Jacob 3–4

Pasiuna

Diha sa Jacob 3, mabasa nato ang panapos sa usa ka wali nga gihatag ni Jacob ngadto sa iyang mga katawhan. Sa daklit mitanyag si Jacob og makapahupay nga mga pulong ug saad ngadto sa mga putli og kasingkasing. Mibadlong usab siya sa mga mapahitas-on ug dili putli taliwala sa iyang mga katawhan, nagpasidaan kanila sa mga sangputanan nga moabut kon dili sila maghinulsol. Ang Jacob 4 naglangkob og mga pulong diin nadasig si Jacob sa pagsulat alang sa mga katawhan kinsa sa umaabut mobasa sa iyang rekord. Mipamatuod siya sa Pag-ula ni Jesukristo ug miawhag sa iyang mga tagbasa nga mopakig-uli sa ilang kaugalingon ngadto sa Dios nga Amahan pinaagi sa Pag-ula. Uban sa tingog sa pasidaan, naghisgot siya sa mga Judeo kinsa mosalikway ni Jesukristo ug sa kayano sa Iyang ebanghelyo.

Mga Sugyot alang sa Pagtudlo

Jacob 3

Mihupay ug mitambag si Jacob sa mga putli og kasingkasing ug miawhag sa uban nga maghinulsol

Dapita ang mga estudyante sa paghunahuna mahitungod sa unsa nga tambag ang tingali ilang mahatag ngadto sa mga tawo diha sa mosunod nga mga sitwasyon:

Ang usa ka batan-ong babaye nanglimbasog sa pagpakabuhi nga matarung apan nag-antus tungod sa iyang amahan nga naadik sa alkohol.
Ang usa ka batan-ong lalaki nagbuhat sa iyang pinakamaayo sa pagsunod sa ebanghelyo apan nakasinati og mga pagsulay tungod sa diborsyo sa iyang ginikanan.
Ang usa ka batan-ong babaye makugihong misulay sa paghigugma sa iyang pamilya apan nanglimbasog diha sa panimalay tungod sa kahakog ug dili mahunahunaon nga mga binuhatan sa iyang igsoong babaye.

Dapita ang mga estudyante sa pagbasa sa unang han-ay sa mga pulong sa Jacob 3:1 sa hilum nga paagi. Hangyoa sila sa pag-ila kon kinsa ang unang gisultihan ni Jacob dinhi niini nga kapitulo.

Ipasabut nga direktang gisultihan ni Jacob ang mga tawo kinsa sad-an sa garbo ug sa sekswal nga mga sala. Ug dayon mihatag siya sa iyang pagtagad ngadto sa matarung nga mga tawo kinsa nakasinati og mga pagsulay tungod sa kadautan sa uban. Dapita ang mga estudyante sa pagbasa sa Jacob 3:1–2 sa hilum nga paagi. Hangyoa sila nga pangitaon ang upat ka butang nga gihangyo ni Jacob nga buhaton sa mga putli og kasingkasing.

Unsa ang upat ka butang nga giawhag ni Jacob nga buhaton sa mga putli og kasingkasing? (“Tan-aw ngadto sa Dios uban ang kalig-on sa hunahuna, … pag-ampo ngadto kaniya uban sa hilabihan ka hugot nga pagtuo, … ipataas ang inyong mga ulo ug dawata ang makapahimuot nga pulong sa Dios, ug pagbusog sa iyang gugma.”) Unsay gisaad ni Jacob sa mga putli ug kasingkasing kon magpabilin silang matinud-anon? (Kalipay diha sa mga kasakit ug pagpanalipod gikan sa mga kaaway.)
Unsa kahay mahimo natong buhaton aron madawat ang pulong sa Dios?

Agig sumpay sa pangutana mahitungod sa mga saad ni Jacob ngadto sa mga putli og kasingkasing, siguroa nga makasabut ang mga estudyante nga ang Dios mohupay sa mga putli og kasingkasing diha sa ilang mga kasakit. Tingali kinahanglan nimong ipasabut nga ang pulong mohupay nagkahulugan sa paghupay sa usa ka tawo kinsa magul-anon o nabalaka. Aron matabangan ang mga estudyante nga mamalandong ug mogamit niini nga kamatuoran, ipangutana:

Sa unsang paagi mihupay ang Ginoo kaninyo?
Sa unsang paagi ang pag-ampo uban ang hugot nga pagtuo nakatabang kaninyo sa panahon sa pagsulay?
Kanus-a ang pulong sa Dios nakatabang kaninyo nga mabati ang Iyang gugma?

Ipasabut nga human namulong ngadto sa mga putli og kasingkasing, sa makausa pa namulong si Jacob niadtong kinsa dili putli og kasingkasing.

Dapita ang usa ka estudyante sa pagbasa og kusog sa Jacob 3:3–4. Hangyoa ang klase sa pagpangita kon unsay giawhag ni Jacob nga buhaton sa mga dili putli.

Unsay mahitabo kon dili maghinulsol ang mga katawhan ni Jacob?

Ipasabut nga namahayag si Jacob nga mas matarung pa ang mga Lamanite kay sa pipila sa mga Nephite niining panahona. Hangyoa ang mga estudyante sa pagbasa sa Jacob 3:5–7 sa hilum nga paagi, nga mangita sa mga pamaagi nga ang mga Lamanite mas matarung pa kay sa pipila sa mga Nephite.

Sa unsang mga pamaagi nga ang mga Lamanite mas matarung pa kay sa pipila sa mga Nephite?
Unsa nga mga baruganan ang inyong makat-unan gikan sa Jacob 3:7 mahitungod sa mga relasyon sa pamilya? (Ang mga bana ug mga asawa maghinigugmaay sa usag usa, ug ang mga ginikanan maghigugma sa ilang mga anak.)
Unsa ang pipila ka mga sangputanan kon mapakyas ang mga sakop sa pamilya sa paghigugma sa usag usa ug sa dili pagtuman sa ilang mga responsibilidad sa pamilya?

Hangyoa ang mga estudyante sa pagbasa sa Jacob 3:10 sa hilum nga paagi, nga mangita sa pahimangno nga pihong gihatag ni Jacob ngadto sa mga amahan nga mga Nephite.

Unsa nga pahimangno ang gihatag ni Jacob ngadto sa mga amahan nga Nephite?
Ngano kahang importante alang sa mga sakop sa pamilya nga magpakita og maayo nga ehemplo alang sa usag usa?

Basaha og kusog ang Jacob 3:11–12 ngadto sa mga estudyante. Tingali kinahanglan nimong ipasabut nga diha sa bersikulo 11, ang mga pulong nga “pukawa ang mga galamhan sa inyong mga kalag” nagpasabut sa pagmata sa espirituhanon nga paagi. Diha sa Jacob 3:12, ang mga pulong nga “gidili nga panghilawas ug pagkamaulagon” nagpasabut sa sekswal nga mga sala. Samtang nagbasa ka niini nga mga bersikulo, hatagi og gibug-aton ang “makalilisang nga mga sangputanan” sa sekswal nga mga sala. Agig dugang, pahinumdumi ang mga estudyante sa mga saad ni Jacob ngadto sa mga putli og kasingkasing (tan-awa sa Jacob 3:1–2). Tabangi ang mga estudyante nga makasabut nga ang labing maayo nga paagi aron madawat kadtong gisaad nga mga panalangin mao ang kanunay nga pagkaputli og kasingkasing. Hinoon, ang mga tawo nga nakahimo og sekswal nga mga sala mahimong mangayo og tabang gikan sa ilang bishop o branch president, kinsa motabang kanila sa paghinulsol, nga mahimong hinlo pinaagi sa Pag-ula ni Jesukristo, ug sa pagdawat sa mga panalangin nga gisaad ngadto sa mga putli og kasingkasing.

Jacob 4

Nagpamatuod si Jacob nga pinaagi sa Pag-ula ni Jesukristo, mahimo kitang mopakig-uli ngadto sa Dios

Sa dili pa magklase, pagbutang og gamay nga litrato ni Jesukristo diha sa tunga-tunga sa pisara. Sa palibut sa litrato, pagsulat og pipila ka mga pulong nga nagrepresentar og mga butang nga makababag sa mga tawo gikan sa Manluluwas ug sa Iyang ebanghelyo. Sama pananglit, mahimo nimong ilakip ang pipila ka maayo nga mga butang—sama sa edukasyon, sports, ug mga higala—nga importante apan nga kinahanglang dili mahimong nag-una nga focus sa atong kinabuhi. Mahimo usab nimong ilista ang ubang mga butang—sama sa pornograpiya, dili maayo nga musika, ug mga droga—nga makadaut sa atong mga kalag ug modala kanato palayo gikan sa Manluluwas.

Hangyoa ang mga estudyante sa pagpakli ngadto sa Jacob 4:14. Ipasabut nga kini nga bersikulo naglakip sa hugpong sa mga pulong nga “pagtan-aw lapas sa tumong.” Si Elder Neal A. Maxwell sa Korum sa Napulog Duha ka mga Apostoles mitudlo nga dinhi niini nga bersikulo, “ang tumong mao si Kristo” (“Jesus of Nazareth, Savior and King,” Ensign, Dis. 2007, 45). Mahimo nimong awhagon ang mga estudyante sa pagsulat niini nga pamahayag diha sa ilang mga kasulatan tupad sa Jacob 4:14.

Human mopakigbahin niini nga pagpasabut, dapita ang usa ka estudyante sa pagbasa og kusog sa Jacob 4:14–15.

Unsa kahay gipasabut sa pagtan-aw lapas sa tumong? (Pagsentro sa atong kinabuhi ngadto sa bisan unsa nga butang gawas sa Manluluwas ug sa Iyang ebanghelyo.)
Sumala ni Jacob, unsa nga mga kinaiya ug mga buhat ang mipugong sa mga Judeo sa pagdawat ni Jesukristo?

Ipasabut nga samtang pihong nag-refer si Jacob ngadto sa mga sala sa pipila sa mga Judeo, ang mga bahin sa Jacob 4:14–15 mahimong magamit usab kanato ug magsilbing usa ka pahimangno alang kanato. Aron matabangan ang mga estudyante nga makita kini nga paggamit, ipangutana ang mosunod:

Ngano man nga usahay ang mga tawo mosalikway sa “kayano sa mga pulong” ug mangita hinoon sa mga butang nga dili nila masabtan? Unsay pipila sa mga kakuyaw kon mataligam-an ang yano nga mga kamatuoran sa ebanghelyo?
Unsa pay atong madugang diha sa pisara isip mga ehemplo sa mga babag gikan sa Manluluwas ug sa Iyang ebanghelyo? (Idugang ang mga tubag sa mga estudyante ngadto sa mga pulong nga imo nang gisulat diha sa pisara.)

Papasa ang mga pulong nga imong gisulat diha sa pisara ug isulat ang mosunod nga pangutana: Unsay mahimo natong buhaton aron dili motan-aw nga lapas sa tumong apan magpabiling naka-focus kang Jesukristo?

Isulat ang mosunod nga mga pakisayran sa kasulatan diha sa pisara: Jacob 4:4–5; Jacob 4:6–7; Jacob 4:8–9; Jacob 4:10; Jacob 4:11–13. Ipasabut nga diha sa Jacob 4, mipakigbahin si Jacob og mga baruganan nga makatabang kanato nga magpabiling naka-focus kang Jesukristo. I-assign ang mga estudyante nga magpares sa pagtrabaho ug mangita alang niini nga mga baruganan diha sa usa sa mga tudling sa kasulatan nga nakalista sa pisara. (Depende sa gidaghanon sa mga estudyante diha sa imong klase, tingali kinahanglan nimong i-assign ang matag tudling ngadto sa labaw pa kay sa usa ka pares sa mga estudyante. O tingali kinahanglan nimong hangyuon ang usa ka pares sa mga estudyante nga mobasa og labaw pa kay sa usa sa mga tudling.)

Human sa pipila ka minuto, dapita ang mga estudyante sa pagreport sa ilang mga tubag. Samtang nagbuhat sila sa ingon, mahimo kang mangutana aron matabangan sila nga maghunahuna og mas lawom mahitungod sa unsay ilang nakat-unan sa mga bersikulo. Aron matabangan ka nga magiyahan niini nga panaghisgutan, ang mosunod nga mga pangutana gihan-ay sumala sa gi-assign nga mga bersikulo:

Jacob 4:4–5. Sa unsang paagi ang mga pagpamatuod sa mga propeta nakatabang kaninyo nga maka-focus kang Jesukristo? Sa unsang paagi kamo napalig-on tungod sa mga pagpamatuod sa ubang mga tawo diha sa Manluluwas? Miingon si Jacob nga ang pagkamasulundon sa iyang mga katawhan ngadto sa balaod ni Moises epektibo sa “pagpunting sa [ilang] mga kalag ngadto” sa Ginoo. Sa unsang mga pamaagi ang atong mga paningkamot nga madawat ang mga ordinansa sa priesthood ug mosunod sa mga kasugoan makapunting sa atong mga kalag ngadto sa Ginoo?
Jacob 4:6–7. Sa unsang paagi ang pagpadayag ngadto sa mga propeta motabang kanato nga makaangkon og paglaum ug hugot nga pagtuo kang Jesukristo? Sa unsang paagi ang personal nga pagpadayag, o ang espirituhanon nga mga pagsaksi nga inyong nadawat, mipalig-on sa inyong hugot nga pagtuo? Ngano kahang importanting hinumduman nga pinaagi lamang sa grasya sa Ginoo kita makahimo sa Iyang buhat?
Jacob 4:8–9. Ngano kahang importanting mailhan nga ang mga buhat sa Ginoo “mahinungdanon ug kahibulongan”? Sa unsang paagi ang buhat sa Manluluwas isip ang Tiglalang sa yuta naka-impluwensya sa inyong pagpamatuod Kaniya? Unsay kahulugan diha kaninyo sa “ayaw pagbiay-biay sa mga pagpadayag sa Dios”? Sa unsang paagi nato mapakita sa Ginoo nga gihatagan nato og bili ang mga pagpadayag nga Iyang gihatag?
Jacob 4:10. Unsay pipila ka mga ehemplo kon sa unsang paagi ang usa ka tawo “[dili mosulay] sa pagtambag sa Ginoo, apan mangayo og tambag gikan kaniya”?
Jacob 4:11–13. Sama sa nahisgutan diha sa leksyon 35, ang pulong mopakig-uli nagkahulugan nga pagdala ngadto sa panag-uyon. Sa unsang paagi ang Pag-ula nagtabang kanato nga mahiuyon uban sa atong Langitnong Amahan? Mipahinumdom si Jacob kanato sa importansya sa pagtudlo mahitungod sa Pag-ula, nangutana, “Ngano nga dili mamulong mahitungod sa pag-ula ni Kristo … ?” Sa unsang paagi nato masunod kini nga baruganan kon mopakigbahin kita sa atong mga pagpamatuod ngadto sa uban ug kon aduna kitay laing mga oportunidad sa pagtudlo sa ebanghelyo? Kon mopakigbahin kita sa atong mga pagpamatuod, nganong importante man ang pagbuhat niini sa pamaagi nga makasabut ang mga tawo? Sa unsang mga pamaagi ang Espiritu nagtabang kanato nga matuman kini?

Isip resulta niini nga panaghisgot, siguroha nga maklaro gayud ang mosunod nga kamatuoran: Pinaagi sa Pag-ula ni Jesukristo, mahimo kitang mapuno sa paglaum ug mopakig-uli sa atong mga kaugalingon ngadto sa Dios.

Ipakigbahin ang imong mga pagbati sa pagpasalamat alang sa Manluluwas ug sa Iyang Pag-ula. Ipamatuod nga si Jesukristo mao ang “tumong” diin kinahanglan natong itutok ang atong kinabuhi. Sa pagtapos sa leksyon, hangyoa ang mga estudyante sa paghunahuna kon unsay ilang buhaton aron maka-focus diha sa Manluluwas sa mosunod nga mga adlaw. Mahimo nimong isugyot nga isulat nila ang ilang mga plano diha sa ilang mga scripture study journal. Ikonsiderar ang pagdapit sa pipila kanila nga mosulti ngadto sa klase kon unsay ilang planong buhaton.

Ribyu sa Scripture Mastery

Ang pagbalik-balik makatabang sa mga estudyante sa paghinumdom sa nahimutangan sa mga scripture mastery passage. Usa ka paagi sa pag-awhag sa pagbalik-balik mao ang paggamit sa mga scripture mastery card (item number 10459; available usab isip PDF diha sa si.lds.org). Kon wala kay access sa mga kard, tabangi ang mga estudyante nga mohimo og mga kard sa ilang kaugalingon, nga ang importante nga mga pulong gikan sa tudling naa diha sa usa ka bahin sa matag kard ug ang pakisayran naa diha sa pikas nga bahin. Ipares-pares ang mga estudyante. Hatagi sila og pipila ka minuto nga mag-eksaminay sa usag usa gamit ang mga kard. Sama pananglit, ang usa ka estudyante mahimong mobasa sa importante nga mga pulong samtang ilhon sa laing estudyante ang pakisayran sa kasulatan. Dapita ang mga estudyante sa kanunay nga paggamit niini nga mga kard sa pag-eksamin sa ilang mga kaugalingon ug sa usag usa.

Timan-i: Ang gitas-on niini nga leksyon mahimong motugot og panahon alang niini nga kalihokan sa pagribyu sa scripture mastery. Mahimo nimong buhaton ang kalihokan diha sa sinugdanan sa klase, isip break tali sa mga seksyon sa leksyon, o diha sa katapusan sa klase. Himoa nga mubo ang kalihokan aron adunay igong panahon alang sa leksyon. Alang sa uban nga pangribyu nga mga kalihokan, tan-awa ang appendix dinhi niini nga manwal.

Komentaryo ug Background nga Impormasyon

Jacob 4:4. Ang mga propeta sa Daang Tugon mipamatuod kang Jesukristo

Labaw sa 400 ka tuig sa wala pa gipanganak si Jesukristro, miingon si Jacob nga ang tanang mga propeta nga nag-una kaniya mipamatuod sa Manluluwas (tan-awa sa Jacob 4:4). Matingala ang uban nganong ang Daang Tugon wala maglangkob og mas daghan pa mahitungod ni Jesukristo. Si Elder Jeffrey R. Holland sa Korum sa Napulog Duha ka mga Apostoles mikutlo sa pagpasabut ni Nephi mahitungod sa “ yano ug mga bililhon nga mga butang” nga “gikuha” gikan sa Biblia (tan-awa sa 1 Nephi 13:26–29) ug dayon miingon:

“Sa pagkatinuod ang labing yano ug bililhon sa tanang mga kamatuoran nga nawala gikan sa Biblia, labi na gyud sa Daang Tugon, mao ang klaro ug walay pagduhaduha nga mga pahayag sa misyon ni Jesukristo, ang iyang gi-orden nang daan nga tahas isip Mesiyas ug Manluluwas sa kalibutan, ug ang mga elemento sa pakigsaad sa iyang ebanghelyo, nga gitudlo na gikan ni Adan tadlas sa matag nagsunod nga dispensasyon. Mao nga ang kinatas-an nga katuyoan sa Basahon ni Mormon mao ang pagpahiuli ngadto sa kinatibuk-ang pamilya sa Dios nianang labing mahinungdanon nga kahibalo sa tahas ni Kristo diha sa kaluwasan sa matag lalaki, babaye, ug bata kinsa nabuhi karon, nabuhi sukad, o mabuhi pa diha sa yuta” (Christ and the New Covenant: The Messianic Message of the Book of Mormon [1997], 6–7).

Jacob 4:5. Pagsimba sa Amahan sa pangalan ni Jesukristo

Ang mga sinulat ni Jacob naghatag og importante nga kaalam ngadto sa balaod ni Moises ug sa Daang Tugon. Diha sa Jacob 4:5, makat-unan nato nga ang mga propeta sa wala pa sa panahon ni Jacob misimba sa Langitnong Amahan diha sa pangalan ni Jesukristo, nagpakita nga nasayud sila nga ang Amahan ug ang Anak managlahi nga mga binuhat. Ang mga pulong ni Jacob nagpahayag nga ang balaod ni Moises mas labaw pa kay sa usa ka hugpong sa higpit nga mga kasugoan ug legal nga mga lagda lamang, sama sa gi-angkon sa pipila ka moderno nga mga iskolar. Ang balaod ni Moises nagpamatuod kang Jesukristo ug midala sa mga matarung ngadto sa pagkabalaan pinaagi sa Iyang Pag-ula.

Jacob 4:10. “Pangayo og tambag gikan kaniya”

Si Presidente Marion G. Romney sa Unang Kapangulohan mipasabut sa importansya sa pagkahibalo ug pagsunod sa tambag sa Ginoo:

“Wala ko magtuo nga daghan nga mga miyembro sa Simbahan ang tuyo nga [nagsunod] sa mga pagdani sa mga tawo o sa ilang kaugalingon nga tambag imbis nga mosunod sa tambag sa Ginoo. Hinoon, kon dili kita kanunay mangita sa tambag sa Ginoo, lagmit atong mapuli ang kaugalingon natong tambag sa Iyang tambag. Sa pagkatinuod, wala kitay laing mahimo apan mosunod na lamang sa atong kaugalingong tambag kon wala kita masayud sa mga instruksyon sa Ginoo” (“Seek Not to Counsel the Lord,” Ensign, Ago. 1985, 5).