Leksyon sa Home-Study
Mosiah 26–Alma 4 (Unit 14)
Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Mosiah 26–Alma 4 (unit 14) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.
Day 1 (Mosiah 26)
Pinaagi sa pagtuon mahitungod sa usa ka henerasyon sa mga Nephite kinsa wala magpalambo sa ilang mga pagpamatuod sa ebanghelyo, makadiskubre ang mga estudyante nga sa pagpalambo ug pagpatunhay sa usa ka pagpamatuod, kinahanglan magbusog kita sa pulong sa Dios, mag-ampo nga may hugot nga pagtuo, ug mosunod sa mga sugo sa Ginoo. Gikan sa mga paningkamot ni Alma sa pagtabang sa uban nga maghinulsol, makat-unan sa mga estudyante nga ang Ginoo mopasaylo niadtong kinsa maghinulsol sa kasinsero sa ilang mga kasingkasing.
Day 2 (Mosiah 27)
Samtang magtuon ang mga estudyante sa pagkakabig ni Alma nga Batan-on ug sa anak nga mga lalaki ni Mosiah, ilang makat-unan ang mosunod nga tulo ka mga kamatuoran sa ebanghelyo: Ang Ginoo motubag sa atong matinud-anon nga mga pag-ampo alang sa uban apan mitugot gihapon sa ilang mga kabubut-on; matag usa kanato kinahanglan matawo pag-usab pinaagi sa Pag-ula ni Jesukristo; ug tinud-anay nga maghinulsol, ang usa ka tawo kinahanglan mobuhat sa tanang posibleng butang aron sa pag-ayo sa kadaot nga iyang nahimo. Ang mga estudyante mirekord diha sa ilang scripture study journal kon sa unsang paagi nga sila nausab pinaagi sa Pag-ula.
Day 3 (Mosiah 28–29)
Samtang ang mga estudyante magtuon mahitungod sa tinguha sa anak nga mga lalaki ni Mosiah aron sa pagsangyaw sa ebanghelyo ngadto sa mga Lamanite, ilang makat-unan nga samtang ang atong pagkakabig magkalawom, ang atong tinguha sa pagpakigbahin sa ebanghelyo mousbaw. Nagsulat usab sila mahitungod sa mga kasinatian nga ilang naangkon nga nakatabang nila nga gustong mopakigbahin sa ebanghelyo. Nabasahan sa mga estudyante ang mahitungod sa pag-usab sa pangagamhanan sa mga Nephite ug nakat-on nga ang mga lumulupyo adunay katungdanan sa pagsunod sa matarung nga mga balaod ug sa mga lider.
Day 4 (Alma 1–4)
Pinaagi sa pagtuon sa mga ehemplo sa mapainubsanon nga mga Nephite, makat-unan sa mga estudyante nga kon kita mosunod sa ebanghelyo, makaangkon kita og kalinaw sa atong mga kinabuhi, bisan kon kita gipanggukod. Samtang sila magbasa mahitungod sa pagrebelde sa mga Amlicite, ilang madiskubrihan nga makadawat kita og kalipay o kauyamot depende kon si kinsa ang atong gipili nga sundon. Si Alma mao ang usa ka ehemplo sa usa ka tawo kinsa mipili sa pagsunod sa Ginoo. Ang iyang dili matandog nga debosyon sa pagtawag ngadto sa mapagarbuhon nga mga Nephite sa paghinulsol makatabang sa mga estudyante nga makakita nga ang mga sulugoon sa Ginoo magpamatuod ug motawag sa mga makasasala sa paghinulsol.
Pasiuna
Kini nga leksyon magtugot sa mga estudyante sa pagribyu sa mga baruganan sa paghinulsol ug mamalandong sa atong panginahanglan aron mausab pinaagi sa Pag-ula ni Jesukristo—sama ni Alma nga Batan-on ug sa anak nga mga lalaki ni Mosiah. Mag-ampo alang sa giya aron masayud kon sa unsa nga paagi nga matabangan sa labing maayo ang mga estudyante sa pagpangita niining kausaban sa ilang mga kinabuhi.
Mga Sugyot alang sa Pagtudlo
Mosiah 26
Nakadawat si Alma og kadasig kon unsaon sa paghukom kadtong nakahimo og bug-at nga mga sala
Sa pagsugod niining leksyon, dapita ang usa ka estudyante sa pagbasa sa summary sa kapitulo sa sinugdanan sa Mosiah 26. Basaha ang mosunod nga mga sitwasyon ngadto sa klase. Hangyoa ang mga estudyante sa paghunahuna mahitungod kon unsa kaha ang ilang buhaton aron matabangan ang tawo sa matag sitwasyon.
-
Usa ka batan-ong babaye nakabuhat og bug-at nga sala, apan nahadlok siya nga makigsulti sa iyang bishop.
-
Usa ka batan-ong lalaki adunay tinguha sa paghinulsol, apan wala siya kahibalo kon unsaon.
-
Usa ka batan-ong babaye nakahimo pag-usab sa sala nga iyang nabuhat kanhi, ug nabalaka nga ang Ginoo dili na mopasaylo kaniya.
-
Usa ka batan-ong lalaki mihukom sa paghinulsol, apan midumili sa pagpasaylo sa usa ka tawo nga nakasilo kaniya.
Isulat ang mosunod nga pakisayran sa kasulatan diha sa pisara: Mosiah 26:21–23, 29–31. Ipasabut ngadto sa mga estudyante nga narekord niining mga bersikulo ang pagpadayag sa Ginoo ngadto ni Alma mahitungod sa mga tawo kinsa nakabuhat og bug-at nga mga sala. Dapita ang mga estudyante sa pagbasa niining mga bersikulo ug motino og bisan usa ka baruganan nga mahimong makatabang sa usa sa mga indibidwal diha sa nag-unang lista. Hangyoa ang pipila ka estudyante nga mopakigbahin sa ilang mga tubag diha sa klase. Mahimo nimong ipakigbahin ang usa ka tubag ug ang imong pagpamatuod sa baruganan mahitungod sa paghinulsol nga makita sa Mosiah 26.
Pahinumdumi ang mga estudyante nga sila nagplano sa paggamit sa usa sa mga baruganan nga ilang nakat-unan gikan sa Mosiah 26 sa ilang kaugalingong mga paningkamot sa paghinulsol. Awhaga sila sa pagtuman sa ilang mga plano.
Mosiah 27–28
Si Alma nga Batan-on ug ang anak nga mga lalaki ni Mosiah naghinulsol ug natawo pag-usab
Aron mahatagan ang mga estudyante og ehemplo sa usa ka tawo kinsa nakasinati og dakong kausaban sa kasingkasing, dapita ang pipila nila nga magpuli-puli sa pagbasa og kusog sa mosunod nga kasinatian nga gipakigbahin ni Elder Keith K. Hilbig sa Seventy:
“[Usa ka batan-ong elder nga nagserbisyo didto sa Eastern Europe] ug ang iyang kauban nakakita ug mitudlo sa hamtong og pangidaron nga tawo nga ginganlan og Ivan. … Ang ilang investigator gikan sa malisud nga kaagi, sumala sa makita sa iyang nagamit na pag-ayo nga sinina, nagkalkag nga bungot, ug nagduha-duha nga panglihok. Ang kinabuhi mapintas ug dili mabination kaniya.
“Walay bisan unsa nga relihiyuso nga pagbansay, si Ivan adunay daghan nga usbunon. Ang mga binuhatan nga dili uyon sa gipahiuli nga ebanghelyo kinahanglang ipadaplin. Bag-ong mga baruganan kinahanglan nga dawaton ug dayon sundon. Si Ivan gusto nga makat-on, ug nagkugi siya sa pag-andam alang sa iyang bunyag ug kumpirmasyon. Ang iyang sinina nagpabilin nga nagkagidlay ug ang iyang bungot nagkalkag, apan siya mihimo sa unang mga lakang. Human dayon sa bunyag ni Ivan, ang mga misyonaryo nabalhin. Nanghinaut siya nga magkakita pa gihapon sila ni Ivan.
Paglabay sa unom ka bulan ang presidente sa misyon mibutang pag-usab sa batan-ong elder ngadto sa iyang kanhi branch. Nasurprisa apan ganahan nga mobalik, ang elder, uban sa bag-ong kauban, misayo sa miting sa sakrament sa iyang unang Dominggo balik sa branch. …
“Ang elder nakaila hapit sa tanan sa gamay nga kongregasyon. Bisan pa niana, wala niya makit-i diha sa mga miyembro ang tawo nga iyang gitudloan ug sa iyang kauban ug gibunyagan unom ka bulan na ang milabay. Mibati ang elder og kasagmuyo ug kasubo. …
“Ang kahadlok ug paghunahuna sa elder nabalda sa pagduol sa dili pamilyar nga tawo nga nagdali nga miduol aron sa paggakos sa misyonaryo. Ang tawo nga limpyo nga namalbas adunay masaligon nga pahiyom ug ang tataw nga kaayo midan-ag gikan sa iyang panagway. Nagsul-ob og puti nga polo ug maayong pagkataud nga kurbata, padulong siya nga moandam sa sakramento alang sa gamay nga panagpundok nianang buntag sa Igpapahulay. Diha lamang nga misugod ang tawo sa pagsulti nga nakaila ang elder kaniya. Ang bag-o kini nga Ivan, dili ang kanhi nga Ivan nga ilang gitudloan ug gibunyagan! Nakita sa elder nga natagik diha sa iyang higala ang milagro sa hugot nga pagtuo, paghinulsol, ug kapasayloan; iyang nakita ang katinuod sa Pag-ula.
“… [Si Ivan] nakasinati og ‘kausaban sa kasingkasing’ (Alma 5:26) nga igo aron bunyagan ug sa pagpadayon sa mapadayunon nga proseso sa pagkakabig” (“Pagsinati og Kausaban sa Kasingkasing,” Ensign, Hunyo 2008, 29-31).
Ipangutana: Unsa nga ebidensya sa istorya nga nagpakita kon sa unsang paagi si Ivan nausab? (Siguroha nga maklaro kini nga ang panggawas nga kausaban nga gihimo ni Ivan maoy mga timailhan sa usa ka lawom nga pagbag-o sa iyang kahiladman.)
Pahinumdumi ang mga estudyante nga sa Mosiah 27 gihulagway ang laing kasinatian sa kausaban pinaagi sa Pag-ula. Pagdapit og usa ka estudyante sa pagbarug atubangan sa klase ug i-summarize ang Mosiah 27. Kon kini anaa, ang estudyante makapakita usab sa litrato nga Pagkakabig ni Alma nga Batan-on (Libro sa mga Hulagway sa Ebanghelyo [2009], nu. 77). Hangyoa ang laing estudyante sa pagbasa sa Mosiah 27:24–26. Dayon hangyoa ang klase sa pag-ila kinsa ang kinahanglan nga mausab pinaagi sa Pag-ula, o “matawo sa Dios.” Samtang motubag ang mga estudyante, kinahanglan nilang ipadayag ang pagsabut sa mosunod nga kamatuoran : Ang matag usa kanato kinahanglang matawo pag-usab pinaagi sa Pag-ula ni Jesukristo.
Ipangutana: Sa unsang paagi nga inyong nakita ang usa ka tawo nga nausab alang sa mas maayo pinaagi sa Pag-ula ni Jesukristo?
Dapita ang mga estudyante sa pagpamalandong sa mga pangutana nga ang misyonaryo diha sa istorya nangutana sa iyang kaugalingon human sa ilang panagkita og usab ni Ivan: “‘Unsa kadako sa “kausaban sa kasingkasing” ang akong nasinati sa milabayng unom ka bulan?’ … ‘Natawo ba ako “pag-usab”?’” (kinutlo sa Keith K. Hilbig, “Pagsinati og Kausaban sa Kasingkasing,” 31).
Dapita ang mga estudyante sa pagbasa sa Mosiah 27:24, 28, nga mangita kon unsa ang gibuhat ni Alma ug unsa ang nabuhat sa Ginoo nga nagdala og kausaban ni Alma. Hangyoa sila sa pagpasabut kon nganong nagtuo sila nga ang indibidwal ug ang Ginoo kinahanglang maapil diha sa dakong kausaban sa kasingkasing.
Pahinumdumi ang mga estudyante nga misulat sila diha sa usa ka tsart og mga pulong nga nagpakita sa kalainan diha ni Alma sa wala pa ug sa nahuman na ang kausaban sa kasingkasing (sa leksyon alang sa day 2). Sa assignment 2 alang sa day 2, ang mga estudyante nagsulat diha sa ilang mga scripture study journal og mga pulong gikan sa “Humana” nga kolum nianang ilang gilauman nga maghulagway kanila sa tibuok nilang kinabuhi ug ipasabut kon ngano. Dapita ang pipila ka estudyante sa pagpakigbahin unsay ilang gisulat. Ipamatuod nga ang usa ka dakong kausaban sa kasingkasing posible alang kanato pinaagi sa Pag-ula ni Jesukristo.
Hangyoa ang mga estudyante sa pagpamalandong kon unsaon nila pag-usab pinaagi sa Pag-ula ni Jesukristo. Dapita sila sa pagpakigbahin sa ilang mga hunahuna, kon gusto nila. Mahimo usab nimong ipakigbahin kon sa unsang paagi nga ikaw nausab pinaagi sa Pag-ula.
Awhaga ang mga estudyante nga trabahoon ang pagsinati og usa ka kausaban sa kasingkasing aron sila mas mahiduol ngadto sa Ginoo ug itugot ang Pag-ula nga makahimo og kalainan sa ilang mga kinabuhi.
Kopyaha ang mosunod nga tsart diha sa pisara sa dili pa ang klase, o pakopyahi kini alang sa matag usa ka estudyante:
|
Sa unsang paagi nga si Alma ug ang anak nga mga lalaki ni Mosiah nausab? Unsa nga baruganan ang atong makat-unan gikan niini nga mga bersikulo? Sa inyong hunahuna nganong ang paghiuli usa ka importantig bahin sa paghinulsol? |
Sa unsang paagi nga ang anak nga mga lalaki ni Mosiah nausab? Unsa nga baruganan ang atong makat-unan gikan niini nga mga bersikulo? Unsa nga mga kasinatian sa inyong kinabuhi nga nakagiya kaninyo sa pagkagusto nga mapakigbahin ang ebanghelyo ngadto sa uban? |
Hangyoa ang katunga sa klase sa pagtubag sa mga pangutana sa unang kolum sa tsart ug ang laing katunga magtubag sa mga pangutana sa ikaduha nga kolum. Ipabuhat sa matag estudyante sa tinagsa-tagsa. Dapita ang pipila ka estudyante sa matag grupo sa pagreport sa ilang mga tubag.
Dapita ang mga estudyante sa pagpamalandong kon unsaon kaha nila sa paghimo og paghiuli sa ilang mga sala ug pag-usbaw sa ilang tinguha sa pagpakigbahin sa ebanghelyo ngadto sa uban.
Mosiah 29–Alma 4
Ang Dios mipanalangin sa mga Nephite kinsa nagpabilin nga matarung sa mga panahon sa pagpanggukod
Pahinumdumi ang mga estudyante nga sa unang mga kapitulo sa Alma gihulagway ang mga panahon sa kasamok ug pagpanggukod sa matarung nga mga Nephite. Dapita ang mga estudyante sa pagbasa sa hilum sa Alma 1:25, 27. Hangyoa sila sa pag-ila unsa ang gibuhat niining mga Nephite panahon sa pagpanggukod.
Ipasabut nga ang Ginoo mipanalangin sa matarung nga mga Nephite aron nga sila mouswag kay sa niadtong mga dautan (tan-awa sa Alma 1:29–32). Hangyoa ang mga estudyante nga maningkamot sa pagsunod sa ehemplo niining matinud-anong mga Nephite samtang sila makasugat og mga kalisdanan sa ilang mga kinabuhi.
Sunod nga Unit (Alma 5–10)
Giunsa ninyo pagkahibalo nga kamo natawo pag-usab? Unsay buot ipasabut sa matawo pag-usab? Samtang nagtuon ang mga estudyante sa Alma 5–10, Ilang makaplagan ang ubang mga pangutana nga sila makapangutana sa ilang kaugalingon sa pagtimbang-timbang kon sila natawo ba pag-usab ug nakasinati og dakong kausaban sa kasingkasing. Agi og dugang, sila makabaton og mas dako nga pagsabut sa kalawmon ug gahum sa Pag-ula.