Leksyon 44
Jacob 2:12–35
Pasiuna
Matinud-anon sa iyang responsibilidad isip usa ka lider sa priesthood, mitawag si Jacob sa iyang mga katawhan sa paghinulsol, nagpasidaan kanila sa mga sala sa garbo ug sa sekswal nga pagka-imoral. Mitudlo siya mahitungod sa mga kakuyaw ug mga sangputanan niining duha ka komon nga mga sala.
Mga Sugyot alang sa Pagtudlo
Jacob 2:12–21
Gipanton ni Jacob ang iyang mga katawhan tungod sa ilang garbo
Isulat ang mosunod diha sa pisara: kwarta, salabutan, mga higala, mga talento, kahibalo sa ebanghelyo. Dapita ang mga estudyante sa paghunahuna mahitungod sa mga panalangin nga gihatag sa Ginoo kanila niini nga mga dapit. Awhaga sila sa pagpamalandong kon unsay ilang gibati mahitungod niini nga mga panalangin samtang nagtuon sila sa Jacob 2.
Dapita ang usa ka estudyante sa pagbasa og kusog sa Jacob 2:12–13. Dapita ang uban sa klase sa pagsunod, nga mangita kon unsay gipangita sa daghang mga Nephite.
Human motubag ang mga estudyante, ipasabut nga gisultian ni Jacob ang iyang mga katawhan nga nakabaton sila og mga katigayunan pinaagi sa “kamot sa magbalantay.” Mahimo nimong ipasabut nga ang pulong magbalantay nag-refer ngadto sa Dios.
-
Nganong importante man nga atong hinumduman nga ang tanan natong mga panalangin naggikan sa atong Langitnong Amahan?
-
Sumala sa Jacob 2:13, nganong daghan sa mga Nephite ang gibayaw sa garbo?
Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).
Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan. Hangyoa ang klase nga maminaw sa mga pagtulun-an mahitungod sa unsay ipasabut sa gibayaw sa garbo:
“Ang kahulugan gayud niini, ang garbo usa ka sala sa pagkumpara, bisan tuod og kini sa kasagaran nagsugod sa ‘Tan-awa kon unsa ko kangilngig ug unsa kangilngig ang akong nahimo,’ ingon og kanunay kining matapos sa ‘Busa, mas maayo pa ko kay nimo.’ …
“… Mao kini ang sala sa “Salamat Dios ako mas imong pinalabi.” Sa kahulugan gayud niini mao ang tinguha nga madayeg o masinahan. Sala kini sa paghimaya sa kaugalingon” (“Garbo ug ang Priesthood,” Ensign o Liahona, Nob. 2010, 56).
Awhaga ang mga estudyante nga pamalandungan sa hilum kon nakasala na ba sila sa paghunahuna nga mas maayo sila kay sa laing tawo.
Dapita ang usa ka estudyante sa pagbasa og kusog sa Jacob 2:14–16. Hangyoa ang klase nga pangitaon ang mga pulong nga nagpakita sa mga sangputanan sa garbo. Hangyoa sila sa pagreport kon unsay ilang makit-an.
-
Ngano kaha nga ang garbo adunay gahum nga “molaglag sa [atong] mga kalag”? (Jacob 2:16).
Dapita ang mga estudyante nga basahon ang Jacob 2:17–21 sa hilum. Hangyoa sila nga pangitaon ang mga pulong nga nagtudlo kon unsaon nato pagbuntog ang garbo ug ang dili angay nga mga kinaiya mahitungod sa materyal nga katigayunan. Mahimo nimong isugyot nga ilang markahan ang mga pulong nga ilang makit-an. Human sila motuon niini nga mga bersikulo, dapita sila sa pagpili og usa ka hugpong sa mga pulong nga ilang nakit-an. Hatagi ang pipila ka mga estudyante og higayon sa pagpasabut kon sa unsang paagi ang mga hugpong sa mga pulong nga ilang napili nakatabang nila sa pagbuntog sa garbo o sa dili angay nga mga kinaiya ngadto sa materyal nga katigayunan. (Isip kabahin niini nga kalihokan, mahimo usab nimong isugyot nga basahon sa mga estudyante ang mosunod nga mga tudling sa kasulatan: 1 Mga Hari 3:11–13; Marcos 10:17–27, lakip ang Hubad ni Joseph Smith diha sa footnote 27a; 2 Nephi 26:31; Alma 39:14; D&P 6:7.)
-
Unsa kaha’y gipasabut sa pagtinguha sa gingharian sa Dios? Unsa kaha’y gipasabut sa pagbaton og paglaum diha kang Kristo?
-
Sa unsang paagi ang pagtinguha sa gingharian sa Dios ug pagbaton og paglaum kang Kristo maka-impluwensya sa atong mga kinaiya ngadto sa katigayunan ug materyal nga mga bahandi?
Hangyoa ang mga estudyante sa paghunahuna kon unsaon nila pag-summarize ang labing mahinungdanon nga punto sa Jacob 2:12–21 alang sa usa ka estudyante nga wala sa klase karon. Hatagi og higayon ang duha o tulo ka mga estudyante sa pagpakigbahin kon unsay ilang isulti. Mahimong mamahayag ang mga estudyante og nagkalainlaing tinuod nga mga baruganan. Siguroha nga makasabut sila nga kinahanglan natong tinguhaon ang gingharian sa Dios labaw sa tanang mga tinguha. Hatagi ang mga estudyante og panahon nga mosulat diha sa ilang mga scripture study journal o mga class notebook mahitungod sa usa ka pamaagi nga ilang magamit ang mga panalangin ug mga oportunidad nga gihatag sa Ginoo diha kanila aron sa pagtukod sa gingharian sa Dios ug sa pagpanalangin sa mga kinabuhi sa uban.
Jacob 2:22–35
Mibadlong si Jacob sa mga katawhan kinsa misupak sa balaod sa kaputli
Isulat diha sa pisara ang mosunod nga pamahayag ni Presidente Ezra Taft Benson:
“Ang mikatap nga sala niining henerasyon mao ang …”
Dapita ang mga estudyante sa paghunahuna kon sa unsa kahang paagi gitapos ni Presidente Benson kini nga han-ay sa mga pulong. Dayon basaha ang mosunod nga pamahayag:
“Ang mikatap nga sala niining henerasyon mao ang sekswal nga pagka-imoral. Kini, miingon si Propeta Joseph, mao ang mahimong tinubdan sa mas daghan nga tintasyon, mas daghan nga kasakit, ug mas daghan nga kalisud alang sa mga elder sa Israel kay sa bisan unsa” (The Teachings of Ezra Taft Benson [1988], 277).
Dapita ang mga estudyante sa pagbasa sa Jacob 2:22–23, 28 sa hilum nga paagi, mangita og mga pulong ug mga hugpong sa mga pulong nga gigamit ni Jacob sa paghulagway sa kaseryuso sa sekswal nga pagka-imoral. (Tingali kinahanglan nimong ipasabut nga ang pulong malaw-ay nga mga buhat nag-refer sa sekswal nga mga sala.) Hangyoa ang mga estudyante sa pagpakigbahin sa mga pulong ug mga hugpong sa mga pulong nga ilang madiskubrihan.
Aron matabangan ang mga estudyante nga makasabut sa balaod sa kaputli, basaha ang mosunod nga pamahayag gikan sa Alang sa Kalig-on sa mga Kabatan-onan nga booklet. Hangyoa ang mga estudyante nga maminaw sa mga binuhatan nga kinahanglan nilang likayan.
“Ang sumbanan sa Ginoo kalabut sa sekswal nga kaputli klaro ug dili mausab. Ayaw paghimo og bisan unsang sekswal nga mga relasyon sa wala pa ang kaminyoon, ug magmatinud-anon sa hingpit ngadto sa inyong kapikas human sa kaminyoon. …
“Ayaw gayud pagbuhat og bisan unsang butang nga moresulta sa sekswal nga kalapasan. Tagda kanunay ang uban nga adunay pagtahud, dili mga butang nga pagagamiton aron pagtagbaw sa mahigalon ug hinakog nga mga tinguha. Sa dili pa ang kaminyoon, ayaw pag-apil nianang lawom nga pagbati sa paghinagkanay, pagpatong ibabaw sa lain nga tawo, o paghikap sa pribado, sagrado nga mga bahin sa lawas sa lain nga tawo nga aduna o walay saput. Ayaw paghimo og bisan unsang butang nga makapukaw sa sekswal nga mga pagbati. Ayaw pukawa kana nga mga emosyon sa inyong kaugalingong lawas” (Alang sa Kalig-on sa mga Kabatan-onan [booklet, 2011], 35–36).
Ipasabut nga sumala sa Jacob 2:23–24, ang pipila ka mga tawo sa panahon ni Jacob misulay sa pagpangatarungan sa ilang sekswal nga mga sala.
-
Sa unsang paagi ang mga tawo usahay maninguha sa pagpangatarungan sa ilang sekswal nga pagka-imoral karong panahona?
-
Unsay pipila ka mga butang nga mahimong buhaton sa mga batan-on aron makalikay nga madala sa sekswal nga mga tintasyon? (Ang mga tubag mahimong maglakip sa pag-ampo alang sa kalig-on, pakig-uban sa maayo nga mga higala, pagpili og maayo nga kalingawan, ug paglikay sa mga sitwasyon ug mga dapit diin lagmit adunay tintasyon.)
Mahimo nimong ipasabut nga usa sa mga sala sa mga Nephite maingon nga ang pagbuhat sa dinaghan nga kaminyoon nga walay awtoridad. Dapita ang mga estudyante sa pagbasa og hilum sa Jacob 2:27–30. Sa dili pa sila mobasa, tingali kinahanglan nimong ipasabut nga ang pulong puyo-puyo nag-refer ngadto sa usa ka babaye kinsa legal nga naminyo sa usa ka lalaki apan adunay mas ubos nga kahimtang kay sa usa ka asawa.
-
Sumala sa Jacob 2:27, unsa ang “pulong sa Ginoo” mahitungod sa pagbaton og labaw sa usa ka asawa? (Ipaklaro gayud nga gikan sa sinugdanan, misugo ang Ginoo nga ang usa ka lalaki kinahanglan maminyo sa usa ka asawa. Tan-awa usab sa D&P 49:15–16.)
Ipasabut nga ang walay awtoridad nga dinaghan nga kaminyoon [pagpangasawa og daghan] usa ka ehemplo sa malaw-ay nga buhat, o sekswal nga sala. Sa mga mata sa Dios, seryuso kaayo ang sekswal nga mga sala.
-
Sumala sa Jacob 2:30, kanus-a man adunay awtoridad ang mga katawhan sa Ginoo nga mobuhat sa dinaghan nga kaminyoon? (Kon ang Ginoo mosugo niini.)
Ipasabut nga dunay mga panahon sa kasaysayan sa kalibutan, misugo ang Ginoo sa Iyang mga katawhan nga mobuhat sa dinaghan nga kaminyoon. Sama pananglit, ang dinaghan nga kaminyoon gibuhat ni Abraham ug Sarah sa panahon sa Daang Tugon (tan-awa sa Genesis 16:1–3; D&P 132:34–35, 37) ug sa ilang apo nga si Jacob (tan-awa sa D&P 132:37), ug gibuhat usab kini sulod sa usa ka panahon niadtong bag-o pa ang gipahiuli nga Simbahan, nga nagsugod kang Joseph Smith (tan-awa sa D&P 132:32–33, 53).
Aron mahatagan og gibug-aton nga ang sekswal nga pagka-imoral adunay makadaut nga impluwensya ngadto sa mga pamilya, basaha og kusog ang Jacob 2:31–35. Hangyoa ang mga estudyante sa pagsunod, nga mangita sa pipila ka mga sangputanan sa pagka-imoral. Ipasabut nga bisan og sa mga lalaki lamang nakigpulong si Jacob, ang balaod sa kaputli sama usab ka importante sa mga babaye.
-
Sumala ni Jacob, sa unsang paagi maapektuhan ang mga pamilya kon ang usa ka miyembro sa pamilya misupak sa balaod sa kaputli? Sa unsang paagi kini makatabang sa pagpasabut kon nganong ang paglapas sa balaod sa kaputli usa ka seryuso kaayo nga sala?
-
Ang pipila ka mga batan-on mangatarungan nga mahimo silang molapas sa balaod sa kaputli tungod kay ang ilang mga binuhatan wala makapasakit sa uban. Sa unsa kahang paagi ang pagka-imoral sa usa ka tawo makaapekto sa ubang mga tawo?
Sa pagtapos niini nga panaghisgot mahitungod sa mga sangputanan sa sekswal nga mga sala, ikonsiderar ang pagbasa sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Dapita ang mga estudyante sa pagpaminaw sa mga sangputanan sa sekswal nga pagka-imoral.
“Kadtong binuhatan sa pagkasuod gidili sa Ginoo kon gawas sa malahutayong pasalig sa kaminyoon tungod kay kini makapahuyang sa Iyang mga katuyoan. Sulod sa sagrado nga pakigsaad sa kaminyoon, ang mao nga mga relasyon nahisubay sa Iyang plano. Kon himoon sa bisan unsang paagi, supak kini sa Iyang kabubut-on. Makahimo kini og grabing emosyonal ug espirituhanong kadaot. Bisan tuod ang partisipante wala makaamgo nga nahitabo na kini karon, makahibalo ra sila unya. Ang sekswal nga pagka-imoral makamugna og usa ka babag sa impluwensya sa Balaang Espiritu sa tanan niining makapabayaw, makapadan-ag ug makahatag og gahum nga mga kapabilidad. Makaingon kini sa gamhanang pisikal ug emosyonal nga kagana. Sa katapusan magmugna kana og dili kapugngan nga gana nga mogiya sa nakasala ngadto sa mas seryuso nga sala” (“Making the Right Choices,” Ensign, Nob. 1994, 38).
Dapita ang mga estudyante nga ribyuhon ang sinugdanan sa Jacob 2:28 ug ilhon kon unsay makapahimuot sa Ginoo. (Mahimo nimong isugyot nga markahan sa mga estudyante kon unsay ilang makit-an. Siguroha nga makasabut sila nga ang Ginoo mahimuot diha sa kaputli.)
-
Base sa atong nahisgutan karon, ngano kahang mahimuot ang Ginoo diha sa kaputli?
Ikonsiderar ang pagpakita og litrato sa imong pamilya. Pagpamatuod sa mga panalangin nga miabut diha kanimo ug sa imong pamilya tungod kay misunod ka sa balaod sa kaputli sa Ginoo. Hatagi og gibug-aton nga ang gahum nga makapanganak usa ka talagsaon nga gasa gikan sa atong Amahan sa Langit kon gamiton kini sa sulod sa mga utlanan nga Iyang gihatag. Awhaga ang mga estudyante nga magmahimong putli ug limpyo aron ang Ginoo “mahimuot sa [ilang] kaputli” (Jacob 2:28).
Aron matabangan ang mga estudyante nga mopakigbahin sa ilang mga pagpamatuod mahitungod sa pagsunod sa balaod sa kaputli, mahimo nimong ipangutana ang mosunod:
-
Unsay ikasulti nimo ngadto sa usa ka tawo kinsa moingon nga ang balaod sa kaputli daan na ug dili na kinahanglan? (Samtang motubag ang mga estudyante niini nga pangutana, aghata sila sa pagpamatuod sa mga panalangin sa paghupot sa balaod sa kaputli, dili lamang sa mga kakuyaw sa dili pagsunod niini.)
Sultihi ang mga estudyante nga aduna kay pagsalig nga mahimo silang limpyo sa moral. Hatagi og gibug-aton nga kon nakasala sila batok sa balaod sa kaputli, kinahanglan nilang tinguhaon ang tabang sa ilang bishop o branch president, kinsa makatabang kanila sa paghinulsol ug mahimong limpyo pinaagi sa Pag-ula ni Jesukristo.
Komentaryo ug Background nga Impormasyon
Jacob 2:17. “Pakig-angay sa inyong kabtangan”
Sa Ang Simbahan ni Jesukristo sa mga Santos sa Ulahing mga Adlaw, mohatag kita og halad sa puasa aron sa pagtabang niadtong nanginahanglan. Ang mga lider sa simbahan nag-awhag kanato nga magmahinatagon sa atong mga halad. Si Elder Joseph B. Wirthlin sa Korum sa Napulog Duha ka mga Apostoles mihatag og tambag kon pila ang ihatag:
“Pila ang atong ibayad sa mga halad sa puasa? Akong mga kaigsoonan, ang sukod sa atong halad aron sa pagpanalangin sa kabus maoy usa ka sukod sa atong pagpasalamat sa atong Langitnong Amahan. Kita ba, kinsa napanalanginan og daghan, mobaliwala niadtong nanginahanglan sa atong tabang? Ang pagbayad og mahinatagon nga halad sa puasa maoy usa ka sukod sa atong kaandam nga mopahinungod sa atong mga kaugalingon aron sa paghupay sa mga pag-antus sa uban.
“Si Brother Marion G. Romney, ang bishop sa among ward sa dihang gitawag ko ngadto sa misyon ug kinsa sa wala madugay miserbisyo isip usa ka sakop sa Unang Kapangulohan sa Simbahan, mipahimangno: ‘Pagmahinatagon sa inyong paghatag, nga kamo sa inyong kaugalingon mahimong molambo. Ayaw paghatag alang lamang sa kaayohan sa mga kabus, apan hatag alang sa inyong kaugalingong kaayohan. Hatag og igo aron mahatag ninyo ang inyong kaugalingon ngadto sa gingharian sa Dios pinaagi sa pagpahinungod sa inyong mga kabtangan ug inyong panahon’” (“The Law of the Fast,” Ensign, Mayo 2001, 75; nagkutlo kang Marion G. Romney, “The Blessings of the Fast,” Ensign, Hulyo 1982, 4).
Jacob 2:23–30. Dinaghan nga kaminyoon [Pagpangasawa og daghan]
Sa panahon ni Jacob, ang pipila ka mga Nephite misugod sa pagsalmot sa dinaghan nga kaminyoon, nag-ingon nga misunod sila sa mga ehemplo ni David ug Solomon. Misaway si Jacob niini nga buhat alang sa labing minus duha ka mga rason:
-
Ang Ginoo, pinaagi ni propetang Lehi, misugo niini nga katawhan nga dili mosalmot sa dinaghan nga kaminyoon (tan-awa sa Jacob 2:27, 34).
-
Si David ug Solomon dili takus nga mga ehemplo. Bisan og naminyo sila ngadto sa pipila ka mga asawa agig pagsunod sa mga sugo sa Ginoo sa ilang panahon, mibuhat usab sila og seryuso nga mga sekswal nga mga sala (tan-awa sa Jacob 2:24; D&P 132:38–39).
Mahitungod sa dinaghan nga kaminyoon, miingon ang Ginoo, “Kay kon Ako buot … mopasanay og binhi ngari kanako, Ako mosugo sa akong mga katawhan; basin pa unya og sila mopatalinghug ngadto niini nga mga butang.” (Jacob 2:30). Sa ato pa, ang kinatibuk-ang sugo sa Ginoo mao ang dili pagsalmot sa dinaghan nga kaminyoon. Hinoon, mahimo Siyang mosugo sa Iyang mga katawhan sa pagsalmot sa dinaghan nga kaminyoon alang sa usa ka panahon kon kinahanglan Niyang “mopasanay og binhi” ngadto Kaniya—sa ato pa, kon gusto Niya nga ang Iyang mga katawhan, sulod sa usa ka mubo nga panahon, modala og dugang pa nga mga bata nganhi sa kalibutan kinsa matawo sa pakigsaad ug mapadako diha sa panimalay nga nakasentro sa ebanghelyo. Sa pagsunod sa direksyon gikan sa Dios pinaagi sa pagpadayag ngadto kang Propeta Joseph Smith, pipila ka mga Santos sa Ulahing mga Adlaw ang misunod niini nga buhat sulod sa pila ka tuig panahon sa katuigan sa 1800 (tan-awa sa D&P 132). Niadtong 1890, sa dihang nausab na ang mga kahimtang sa Simbahan ug sa mga balaod sa Estados Unidos, gibawi sa Ginoo ang Iyang pagtugot sa buhat pinaagi sa usa ka pagpadayag ngadto kang Presidente Wilford Woodruff, kinsa kaniadto nangalagad isip Presidente sa Simbahan (tan-awa sa D&P, Opisyal nga Pahayag 1). Sukad niadto nga panahon, ang dinaghan nga kaminyoon wala na itugot sa Ginoo o dili na awtorisado sa Ang Simbahan ni Jesukristo sa mga Santos sa Ulahing mga Adlaw. Bisan kinsa nga Santos sa Ulahing mga Adlaw nga mohimo niini nga buhat matangtangan sa iyang pagkamiyembro sa Simbahan. Si Presidente Gordon B. Hinckley mitudlo:
“Gusto nakong ipamahayag nga kini nga Simbahan walay labut sa bisan unsa niadtong nagbuhat sa dinaghan nga kaminyoon. Dili sila mga miyembro niini nga Simbahan. Kadaghan kanila wala gayud sukad nahimong mga miyembro. Nagsupak sila sa sibil nga balaod. Nasayud sila nga nagsupak sila sa balaod. Naa sila ubos sa mga silot niini. …
“Kon si bisan kinsa sa among mga miyembro makita nga nagpraktis og dinaghan nga kaminyoon, sila i-excommunicate, ang labing seryuso nga silot nga ikapahamtang sa Simbahan. Dili lang kadtong apil niini direktang nakasupak sa sibil nga balaod, sila nakasupak sa balaod niini nga Simbahan. Ang usa ka artikulo sa among hugot nga pagtuo nagbugkos kanamo. Kini nag-ingon, ‘Kami nagtuo sa kamandoan ubos sa mga hari, presidente, mga magmamando, ug sa mga maghuhukom, sa pagsunod; pagtahud; ug sa paghupot sa balaod.’ (A sa HP 1:12). …
“Labaw sa usa ka siglo ang milabay klaro nga gipadayag sa Dios ngadto sa Iyang propeta nga si Wilford Woodruff nga kinahanglang hunongon na ang pagbuhat sa dinaghan nga kaminyoon, nagpasabut nga kini supak na sa balaod sa Dios. Gani diha sa mga nasud diin ang sibil o relihiyuso nga balaod nagtugot sa dinaghan nga kaminyoon, ang Simbahan nagtudlo nga kinahanglan ang kaminyoon usa ray bana ug usa ray asawa ug kini dili modawat sa pagkamiyembro niini niadtong nagbuhat sa dinaghan nga kaminyoon” (“What Are People Asking about Us?” Ensign, Nob. 1998, 71–72).