginoo ug naghupot sa Iyang mga kasugoan. “Busa ang pangalan nga Israel gigamit sa pagrepresentar (1) sa tawo nga si Jacob, (2) sa literal nga mga kaliwat ni Jacob, ug (3) sa tinuod nga mga tumutuo ni Kristo, bisan unsa man ang ilang kaliwatan o hiyograpikanhong lokasyon” (Bible Dictionary, “Israel”).

Ang mga Judeo sa sinugdanan gipasabut nga bisan kinsa nga gikan sa tribo ni Juda (usa sa napulog duha ka mga tribo sa Israel). Nagpasabut kini sa tanang gikan sa gingharian sa Juda (sa kapanahunan sa Daang Tugon, sa habagatang bahin sa nabahin nga gingharian sa Israel), bisan og dili sila gikan sa tribo ni Juda. Nagpasabut usab kini sa “mga katawhan nga nagsunod sa mga relihiyon, mga paagi sa kinabuhi, ug mga tradisyon sa tinuohan sa mga Judeo apan mahimo o mahimo nga dili Judeo pinaagi sa pagkatawo” (Giya ngadto sa mga Kasulatan, “Judeo, Mga,” scriptures.lds.org).

Ang mga Hentil nagkahulugan nga “mga nasud.” Nagpasabut kini nga (1) kadtong kinsa dili sakop sa balay ni Israel, (2) kadtong kinsa wala motuo sa Dios sa Israel o kinsa walay ebanghelyo, bisan unsa man ang ilang kaliwatan, ug (3) mga katawhan kinsa dili gikan o wala magpuyo sa yuta sa Juda. Sama pananglit, ang mga langyaw ug mga tigkolonya [colonists] gitawag nga mga Hentil diha sa 1 Nephi 13:3–13. Kadtong kinsa mipatungha sa Basahon ni Mormon gitawag nga mga Hentil diha sa 1 Nephi 13:34. Ang Doktrina ug mga Pakigsaad ug Perlas nga Labing Bililhon gipatungha usab sa mga Hentil (tan-awa sa 1 Nephi 13:39). Ang Tinipong Bansa sa Amerika gitawag nga hentil nga nasud diha sa 1 Nephi 13:34, 39.

Ang minubo mao ang gipamubo nga saysay sa usa ka butang.

Ang salin mao ang nahibilin nga bahin sa usa ka butang. Diha sa ulohan nga pahina sa Basahon ni Mormon, ang mga pulong nga “mga salin sa Balay ni Israel” nagpasabut sa mga tawo sa nagkatibulaag nga Israel ug sa ilang kaliwatan. Sa dihang gitapos ni Moroni ang iyang rekord ug gisilyohan ang bulawang mga palid aron motungha sa ulahing mga adlaw, piho siyang nabalaka mahitungod sa nahibilin nga mga Lamanite ug sa ilang mga kaliwat, kinsa ang iyang amahan miingon nga “salin sa balay ni Israel” (Mormon 7:1). Gipaabut ni Moroni ang panahon nga sa makausa pa ang mga Lamanite masayud ug mohangup sa ebanghelyo ni Jesukristo (tan-awa sa Moroni 1:4).

Pasiuna. Mga kaliwat sa mga Lamanite sa moderno nga panahon

Ang mga Lamanite nalakip sa mga kagikan sa mga American Indian. Bisan pa niana, wala mangangkon ang Basahon ni Mormon nga ang tanang mga American Indian mga kaliwat sa mga Lamanite. Si Presidente Anthony W. Ivins sa Unang Kapangulohan mipahayag:

“Kinahanglan kitang mag-amping sa atong mga paghukom. Nagtudlo ang Basahon ni Mormon sa kasaysayan sa tulo ka managlahi nga mga katawhan … kinsa miabut niini nga kayutaan gikan sa karaan nga kalibutan. Wala kini magsulti kanato nga wala pay tawo dinhi sa wala pa sila. Wala kini magsulti kanato nga wala nay mga tawo nga miabut human niana. Busa kon adunay mga pagdiskubre nga nagpasabut og mga kalainan diha sa gigikanan sa mga kaliwat, sayon ra kaayo kining hatagan og kasayuran, ug makatarunganon, tungod kay nagtuo kita nga adunay laing mga katawhan nga miabut niini nga kayutaan” (sa Conference Report, Abr. 1929, 15).

Ang Pagpamatuod sa Tulo ka mga Saksi. “Gihubad pinaagi sa gasa ug gahum sa Dios”

Si Elder Neal A. Maxwell sa Korum sa Napulog Duha ka mga Apostoles miangkon nga bisan og ang Basahon ni Mormon gihubad pinaagi sa gasa ug gahum sa Dios, wala kita masayud sa detalye sa proseso sa paghubad:

“Masabut nga daghan sa mga mobasa sa Basahon ni Mormon matinguhaon nga masayud pa og dugang mahitungod sa pagtungha niini, lakip ang tinuod nga proseso sa paghubad. Mao usab kini sa matinud-anon ug maunungon nga si Hyrum Smith. Sa dihang nangutana, giingnan si Hyrum ni Propeta Joseph nga ‘dili tuyo nga sultian ang kalibutan sa tanang mga detalye sa pagtungha sa Basahon ni Mormon’ ug nga ‘dili angay nga iyang ipakigbahin kini nga mga butang’ (History of the Church, 1:220). Busa igo na ang atong nahibaloan mahitungod sa tinuod nga pagtungha sa Basahon ni Mormon, apan dili kini malukpanon. …

“Si Propeta Joseph lamang ang nasayud sa tibuok nga proseso, ug tuyo niyang dili ihulagway ang mga detalye. Atong giila ang mga pulong nila ni David Whitmer, Joseph Knight, ug Martin Harris, kinsa mga tig-obserbar, dili mga tighubad. Mipahayag si David Whitmer nga samtang migamit ang Propeta sa balaan nga mga himan nga gihatag aron sa pagtabang kaniya, ‘ang mga hieroglyphic motungha, ug usab ang paghubad sa Iningles nga linggwahe … diha sa hayag nga mga letra.’ Dayon basahon ni Joseph ang mga pulong ngadto kang Oliver (gikutlo diha sa James H. Hart, “About the Book of Mormon,” Deseret Evening News, 25 Mar. 1884, 2). Miasoy si Martin Harris mahitungod sa bato sa manalagna: ‘Motungha ang mga han-ay sa mga pulong ug gibasa sa Propeta ug gisulat ni Martin’ (gikutlo gikan sa Edward Stevenson, “One of the Three Witnesses: Incidents in the Life of Martin Harris,” Latter-day Saints’ Millennial Star, 6 Peb. 1882, 86–87). Mihimo og susama nga obserbasyon si Joseph Knight (tan-awa sa Dean Jessee, “Joseph Knight’s Recollection of Early Mormon History,” BYU Studies 17 [Autumn 1976]: 35).

“Giingon nga mipamatuod si Oliver Cowdery diha sa korte nga ang Urim ug Thummim mipahimo ni Joseph nga ‘mabasa sa Iningles, ang mga titik sa inusab nga Ehiptohanon, diin gikulit diha sa mga palid’ (“Mormonites,” Evangelical Magazine and Gospel Advocate, 9 Abr. 1831). Kon tukma kini nga mga report, nagpasabut kini og usa ka proseso nga nagpakita nga mihatag ang Dios kang Joseph og ‘panan-aw ug gahum sa paghubad’ (D&P 3:12). …

“Klaro nga ang proseso sa pagpadayag wala nagkinahanglan sa Propeta nga mahimong usa ka eksperto sa karaan nga linggwahe. Ang pagkamakanunayon sa pagpadayag mas labing mahinungdanon kay sa kanunay nga presensya sa abli nga mga palid, diin, agig sugo, kinahanglang dili ipakita sa mga mata sa walay awtoridad.

“Bisan og ang paggamit og mga himan tingali usa sa hinungdan sa paspas nga paghubad, mahimong ang Propeta usahay wala kaayo misalig sa pisikal nga mga himan. Sa yano wala kita masayud sa mga detalye.

“Hinoon, nasayud kita nga kining proseso nga nagkinahanglan og dakong pagtuo dili sayon. Kini nga kamatuoran klaro nga gipahayag diha sa kaugalingong pagsulay ni Oliver Cowdery sa paghubad. Napakyas si Oliver tungod kay siya ‘wala mipadayon sumala sa [iyang] nasugdan,’ ug tungod kay, nagkulang sa pagtuo ug buhat, siya ‘wala maghunahuna gawas sa pagpangutana’ (D&P 9:5, 7). Dili igo ang iyang kaandam sa pagbuhat niini. …

“Bisan unsa man ang detalye sa proseso, nagkinahanglan kini og dako kaayo, personal nga mga paningkamot ni Joseph uban sa tabang sa mga himan sa pagpadayag. Mahimong nausab ang proseso samtang milambo ang kapabilidad ni Joseph, naglakip sa Urim ug Thummim apan tingali sa minos nga pagsalig sa maong mga himan diha sa kaulahian sa pagbuhat sa Propeta sa paghubad. Si Elder Orson Pratt sa Korum sa Napulog Duha ka mga Apostoles miingon nga gisultian siya ni Joseph Smith nga migamit siya sa Urim ug Thummim sa dihang dili pa siya masination sa paghubad apan kadugayan wala na niya kini kinahanglana, sama sa paghubad ni Joseph sa daghang mga bersikulo sa Biblia (tan-awa sa Latter-day Saints’ Millennial Star, 11 Ago. 1874, 498–99)” (“By the Gift and Power of God,” Ensign, Ene. 1997, 39).

Dugang nga mga Ideya sa Pagtudlo

Ulohan nga Pahina

Papaklia ang mga estudyante ngadto dapit sa katapusan sa ikaduhang paragraph sa ulohan nga pahina sa Basahon ni Mormon.

• Unsay gusto sa mga tagsulat sa Basahon ni Mormon nga mahibaloan sa Judeo ug Hentil mahitungod ni Jesus?

Mahimo nimong ipasabut nga ang “Kristo (usa ka pulong nga Gresyanhon) ug Mesiyas (usa ka pulong nga Hebreo) nagpasabut nga ‘ang dinihugan.’ Si Jesukristo mao ang Unang Natawo sa Amahan diha sa espiritu (Heb. 1:6; D&P 93:21). Siya mao ang Bugtong Anak sa Amahan diha sa unod (Juan 1:14; 3:16). Siya mao si Jehova (D&P 110:3–4) ug gi-orden nang daan sa iyang mahinungdanon nga katungdanan sa wala pa malalang ang kalibutan” (Giya ngadto sa mga Kasulatan, “Jesukristo,” scriptures.lds.org; tan-awa usab ang “Mesiyas”).

Gamita ang mosunod nga tsart aron sa pagtabang nga mahulagway ang focus sa Basahon ni Mormon diha kang Jesukristo.

Mga Pakisayran sa Basahon ni Mormon ngadto kang Jesukristo
Libro	Mga Pakisayran sa mga Pangalan ug mga Ulohan ni Kristo	Gidaghanon sa mga Bersikulo diha sa Libro	Gidaghanon sa mga Bersikulo matag Pakisayran
1 Nephi	474	618	1.3
2 Nephi	591	779	1.32
Jacob	156	203	1.3
Enos	22	27	1.23
Jarom	8	15	1.88
Omni	20	30	1.5
Mga Pulong ni Mormon	15	18	1.2
Mosiah	492	785	1.6
Alma	1,013	1,975	1.95
Helaman	225	497	2.21
3 Nephi	293	788	2.69
4 Nephi	42	49	1.17
Mormon	188	227	1.21
Ether	220	433	1.97
Moroni	166	163	0.98
Total	3,925	6,607	1.68

(Gikuha gikan sa Susan Easton Black, Finding Christ through the Book of Mormon [1987], 16.)

Ipasabut nga ang mga tagsulat sa Basahon ni Mormon naghisgot kang Jesukristo pinaagi sa usa sa Iyang mga pangalan o mga tawag [title] hapit kausa matag 1.7 ka mga bersikulo. Sa pagkumpara, ang mga tagsulat sa Bag-ong Tugon naggamit og “usa ka porma sa iyang pangalan sa average nga kausa matag 2.1 ka mga bersikulo” (tan-awa sa Susan Easton Black, Finding Christ through the Book of Mormon, 15).

Ipasabut gayud ang mga pulong nga “si Jesus mao ang Kristo, ang Dios sa Kahangturan, nga nagpaila sa iyang kaugalingon ngadto sa tanan nga mga nasud.” Ipamatuod nga magpaila si Jesukristo sa Iyang Kaugalingon (o magpakita sa Iyang Kaugalingon) ngadto sa tanan kinsa modangup ngadto Kaniya. Dapita ang klase sa pagsiksik sa mosunod nga mga kasulatan, nga mangita alang sa pipila ka mga pamaagi diin ang Ginoo magpakita sa Iyang Kaugalingon ngadto sa mangita Kaniya:

• 1 Nephi 2:16 (pinaagi sa mga tubag sa pag-ampo)

• 2 Nephi 11:2–3 (pinaagi sa mga panan-awon)

• Jacob 4:7 (pinaagi sa Iyang grasya, o makaabag nga gahum)

• Enos 1:4–5, 10 (pinaagi sa pagpadayag nganhi sa atong mga hunahuna)

• Mosiah 4:2–3 (pinaagi sa kapasayloan sa atong mga sala)

• 3 Nephi 11:8–10 (sa personal)

Dapita ang mga estudyante sa pagpakigbahin kon unsay ilang nakit-an. Sa pag-awhag sa mga estudyante nga mopamatuod pa mahitungod sa unsang paagi ang Basahon ni Mormon mitudlo kanila mahitungod ni Jesukristo, ikonsiderar ang pagpangutana sa mosunod:

• Sa unsang paagi nga ang Basahon ni Mormon nakapalig-on sa inyong pagpamatuod kang Jesukristo?

Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Ang pinakalabaw ug mamandoon nga tawo diha sa Basahon ni Mormon, gikan sa unang kapitulo ngadto sa katapusan, mao ang Ginoong Jesukristo. … Ang basahon nakatutok sa unsay kanunayng gitutukan sa mga tugon sa kasulatan sukad sa panahon ni Adan ug Eva—ang pamahayag ngadto sa tanan nga pinaagi sa pag-ula sa Anak sa Dios, ‘kay ikaw napukan ikaw mahimo nga pagatubson, ug ang tanan nga katawhan, kutob sa buot [tanan nga gusto]’ [Moises 5:9]. …

“… Ang Basahon ni Mormon mao ang labing importanting pamahayag sa pakigsaad ug sa gugma sa Dios alang sa iyang mga anak dinhi sa kalibutan. Mao kini ang iyang labing importanting pahayag mahitungod sa maulaong sakripisyo sa iyang Anak” (Christ and the New Covenant: The Messianic Message of the Book of Mormon [1997], 3–4).

Dapita ang usa ka estudyante sa pagbasa sa 3 Nephi 5:25–26.

• Sumala niini nga mga bersikulo, unsay mahimong resulta sa pagpahiuli sa Dios sa Iyang pakigsaad ngadto sa Iyang mga katawhan?

• Sumala sa 3 Nephi 5:26, unsay resulta kon mohimo ug mohupot kita sa atong mga pakigsaad?

Pasiuna

Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson. (Mahimo nimong isulat kini nga pamahayag diha sa pisara sa dili pa magklase.)

President Ezra Taft Benson

“Ang Basahon ni Mormon mao ang sukaranang bato sa atong tinuohan. Kini mao ang pahayag ni Propeta Joseph Smith. Siya mipamatuod nga “ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan’ (Pasiuna sa Basahon ni Mormon). Ang sukaranang bato mao ang sentrong bato sa usa ka arko. Kini ang mopugong sa uban pang mga bato sa lugar niini, ug kon tangtangon, ang arko malumpag.

“Adunay tulo ka mga pamaagi diin ang Basahon ni Mormon nahimong sukaranang bato sa atong relihiyon. Kini mao ang sukaranang bato sa atong pagsaksi kang Kristo. Kini mao ang sukaranang bato sa atong doktrina. Kini mao ang sukaranang bato sa pagpamatuod” (“The Book of Mormon—Keystone of Our Religion,” Ensign, Nob. 1986, 5).

Ilista diha sa pisara ang tulo ka paagi nga gipamahayag ni Presidente Benson nga ang Basahon ni Mormon mao “ang sukaranang bato sa atong tinuohan.”

• Saksi ni Kristo

• Doktrina

• Pagpamatuod

• Unsa ang pipila ka mga kamatuoran nga gitudlo sa Basahon ni Mormon mahitungod ni Jesukristo? (Aron matabangan ang mga estudyante sa pagtubag niini nga pangutana, mahimo nimo silang dapiton sa pagpakli ngadto sa Giya ngadto sa mga Kasulatan ug tan-awon ang mga hilisgutan mahitungod ni Jesukristo.)

Human makahatag ang mga estudyante og pipila ka mga tubag, dapita ang usa ka estudyante sa pagbasa sa mosunod nga pamahayag ni Presidente Benson:

“Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahum ug katin-aw. Dili sama sa Biblia, nga miagi sa daghang mga henerasyon sa mga tigkopya [copyists], mga tighubad, ug malimbungon nga mga relihiyonista kinsa miusab sa teksto, ang Basahon ni Mormon naggikan sa tigsulat ngadto sa tigbasa sa usa lang ka dinasig nga paagi sa paghubad. Busa, ang pagpamatuod sa Agalon klaro, lunsay, ug puno sa gahum. Apan kini makahimo og mas daghan pa. Kadaghanan sa kalibutan sa Kristiyano karon nagsalikway sa kabalaan sa Manluluwas. Ilang gikwestyon ang Iyang milagruso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug dili masayop nga mga termino kabahin sa kamatuoran sa tanan niadtong butanga. Kini naghatag usab sa labing kompleto nga pagpasabut sa doktrina sa Pag-ula. Sa tinuoray, kining balaanong dinasig nga basahon mao ang sukaranang bato sa pagpamatuod ngadto sa kalibutan nga si Jesus mao ang Kristo” (Ensign, Nob. 1986, 5).

Pahinumdumi ang mga estudyante nga mipasabut usab si Presidente Benson nga ang Basahon ni Mormon mao ang “sukaranang bato sa atong doktrina.” Dapita ang usa ka estudyante sa pagbasa sa mosunod nga pamahayag ni Presidente Benson:

“Ang Ginoo Mismo namahayag nga ang Basahon ni Mormon naglangkob sa ‘kahingpitan sa ebanghelyo ni Jesukristo’ (D&P 20:9). Kana wala magpasabut nga kini naglangkob sa tanang pagtulun-an, sa tanang doktrina nga gipadayag. Hinoon, kini nagpasabut nga diha sa Basahon ni Mormon kita makakaplag sa kahingpitan niadtong mga doktrina nga gikinahanglan sa atong kaluwasan. Ug kini gitudlo sa yano ug simple nga paagi aron bisan ang mga bata makakat-on sa mga pamaagi sa kaluwasan ug kahimayaan. Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa gipangtudlo sa ubang mga kasulatan dili mahimong yano ug bililhon” (Ensign, Nob. 1986, 6).

• Unsa ang pipila sa mga importanting mga doktrina nga gitudlo sa Basahon ni Mormon? (Aron matabangan ang mga estudyante sa pagtubag niini nga pangutana, mahimo nimo silang dapiton sa pagsiksik sa mosunod nga mga kasulatan.)

  • 1 Nephi 3:7; Alma 37:35 (paghupot sa mga kasugoan)

  • 2 Nephi 2:25 (ang Pagkapukan)

  • 2 Nephi 2:27 (kagawasan)

  • 2 Nephi 9:23; 31:17 (pagbunyag)

  • 2 Nephi 32:8–9 (pag-ampo)

  • Alma 7:11–13 (ang Pag-ula)

  • Alma 13:7–9 (ang priesthood)

  • Alma 32:21 (hugot nga pagtuo)

  • Helaman 5:10–11 (paghinulsol)

  • 3 Nephi 9:15 (ang Paglalang)

  • Mormon 7:5–6 (ang Pagkabanhaw)

Pahinumdumi ang mga estudyante nga miingon si Presidente Benson nga ang Basahon ni Mormon mao usab “ang sukaranang bato sa pagpamatuod.”

• Ngano kahang importante nga adunay pagpamatuod sa Basahon ni Mormon?

Dapita ang usa ka estudyante sa pagbasa sa mosunod nga pamahayag ni Presidente Benson:

“Ang Basahon ni Mormon mao ang sukaranang bato sa pagpamatuod. Sama nga ang arko malumpag kon tang-tangon ang sukaranang bato, mao usab ang tanan diha sa Simbahan mobarug o mapukan uban sa pagkatinuod sa Basahon ni Mormon. … Kon tinuod ang Basahon ni Mormon … dayon ang usa ka tawo kinahanglan gayud nga modawat sa mga pag-angkon sa Pagpahiuli ug sa tanang kauban niini” (Ensign, Nob. 1986, 6).

• Sa unsang paagi ang inyong pagpamatuod sa Basahon ni Mormon naka-impluwensya sa inyong pagpamatuod sa mga doktrina ug mga baruganan sa ebanghelyo?

• Sa unsang paagi ang Basahon ni Mormon mipaduol ninyo ngadto sa Dios?

Ipabasa sa mga estudyante ang katapusang duha ka mga paragraph sa pasiuna sa Basahon ni Mormon.

• Kon tinuod ang Basahon ni Mormon, unsa pay laing mga butang nga tinuod usab?

Mahimo nimong ipakigbahin ang mosunod nga tambag gikan ni Presidente Ezra Taft Benson, kinsa mitudlo kanato kon sa unsang paagi ang Basahon ni Mormon mao ang sukaranang bato sa atong pagpamatuod ug ang tubag sa bisan unsa nga pagsupak:

“Tanang mga pagsupak, sa aborsyon man o sa dinaghan nga kaminyoon, o sa pagsimba sa ikapito nga adlaw, ug uban pa, nagdepende lamang kon si Joseph Smith ug ang iyang mga sumusunod mga propeta ba sa Dios kaniadto ug karon, nga nagdawat og balaan nga pagpadayag. Dayon, mao kini ang pamaagi sa pagtubag sa kadaghanang mga pagsupak pinaagi sa paggamit sa Basahon ni Mormon.

“Una, sabta ang pagsupak.

“Ikaduha, ihatag ang tubag gikan sa pagpadayag.

“Ikatulo, ipakita nga ang pagkasakto sa tubag magdepende gayud kon tinuod ba nga duna kitay modernong pagpadayag pinaagi sa modernong mga propeta.

“Ikaupat, ipasabut nga ang pagkatinuod nga duna kitay modernong mga propeta ug pagpadayag magdepende gayud kon tinuod ba ang Basahon ni Mormon.

“Busa, ang bugtong problema sa tigsupak nga kinahanglan niyang husayon sa iyang kaugalingon mao nga kon tinuod ba ang Basahon ni Mormon. Kay kon ang Basahon ni Mormon tinuod, nan si Jesus mao ang Kristo, si Joseph Smith mao ang Iyang propeta, Ang Simbahan ni Jesukristo sa mga Santos sa Ulahing mga Adlaw tinuod, ug kini gipangulohan karon pinaagi sa usa ka propeta nga nagdawat og pagpadayag” (“The Book of Mormon Is the Word of God,” Ensign, Mayo 1975, 64–65).

Ang Pagpamatuod sa Tulo ka mga Saksi

Dapita ang usa ka estudyante sa pagbasa sa mosunod nga istorya, nga naghisgot sa kahupayan nga gibati ni Joseph Smith sa dihang gitugutan ang uban nga makakita sa bulawang mga palid ug mobarug uban kaniya isip mga saksi ngadto sa kalibutan sa katinuod niini:

Human makakita ang Tulo ka mga Saksi sa bulawang mga palid, ang inahan ni Joseph Smith, si Lucy Mack Smith, naka-obserbar: “Tunga-tunga sa alas tres ug alas kwatro na to sa hapon sila mibalik sa balay. Si Mrs. Whitmer, Mr. Smith ug ako, nanglingkod diha sa usa ka kwarto nianang panahona. Sa pagsulod, mitupad si Joseph kanako, ug mituaw, ‘Papa, mama, wala kamo nasayud unsa ako ka malipayon: mitugot na ang Ginoo mga mapakita ang mga palid ngadto sa tulo pa gawas kanako. Nakakita sila og usa ka anghel, kinsa mipamatuod ngadto kanila, ug kinahanglan silang mopamatuod sa kamatuoran sa unsay akong nasulti, kay karon nasayud na sila alang sa ilang mga kaugalingon, nga wala ako nangadto-ngadto sa paglingla sa mga tawo, ug gibati nako nga nahupay sa usa ka alantuson nga hapit bug-at ra kaayo alang kanako nga pas-anon, ug kini nagpalipay sa akong kalag, nga dili na ako bugtong nag-inusara sa kalibutan’” (History of Joseph Smith by His Mother, Lucy Mack Smith, ed. Preston Nibley [1958], 152).

• Ngano kahang mibati si Joseph Smith og dako kaayo nga kahupayan nga aduna nay dugang mga saksi sa bulawang mga palid?

• Unsay bili sa paglakip sa mga pagpamatuod sa Tulo ug Walo ka mga Saksi diha sa sinugdanan sa Basahon ni Mormon?

• Sa unsang paagi kamo mahimong usa ka saksi ngadto sa kalibutan nga ang Basahon ni Mormon tinuod?

Basaha og kusog ang Moroni 10:3–5. Ipasabut sa mga estudyante nga mahimo usab silang mga saksi sa Basahon ni Mormon. Mahimong dili gayud sila makakita o makahikap sa mga palid, apan mahimo silang makadawat og gamhanang saksi gikan sa Espiritu Santo nga tinuod ang Basahon ni Mormon. Aron matabangan ang mga estudyante nga malig-on ang ilang mga pagpamatuod sa Basahon ni Mormon, awhaga sila sa pagbasa niini matag adlaw. Dapita ang usa ka estudyante sa pagbasa sa mosunod nga pamahayag ni Presidente Henry B. Eyring:

“Sa matag higayon nga magbasa ko og bisan gani pipila lamang ka linya sa Basahon ni Mormon, akong mabati nga ang akong pagpamatuod nalig-on nga ang basahon tinuod, nga si Jesus mao ang Kristo, nga makasunod kita Kaniya pauli. … Kini ang labing maayo nga basahon sa tanang mga basahon alang kanako. Kini ang pulong sa Dios.

“Nag-ampo ko nga kita ug tanan natong mga gihigugma magtuon og maayo niini ug matag adlaw” (“The Book of Mormon as a Personal Guide,” Ensign, Sept. 2010, 5).

Dapita ang mga estudyante nga maghimo og usa ka personal nga pasalig nga basahon ang tibuok Basahon ni Mormon karong tuiga. Mahimo nimong pahinumduman ang mga estudyante nga ang paghimo ug pagsunod sa usa ka tumong sa pagbasa sa tibuok nga Basahon ni Mormon makatabang nila sa pagtuman sa mga gikinahanglan sa Personal nga Kauswagan ug sa Katungdanan ngadto sa Dios.