2 Nephi 1

Pasiuna

Ang mga kamatuoran diha sa 2 Nephi 1 gipamulong sa usa ka mahigugmaong ginikanan ug lider nga hapit na mamatay. Nangamuyo si Lehi sa iyang mga anak nga lalaki, sa mga anak nga lalaki ni Ishmael, ug ni Zoram sa pagsunod sa mga sugo sa Dios. Misaad siya kanila nga kon motuman sila sa mga sugo sa Dios, mouswag sila sa yuta. Iya usab silang giawhag nga mosunod sa propetikanhong pagpangulo ni Nephi.

Mga Sugyot alang sa Pagtudlo

2 Nephi 1:1–23

Giawhag ni Lehi ang iyang katawhan nga magpakabuhi sa matarung nga paagi

Hangyoa ang mga estudyante sa paghunahuna nga sa kalit lang kinahanglan silang mobiya sa mga sakop sa ilang pamilya ug mahimong dili na nila sila makita pag-usab.

Kon magbilin kamo og katapusang mga pulong nga itambag ngadto sa inyong pamilya, unsa man ang inyong isulti? Ngano man?

Human makadungog gikan sa pipila ka mga estudyante, ipasabut nga ang mga kapitulo 1–4 sa 2 Nephi naglangkob sa rekord ni Nephi bahin sa katapusang tambag sa iyang amahan. Kini nga leksyon nag-focus sa 2 Nephi 1, nga naglangkob sa tambag nga gipakigbahin ni Lehi ngadto sa iyang mga anak nga lalaki, sa mga anak nga lalaki ni Ishmael, ug ni Zoram.

Ngano kaha nga ang katapusang tambag sa usa ka ginikanan o propeta labihan man ka mahinungdanon?

Dapita ang usa ka estudyante sa pagbasa og kusog sa 2 Nephi 1:1–5. Hangyoa ang klase nga matino ang “mahinungdanon [nga] mga butang nga gihimo sa Ginoo” alang sa pamilya ni Lehi.

Sa unsang paagi nga kining mahinungdanong mga butang nagpakita sa kalooy sa Ginoo?
Unsa ang ehemplo sa mahinungdanong mga butang nga gihimo sa Ginoo alang kaninyo o sa inyong pamilya?
Unsa ang inyong gibati samtang naghunahuna kamo bahin sa kalooy sa Dios nganha kaninyo o sa inyong pamilya?

Sa usa ka bahin sa pisara, isulat ang Mga Aksyon. Sa pikas nga bahin sa pisara, isulat ang Mga Sangputanan. Bahina ang klase ngadto sa duha ka grupo. Dapita ang unang grupo sa pagbasa sa 2 Nephi 1:6–9 ug ang ikaduhang grupo sa pagbasa sa 2 Nephi 1:10–12. Hangyoa ang duha ka grupo sa pagpangita sa mga aksyon nga gisulti ni Lehi nga mahimong buhaton sa iyang mga kaliwatan. Hangyoa usab sila sa pagpangita sa mga sangputanan niadtong mga aksyon. Pananglitan, miingon si Lehi nga kon ang mga tawo moserbisyo sa Ginoo sumala sa Iyang mga sugo, ang yuta mahimong usa ka yuta sa kalingkawasan ngadto kanila (tan-awa sa 2 Nephi 1:7). Samtang magpakigbahin ang mga estudyante sa ilang mga tubag, ipasulat kini sa usa ka estudyante diha sa pisara.

Sa pagsusi ninyo sa mga tubag diha sa pisara, unsaon ninyo sa pag-summarize ang mensahe ni Lehi ngadto sa iyang pamilya? (Ang mga estudyante mahimong motubag gamit ang lain-laing mga pulong, apan siguroha nga ang mosunod nga mensahe klaro: Panalanginan kita sa Ginoo kon mosunod kita sa Iyang mga sugo, ug pugngan Niya ang mga panalangin kon dili kita mosunod sa Iyang mga sugo.)
Diha sa 2 Nephi 1:9, ang mga pulong nga “niini nga yuta” nagpasabut sa Amerika. Unsa ang gisaad sa Ginoo ngadto sa mga masulundon nga mopuyo “niinii nga yuta”?

Aron matabangan ang mga estudyante nga makasabut sa kahulugan sa mga sambingay [metaphor] nga gigamit ni Lehi sa pag-awhag sa iyang mga anak nga lalaki nga motuman sa mga sugo sa Ginoo, pag-display og alarm clock, kadena, ug butang nga dunay abug niini (siguroha ang paghatag og gibug-aton sa abug, dili sa butang).

Dapita ang mga estudyante sa pagbasa sa hilum sa 2 Nephi 1:13–14, nga mangita sa mga pulong nga may kalabutan niining tulo ka mga butang. Human nila mabasa, iisa ang matag butang ug hangyoa ang mga estudyante nga ipakigbahin ang mga pulong nga ilang nakit-an. (Ang mga tubag mahimong maglakip sa “mahigmata,” “espirituhanon nga kamatayon,” “iwakli ang mga makalilisang nga higot,” “higot nga migapos,” ug “bangon gikan sa abug.”) Pangutan-a ang mga estudyante kon unsay buot ipasabut sa maanaa sa usa ka “lawom nga pagkatulog,” nga magapos sa “mga makalilisang nga higot,” o kinahanglang “[mo]bangon gikan sa abug.”

Sa dihang gigamit ni Lehi kining mga pulong, unsa may iyang giawhag nga buhaton sa iyang mga anak nga lalaki? (Maghinulsol, mousab sa ilang mga kinaiya.)
Unsa may gipasidaan ni Lehi nga mahitabo kon ang iyang mga anak nga lalaki dili “iwakli ang [ilang] mga makalilisang nga higot”? (Tan-awa sa 2 Nephi 1:13.)

Dapita ang mga estudyante sa pagtuon sa hilum sa 2 Nephi 1:14–18. Ipasabut nga gihatag ni Lehi kini nga tambag uban sa kamabination ug gugma ug uban sa hilabihan nga kabalaka (“kahasol”) alang sa kaayohan sa iyang mga anak. Hangyoa ang mga estudyante nga mangita sa mga rason nganong gusto ni Lehi nga ang iyang pamilya motuman sa mga sugo sa Ginoo.

Nganong nabalaka man si Lehi alang sa iyang kaliwatan? (Nabalaka siya bahin sa mga sangputanan nga ilang antuson tungod sa ilang mga aksyon, ug gusto siya nga ilang masinati ang gugma sa Dios, sama sa iyang nasinati.)

Ipabasa og usab sa mga estudyante sa tagsa-tagsa ang 2 Nephi 1:15.

Unsa nga panalangin ang nadawat ni Lehi tungod sa iyang pagkamatinud-anon?
Kanus-a man kamo mibati nga giliyokan sa mga bukton sa gugma sa Dios?

Ipares-pares ang mga estudyante. Hangyoa ang usa ka estudyante sa matag pares sa pagpangita sa 2 Nephi 1:19–22 alang sa mga saad nga unta nakapadasig sa mga anak nga lalaki ni Lehi nga maghinulsol. Hangyoa ang laing estudyante sa matag pares sa pagpangita sa samang bersikulo alang sa mga sangputanan nga gisulti ni Lehi nga moabut kon ang iyang mga anak nga lalaki mopili nga mosalikway sa iyang tambag. (Mahimo nimong isulat sa pisara kini nga assignment.) Hatagi ang mga estudyante og tulo o upat ka minuto sa pagkompleto sa assignment ug sa pagpakigbahin sa ilang mga nakita ngadto sa usag usa. Mahimo kang molibut sa classroom samtang maghatag sila sa ilang mga report aron makatabang ka nga magiyahan ang ilang mga panaghisgutan.

Basaha og kusog ang hagit ni Lehi diha sa 2 Nephi 1:23 ngadto sa mga estudyante. Mahimo nimong awhagon ang mga estudyante nga markahan kini nga bersikulo. Mahimo usab nimo silang awhagon sa pagsulat diha sa ilang mga scripture study journal o mga class notebook bahin sa usa ka butang nga kinahanglan nilang buhaton aron “mahigmata” o “iwakli ang mga higot” o “[mo]bangon gikan sa abug” aron makadawat sila sa mga panalangin nga gihisgutan ni Lehi.

Unsay buot ipasabut niini nganha kaninyo nga “isul-ob ang taming sa pagkamatarung”? (Tan-awa usab sa D&P 27:15–18.)

2 Nephi 1:24–32

Giawhag ni Lehi ang iyang mga anak nga lalaki nga mosunod sa propetikanhong pagpangulo ni Nephi

Ipasabut nga nagtudlo si Lehi bahin sa usa ka tinubdan sa kalig-on ug inspirasyon nga gihatag sa Ginoo alang sa iyang pamilya. Dapita ang mga estudyante sa pagpangita niana nga tinubdan diha sa 2 Nephi 1:24. (Ang tinubdan mao si Nephi, kinsa maoy moserbisyo isip ilang propeta human sa pagkamatay ni Lehi.)

Hangyoa ang usa ka estudyante sa pagbasa og kusog sa 2 Nephi 1:25–28. Hangyoa ang klase sa pagpangita sa mga rason nga gihatag ni Lehi aron ang katawhan mosunod ni Nephi.

Unsa nga mga kinaiya ang gihatagan og gibug-aton ni Lehi sa dihang namulong siya bahin sa pagpangulo ni Nephi? Nganong mosalig man kamo sa usa ka lider nga aduna niining mga kinaiya?
Kanus-a man kamo nakakita sa mga lider sa Simbahan nga mipakita niining mga kinaiya?

Dapita ang mga estudyante sa pagbasa sa hilum sa 2 Nephi 1:30–32. Hangyoa sila sa pagpangita sa mga saad nga gihatag ni Lehi kang Zoram.

Unsa nga mga saad ang inyong nakit-an?
Sa unsang paagi nga kining mga saad magamit nato ug sa atong mga pamilya samtang mosunod kita sa propeta?

Human niini nga panaghisgutan, siguroha nga masabtan sa mga estudyante nga samtang mosunod kita niadtong gitawag sa Dios nga mangulo kanato, mapanalanginan kita og espirituhanong pag-uswag ug kasiguroan. Sa pagsuporta niini nga baruganan, ipakigbahin ang imong pagpamatuod bahin sa mga panalangin nga moabut kon mosunod kita sa mga lider sa Simbahan.

Komentaryo ug Background nga Impormasyon

2 Nephi 1:22. “Walay katapusan nga kalaglagan”

Diha sa 2 Nephi 1:22, naghisgot si Lehi bahin sa “walay katapusan nga kalaglagan sa kalag ug lawas.” Ang mosunod nga pamahayag ni Presidente Joseph Fielding Smith mahimong makatabang nimo sa pagpasabut sa mga pulong ni Lehi:

“Ang kalaglagan wala magpasabut og paghunong sa pagpakabuhi. Nasayud kita, tungod kay gitudloan kita diha sa mga pinadayag sa Ginoo, nga ang kalag dili mamatay.

“Matag tawo nga nahimugso niining kalibutana makadawat sa pagkabanhaw ug pagka-imortal ug molungtad sa kahangturan. Nan, ang kalaglagan wala magpasabut og paghunong sa pagpakabuhi. Sa dihang miingon ang Ginoo nga sila pagalaglagon, gipasabut niya nga sila mahanaw gikan sa iyang presensya, nga sila ipahimulag gikan sa presensya sa kahayag ug kamatuoran, ug dili makabaton sa pribilehiyo nga makaangkon niining kahimayaan; ug mao kana ang kalaglagan” (Doctrines of Salvation, comp. Bruce R. McConkie, 3 vols. [1954–56], 2:227–28).

2 Nephi 1:28. “Kon kamo mopatalinghug ngadto sa tingog ni Nephi kamo dili malaglag”

Misaad si Lehi nga kadtong “mopatalinghug ngadto sa tingog ni Nephi” mapanalanginan (tan-awa sa 2 Nephi 1:28). Aron mabasa ang mga saad nga gihimo sa Ginoo ngadto sa mosunod sa buhing mga propeta sa atong panahon, tan-awa sa Doktrina ug mga Pakigsaad 21:5–6.

Miingon si Presidente Wilford Woodruff: “Nanghinaut ako nga atong subayon ang agianan nga gipahimutang kanato sa mga sulugoon sa Ginoo, kay kon kini atong sundon nasayud ako nga luwas kita niining kalibutana, ug makaangkon og kalipay ug kahimayaan sa umaabot nga kalibutan. … Kon kita matinud-anon modala sila kanato sa dalan sa kinabuhi, ug ingon ngaaduna kitay hugot nga pagtuo sa pagsunod sa ilang mga panudlo, sa mga pagtulun-an sa Balaang Espiritu pinaagi kanila, kita anaa kanunay sa luwas nga dalan, ug makasiguro sa atong ganti” (Mga Pagtulun-an sa mga Presidente sa Simbahan: Wilford Woodruff [2004], 221).