Leksyon 127
3 Nephi 18
Pasiuna
Sa pagtapos ni Jesukristo sa unang adlaw sa Iyang pagpangalagad sa mga Nephite, Siya mipahigayon sa sakrament. Siya misugo kanila sa pag-ambit sa sakrament, mag-ampo ngadto sa Amahan sa kanunay, ug makigdait sa tanang katawhan. Ang Manluluwas misaad og dakong mga panalangin niadtong misunod. Mihatag dayon Siya og instruksyon ngadto sa napulog duha ka mga disipulo nga Nephite kabahin sa ilang pagpangalagad sa Simbahan. Sa wala pa mokayab ngadto sa langit, Siya mihatag kanila og gahum sa paghatag sa gasa sa Espiritu Santo.
Mga Sugyot alang sa Pagtudlo
3 Nephi 18:1–14
Mipahigayon si Jesukristo sa sakrament ngadto sa mga Nephite
Dapita ang usa ka estudyante sa pagbasa sa mosunod nga pamahayag ni Elder Gerald N. Lund sa Seventy. (Sultihi ang estudyante nga ang paglitok sa pangalan nga Czenkusch kay “ZEN-kush.”) Awhaga ang klase sa paghunahuna kon unsa kaha ang gibati sa mountain climber nga gihisgutan ni Elder Lund.
“Kaniadto dihay usa ka makapaikag nga artikulo sa usa ka medikal nga magasin mahitungod sa pagkatkat sa bukid. …
“Ang artikulo mahitungod sa usa ka tawo nga ginganlan og Czenkusch kinsa nagdumala og climbing school. … Si Czenkusch naghulagway sa nag-interbyu niya sa belay system sa pagkatkat og bukid. Mao kini ang sistema diin ang mga tigkatkat manalipod sa ilang kaugalingon gikan sa pagkatagak. Usa ka tigkatkat anaa sa luwas nga posisyon ug mosiguro sa pisi alang sa ubang tigkatkat, sa kasagaran libut sa iyang kaugalingong lawas. ‘Anaa ka sa belay,’ nagpasabut nga, ‘Nagbantay ko nimo. Kon dunay mahitabo, mapugngan ko ikaw sa pagkahulog.’ Usa kini ka importante nga bahin sa pagkatkat sa bukid. Karon timan-i unsay misunod sa artikulo: ‘Ang belaying nakapakita ni Czenkusch sa iyang labing maayo ug labing dili maayo sa pagkatkat. Si Czenkusch sa makausa nahulog gikan sa taas nga pangpang, nakalangkat sa tulo ka mekanikal nga mga suporta ug mitangtang sa iyang pisi gikan sa nahimutangan niini. Nahunong siya, nga nagtuwad, 10 ka pye (3 ka metros) gikan sa yuta sa dihang ang pisi nga gihigot kaniya nakasanta sa pagkatagak ginamit ang kusog sa iyang mga kamot. “Giluwas ni Don ang akong kinabuhi,” miingon si Czenkusch. “Unsay imong reaksyon sa tawo nga sama niana? Hatagan siya og ginamit nga pisi sa pagkatkat alang sa regalo sa Pasko? Dili, imo siyang mahinumduman. Kanunay nimo siyang mahinumduman”’ [Eric G. Anderson, “The Vertical Wilderness,” Private Practice, Nobyembre 1979, 21; emphasis gidugang]” (“The Grace and Mercy of Jesus Christ,” sa Jesus Christ: Son of God, Savior, ed. Paul H. Peterson, Gary L. Hatch, ug Laura D. Card [2002], 48).
-
Ngano kaha nga ang tigkatkat sa bukid mibati nga ang paghatag ngadto sa iyang tig-rescue og materyal nga mga regalo dili igo nga pagpakita og pagpasalamat?
Dapita ang mga estudyante sa pagbasa og hilum sa 3 Nephi 18:1–7, nga mangita kon unsay gihangyo sa Manluluwas nga buhaton sa mga Nephite aron mahinumdom Kaniya. (Mahimo kang mosugyot nga markahan sa mga estudyante ang mga pulong nga handumanan ug mahinumdom sa 3 Nephi 18:7.) Human makareport ang mga estudyante kon unsa ang ilang nakit-an, ipangutana ang mosunod:
-
Sa unsang paagi nga ang pag-ambit sa sakrament makatabang kanato sa paghinumdom sa sakripisyo sa Manluluwas alang kanato?
-
Sumala sa 3 Nephi 18:7, unsa ang hinumduman sa mga Nephite sa ilang pag-ambit sa pan?
Hatagi og panahon ang mga estudyante nga hinumduman ang 3 Nephi 11:14–15. Dayon ipangutana ang mosunod:
-
Ngano kaha nga mahinungdanon gayud alang sa mga Nephite ang paghinumdom sa lawas sa Manluluwas ?
-
Bisan tuod kamo wala makakita sa mga samad sa lawas sa Manluluwas sama sa mga Nephite, nganong importante lang gihapon alang kaninyo ang pag-ambit sa pan sa sakrament “agi og handumanan sa lawas” sa Manluluwas? (D&P 20:77).
-
Unsa ang inyong mabuhat aron kanunayng mahinumdom sa Manluluwas?
Isulat ang mosunod nga mga pulong diha sa pisara: Samtang kita moambit sa sakrament, nagsaksi kita ngadto sa Amahan nga …
Dapita ang mga estudyante sa pagbasa og hilum sa 3 Nephi 18:8–11, nga mangita sa mga pulong nga mokompleto sa pamahayag diha sa pisara. Hangyoa ang pipila ka mga estudyante sa pagpakigbahin kon unsay ilang nakit-an. (Mahimong kompletuhon sa mga estudyante ang pamahayag sa ingon niini nga paagi: Samtang kita moambit sa sakrament, kita nagsaksi ngadto sa Amahan nga kita kanunayng mohinumdom ni Jesukristo. Tingali ang laing posible nga tubag mao ang mosunod: Samtang moambit kita sa sakrament, nagsaksi kita ngadto sa Amahan nga andam kita sa pagbuhat sa tanang gisugo sa Manluluwas.)
Gamita ang pipila o tanan sa mosunod nga mga pangutana aron matabangan ang mga estudyante nga mapalambo pa ang ilang panabut ug pag-ila sa tahas sa sakrament sa pagtabang kanato sa paghinumdom sa Manluluwas:
-
Unsa ang pipila ka mga aspeto sa kinabuhi ug pagpangalagad sa Manluluwas nga lagmit natong mahinumduman atol sa ordinansa sa sakrament? (Ang mga tubag mahimong maglakip sa Iyang kamatayon ug maulaong sakripisyo, sa Iyang mapaubsanong pagkatawo, sa Iyang mga milagro ug mga pagtulun-an, sa Iyang mahigugmaong pag-amuma sa uban, ug sa Iyang pagkamanunuton ngadto sa Langitnong Amahan.)
-
Bisan og gamay ra nga panahon ang magahin sa pag-ambit sa sakrament, ang epekto sa pagpangandam ug pag-apil niining ordinansa mahangturon. Unsa ang atong mahimo aron kanunayng mahinumdom sa Manluluwas human kita makaambit sa sakrament ug sa tibuok semana?
-
Sa unsang paagi nga ang pagkasinsero ug ang pagtagad nga atong ihatag sa pag-ambit sa sakrament makatabang kanato sa paghinumdom sa Manluluwas atol sa semana?
-
Unsay kahulugan sa sakrament kon mapakyas kita sa paghinumdom Kaniya?
-
Sumala sa 3 Nephi 18:7, 11, unsa ang gisaad sa Manluluwas niadtong moambit sa sakrament ug mohinumdom Kaniya? (Samtang kita moambit sa sakrament ug kanunayng mohinumdom sa Manluluwas, kita makabaton sa Iyang Espiritu uban kanato.)
Hangyoa ang usa ka estudyante sa pagbasa og kusog sa 3 Nephi 18:12–14, ug dayon hangyoa ang laing estudyante sa pagbasa og kusog sa Helaman 5:12. Dapita ang ubang mga estudyante sa pagsunod, nga mamalandong sa koneksyon tali sa duha ka mga tudling sa kasulatan.
-
Sa unsang paagi nga ang regular nga pag-ambit sa sakrament makatabang ninyo nga si Jesukristo ang mahimong pundasyon diin kamo nagtukod sa inyong kinabuhi?
Aron matabangan ang mga estudyante nga mas mahinumdom ni Jesukristo, dapita sila sa pagsulat sa matag adlaw sulod sa sunod nga semana diha sa mga notebook, scripture study journal, o sa ilang personal nga mga journal mahitungod sa unsay ilang buhaton aron mahinumdom sa Manluluwas. Awhaga sila sa pagkonsiderar sa pagsulat mahitungod sa ilang mga hunahuna panahon sa sakrament o kon sa unsang paagi nga ang paghinumdom sa Manluluwas nakaimpluwensya sa ilang mga hunahuna, mga pulong, ug mga binuhatan.
I-follow up ang mga estudyante sa pipila ka mosunod nga klase pinaagi sa pag-awhag kanila sa pagpadayon sa pagsulat sa matag adlaw. Atol sa semana, mahimo kang mohatag kanila og pipila ka minuto sa pagsugod sa klase aron marekord unsa ang ilang gibuhat sa paghinumdom sa Manluluwas.
3 Nephi 18:15–25
Si Jesus nagtudlo sa mga Nephite sa pag-ampo kanunay ngadto sa Amahan ug sa pagtigum kanunay
Ipares-pares ang mga estudyante. Dapita ang matag parisan nga magdungan sa pagbasa sa 3 Nephi 18:15–21, nga mangita kon unsay gitudlo sa Manluluwas nga atong buhaton aron mabatukan ang tintasyon. Kon mahuman na sila sa pagbasa, hangyoa ang mga parisan sa pagsulat og usa ka sentence nga ilang gibati nga nag-summarize niining mga pagtulun-an mahitungod sa pagbuntog sa tintasyon. Hangyoa ang pipila ka parisan sa pagpakigbahin unsay ilang gisulat. (Bisan og ang mga estudyante mogamit og lain-laing mga pulong sa pagpadayag sa ilang mga summary, kinahanglan silang motino sa mosunod nga kamatuoran: Kon kita magmabinantayon ug mag-ampo kanunay ngadto sa Amahan, atong mabatukan ang mga tintasyon ni Satanas.)
-
Unsa kaha ang gipasabut sa pulong nga magbantay diha sa 3 Nephi 18:18? (Magmahimong alerto, magmatngon, o magmabinantayon sa espirituhanong paagi.)
-
Ngano kaha nga ang pagbantay ug pag-ampo mahinungdanon sa pagbatok sa tintasyon?
Ipasabut nga ang 3 Nephi 18:15, 20–21 usa ka scripture mastery passage. Mahimo nimong isugyot nga markahan sa mga estudyante kining tudling sa lahi nga paagi aron dali ra nila kining mapangita.
-
Sa unsang paagi nga ang pag-ampo makatabang kanato nga magpabiling mabinantayon ug alisto kabahin sa mga paningkamot ni Satanas sa pagtintal kanato?
Dapita ang mga estudyante sa pagtubag sa usa sa mosunod nga mga pangutana diha sa mga notebook o mga scripture study journal. (Mahimo nimong isulat ang mga pangutana diha sa pisara o basahon kini og hinay aron ang mga estudyante makasulat niini.)
-
Sa unsang paagi nga ang pag-ampo nakatabang kaninyo sa pagbatok sa mga tintasyon ni Satanas?
-
Unsa ang mahimo ninyong buhaton aron mapalambo ang inyong personal nga mga pag-ampo?
-
Unsa ang mga panalangin nga inyong nakita sa pag-ampo uban sa inyong pamilya?
-
Unsay mahimo ninyong buhaton aron tabangan ang inyong pamilya nga makabaton og makanunayon ug makahuluganon nga pag-ampo sa pamilya?
Kon may oras pa, ikonsiderar ang paghangyo sa pipila ka mga estudyante sa pagpakigbahin sa klase kon unsa ang ilang nasulat.
Hangyoa ang mga estudyante sa paghunahuna og usa ka tawo nga gusto nilang tabangan nga mapaduol ngadto sa Manluluwas. Isulat ang mosunod nga baruganan diha sa pisara ug awhaga ang mga estudyante sa pagsulat niini: Samtang kita mangalagad sa uban, makatabang kita nila sa pagduol ngadto kang Kristo. Dapita ang usa ka estudyante sa pagbasa og hilum sa 3 Nephi 18:22–24.
-
Unsa ang gihangyo sa Manluluwas nga atong buhaton sa pagtabang sa uban nga moduol ngadto Kaniya? (Kinahanglan dili nato talikdan ang uban sa atong mga miting sa Simbahan, ug kinahanglan mag-ampo kita alang kanila.)
-
Ang Manluluwas miingon nga Siya mao ang kahayag nga atong ibanwag sa kalibutan. Unsaon man sa matag usa kanato sa pagbanwag sa kahayag sa Manluluwas?
Basaha og kusog ang mosunod nga pamahayag ni Elder Robert D. Hales sa Korum sa Napulog Duha ka mga Apostoles. Dapita ang mga estudyante sa pagpaminaw sa unsay gisulti ni Elder Hales nga mahitabo kon kita magpuyo nga matarung.
“Dili ba makapahimuot kang Jesus kon tugutan nato ang atong kahayag nga modan-ag aron kadtong nagsunod kanato sama ra usab nga nagsunod sa Manluluwas? Adunay mga nagpangita alang sa kahayag kinsa malipayong moagi sa ganghaan sa bunyag ngadto sa higpit ug pig-ot nga dalan nga padulong sa kinabuhing dayon (tan-awa sa 2 Nephi 31). Mahimo ba nga kamo kanang kahayag nga mogiya kanila ngadto sa luwas nga dapit?” (“That Ye May Be the Children of Light” [pakigpulong sa fireside sa Brigham Young University, Nob. 3, 1996], 8, speeches.byu.edu).
-
Unsa ang inyong hunahuna kon inyong ikonsiderar ang pangutana nga, “Dili ba makapahimuot kang Jesus kon tugutan nato ang atong kahayag nga modan-ag aron kadtong nagsunod kanato sama ra usab nga nagsunod sa Manluluwas?
Ipasabut nga ang pag-ampo alang sa uban, pagdapit kanila sa pagtambong sa mga miting sa Simbahan, ug pagpakita og Kristohanong ehemplo maoy mga paagi nga kita makapangalagad sa uban. Dapita ang pipila ka mga estudyante sa pagpakigbahin sa ilang kasinatian nga sila mibanwag sa kahayag sa Manluluwas aron sa pagtabang sa usa ka tawo nga moduol ngadto Kaniya.
3 Nephi 18:26–39
Ang Manluluwas nagtudlo sa Iyang mga disipulo sa pagpakigdait sa tanang tawo
I-summarize ang 3 Nephi 18:26–39 pinaagi sa pagpasabut nga human ang Manluluwas namulong ngadto sa pundok sa mga katawhan, miatubang Siya ngadto sa napulog duha ka mga disipulo nga Iyang gipili ug mitudlo kanila kon unsaon sa pagpangulo og pagdirekta ang mga kalihokan sa Simbahan. Dapita ang mga estudyante sa pagbasa og hilum sa 3 Nephi 18:32, nga mangita kon sa unsang paagi kita motabang sa mga tawo kinsa nahisalaag gikan sa pagtuo.
-
Nganong importante man nga magpadayon kita sa pagpangalagad sa mga tawo kinsa nahisalaag gikan sa pagtuo?
Ikonsiderar ang pagpakigbahin og kasinatian diin mitabang ka sa usa sa mga anak sa Dios ug mitabang sa tawo nga moduol ngadto kang Kristo.
Scripture Mastery—3 Nephi 18:15, 20–21
Pahinumdom: Tungod sa gitas-on niini nga leksyon, mahimo kang magsugod sa sunod nga leksyon sa mosunod nga kalihokan sa scripture mastery. O kini nga kalihokan mahimong gamiton sa umaabut nga leksyon kon ikaw adunay mas dakong panahon sa pagribyu sa mga scripture mastery passage.
Paggahin og pipila ka minuto sa pagtabang sa mga estudyante sa pagmemorya sa 3 Nephi 18:15, 20–21. Isulat ang tulo ka mga bersikulo diha sa pisara, ug ipapraktis sa mga estudyante ang pagsulti niini og kusog. Human mabasa sa mga estudyante ang tanang mga bersikulo sa pipila ka higayon, sugdi ang pagpapas sa lain-laing mga bahin sa mga bersikulo samtang ang mga estudyante nagpadayon sa pagmemorya sa tibuok tudling. Sublia kini nga proseso hangtud ang tanang pulong mapapas na gikan sa pisara.
Komentaryo ug Background nga Impormasyon
3 Nephi 18:15. Pag-ampo sa kanunay
Si Elder David A. Bednar sa Korum sa Napulog Duha ka mga Apostoles namulong kon unsay gipasabut sa “pag-ampo sa kanunay”:
“Ang atong pag-ampo sa gabii mapalig-on ug usa ka sumpay sa atong pag-ampo sa buntag. Ug ang atong pag-ampo sa gabii mao usab ang pagpangandam alang sa makahuluganon nga pag-ampo sa buntag.
“Buntag ug gabii nga mga pag-ampo—ug ang tanang mga gisal-ot nga mga pag-ampo—dili walay kalabutan, lahi nga mga panghitabo, hinonoa, sila gisumpay matag adlaw ug daghang mga adlaw, mga semana, mga bulan, ug gani mga katuigan. Mao kini ang kabahin kon giunsa nato sa pagtuman ang tambag sa kasulatan sa ‘pag-ampo sa kanunay’ (Lucas 21:36; 3 Nephi 18:15, 18; D&P 31:12). Ang ingon nga makahuluganon nga mga pag-ampo makatabang sa pagpanag-iya sa labing taas nga mga panalangin ang Dios nagtagana alang sa Iyang matinud-anon nga mga anak” (“Pag-ampo sa Kanunay,” Ensign o Liahona, Nob. 2008, 42).
3 Nephi 18:21. Pag-ampo uban sa inyong pamilya
Si Presidente James E. Faust sa Unang Kapangulohan namulong bahin sa gahum sa pag-ampo sa pamilya:
“Ang pag-ampo sa pamilya usa ka gamhanan ug nagpaluyong impluwensya. Atol sa malisud nga panahon sa Ikaduhang Gubat sa Kalibutan, ang usa ka 500 libras nga bomba nahagsa sa gawas sa gamayng balay ni Brother Patey, usa ka batan-ong amahan didto sa Liverpool, England, apan ang bomba wala mobuto. Ang iyang asawa namatay na man, mao nga nag-inusara siya nga nagpadako sa iyang lima ka mga anak. Siya mipundok nila niining lisud nga panahon nga nagkinahanglan kaayo alang sa pag-ampo sa pamilya. Silang ‘tanan nag-ampo … nga kinasingkasing ug sa dihang nahuman na sila sa pag-ampo, ang mga bata miingon: “Papa, kita mamaayo ra. Mamaayo ra kita dinhi sa balay karong gabhiuna.”
“‘Ug mao nga nangatulog na sila, hunahunaa, uban nianang makalilisang nga bomba nga anaa lang gyud sa gawas sa pultahan nga ang katunga nalubong sa yuta. Kon mibuto pa kadto makaguba unta kini og tingali kwarenta o singkwenta ka mga balay ug makapatay og duha o tulo ka gatus ka mga tawo. …
“‘Pagkasunod buntag ang … tibuok kasilinganan gibakwit sulod sa kwarentay-otso ka oras ug ang bomba sa katapusan nakuha na. …
“‘Sa pagpamalik na si Brother Patey nangutana sa foreman sa A.R.P. Squad: “Unya, unsa man ang inyong nasuta?”
“‘”Mr. Patey, among nasusi ang bomba gawas sa inyong pultahan ug nasuta nga andam na kining mobuto sa bisan unsang oras. Dili kini depektibo. Naglibug mi kon nganong wala kini mobuto.”‘ [Andre K. Anastasiou, sa Conference Report, Okt. 1946, 26.] Milagroso nga mga butang mahitabo kon ang mga pamilya dungan nga mag-ampo” (“The Lifeline of Prayer,” Ensign, Mayo 2002, 61).