Leksyon 107

Helaman 3–4

Pasiuna

Niini nga panahon sa kasaysayan sa Basahon ni Mormon, gitagamtam sa mga Nephite ang panahon sa kalinaw apan nakasinati usab og mga panahon sa panagbingkil. Napulo ka liboan nga mga Nephite ang mipasakop sa Simbahan atol sa panahon sa kalinaw. Human niini nga panahon sa hilabihan nga paglambo, ang garbo nagsugod sa pagsulod sa kasingkasing sa mga tawo. Hinoon, ang mas mapaubsanong mga miyembro sa Simbahan miuswag sa ilang hugot nga pagtuo, bisan og gilutos niadtong mga mapahitas-on. Tungod sa kadautan sa daghang mga Nephite, nawala kanila ang ilang mga yuta sa habagatan nga bahin ngadto sa mga Lamanite.

Mga Sugyot alang sa Pagtudlo

Helaman 3

Daghan sa mga Nephite milangyaw ngadto sa amihanang bahin, samtang ang Simbahan milambo bisan sa kadautan ug pagpanglutos

Isulat sa pisara ang mosunod nga mga pulong (mahimo nimo kining buhaton sa dili pa magklase):

Ang mga tawo sa … (ngalan sa imong nasud)

Ang mga tawo sa … (ngalan sa imong siyudad)

Ang mga tawo sa akong ward o branch

Ang mga tawo sa akong pamilya

Ang akong kaugalingon

Pangutan-a ang mga estudyante kon si kinsa, sa tanang tawo nga gilista diha sa pisara, ang gibati nila nga ilang makontrolar. Dayon hangyoa sila sa pag-isa sa ilang mga kamot kon nakasulay na ba sila nga nawad-an og paglaum tungod sa binuhatan sa uban. Ipadayon lang sa pag-isa ang ilang mga kamot kon sila, sa bag-o lang, nawad-an og paglaum tungod sa dautang mga buhat sa uban. Pasabta nga samtang magtuon sila sa Helaman 3, makakita sila og mga panabut kon unsay mahimo ra nilang buhaton kon ang mga tawo sa ilang palibut wala magpakabuhi nga pinasubay sa ebanghelyo.

Dapita ang usa ka estudyante sa pagbasa og kusog sa Helaman 3:1–2. Hangyoa ang klase sa pagsunod, nga mangita sa nagbalik-balik nga mga pulong nga “walay panagbingkil.” Dapita ang mga estudyante sa pagbasa sa hilum nga paagi sa Helaman 3:3, 19, sa pag-ila sa mga pulong nga nagpasabut sa unsang paagi nausab ang mga butang taliwala sa mga Nephite.

• Ngano kaha nga ang mga Nephite nausab man dayon gikan sa panahon nga walay panagbingkil ngadto sa hilabihan nga panagbingkil?

I-summarize ang Helaman 3:3–16 pinaagi sa pagpasabut nga atol niini nga panahon sa panagbingkil, daghang Nephite ang milangyaw ngadto sa amihanan.

Dapita ang usa ka estudyante sa pagbasa og kusog sa Helaman 3:20. Hangyoa ang klase sa pag-ila kon sa unsang paagi gihulagway si Helaman atol niini nga kapanahunan sa panagbingkil.

• Unsa ang natudlo diha nimo mahitungod sa ehemplo ni Helaman atol niining panahon sa panagbingkil? (Samtang motubag ang mga estudyante, mahimo nimong isugyot nga markahan nila ang pulong nga kanunay sa Helaman 3:20.)

Dapita ang mga estudyante sa pagbasa sa hilum nga paagi sa Helaman 3:22–26, ug sa pag-ila kon sa unsang paagi nausab ang kahimtang sa mga Nephite.

• Unsa ang hinungdan nga nangahibulong ang mga lider sa Simbahan?

• Unsa man ang atong makat-unan gikan niini nga mga bersikulo mahitungod sa malagmit nga impluwensya sa Simbahan ngadto sa mga tawo?

Pahinumdumi ang mga estudyante nga dihang giandam ni Mormon ang rekord sa Basahon ni Mormon, usahay ipaklaro niya ang mga leksyon nga maoy gusto niyang makat-unan sa mga tigbasa gikan sa piho nga mga istorya. Kabahin sa Helaman 3, gigamit niya ang mga pulong nga “sa ingon kita makakita,” ug “kita makakita” aron sa pagpaila sa iyang mga leksyon. Dapita ang mga estudyante sa pagbasa sa hilum nga paagi sa Helaman 3:27–30 ug sa pag-ila kon unsa nga mga leksyon ang gusto ni Mormon nga atong makat-unan. Human makareport ang mga estudyante kon unsay ilang nakit-an, pangutan-a:

• Unsa ang gusto ni Mormon nga atong mahibaloan mahitungod sa pulong sa Dios?

Pag-ila sa “ug sa ingon kita makakita” nga mga pamahayag

Sa iyang pag-andam sa basahon ni Mormon, si propeta Mormon mogamit usahay og mga pulong sama sa “ug sa ingon kita makakita” aron paghatag og gibug-aton sa mga kamatuoran nga gusto niyang itudlo. Pinaagi sa pagklaro niini nga mga pulong sa Helaman 3, mahimo nimong andamon ang mga estudyante sa pagdiskubre sa mga leksyon nga maoy tuyo ni Mormon diha sa ubang bahin sa Basahon ni Mormon.

Hatagi ang mga estudyante og panahon sa paghunahuna kon sa unsang paagi ang ilang pagtuon sa mga kasulatan naghimo kanila nga makabaton sa mga panalangin sama sa mga gisaad sa Helaman 3:29. Hunahunaa ang pagtawag sa pipila ka estudyante sa pagpaambit sa ilang mga kasinatian.

Ipasabut nga ang uban pa diha sa Helaman 3 naghisgot kon sa unsang paagi, human sa hilabihan nga paglambo, ang garbo mikatap tali sa mga Nephite. Daghang miyembro sa Simbahan nga mapaubsanon ang nakasinati og pagpanglutos gikan sa ubang miyembro sa Simbahan kinsa mga mapahitas-on sa ilang kasingkasing. Basaha og kusog ang mosunod nga mga sitwasyon. Hangyoa ang mga estudyante sa paghunahuna kon kanus-a sila nakakita o nakasinati og susama nga mga sitwasyon.

1. Usa ka batan-ong babaye ang naghimong kataw-anan sa laing batang babaye sa iyang ward.

2. Giyaga-yagaan sa usa ka batan-ong lalaki ang usa ka sakop sa iyang korum tungod sa iyang kaagresibo nga motubag og mga pangutana sa klase o moboluntaryo alang sa mga katungdanan sa priesthood.

3. Usa ka grupo sa mga batan-ong lalaki sa ward wala mopaapil sa usa ka batan-on gikan sa ilang panagsultihay ug mga kalihokan sa gawas sa simbahan.

4. Usa ka grupo sa batan-ong mga babaye misulti og masakit nga mga pulong mahitungod sa sinina nga gisul-ob sa ubang mga batan-on.

Dapita ang usa ka estudyante sa pagbasa og kusog sa Helaman 3:33–34. Hangyoa ang klase sa pag-ila sa mga pagkaparehas tali sa sitwasyon sa mga Nephite ug sa mga sitwasyon nga gihulagway sa ibabaw. Human makatubag ang mga estudyante, ipangutana ang mga mosunod:

• Ngano kaha nga ang pagpanglutos sa mga miyembro sa Simbahan gikan sa ubang miyembro sa Simbahan gikonsiderar man nga “hilabihan ka dautan” tali sa mga Nephite?

• Unsa nga mga baruganan sa ebanghelyo ang atong gisupak kon dili nato tarungon sa pagtagad o dili kita mabination sa ubang miyembro sa Simbahan? Unsaon man nato sa paglig-on ang atong gugma alang sa atong isigka-Santos?

Dapita ang mga estudyante sa pagbasa sa hilum nga paagi sa Helaman 3:35, ug sa pag-ila kon sa unsang paagi ang mga mapainubsanon tali sa mga Nephite misanong sa pagpanglutos.

• Ang hugot nga pagtuo ba sa gilutos nga tawo milambo, mikunhod, o nagpabiling mao lang gihapon?

• Unsay gihimo sa gilutos nga mga tawo nga nakatampo sa paglambo sa ilang pagtuo? (Nagpuasa sila ug nag-ampo sa kanunay, naningkamot nga magpaubos, ug gitugyan ang ilang kasingkasing ngadto sa Dios.)

• Gawas sa paglambo sa ilang pagtuo, unsa pay resulta sa gibuhat sa mga Nephite nga pagpaubos? (Kalipay, kahupayan, pagkalunsay, ug pagkabalaan sa ilang kasingkasing.)

Isulat sa pisara ang mosunod: Kon kita … , ang atong pagtuo kang Jesukristo molambo, bisan pa sa pagpanglutos ug pagsulay. Hangyoa ang mga estudyante sa pagkompleto niini nga pamahayag base sa unsay ilang nakat-unan gikan sa Helaman 3:33–35. Mahimo nimong dapiton ang pipila ka estudyante sa pagpaambit kon giunsa nila sa pagkompleto ang pamahayag. Bisan og ang tubag sa mga estudyante lain-lain, siguroa nga masulti nila ang mosunod nga kamatuoran: Kon maningkamot kita sa pagpakabuhing matarung, ang atong pagtuo kang Jesukristo molambo, bisan pa sa pagpanglutos ug pagsulay. Aron matabangan ang mga estudyante nga mapalawman pa ang ilang panabut bahin sa mga pagtulun-an niini nga mga bersikulo, mahimo nimong ipangutana ang mosunod nga mga pangutana:

• Sa unsang paagi ang pag-ampo ug pagpuasa nakatabang ninyo panahon sa pagpanglutos o pagsulay?

• Unsa kaha ang buot ipasabut sa pagtugyan sa inyong kasingkasing ngadto sa Dios?

• Ngano kaha nga ang pagtugyan sa inyong kasingkasing ngadto sa Dios gikinahanglan aron molambo ang inyong pagtuo sa panahon sa pagpanglutos o pagsulay?

Pangutan-a ang mga estudyante kon nakasulay na ba silang mobati nga milambo ang ilang pagtuo dihang gisanong nila sa matarung nga paagi ang pagpanglutos. Dapita ang pipila ka mga estudyante sa pagpakigbahin sa ilang mga kasinatian. Mahimo usab ka nga magpaambit og personal nga kasinatian.

Aron maandam ang mga estudyante sa pagtuon sa Helaman 4, dapita sila sa pagbasa sa hilum nga paagi sa Helaman 3:36. Hangyoa sila sa pag-ila sa kinatibuk-ang kahimtang sa mga Nephite. (Ang garbo sa mga Nephite migrabe, bisan pa sa ehemplo sa mapaubsanong mga sumusunod ni Kristo.)

Helaman 4

Tungod sa kadautan, ang Espiritu sa Ginoo mipalayo gikan sa mga Nephite, ug ang mga Lamanite miilog sa tanang habagatang bahin nga yuta sa mga Nephite

Ipasabut nga ang Helaman 4:4–8 naghisgot bahin sa usa ka gubat nga gipakig-awayan sa mga Nephite batok sa mga masupilon nga mga Lamanite ug Nephite. Dapita ang usa ka estudyante sa pagbasa og kusog niining mga bersikulo. Hangyoa ang klase sa pagsunod, sa pag-ila kon asa nga yuta sa mga Nephite ang nailog atol niini nga away.

Isulat sa pisara ang mosunod nga mga instruksyon. (Mahimo nimo kining buhaton sa dili pa magsugod ang klase.) (Dapita ang mga estudyante sa pagkopya niini diha sa mga notebook o sa mga scripture study journal.

Pagsulat og tulo ka hugpong sa pulong nga nagpakita sa mga kinaiya ug binuhatan sa mga Nephite.

Pagsulat og tulo ka hugpong sa mga pulong nga nagpakita kon unsay nahitabo tungod niini nga mga binuhatan.

Ipares-pares ang mga estudyante. Hangyoa ang magkapares sa pagbasa og dungan sa Helaman 4:11–13, 23–26, nga mangita ug mosulat sa importanting mga pulong sumala sa mga instruksyon nga naa sa pisara.

Dapita ang pipila ka managpares sa pagreport sa ilang mga tubag. Samtang mopaambit ang mga estudyante sa unsay ilang gisulat, mahimo kang mosugyot nga markahan nila ang mosunod nga mga pulong diha sa mga kasulatan: “sila misalig sa ilang kaugalingon nga kusog” (Helaman 4:13), “sila nahimo nga mahuyang” (Helaman 4:24), ug “sa ingon sila nahimo nga mahuyang” (Helaman 4:26).

Hangyoa ang mga estudyante kon unsa nga baruganan ang ilang mahibaloan gikan sa ilang pagtuon sa Helaman 4. Tabangi sila sa pag-ila sa mosunod nga baruganan nga: Ang garbo ug kadautan mobulag kanato gikan sa Espiritu sa Ginoo ug mapasagdan lang kita sa atong kaugalingong kusog. Mahimo nimong isulat sa pisara kini nga baruganan. Mahimo usab nimong isugyot nga isulat sa mga estudyante kini diha sa ilang mga kasulatan tupad sa Helaman 4:23–24.

Aron matabangan ang mga estudyante sa pagsabut niini nga baruganan, dapita ang usa kanila sa pagduol sa atubangan sa klase. Hangyoa ang estudyante sa paghunahuna nga siya nalista nga makig-away nga mag-inusara sa usa ka pakig-away batok sa mga Lamanite. Pangutan-a ang estudyante kon unsay iyang tsansa batok sa pundok sa mga sundalo nga may igong gidaghanon. Paghangyo og laing estudyante nga moduol sa atubangan sa klase ug mobarug tupad sa unang estudyante. Pangutan-a ang unang estudyante kon ang tabang sa ikaduhang estudyante makadugang ba sa iyang tsansa nga modaug batok sa pwersa sa kaaway. (Batok sa pundok sa mga sundalo nga may igong gidaghanon, ang pagdugang og ikaduhang estudyante dili igo nga makadugang sa tsansa nga modaog.) Dayon isulat ang Ang Ginoo diha sa pisara. Pangutan-a ang unang estudyante:

• Unsa kahay inyong tsansa nga modaog sa away kon ang Ginoo anaa sa inyong kilid?

Pangutan-a ang mga estudyante kon unsay kalambigitan niini nga kalihokan ngadto sa baruganan nga makita sa Helaman 4. Ikonsiderar ang pagpangutana sa mosunod:

• Diha sa mga kasinatian sa mga Nephite, ang mapasagdan sa kaugalingon nilang kusog nagpasabut og kapildihan sa mga away ug pagkawala sa ilang mga yuta. Unsa kaha nga mga “away” kita tingali mapildi kon wala ang Espiritu Santo uban kanato?

Hangyoa ang mga estudyante sa paghunahuna og usa ka butang nga ilang mahimo aron magpadayon ang pakig-uban sa Espiritu Santo sa ilang kinabuhi, ug dapita sila sa paghimo niini. Ipaambit ang imong pagpamatuod bahin sa kaimportante sa Espiritu diha sa imong kinabuhi.

Komentaryo ug Background nga Impormasyon

Helaman 3:33–34, 36; 4:12. Ang epekto sa garbo diha sa Simbahan

Gipasabut gayud ni Mormon nga ang garbo dili usa ka bahin sa Simbahan sa Ginoo apan tungod sa labihan nga katigayunan, nagsugod kini sa pagsulod sa kasingkasing sa ubang mga miyembro sa Simbahan ( tan-awa sa Helaman 3:33, 36).

Si Presidente Ezra Taft Benson mitudlo:

“Hunahunaa kon unsay nahimo nga kadaut sa garbo ngari kanato sa nangagi ug unsay nahimo niini nga kadaut karon sa atong kinabuhi, sa atong mga pamilya, ug sa Simbahan.

“Hunahunaa ang paghinulsol nga mahitabo unta sa nausab nga kinabuhi, napreserbar unta nga kaminyoon, ug nalig-on unta nga mga panimalay, kon ang garbo wala pa unta mopugong kanato sa pagkumpisal sa atong mga sala ug sa pagbiya niini. (Tan-awa sa D&P 58:43.)

“Hunahunaa ang daghan nga dili kaayo aktibong mga miyembro sa Simbahan tungod kay sila nasilo ug ang ilang garbo nagpugong kanila sa pagpasaylo o hingpit nga pag-ambit diha sa lamesa sa Ginoo.

“Hunahunaa ang napulo ka liboang mga batan-ong lalaki ug magtiayon nga nagmisyon na unta kon dili pa tungod sa ilang garbo nga nagpugong kanila sa pagtugyan sa ilang kasingkasing ngadto sa Dios. (Tan-awa sa Alma 10:6; Hel. 3:34–35.)

“Hunahunaa kon sa unsang paagi molambo ang buhat sa templo kon ang panahon nga gigahin niining sagradong pagserbisyo mas importante kaysa daghang mapagarbuhong mga tinguha nga nakigkompetensya sa atong panahon” (“Beware of Pride,” Ensign, Mayo 1989, 6).