1 Nephi 1–6; 9 (Unit 2)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 1 Nephi 1–6; 9 (Unit 2) wala gitumong nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa mga estudyante.

Day 1 (1 Nephi 1)

Samtang ang mga estudyante nagtuon mahitungod sa panagna ni Lehi ngadto sa mga tawo ug nagpasidaan nila sa paghinulsol, nakat-unan nila nga ang mga propeta nagpasidaan batok sa pagpakasala ug nagtudlo og kaluwasan pinaagi ni Jesukristo. Dugang pa, nakat-unan nila nga ang malumo nga kalooy sa Ginoo ihatag ngadto niadtong nagpakita og hugot nga pagtuo Kaniya.

Day 2 (1 Nephi 2)

Misunod si Lehi sa sugo sa Ginoo sa pagbiya sa Jerusalem. Iyang gipasabut ang baruganan nga kon kita magmatinud-anon ug magmasulundon, ang Ginoo motabang nato sa mga panahon sa pagsulay. Nagpakita si Nephi og masulundon nga espiritu ug nakat-on sa iyang kaugalingon nga kon kita motawag sa Dios, Siya makapahumok sa atong mga kasingkasing sa pagtuo sa Iyang mga pulong. Ang mga estudyante nakat-on nga ang Dios mopanalangin niadtong kinsa masulundon ug matinud-anon.

Day 3 (1 Nephi 3–4)

Sa dihang si Lehi misulti ni Nephi ug sa iyang mga igsoong lalaki sa sugo sa Dios nga sila mobalik ngadto sa Jerusalem ug kuhaon ang tumbaga nga mga palid, si Nephi mitubag pinaagi sa pagpamatuod nga kon kita mobuhat unsay gisugo sa Ginoo, nan Siya moandam og paagi alang kanato nga matuman kini. Si Nephi ug ang iyang mga igsoon nakakita nga lisud ang pagtuman sa sugo sa Ginoo. Ang determinasyon ni Nephi sa pagbalik ngadto sa Jerusalem makatabang sa mga estudyante nga makakita nga kon mopakita kita og hugot nga pagtuo sa Dios ug magtinguha sa pagbuhat unsay Iyang gisugo, bisan og dili nato makita ang sangputanan, Siya mogiya nato pinaagi sa Espiritu Santo.

Day 4 (1 Nephi 5–6; 9)

Samtang ang mga estudyante nagtuon mahitungod sa kasinatian ni Lehi sa pagpangita sa mga palid nga tumbaga, ilang nadiskobrehan ang mosunod nga baruganan: Samtang magsiksik kita sa kasulatan, mapuno kita sa Balaan nga Espiritu ug makadawat og pagpadayag. Sa dihang ilang nahibaloan ang katuyoan ni Nephi sa pagsulat sa iyang rekord, ang mga estudyante nakahibalo usab nga ang katuyoan sa Basahon ni Mormon mao ang pagdani sa tanang mga katawhan sa pagduol ngadto ni Jesukristo.

Pasiuna

Ang leksyon niining semanaha makahatag og kahigayunan sa mga estudyante sa pagribyu ug paghisgot unsay ilang nakat-unan gikan sa ehemplo sa pamilya ni Lehi ug sa ilang mga buhat sa hugot nga pagtuo. Samtang ikaw magtudlo sa leksyon, ipasabut og maayo ang matinud-anong pagkamasulundon ni Nephi sa mga sugo sa Ginoo ug sa iyang kakugi sa pagtinguha nga makahibalo sa katinuod sa “tanan nga mga pulong nga gilitok sa [iyang] amahan” (1 Nephi 2:16). Samtang ang mga estudyante mosunod sa ehemplo ni Nephi sa pagkamasulundon, malig-on nila ang ilang kaugalingong mga pagpamatuod sa ebanghelyo.

Sa imong pagtudlo, sunda ang pahimangno ni Elder Jeffrey R. Holland sa Korum sa Napulog Duha ka mga Apostoles:

“Kinahanglang atong ibalik ang kadasig ug bag-ong paagi sa pagtudlo diha sa Simbahan—sa panimalay, sa pulpito, sa atong mga miting nga administratiba, ug diha gayud sa classroom. Ang madasigong pagtudlo kinahanglang dili mawala diha sa Simbahan, ug kinahanglang atong siguroon nga ang atong pagpaningkamot niini dili mawala. …

“… Hinaut nga atong ibayaw ang kasinatian sa pagtudlo diha sa panimalay ug sa Simbahan ug palamboon ang atong tanang paningkamot sa pagbalaan ug pagtudlo” (“A Teacher Come from God,” Ensign, Mayo 1998, 25, 27).

Mga Sugyot alang sa Pagtudlo

1 Nephi 1

Ang Ginoo mohatag sa iyang malumo nga mga kalooy ngadto sa matinud-anon

Isulat ang mosunod nga baruganan diha sa pisara: Ang malumo nga mga kalooy sa Ginoo ihatag ngadto niadtong kinsa magpakita og hugot nga pagtuo Kaniya. Dapita ang mga estudyante sa pag-scan sa 1 Nephi 1 ug moila sa bersikulo diin kini nga kamatuoran gitudlo (bersikulo 20).

Ipangutana ang mosunod nga mga pangutana sa pagtabang sa mga estudyante nga makahinumdom ug maka-summarize unsay ilang nakat-unan samtang sila nagtuon sa 1 Nephi 1–6; 9 nianang semanaha:

Gikan sa unsay inyong nakat-unan sa mga kapitulo nga inyong gitun-an niining semanaha, giunsa sa Ginoo paghatag ang Iyang malumo nga mga kalooy ngadto ni Lehi ug sa iyang pamilya?
Unsa nga mga ehemplo sa pagkamasulundon ug hugot nga pagtuo ang gipakita ni Lehi ug sa iyang pamilya?
Kanus-a ninyo nakita ang Ginoo nga mihatag sa Iyang malumo nga mga kalooy nganha kaninyo o sa usa ka tawo nga inyong nailhan?

Mahimo nimong isulti ang usa ka higayon sa dihang ang Ginoo mihatag og kalooy nganha kaninyo ug sa inyong pamilya samtang kamo naglihok pinaagi sa hugot nga pagtuo, o pakigbahin og kasinatian nga imong nakita sa publikasyon sa Simbahan. Awhaga ang mga estudyante sa pagpangita og mga ehemplo sa Ginoo nga mihatag sa Iyang kalooy ngadto sa matinud-anon samtang sila magtuon sa Basahon ni Mormon sa tibuok tuig.

1 Nephi 2

Ang Ginoo makapahumok sa atong mga kasingkasing sa pagtuo sa Iyang mga pulong

Pahinumdumi ang mga estudyante nga human sugoa si Lehi nga mobiya sa Jerusalem uban sa iyang pamilya, ang iyang anak nga lalaki nga si Nephi mihimo og personal nga paningkamot nga makahibalo ug makasabut sa katinuod sa mga pagpadayag sa iyang Amahan. Dapita ang usa ka estudyante sa pagbasa og kusog sa 1 Nephi 2:16, 19.

Pangutan-a ang mga estudyante: Bisan og si Nephi wala magbagulbol, unsa nga ebidensya ang anaa sa 1 Nephi 2:16 nga ang pagbiya sa Jerusalem tingali lisud alang kaniya? (Si Nephi misulat nga siya nag-ampo aron makasabut ug ang Ginoo mipahumok sa iyang kasingkasing. Kini nagpasabut nga ang pagbiya sa Jerusalem dili sayon alang kaniya, mao nga ang Ginoo mitabang niya nga makadawat niini.)

Pangutana: Unsa nga ebidensya ang inyong nakita nga bisan og si Lehi ug ang iyang pamilya masulundon ngadto a Ginoo, ang kinabuhi dili sayon alang kanila? (Tan-awa sa 1 Nephi 2:4, 11.)

Hangyoa ang mga estudyante sa pagpakigbahin og mga hunahuna nga sila aduna mahitungod sa mga tinguha ni Nephi ug bahin sa unsay iyang gibuhat nga nakapadawat niya sa mga sugo sa Ginoo nga gihatag pinaagi sa iyang amahan.

Dapita ang pipila ka mga estudyante sa pagpakigbahin unsay ilang gisulat sa ilang mga scripture study journal alang sa day 2, assignment 4: Pakigbahin og ehemplo sa usa ka panahon sa dihang, sama ni Nephi, kamo mitawag sa Langitnong Amahan ug nakasinati og pagkahumok sa kasingkasing pinaagi sa Espiritu o usa ka panahon sa dihang kamo nakadawat og pagpamatuod sa butang nga gisulti sa Ginoo.

Ipakigbahin ang imong kaugalingon nga pagpamatuod nga kon kita motawag sa Dios, Siya makapahumok sa atong mga kasingkasing sa pagtuo sa Iyang mga pulong.

Hangyoa ang mga estudyante sa pagkonsiderar unsay ilang mahimo sa pagpalig-on sa ilang mga pagpamatuod ug pag-angkon og kasiguroan, sama ni Nephi. Hatagi sila og oportunidad sa pagpakigbahin sa ilang mga ideya kon gusto nila. Awhaga sila sa pagbuhat sa ilang mga hunahuna ug mga impresyon.

1 Nephi 3–4

Ang Ginoo moandam sa paagi kon kita matinud-anong mosunod sa Iyang mga sugo

I-assign ang kada estudyante nga motrabaho uban sa usa ka partner. Isulat sa pisara ang mosunod nga mga pakisayran sa kasulatan: 1 Nephi 3:6–7 ug 1 Nephi 4:6–13. Dapita ang mga estudyante sa pagbasa sa mga tudling ug sa paghisgot sa mosunod nga mga pangutana kauban sa usa ka partner:

Unsa sa inyong hunahuna ang importante sa pamahayag ni Nephi nga “Bisan pa niana ako mipadayon”? (1 Nephi 4:7).
Sa unsang paagi nga ang hugot nga pagtuo ni Nephi maoy nakapahimo nga posible nga iyang makuha ang mga palid nga tumbaga?

Human mahisguti sa mga estudyante ang ilang mga hunahuna uban sa ilang mga partner, ipasabut nga ang Ginoo mahimong mosugo nato sa pagbuhat og butang, sama sa Iyang gihimo ni Nephi ug sa iyang mga igsoong lalaki, nga wala dayon mopadayag ngano, kanus-a, o unsaon nato sa paghimo niini. Si Nephi nakat-on ngano, kanus-a, ug unsaon sa Ginoo pagtabang lamang kaniya human siya mitugot sa Espiritu sa paggiya kaniya ug human siya makahukom sa pagpadayon uban sa hugot nga pagtuo. Ipakigbahin ang imong pagpamatuod nga kon kita mopakita og hugot nga pagtuo sa Dios ug magtinguha sa pagbuhat unsay Iyang gisugo, bisan kon kita dili makakita sa sangputanan, Siya mogiya nato pinaagi sa impluwensya sa Espiritu Santo.

Kon duna pay panahon, mahimong mangutana ka sa mga estudyante kon duna ba silay mga pangutana o gusto nga mopakigbahin og mga hunahuna gikan sa ilang day 4 nga pagtuon sa 1 Nephi 5–6; 9. Sama pananglit, makadapit ka kanila sa pagpakigbahin kon sa unsa nga paagi sila mitubag sa assignment 4, diin sila gihangyo sa pagsulat mahitungod sa usa ka panahon sa dihang nagsiksik sila sa mga kasulatan ug mibati sa Espiritu sa Ginoo.

Tapusa pinaagi sa paghangyo sa usa ka estudyante sa pagbasa og kusog (o pag-recite gikan sa panumduman) sa scripture mastery passage 1 Nephi 3:7. Dayon ipangutana ang mosunod:

Unsa nga baruganan sa 1 Nephi 3:7 nga nagtudlo mahitungod sa pagkamasulundon ngadto sa mga sugo sa Ginoo? (Ang mga estudyante kinahanglang makahimo sa pagpadayag sa baruganan nga kon kita maningkamot sa pagbuhat unsay gisugo sa Ginoo, Siya moandam og paagi alang kanato nga matuman kini.)
Sumala sa unsay inyong nabasa sa 1 Nephi 1–6 ug 9, unsa ang mga resulta sa pagkamasulundon ni Lehi ug Nephi ngadto sa mga sugo sa Dios?
Kanus-a nga ang Ginoo miandam og paagi alang kaninyo sa pagsunod og usa ka sugo?

Dapita ang mga estudyante sa pagpamalandong og bahin diin makapakita sila sa hingpit sa ilang pagkamasulundon ngadto sa Dios. Mahimo nimong tapuson ang leksyon pinaagi sa pagpamatuod sa mga panalangin nga miabut sa imong kinabuhi pinaagi sa imong paningkamot sa pagsunod sa mga sugo sa Ginoo.

Sunod nga Unit (1 Nephi 7–14)

Sa sunod nga unit, ang mga estudyante magtuon sa panan-awon ni Lehi ug Nephi. Ang panan-awon ni Lehi ug Nephi sa kahoy sa kinabuhi magamit sa atong kinabuhi karon. Ang asoy ni Nephi sa iyang panan-awon naglakip sa mga deskripsyon sa pagkatawo, pangalagad, ug Pag-ula ni Jesukristo; ang pagkadiskobre ug pagkolonya sa Amerika sa mga Hentil; ug ang pagkawala sa importante nga mga kamatuoran sa Biblia ug ang pagpahiuli niini pinaagi sa Basahon ni Mormon. Ang asoy ni Nephi sa iyang panan-awon natapos uban sa deskripsyon sa Pagpahiuli sa ebanghelyo.