Librarya
Pasiuna sa Unang Basahon ni Nephi.

Pasiuna sa Ang Unang Basahon ni Nephi

Ngano nga kinahanglang tun-an kini nga basahon?

Samtang magtuon ang mga estudyante sa 1 Nephi, ilang madiskobrehan nga ang “malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo, aron mahimo sila nga malig-on” (1 Nephi 1:20). Makat-unan usab nila nga ang Dios nagtinguha sa pagpanalangin sa Iyang mga anak. Si Lehi ug ang iyang mga katawhan nakasinati sa kalooy ug mga panalangin sa Dios samtang misunod sila sa Iyang mga sugo. Sila si Lehi ug Nephi nagtinguha og giya gikan sa Dios ug nakadawat niini pinaagi sa mga damgo, mga panan-awon, sa Liahona, ug sa giya sa Espiritu Santo. Nadawat ug narekord ni Nephi ang lapad nga talan-awon sa kasaysayan sa yuta nga nagpakita niya sa tanang kahibalo sa Dios; sa bunyag, pangalagad, ug pagkalansang ni Jesukristo; sa kalaglagan sa mga Nephite; ug sa ulahing mga adlaw. Ang Dios mitabang ni Nephi ug sa iyang mga igsoong lalaki nga makuha ang mga palid nga tumbaga aron sila adunay mga kasulatan. Giluwas usab Niya si Lehi ug iyang katawhan gikan sa kagutom diha sa kamingawan ug kalaglagan diha sa kadagatan, luwas nga midala nila ngadto sa gisaad nga yuta. Samtang ang mga estudyante magtuon sa mga kasinatian ni Nephi ug Lehi niini nga basahon, ilang makat-unan unsaon sa pagtinguha ug pagdawat sa mga panalangin sa langit.

Kinsa ang nagsulat niini nga basahon?

Ang anak nga lalaki ni Lehi nga si Nephi misulat niini nga basahon agig pagsunod sa sugo sa Ginoo nga siya magtipig og rekord sa iyang katawhan. Natawo si Nephi diha o duol sa Jerusalem. Nagpuyo siya didto panahon sa pangalagad ni propeta Jeremias ug paghari ni Haring Sedechias. Nagtinguha si Nephi sa iyang kaugalingong pagsaksi mahitungod sa mga pulong sa iyang amahan kalabut sa kalaglagan sa Jerusalem ug sa panginahanglan sa ilang pamilya nga mobiya. Sa dihang nagpadayon siya sa pagtinguha ug pagsunod sa tambag sa Ginoo, si Nephi nahimong instrumento sa mga kamot sa Dios. Masulundon siyang mibalik ngadto sa Jerusalem uban sa iyang mga igsoong lalaki kaduha—una sa pagkuha sa mga palid nga tumbaga ug sa pag-awhag sa pamilyang Ishmael sa pag-apil sa pamilyang Lehi didto sa kamingawan. Sa tabang sa Ginoo, si Nephi mibuhat og barko nga midala sa iyang pamilya ug sa uban tabok sa kadagatan ngadto sa gisaad nga yuta. Sa dihang si Lehi namatay, ang Ginoo mipili ni Nephi nga mahimong lider sa iyang katawhan.

Para kang kinsa kini nga basahon gisulat ug ngano?

Si Nephi misulat nga dunay tulo ka grupo sa mga tawo sa hunahuna: ang kaliwatan sa iyang amahan, ang mga katawhan sa pakigsaad sa Ginoo sa ulahing mga adlaw, ug ang tanang mga tawo sa tibuok kalibutan (tan-awa sa 2 Nephi 33:3, 13). Misulat siya aron sa pag-awhag sa tanan nga moduol ngadto ni Jesukristo ug maluwas (tan-awa sa 1 Nephi 6:4).

Kanus-a ug diin kini gisulat?

Si Nephi misulat sa asoy nga nahimong 1 Nephi sa mga 570 B.C.—30 ka tuig human siya ug ang iyang pamilya mibiya sa Jerusalem (tan-awa sa 2 Nephi 5:30). Gisulat niya kini sa dihang didto siya sa yuta sa Nephi.

Unsa ang pipila ka mga butang nga nakalahi niini nga basahon?

Ang 1 Nephi naglangkob sa daghang mga asoy sa langitnong mga pagpakita diha sa mga damgo, mga panan-awon, ug direkta nga mga pagpadayag. Kini nga mga pagpakita nagpakita nga ang Dios mosugo, mogiya, ug mopanalipod niadtong kinsa nagtinguha Kaniya:

  • Samtang nag-ampo si Lehi, dako nga gilis sa kalayo ang nagpakita, ug siya nakakita ug nakadungog og daghang mga butang nga nakapakurog niya (tan-awa sa 1 Nephi 1:6–7).

  • Si Lehi nakadawat og panan-awon diin iyang nakita ang Dios ug nagbasa og basahon nga nanagna sa kalaglagan sa Jerusalem ug pagkabihag sa mga lumulupyo (tan-awa sa 1 Nephi 1:8–14).

  • Ang Ginoo nagsugo ni Lehi sa pagbiya uban sa iyang pamilya ngadto sa kamingawan (tan-awa sa 1 Nephi 2:1–2).

  • Ang Ginoo nag-ingon kang Lehi sa pagpadala sa iyang mga anak ngadto sa Jerusalem aron sa pagkuha sa mga palid nga tumbaga (tan-awa sa 1 Nephi 3:2–4).

  • Usa ka anghel ang nagbadlong sa dihang si Laman ug Lemuel nagbunal ni Nephi ug Sam (tan-awa sa 1 Nephi 3:29).

  • Ang Ginoo nagsugo nga si Nephi ug ang iyang mga igsoon mobalik ngadto sa Jerusalem alang kang Ishmael ug sa iyang pamilya (tan-awa sa 1 Nephi 7:1–2).

  • Sila si Lehi ug Nephi nakadawat og mga panan-awon nga naglakip sa kahoy sa kinabuhi; sa pagkatawo, sa pangalagad, ug Pag-ula ni Jesukristo; sa kasaysayan sa yuta sa saad; sa Pagpahiuli sa ebanghelyo; ug sa panagbingkil tali sa mga kasundalohan sa dautan ug simbahan sa Kordero sa Dios (tan-awa sa 1 Nephi 8; 11–14).

  • Gipakita si Nephi unsaon sa pagbuhat og barko nga maoy modala sa iyang katawhan ngadto sa gisaad nga yuta (tan-awa sa 1 Nephi 18:1).

Ang 1 Nephi mao ang unang asoy sa mga tawo nga mipanaw ngadto sa yuta sa saad. Ang Basahon ni Mormon mihingalan og duha ka laing mga grupo nga mipanaw ngadto sa gisaad nga yuta: ang mga Mulekite (tan-awa sa Omni 1:14–17) ug ang mga Jaredite (tan-awa sa Ether 6:4–12).

Ang basahon sa 1 Nephi nagpaila usab og duha ka importante nga mga butang: ang espada ni Laban ug usa ka kompas, o tigtultol, nga gitawag og Liahona (tan-awa sa 1 Nephi 18:12; Alma 37:38). Pinaagi sa Liahona, ang Ginoo migiya sa pamilya ni Lehi sa kamingawan ug tabok sa kadagatan. Ang espada ni Laban gipasa-pasa sa tibuok henerasyon hangtud sa katapusan sa sibilisasyon sa Nephite. Ang Liahona ug ang espada ni Laban gilubong uban sa bulawan nga mga palid, ug gipakita ngadto ni Joseph Smith ug sa Tulo ka mga Saksi (tan-awa sa D&P 17:1–2).

Outline

1 Nephi 1–7 Si Lehi naggiya sa iyang pamilya ngadto sa kamingawan. Ang iyang mga anak nga lalaki naminaw sa mga sugo sa Ginoo sa pagbalik ngadto sa Jerusalem ug kuhaon ang tumbaga nga mga palid ug mobalik pag-usab aron sa pag-awhag ni Ishmael ug sa iyang pamilya sa pag-apil nila sa kamingawan.

1 Nephi 8–15 Kada usa nila ni Lehi ug Nephi nakadawat og panan-awon sa kahoy sa kinabuhi. Gisaysay pag-usab ni Nephi ang iyang panan-awon sa pangalagad sa Manluluwas ug makasaysayanong mga hitabo nga paingon sa Pagpahiuli sa ebanghelyo sa ulahing mga adlaw.

1 Nephi 16–18 Ang Ginoo naggiya ni Lehi ug sa iyang pamilya sa ilang panaw diha sa kamingawan ug tabok sa kadagatan ngadto sa gisaad nga yuta.

1 Nephi 19–22 Si Nephi nanagna bahin ni Jesukristo ug sa pagkatibulaag ug pagpundok sa Israel.