Mga Kalihokan sa Scripture Mastery

Pasiuna

Kini nga seksyon naghatag og pipila ka mga ideya nga imong magamit aron sa pagtabang sa mga estudyante sa pagmemorya og importanting mga tudling sa kasulatan. Samtang imong tabangan ug awhagon ang mga estudyante sa pagpalambo niini nga mga kahanas, imo silang gitabangan nga mahimong mapaningkamuton sa kaugalingon sa ilang pagtuon sa mga kasulatan. Ang mga estudyante makagamit niini nga mga kahanas sa tibuok nilang kinabuhi aron mas maayo sila nga makapangita, makasabut, makagamit, ug makamemorya sa mga tudling sa kasulatan. Ang mga ideya sa pagtudlo alang sa matag elemento sa scripture mastery gilista sa ubos. Ang paggamit og lain-laing mga matang niini nga mga kalihokan makatabang sa mga estudyante nga mas magmalampuson sa pagmemorya sa mga tudling sa kasulatan.

Mga Kalihokan Nga Makatabang Sa Mga Estudyante Sa Pagpangita Sa Mga Scripture Mastery Passage

Pagmarka sa mga Tudling

Ang pagmarka sa mga scripture mastery passage makatabang sa mga estudyante sa paghinumdom niini nga mga tudling ug sa pagpangita niini nga mas dali. Ikonsiderar ang pag-awhag sa mga estudyante nga markahan kining importanting mga tudling sa paagi nga magpalahi niini sa ubang mga tudling nga ilang markahan.

Pagkasayud sa mga Basahon

Ang pagmemorya sa mga pangalan ug han-ay sa mga basahon diha sa Basahon ni Mormon makatabang nga mas daling makit-an sa mga estudyante ang mga scripture mastery passage. Ang mosunod mao ang pipila ka mga ehemplo sa mga kalihokan nga makatabang sa mga estudyante aron mahimong pamilyar sa mga basahon diha sa Basahon ni Mormon:

Mangita sa Talaan sa mga Sulod—Tabangi ang mga estudyante sa pagpangita sa talaan sa mga sulod diha sa Basahon ni Mormon, nga gitawag og “Ang mga Ngalan ug Han-ay sa mga Basahon diha sa Basahon ni Mormon.”
Manganta—Tudloi ang mga estudyante sa pagkanta sa “Ang mga Libro sa Basahon ni Mormon” (Songbook sa mga Bata, 63). Ipakanta kini sa mga estudyante matag karon ug unya sa tibuok tuig aron sa pagtabang nila nga mahinumdom sa mga ngalan ug han-ay sa mga basahon sa Basahon ni Mormon.
Mogamit sa Unang Letra—Isulat ang unang letra sa mga basahon sa Basahon ni Mormon diha sa pisara (1N, 2N, J, E, ug uban pa). Ipapraktis sa mga estudyante ang pagsulti sa mga ngalan sa mga basahon nga motukma sa matag letra. Balik-balika kini nga kalihokan hangtud nga maka-recite sila sa mga ngalan sa mga basahon gikan sa hunahuna.
Maglumba og Abli sa Libro [Book Chase]—Isulti ang usa sa mga basahon kon asa anaa ang scripture mastery passage, ug ipaabli sa mga estudyante ang ilang mga kasulatan sa bisan asa nga pahina niana nga basahon. Orasi kon unsa kadugay nga makit-an sa tibuok klase ang matag usa sa mga basahon. Kini nga kalihokan mahimong balik-balikon aron mas makamao ang mga estudyante sa paghinumdom ug pagpangita sa mga basahon sa Basahon ni Mormon.

Paghinumdom sa mga Pakisayran ug sa Sulod

Samtang ang mga estudyante nagkat-on sa mga lokasyon ug sulod sa mga scripture mastery passage, ang Espiritu Santo makatabang kanila nga makahinumdom sa mga scripture reference kon gikinahanglan (tan-awa sa Juan 14:26). Ang importanting mga pulong, sama sa “Ako moadto ug mobuhat” (1 Nephi 3:7) ug “gawasnon sa pagpili” (2 Nephi 2:27) makatabang sa mga estudyante sa paghinumdom sa sulod ug sa doktrinal nga mga pagtulun-an sa matag tudling. Ang mosunod nga mga pamaagi makatabang sa mga estudyante nga makonektar ang mga pakisayran sa scripture mastery ngadto sa sulod o sa importante nga mga pulong niini. (Mahimong unya na nimo buhaton sa ulahing bahin sa tuig ang mga kalihokan nga maglakip og kompetisyon, lumba, o sukdon ang oras, human ang mga estudyante makapakita nga kahibalo na sila kon asa makit-an ang mga scripture mastery passage. Ang ingon nga mga kalihokan makatabang sa pagpalig-on sa unsay ilang nakat-unan.)

Mga Pakisayran ug Importanting mga Pulong [Keyword]—Awhaga ang mga estudyante sa pagmemorya sa mga pakisayran ug sa importanting mga pulong sa matag scripture mastery passage nga gilista diha sa mga scripture mastery card. (Ang mga scripture mastery card mahimong ma-order online sa store.lds.org. Mahimo usab nimong pahimoon ang mga estudyante og kaugalingon nilang hugpong sa mga scripture mastery card.) Hatagi ang mga estudyante og panahon sa pagtuon sa mga kard uban sa usa ka pares ug dayon magpangutan-anay ang usag usa. Awhaga ang mga estudyante nga magmamugnaon sa mga paagi sa ilang dungan nga pagtuon ug pagpangutan-anay sa usag usa. Samtang mahimo silang mas hanas sa mga scripture mastery passage, mahimo nimo silang dapiton sa paggamit og mga timailhan nga naglakip og konteksto [kinatibuk-ang kahulugan] o paggamit sa mga doktrina ug mga baruganan gikan sa mga tudling. Ang tawo nga gipangutana mahimong motubag pinaagi sa pagsulti o pagsulat.
Mga Scripture Mastery Card—Kini nga kalihokan mahimong gamiton sa pagpaila o pagribyu sa usa ka hugpong sa mga scripture mastery passage. Pagpili og mga scripture mastery card ug pangandami ang pag-apud-apod niini sa imong mga estudyante. (Siguroha nga duna pay laing mga kopya sa matag kard aron sobra sa usa ka estudyante ang makadawat sa sama gihapon nga scripture mastery passage. Mahimo nga duna kay daghang kard para ang matag estudyante mahatagan nimo og duha o tulo ka managlahi nga mga tudling.) Iapud-apod kini sa klase. Hatagi og panahon ang mga estudyante nga makatuon sa scripture mastery passage, sa pakisayran, sa mga key word, sa pamahayag sa konteksto, sa doktrina o baruganan, ug sa mga ideya sa paggamit [application] nga naa sa matag kard. Isulti ang pipila ka clue gikan sa kard (sama pananglit, mga pulong gikan sa scripture mastery passage o mga key word, konteksto, doktrina o baruganan, o paggamit). Ang mga estudyante nga naggunit sa mao nga kard kinahanglang mobarug ug mosulti og kusog sa pakisayran sa scripture mastery.
Scripture Chase [Lumba sa Pag-ukab]—Gamiti og mga clue aron matabangan ang mga estudyante nga makapraktis sa dali nga pagpangita sa mga tudling diha sa ilang mga kasulatan. Alang sa mga clue, mahimo kang mogamit og mga key word, mga doktrina ug baruganan, ug mga ideya sa paggamit gikan sa mga scripture mastery card. Mahimo sab nga maghimo ka og kaugalingon nimong mga clue. Ang scripture chase nga kalihokan diin maglumba ang mga estudyante og pangita sa mga tudling makatabang nga maaktibo ang ilang pag-apil sa pagkat-on sa mga scripture mastery passage. Kon mogamit ka og scripture chase nga mga kalihokan aron sa pagtabang sa scripture mastery, buhata kini sa paagi nga dili makapasakit sa mga pagbati o makasilo sa Espiritu. Tabangi ang mga estudyante nga likayan ang walay pagtahud nga paggamit sa ilang mga kasulatan o mosubra sa pakigkompetisyon. Ikonsiderar usab nga makigkompetensya ang mga estudyante sa usa ka sumbanan dili kaysa usag usa. Sama pananglit, ang mga estudyante mahimong makiglumba sa magtutudlo, o makiglumba sila aron masuta kon ang piho nga gidaghanon sa klase makakita ba sa partikular nga tudling sa gitakda nga oras.
Story Chase [Paunhanay sa pagpangita sa tudling sa kasulatan basi sa sitwasyon]—Ihatag ang mga clue pinaagi sa paghimo og mga sitwasyon nga nagpakita sa kamahinungdanon sa mga scripture mastery passage sa matag adlaw nga kinabuhi. Sama pananglit, isip clue sa 1 Nephi 3:7, mahimo kang moingon nga, “Si John nasayud nga ang Ginoo misugo sa tanang takus nga batan-on nga magmisyon, apan nabalaka siya nga ang iyang kamaulawon makapugong kaniya sa epektibong pagserbisyo. Dayon nakahinumdom siya giunsa sa pagsanong ni Nephi ang lisud nga tahas sa pagkuha sa palid nga tumbaga. Si John nakabaton og kaisug nga ang Ginoo mohatag og paagi aron siya mahimong epektibo nga misyonaryo.” Samtang ang mga estudyante maminaw sa mga sitwasyon, ipapangita nila ang haum nga mga scripture mastery passage sa ilang mga kasulatan.
Mga Quiz ug Test—Hatagi ang mga estudyante og mga oportunidad nga matestingan ang ilang panumduman sa mga scripture mastery passage. Ang mga clue maglakip sa mga key word o mga scripture reference, mga kinutlo gikan sa mga tudling sa kasulatan, o mga sitwasyon nga naghulagway sa mga kamatuoran nga gitudlo diha sa mga tudling. Ang mga quiz ug test mahimong idikta, isulat sa pisara, o sa papel. Human ang mga estudyante makakuha og quiz o test, ikonsiderar ang pagpares sa mga estudyante nga tag-as og score ngadto sa mga estudyante nga ubos ra og score. Ang taas og score nga estudyante mahimong maoy motudlo aron matabangan sa pagtuon ug paglambo ang mas mubo og score nga estudyante. Isip kabahin niini nga paningkamot, ang paresan makahimo usab og tumong nga mokab-ot og mas taas nga hiniusang grado sa sunod nga test. Ikonsiderar ang paghimo og tsart o bulletin board diin ika-display ang mga tumong sa mga estudyante ug makita ang ilang paglambo.

Mga Kalihokan Nga Makatabang sa Mga Estudyante sa Pagsabut sa Mga Scripture Mastery Passage

Pagpasabut sa mga Pulong

Ang pagpasabut sa mga pulong diha sa mga scripture mastery passage (o pagtabang sa mga estudyante sa pagpasabut niini) makatabang sa mga estudyante nga makasabut sa kahulugan sa tibuok tudling. Kon ang mao nga kahulugan mahinungdanon kaayo alang sa pagsabut sa mga doktrina ug mga baruganan diha sa usa ka tudling, mahimo kang moawhag nga isulat sa mga estudyante kini nga mga kahulugan diha sa ilang mga kasulatan. Ribyuha ang mga kahulugan sa mga pulong samtang imong ribyuhon ang mga scripture mastery passage.

Pag-ila sa Konteksto

Ang pag-ila sa konteksto sa usa ka tudling sa kasulatan makatabang sa mga estudyante nga mas masabtan ang kahulugan sa tudling. Ang konteksto naglakip og impormasyon kon si kinsa ang namulong ngadto sa usa ka tawo ug ngano, ang sitwasyon sa tudling (kasaysayan, kultura, ug hiyograpika), ug ang pangutana o sitwasyon diin nahitabo ang sulod sa tudling sa kasulatan. Sama pananglit, ang konteksto sa 1 Nephi 3:7 naglakip sa kamatuoran nga si Nephi gihangyo sa iyang amahan nga si Lehi, kinsa usa ka propeta, sa pagbalik sa Jerusalem ug kuhaon ang mga palid nga tumbaga. Ang pagkahibalo niini nga impormasyon makatabang sa mga estudyante nga mas klarong masabtan nganong miingon si Nephi nga,“Ako moadto ug mobuhat sa mga butang nga ang Ginoo nagsugo.” Samtang magtudlo ka sa mga leksyon nga naglakip sa mga scripture mastery passage, ipasabut og maayo ang konteksto nga naglibut niana nga mga tudling. Ang dugang nga mga kalihokan sama sa usa nga naa sa ubos makatabang usab sa mga estudyante sa pagsabut niining importanting mga tudling.

Pag-ila sa Konteksto—Isulat ang mosunod nga mga ulohan sa ibabaw sa pisara: Mamumulong, Tigpaminaw, Katuyoan, Uban pang Makatabang nga mga Panabut. Igrupo-grupo ang mga estudyante, ug pag-assign og usa ka scripture mastery passage sa matag grupo. Dapita sila sa pagdiskubre sa konteksto sa gi-assign kanila nga mga tudling pinaagi sa pag-ila sa impormasyon nga motakdo sa mga ulohan diha sa pisara. Ipasulat nila sa pisara ang ilang mga nasayran. Dayon hangyoa ang matag grupo sa pagpasabut sa konteksto sa gi-assign kanila nga mga tudling ug sa unsang paagi kini nga impormasyon nakaapekto sa ilang pagsabut sa mga kamatuoran diha sa matag tudling. Aron mahimong mas makapainteres kini nga kalihokan, mahimo nimong hagiton ang klase sa pagtag-an sa mga scripture mastery reference base sa mga paghulagway diha sa pisara sa dili pa ipasabut sa matag grupo unsay ilang gisulat.

Pag-analisar

Ang pag-analisar naglakip sa pag-ila sa mga doktrina ug mga baruganan nga anaa sa mga tudling sa kasulatan. Naglakip usab kini sa pagtabang sa mga estudyante aron makasabut kon sa unsang paagi kini nga mga kamatuoran mapuslanon ngadto kanila. Kini moresulta sa mas lawom nga paggamit sa mga doktrina ug mga baruganan diha sa ilang kinabuhi. Ang mosunod nga kalihokan makatabang sa mga estudyante sa pag-analisar sa mga scripture mastery passage:

Magsulat og mga Clue—Kon ang mga estudyante mas mapamilyar na sa mga scripture mastery passage, dapita sila sa paghimo og mga pangutana, mga sitwasyon, o ubang clue nga maghulagway sa mga doktrina ug baruganan nga gitudlo diha sa mga tudling. Magamit kini sa pagpangutana sa klase.

Pagpasabut

Ang paghimo sa mga estudyante nga maoy mopasabut sa mga tudling sa kasulatan makapalawom sa ilang pagsabut ug makapalambo sa ilang abilidad sa pagtudlo sa mga doktrina ug mga baruganan gikan sa mga kasulatan. Ang mosunod mao ang duha ka paagi nga makatabang sa mga estudyante aron makat-on sa pagpasabut sa mga scripture mastery passage:

Mga Key Word ug Hugpong sa Mga Pulong—Dapita ang mga estudyante sa pagbasa sa sama nga scripture mastery passage sa ilang kaugalingon ug sa pagtino og usa ka pulong o mga pulong nga sa ilang hunahuna importante kaayo ngadto sa unsay gipasabut sa tudling. Dayon dapita ang usa ka estudyante sa pagbasa sa tudling ngadto sa klase ug sa paghatag og gibug-aton sa pulong o hugpong sa mga pulong nga iyang gipili. Hangyoa ang estudyante sa pagpasabut nganong kana nga pulong o hugpong sa mga pulong importante alang sa pagsabut sa tudling. Dapita ang pipila pa ka mga estudyante sa pagbuhat usab sa ingon. Ang mga estudyante mahimong mopili og lain-laing mga pulong o hugpong sa mga pulong alang sa mao gihapon nga tudling. Samtang ang mga sakop sa klase makadungog niining managlahi nga panglantaw, makaangkon sila og mas lawom nga pagsabut sa tudling.
Mag-andam og Debosyunal—Hatagi ang mga estudyante og mga oportunidad nga makagamit sa ilang mga scripture mastery passage samtang mag-andam sila ug magpresentar og mga debosyunal sa pagsugod sa klase. Tabangi sila nga maandam sa pag-summarize sa konteksto, pagpasabut sa mga doktrina ug mga baruganan, pagpakigbahin og makahuluganong mga kasinatian o mga ehemplo, ug pagpamatuod sa mga doktrina ug mga baruganan nga naa sa mga tudling. Mahimo usab kang mosugyot nga ang mga estudyante mokonsiderar sa paggamit og butang alang sa pagpasabut sa mga ideya nga naa sa mga tudling.

Ang Pagbati sa Kaimportante sa mga Doktrina ug mga Baruganan

Tabangi ang mga estudyante nga makasabut ug makaangkon og espirituhanong saksi sa mga doktrina ug mga baruganan nga gitudlo diha sa mga scripture mastery passage. Gipasabut ni Elder Robert D. Hales nga, “Ang tinuod nga magtutudlo, sa higayon nga magtudlo siya sa mga kamatuoran [sa ebanghelyo] … , modala [sa mga estudyante] ngadto sa dugang nga ang-ang aron makaangkon sa espirituhanong pagsaksi ug sa panabut diha sa ilang kasingkasing nga mopahinabo sa aksyon ug sa pagbuhat” (“Teaching by Faith” [pakigpulong alang sa religious educators, Peb.1, 2002], 5, si.lds.org). Kon ang mga estudyante mobati sa kamatuoran, kaimportante, ug kakinahanglanon sa usa ka doktrina o baruganan pinaagi sa impluwensya sa Balaang Espiritu, ang ilang tinguha sa paggamit niana nga kamatuoran sa ilang kinabuhi modako. Ang mga magtutudlo makatabang sa mga estudyante sa pagdapit ug pag-amuma niini nga mga pagbati sa Balaang Espiritu pinaagi sa paghatag kanila og mga oportunidad sa pagpakigbahin sa ilang mga kasinatian sa pagsunod sa mga baruganan sa ebanghelyo nga makita diha sa mga scripture mastery passage. Makatabang kini sa mga estudyante nga sila mas makasabut sa mga kamatuoran nga gitudlo diha sa mga scripture mastery passage ug mosiguro nga kini nga mga kamatuoran masilsil diha sa kasingkasing sa mga estudyante. Ang mosunod nga kalihokan makatabang sa mga estudyante nga mobati sa kaimportante sa mga doktrina ug mga baruganan nga gitudlo sa mga scripture mastery passage:

Pagpaminaw og mga Tudling sa Kasulatan—Dapita ang mga estudyante sa pagpaminaw og mga scripture mastery passage diha sa mga pakigpulong sa simbahan, sa mga pakigpulong sa kinatibuk-ang komperensya, ug sa diskusyon sa pamilya ug mga higala. Matag karon ug unya dapita ang mga estudyante sa pagreport bahin sa mga tudling nga ilang nadungog, giunsa paggamit ang mga tudling, unsa nga mga kamatuoran ang gitudlo, ug kon unsa nga mga kasinatian ang naangkon nila o sa uban bahin sa mga kamatuoran nga gitudlo. Pangita og mga oportunidad nga makapamatuod (ug dapita ang mga estudyante sa pagpamatuod) sa mga kamatuoran nga gitudlo sa mga scripture mastery passage.

Mga Kalihokan Nga Makatabang Sa Mga Estudyante Aron Magamit Ang Mga Scripture Mastery Passage

Pagtudlo

Ang mga scripture mastery passage ug ang Sukaranang mga Doktrina dungan nga gihimo ug tuyo nga gipahiangay alang sa kaayohan sa mga estudyante. (Ang mga scripture mastery passage gipakita sa tibuok Sukaranang mga Doktrina nga dokumento.) Kon ang mga estudyante makakat-on ug makapahayag sa mga doktrina ug mga baruganan nga anaa sa mga scripture mastery passage, sila usab magkat-on ug magpahayag sa Sukaranang mga Doktrina. Ug samtang ang mga estudyante makakat-on sa pagpahayag sa Sukaranang mga Doktrina sa ilang kaugalingong mga pulong, makasalig sila sa namemorya nga mga scripture mastery passage nga makatabang kanila. Ang paghatag sa mga estudyante og mga oportunidad sa pagtudlo sa mga doktrina ug mga baruganan sa ebanghelyo gamit ang mga scripture mastery passage makapalambo sa ilang pagsalig diha sa ilang kaugalingon ug sa ilang kahibalo sa mga kasulatan. Kon ang mga estudyante motudlo ug mopamatuod sa mga doktrina ug mga baruganan nga makita diha sa mga scripture mastery passage, sila makapalig-on usab sa ilang mga pagpamatuod. Awhaga ang mga estudyante sa paggamit sa mga scripture mastery passage sa pagtudlo ug pagpasabut sa ebanghelyo diha sa klase ug sa pagpakig-istorya sa mga higala, pamilya, ug sa uban.

Magpresentar og Mensahe—I-assign ang mga estudyante sa pag-andam og 3- ngadto sa 5-minutos nga pakigpulong o mga leksyon nga gibase sa mga scripture mastery passage. Paandama sila diha sa klase o sa balay. Agig dugang sa mga scripture mastery passage, makagamit sila og ubang mga kapanguhaan aron sa pagtabang kanila sa pagpangandam, sama sa mga scripture mastery card, sa Giya ngadto sa mga Kasulatan, o sa Matinud-anon sa Tinuhoan: Usa ka Pakisayran sa Ebanghelyo. Ang matag pakigpulong o leksyon kinahanglang maglakip og introduksyon, sa scripture mastery passage, usa ka istorya mahitungod sa baruganan nga gitudlo o ehemplo niini, ug pagpamatuod sa estudyante. Ang mga estudyante makaboluntaryo nga ipresentar ang ilang mga mensahe diha sa klase, sa family home evening, o sa ilang mga korum o mga klase isip kabahin sa ilang mga paningkamot sa Katungdanan ngadto sa Dios o sa Personal nga Kauswagan. Kon ang mga estudyante mopresentar sa ilang mga pakigpulong o mga leksyon sa gawas sa klase, ikonsiderar ang pagdapit kanila sa pagreport sa ilang mga kasinatian.
Pangmisyonaryo nga Role Play—Pag-andam og pipila ka kard nga dunay mga pangutana nga posibling ipangutana sa investigator nga mahimong tubagon gamit ang tabang sa mga scripture mastery passage (sama pananglit sa, “Unsa ang gituohan sa mga miyembro sa inyong simbahan mahitungod ni Jesukristo?”). Dapita ang mga pares sa mga estudyante sa pag-anha sa atubangan sa klase aron sa pagtubag og pangutana nga gipili gikan sa mga kard. Aron matabangan ang mga estudyante nga makasabut unsaon sa mga misyonaryo pagtubag ang susama nga mga pangutana, makasugyot ka og pipila ka mga pamaagi sa epektibo nga pagtudlo, sama sa (1) pagsulti sa konteksto sa tudling sa kasulatan, (2) pagpasabut sa usa ka doktrina o baruganan, (3) pagpangutana aron sa pagsuta kon ang ilang gitudloan nakasabut o mituo ba sa unsay gitudlo, (4) pagpakigbahin og mga kasinatian ug pagpamatuod, ug (5) pagdapit niadtong ilang gitudloan sa pagsunod sa kamatuoran nga gitudlo. Hangyoa ang klase sa paghatag og feedback mahitungod sa unsay ilang ganahan sa paagi nga gitubag sa managkompanyon ang ilang mga pangutana.
Mopamatuod—Dapita ang mga estudyante sa pagpangita diha sa mga scripture mastery passage ug magpili og usa nga adunay doktrina o baruganan nga ilang ikapamatuod. Dapita sila sa pagpamatuod kabahin sa kamatuoran nga ilang gipili ug sa pagpakigbahin og mga kasinatian nga nakahimo nila sa pagpamatuod niini. Samtang ang mga estudyante mopakigbahin sa ilang mga pagpamatuod, ang Espiritu Santo mokumpirmar sa kamatuoran sa mga doktrina ug mga baruganan nga ilang gipamatuod. Ang ilang mga pagpamatuod mahimong modasig usab sa uban aron molihok inubanan sa pagtuo.

Pahinumdom: Ang mga oportunidad alang sa mga estudyante sa pagpakigbahin sa ilang mga pagpamatuod kinahanglan nga boluntaryo. Ang mga estudyante kinahanglang dili pugson sa pagpakigbahin sa ilang mga pagpamatuod o mobati nga kinahanglan nilang moangkon nga nahibalo sa mga butang nga wala nila mahibaloi. Agig dugang, ang pipila ka mga estudyante magpanagana sa pagpakigbahin sa ilang mga pagpamatuod tungod kay nasayop sila sa paghunahuna nga kinahanglan nilang sugdan og “Gusto kong mohatag sa akong pagpamatuod …” o nga ang ilang pagpahayag og pagpamatuod kinahanglang pagaubanan og emosyon. Tabangi ang mga estudyante nga makasabut nga kon sila magpamatuod, mahimo sila nga mopakigbahin lamang sa mga doktrina o mga baruganan nga ilang nahibaloan nga tinuod. Ang pagpakigbahin og pagpamatuod mahimong sama ka yano sa pag-ingon “Ako mituo nga kini tinuod” o “Ako nasayud nga kini tinuod” o “Ako mituo niini sa tibuok nakong kasingkasing.”

Pagpakabuhi

Ang pagsugyot og mga paagi aron magamit sa mga estudyante ang mga doktrina ug mga baruganan nga anaa sa mga tudling sa kasulatan (o pagdapit sa mga estudyante sa paghunahuna og mga paagi) maghatag kanila og oportunidad sa pagkat-on pinaagi sa pagpakita og hugot nga pagtuo. Si Elder David A. Bednar sa Korum sa Napulog Duha ka mga Apostoles miingon:

“Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Ang kinasingkasing ug pagkamakanunayon sa atong paglihok nga dinasig sa hugot nga pagtuo nga atong gipakita ngadto sa atong Langitnong Amahan ug sa Iyang Anak, nga si Jesukristo, sa atong pagkaandam nga makat-on ug pagdawat og panudlo gikan sa Espiritu Santo” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 20).

Hatagi ang mga estudyante og mga oportunidad nga mopakigbahin ug mopamatuod sa mga kasinatian nga ilang nasinati sa paggamit sa mga doktrina ug mga baruganan. Ang mosunod mao ang usa ka paagi sa pag-awhag sa mga estudyante sa paggamit sa mga scripture mastery passage sa ilang kinabuhi:

Maghimo og Tumong—Base sa seksyon nga application diha sa mga scripture mastery card, dapita ang mga estudyante sa paghimo og piho nga mga tumong alang sa mas maayong pagsunod sa mga baruganan nga naa sa mga scripture mastery passage. Ipasulat nila ang ilang mga tumong sa usa ka piraso nga papel nga ilang madala-dala isip pahinumdom. Kon angay, pagdapit og mga estudyante sa pagreport sa ilang mga kalampusan.

Mga Kalihokan nga Makatabang sa mga Estudyante sa Pagmemorya sa mga Scripture Mastery Passage

Pagmemorya

Ang pagmemorya makapalawom sa panabut ug makapalambo sa abilidad sa estudyante sa pagtudlo sa ebanghelyo. Kon ang mga estudyante makamemorya sa mga kasulatan, ang Espiritu Santo makapahinumdom kanila sa mga pulong ug mga ideya sa mga panahon sa panginahanglan (tan-awa sa Juan 14:26; D&P 11:21). Hinumdumi nga ipahiangay ang mga kalihokan sa pagmemorya ngadto sa mga abilidad sa imong mga estudyante. Si Elder Richard G. Scott sa Korum sa Napulog Duha ka mga Apostoles miawhag og pagmemorya sa mga kasulatan sa dihang siya miingon:

“Talagsaong gahum moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong mga higala. Sama kini sa pagdiskubre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban” (“Ang Gahum sa Kasulatan,” Ensign o Liahona, Nob. 2011, 6).

Ang matag usa sa mosunod nga mga kalihokan mahimong balikon sa mosunod nga pipila ka adlaw diha sa sinugdanan o katapusan sa klase aron matabangan ang mga estudyante nga makakab-ot og malungtaron nga pagmemorya:

Lumba Gamit ang Usa ka Pulong—Hagita ang klase sa pagsulti og usa ka scripture mastery passage usa ka pulong sa usa ka estudyante sa usa ka higayon. Sama pananglit, kon magtabang sa mga estudyante sa pagmemorya sa Alma 39:9, ang unang estudyante molitok sa pulong nga karon, ang ikaduhang estudyante moingon nga akong , ang ikatulong estudyante moingon nga anak, ug padayon pa hangtud nga ang tibuok bersikulo makompleto. Orasi ang klase, ug tugoti sila nga mosulay sa makadaghan aron makakuha sa gitumong nga oras. Samtang imong balikon kini nga kalihokan, ikonsiderar ang pag-usab sa han-ay sa mga estudyante aron lain-laing mga pulong ang ilang masulti.
Unang mga Letra—Isulat sa pisara ang unang mga letra sa matag pulong sa scripture mastery passage. Itudlo ang mga letra samtang ang klase mosulti sa tudling uban nimo, mogamit sa ilang mga kasulatan kon gikinahanglan. Balika kini nga kalihokan hangtud nga ang mga estudyante mobati nga masaligon sa ilang abilidad sa pag-recite sa usa ka tudling uban lamang sa tabang sa unang mga letra. Mahimo nimong papason ang pipila sa mga letra sa matag higayon nga ang mga estudyante mo-recite sa tudling. Hinay-hinay kini nga modugang sa kalisud hangtud nga ang mga estudyante makasulti og balik sa tudling nga dili mogamit sa unang mga letra.
Mga Puzzle nga Ginunting nga Papel [Wordstrip Puzzles]—Isulat o ipasulat sa mga estudyante ang mga pulong sa scripture mastery passage sa usa ka papel nga dunay linya. Guntinga ang papel aron mahimong mga gilis [strips], nga anaa gihapon ang mga linya sa kasulatan. Guntinga nga mugbo ang pipila sa mga gilis aron pipila lang ka mga pulong sa tudling ang malakip diha sa matag usa. Isagol ang mga gilis sa papel ug ihatag kini ngadto sa mga pares o gagmayng grupo sa mga estudyante. Hagita ang mga estudyante sa paghan-ay sa mga gilis nga papel, nga gamiton ang ilang mga kasulatan isip giya. Ipapraktis kini kanila hangtud nga dili na sila kinahanglang mogamit sa ilang mga kasulatan. Kon mahuman na sila, hangyoa sila sa pag-recite og kusog sa tudling. Mahimo usab nimong orasan ang mga estudyante aron makita kon kinsa nga grupo ang labing paspas nga makapahimutang sa mga ginunting nga papel sa sakto nga han-ay. O mahimo nimong orasan ang tibuok klase aron makita kon unsa ka dugay nga makompleto sa tanang grupo ang puzzle (kon ang unang mga grupo mahuman na, patabanga sila sa mas hinay nga mga grupo).