Alma 18

Pasiuna

Si Haring Lamoni natingala sa gahum nga gipakita ni Ammon sa pagpanalipod sa mga panon sa hari. Mituo dayon siya nga si Ammon mao ang Gamhanang Espiritu. Nasabtan ni Ammon ang mga hunahuna sa hari pinaagi sa gahum sa Espiritu Santo, ug si Ammon misugod sa pagtudlo kaniya sa ebanghelyo. Si Haring Lamoni mituo sa unsay gitudlo ni Ammon, miila sa panginahanglan alang sa usa ka Manluluwas, nag-ampo ngadto sa Ginoo alang sa kalooy, ug nabuntog sa Espiritu.

Mga Sugyot alang sa Pagtudlo

Alma 18:1–11

Si Haring Lamoni nakadayeg sa kamatinud-anon ni Ammon

Ang dali nga pagribyu sa istorya sa katapusan sa Alma 17 motabang sa mga estudyante nga makita ang konteksto sa Alma 18. Kini motabang usab kanila nga masabtan ang mga mensahe sa Alma 18. Sa pagribyu sa Alma 17, ipangutana sa mga estudyante kon ang mosunod nga mga pamahayag husto ba o sayop. Mahimo nimong ipasulat nila ang ilang mga tubag.

Tungod kay si Haring Lamoni nahimuot ni Ammon, mitanyag siya nga usa sa iyang anak nga mga babaye mahimong asawa ni Ammon. (Husto. Tan-awa sa Alma 17:24.)
Si Ammon miingon nga gusto niya nga mahimong usa ka sulugoon sa hari. (Husto. Tan-awa sa Alma 17:25.)
Nahadlok si Ammon alang sa iyang kinabuhi sa dihang usa ka grupo sa mga Lamanite mipatibulaag sa panon sa hari. (Sayop. Tan-awa sa Alma 17:28–30.)
Uban sa talagsaong gahum, si Ammon nakig-away sa mga Lamanite ug miputol sa ilang mga bukton niadtong mialsa sa ilang mga bunal batok kaniya. (Husto. Tan-awa sa Alma 17:37–38.)

Pagkahuman og pahigayon niining kalihokan, siguroha nga ang mga estudyante nakahibalo sa husto nga mga tubag.

Ipangutana sa mga estudyante kon nahadlok na ba sila sukad o mibati nga dili sarang o kon sila mibati ba sukad nga ang usa ka tahas o katungdanan lisud ra kaayo alang nila nga matuman. Sultihi sila nga sa leksyon karon, ilang makat-unan ang mga baruganan nga motabang kanila sa ingon niana nga mga sitwasyon.

Tungaa ang klase. I-assign ang katunga sa pagbasa sa Alma 18:1–4 ug ang laing tunga sa pagbasa sa Alma 18:8–11. Samtang sila magbasa, ipakonsiderar kon sa unsang paagi nga ang kamatinud-anon ni Ammon miandam og paagi alang kaniya sa pagtudlo ni Lamoni ug sa iyang katawhan. Kon sila nakagahin na og igong panahon sa pagbasa, ipangutana ang mosunod:

Unsa nga mga ideya sa hari ug sa iyang mga sulugoon mahitungod sa pagkatawo ni Ammon?
Sumala sa Alma 18:2, 4, unsa kaha ang gihunahuna ni Lamoni nga katuyoan sa pag-abut ni Ammon? (Sa pagsilot sa mga tawo tungod sa ilang pagpatay ug sa pagpugong kang Lamoni sa pagpatay og daghan sa iyang mga sulugoon.)
Sumala sa Alma 18:10, unsa ang nagustohan ni Lamoni gawas sa gahum nga gipakita ni Ammon sa pagpanalipod sa mga panon? (Mahimo nimong awhagon ang mga estudyante nga markahan ang mga pulong nga pagkamatinud-anon ug matinud-anon.)

Isulat sa pisara ang mosunod nga dili kompleto nga pamahayag: Samtang magserbisyo kita sa uban sa matinud-anon nga paagi, …

Hangyoa ang mga estudyante sa pagkonsiderar kon unsaon nila sa pagkompleto kining mga pulong samtang sila magpadayon sa pagtuon sa Alma 18.

Alma 18:12–43

Samtang si Ammon nagtudlo sa plano sa katubsanan, si Lamoni miila sa iyang panginahanglan alang sa Manluluwas

Aron matabangan ang mga estudyante nga masabtan ang gahum sa mga pagtulun-an ni Ammon ug sa dakong kausaban nga nasugdan sa pagsinati ni Haring Lamoni, ipresentar ang Alma 18:12–35 isip teyatro sa magbabasa. Pagpili og upat ka estudyante ug pag-assign og usa ka bahin sa matag usa. Ang usa magsilbing tig-asoy, ug ang tulo mobasa sa mga pulong ni Ammon, Haring Lamoni, ug usa sa mga sulugoon sa hari. Ikonsiderar ang pagtabang sa mga estudyante nga maandam pinaagi sa pag-assign daan sa ilang mga bahin, tingali usa ka adlaw sa dili pa ang klase o sa dili pa magsugod ang klase.

Ipabasa sa upat ka mga estudyante ang ilang mga bahin sa Alma 18:12–15. Hangyoa ang klase sa pagsunod diha sa ilang mga kasulatan, mangita sa epekto sa pagserbisyo ni Ammon diha ni Lamoni. Human mabasa ang bersikulo 15, pahunonga ang teyatro sa magbabasa ug hangyoa ang mga estudyante sa pagreport unsa ang ilang nakit-an.

Ngano kaha nga si Lamoni nahilum sa atubangan ni Ammon? (Kon gikinahanglan, tabangi ang mga estudyante sa paghinumdom nga si Lamoni nahimong mahadlukon tungod sa mga pagpatay nga iyang nahimo ug nga siya nabalaka nga si Ammon mao ang Gamhanang Espiritu ug miabut aron sa pagsilot kaniya.)

Ipapadayon ang teyatro sa magbabasa pinaagi sa pagdapit sa partisipante sa pagbasa sa ilang bahin sa Alma 18:16–21. Awhaga ang klase sa pagpangita og ebidensya nga ang gahum sa Dios anaa ni Ammon.

Sa unsang paagi nga ang Espiritu sa Dios mitabang ni Ammon dinhi niining sitwasyon?
Unsay gustong mahibaloan ni Lamoni gikan ni Ammon?
Niining puntoha sa istorya, unsa ang nahibaloan ni Lamoni mahitungod ni Ammon? (Siya nasayud nga si Ammon nagtrabaho inubanan sa dili kasagaran nga gahum ug nakasabut sa mga hunahuna sa ubang mga tawo.)

I-refer ang mga estudyante ngadto sa dili kompleto nga pamahayag nga imong gisulat sa pisara: Samtang magserbisyo kita sa uban sa matinud-anon nga paagi, …

Base sa unsay atong nakat-unan karon gikan sa Alma 17–18, unsaon ninyo sa pagkompleto kining mga pulong? (Ang mga estudyante mahimong motubag sa lain-laing paagi. Sa pag-summarize sa ilang mga tubag, kompletuha ang pamahayag sa pisara sumala sa mosunod: Samtang magserbisyo kita sa uban sa matinud-anon nga paagi, makatabang kita kanila nga maandam sa pagdawat sa mga kamatuoran sa ebanghelyo.)

Dapita ang mga partisipante sa pagbasa sa ilang bahin sa Alma 18:22–32. Hangyoa ang klase sa pagsunod, nga mangita sa piho nga mga kamatuoran nga gitudlo ni Ammon kang Lamoni. Mahimo kang mosugyot nga markahan sa mga estudyante kining mga kamatuoran diha sa ilang mga kasulatan. Dayon hangyoa sila sa pagreport sa mga kamatuoran nga ilang nahibaloan. Isulat sa pisara ang ilang mga tubag.

Dapita ang mga partisipante sa pagbasa sa ilang bahin sa Alma 18:33–35. Hangyoa ang klase sa pagpangita kon giunsa sa pagpasabut ni Ammon ang iyang abilidad nga makahibalo sa mga hunahuna sa hari ug ang iyang abilidad sa pagpanalipod sa mga panon sa hari. Pagkahuman og basa sa mga partisipante sa teyatro sa magbabasa, pasalamati sila sa ilang pagtabang. Hangyoa ang mga estudyante sa pagreport sa ilang mga nakaplagan. Aron matabangan ang mga estudyante nga makita kon giunsa sa pagpanalangin sa Dios si Ammon nga nakaserbisyo ni Lamoni ug sa iyang katawhan, ipangutana:

Unsa ang pipila ka butang nga nabuhat ni Ammon nga milabaw sa iyang natural nga abilidad?

Ipasabut nga sa dihang si Ammon nagserbisyo ni Haring Lamoni, nagserbisyo usab siya sa Langitnong Amahan ug ni Jesukristo. Isulat ang mosunod diha sa pisara: Samtang matinud-anon kitang moserbisyo sa Langitnong Amahan ug ni Jesukristo, …

Base sa unsay inyong nakat-unan sa ehemplo ni Ammon, unsaon ninyo sa pagkompleto kining pamahayag? (Ang mga estudyante mahimong motubag sa lain-laing paagi. Sa pag-summarize sa ilang mga tubag, kompletuha ang pamahayag diha sa pisara sumala sa mosunod: Samtang magserbisyo kita sa Langitnong Amahan ug ni Jesukristo sa matinud-anon nga paagi, ang atong abilidad sa paghimo sa Ilang mga buhat molambo.)
Sa unsa kaha nga paagi kining baruganan magamit sa usa ka tawo kinsa mibati og kahadlok o kakulang o kinsa mibati nga ang usa ka buluhaton o katungdanan lisud kaayo?
Kanus-a kamo mibati nga ang Langitnong Amahan ug si Jesukristo nakatabang ninyo sa paghimo sa Ilang mga buhat? (Mahimo nimong isulti ang mahitungod kon giunsa sa Langitnong Amahan ug ni Jesukristo sa pagdugang sa imong mga abilidad sa pagserbisyo diha Kanila. O mahimo usab nimong ipakigbahin ang ehemplo gikan sa kinabuhi sa laing tawo.)

Aron matabangan ang mga estudyante nga magamit kining baruganan, isulat ang mosunod nga mga pangutana diha sa pisara. Hangyoa ang mga estudyante sa pagsulat sa ilang mga tubag sa usa niini nga mga pangutana.

Sa unsang paagi kining baruganan makatabang ninyo sa inyong kasamtangan ug umaabut nga mga responsibilidad?

Unsaon ninyo nga mahimong mas matinud-anon aron nga kamo unta mobati nga ang Ginoo mopalambo sa inyong abilidad sa paghimo sa Iyang buhat?

Ipasabut nga ang pamaagi ni Ammon sa pagtudlo ni Lamoni sa Alma 18:36–39 mao ang usa ka sumbanan nga gigamit sa mga misyonaryo karon. Siya mitudlo mahitungod sa plano sa katubsanan, nga naglakip sa Paglalang, sa Pagkapukan ni Adan ug Eva, ug sa Pag-ula ni Jesukristo. Hangyoa ang mga estudyante sa pagpamalandong sa mosunod nga pangutana:

Ngano kaha nga importante ang pagtudlo mahitungod sa Paglalang ug Pagkapukan kon kita magtudlo mahitungod sa Pag-ula ni Jesukristo?

Dapita ang usa ka estudyante sa pagbasa sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

“Sa dili pa nato masabtan ang Pag-ula ni Kristo, … kinahanglan gayud nga una natong masabtan ang Pagkapukan ni Adan. Sa dili pa nato masabtan ang Pagkapukan ni Adan, kinahanglan gayud nga una natong masabtan ang Paglalang. Kining tulo ka importanting bahin sa plano sa kaluwasan adunay kalabutan sa usag usa. …

“… Ang kinabuhing dayon, nga nahimong posible pinaagi sa Pag-ula, mao ang labing taas nga katuyoan sa Paglalang” (“The Atonement,” Ensign, Nob. 1996, 33, 35).

Kon kining tulo ka doktrina wala diha sa pisara, idugang kini ngadto sa lista nga imong gisulat atol sa teyatro sa mga magbabasa. Dapita ang usa ka estudyante sa pagbasa og kusog sa Alma 18:36–39. Hangyoa ang klase sa pagsunod, nga mangita sa mga elemento sa Paglalang, sa Pagkapukan, ug sa Pag-ula diha sa mga pagtulun-an ni Ammon ngadto ni Lamoni. Ipareport nila kon unsay ilang nakit-an.

Sa unsang paagi nga ang pagkat-on sa mga doktrina sa Paglalang, sa Pagkapukan, ug sa Pag-ula nakatabang kang Lamoni sa pag-ila sa iyang panginahanglan alang sa Manluluwas?

Hangyoa ang mga estudyante sa pagbasa sa hilum sa Alma 18:40–43 ug ilha unsa ang giampo ni Lamoni agi og tubag sa pagtudlo ni Ammon. Mahimo nimong awhagon ang mga estudyante sa pagmarka sa hangyo ni Lamoni.

Unsa ang gipakita diha sa pag-ampo ni Lamoni nga siya nakasabut mahitungod sa iyang kaugalingon ug sa iyang katawhan? (Siya nakasabut nga sila nakasala ug nagkinahanglan og kapasayloan.)
Unsa ang atong makat-unan ni Lamoni mahitungod sa unsay mahitabo kon kita makasabut nga kita nagkinahanglan sa Manluluwas? (Samtang motubag ang mga estudyante niining pangutana, tabangi sila nga makaila sa mosunod nga baruganan: Kon kita makasabut sa atong panginahanglan alang sa Manluluwas, kita magtinguha sa paghinulsol. Mahimo nimong dapiton ang mga estudyante sa pagsulat niining baruganan diha sa ilang mga kasulatan duol sa Alma 18:40–41. Ipasabut nga samtang ang atong indibidwal nga mga kasinatian uban sa paghinulsol mahimong magkalain-lain, kitang tanan makasunod sa ehemplo ni Haring Lamoni kon kita sinsero nga mangayo sa kalooy sa Dios.)

Dapita ang mga estudyante sa pagsulat sa ilang mga tubag sa mosunod nga pangutana:

Unsa man ang inyong mabuhat aron kamo matabangan sa paghinumdom sa inyong panginahanglan sa Manluluwas?

Komentaryo ug Background nga Impormasyon

Alma 18:36–39. Pagtudlo sa plano sa kaluwasan

Sa dihang mitudlo si Ammon ni Lamoni, “siya misugod gikan sa paglalang sa kalibutan,” ug dayon siya mitudlo “mahitungod sa pagkapukan sa tawo” (Alma 18:36). Sa katapusan, siya “mipatin-aw ngadto kanila [sa hari ug sa iyang mga sulugoon] sa laraw sa katubsanan,” ilabi na “mahitungod sa pag-anhi ni Kristo” (Alma 18:39). Sa samang paagi, si Aaron mitudlo niini nga mga doktrina ngadto sa amahan ni Lamoni (tan-awa sa Alma 22:12–14).

Si Elder Bruce R. McConkie sa Korum sa Napulog Duha ka mga Apostoles mitawag niining sukaranan nga mga doktrina—ang Paglalang, ang Pagkapukan, ug ang Pag-ula—ang “tulo ka mga haligi sa kahangturan” ug ang “labing talagsaon nga mga panghitabo nga sukad nahitabo sa tanang kahangturan.” Siya mipasabut:

“Kon kita makaangkon sa pagsabut niini, dayon ang tibuok mahangturong plano mahan-ay sa hustong dapit, ug kita maanaa sa posisyon nga lihukon ang atong kaluwasan. …

“… Kining tulo mao ang pundasyon diin ang tanan nga mga butang napahimutang. Kon wala ang bisan usa niini mawala ang tumong ug kahulugan sa tanang butang, ug ang mga plano sa Dios mapakyas gayud” (“The Three Pillars of Eternity” [Brigham Young University devotional nga pakigpulong, Peb. 17, 1981], 1, speeches.byu.edu).

Si Elder Russell M. Nelson sa Korum sa Napulog Duha ka mga Apostoles mipasabut kon sa unsang paagi ang matag usa ka bahin sa plano mahinungdanon:

“Ang plano nagkinahanglan sa Paglalang, ug sa ingon gikinahanglan ang Pagkapukan ug ang Pag-ula. Kini mao ang tulo ka sukaranang bahin sa plano. Ang paglalang sa usa ka paraisohanon nga planeta naggikan sa Dios. Ang pagkamortal ug ang kamatayon miabut sa kalibutan pinaagi sa Pagkapukan ni Adan. Ang pagka-imortal ug ang posibilidad sa kinabuhing dayon nahatag pinaagi sa Pag-ula ni Jesukristo. Ang Paglalang, ang Pagkapukan, ug ang Pag-ula dugay nang giplano sa wala pa ang aktwal nga pagbuhat sa Paglalang” (“The Creation,” Ensign, Mayo 2000, 84).

Agi og dugang sa pagtudlo sa samang mga doktrina, si Ammon ug si Aaron migamit og susama nga pamaagi sa ilang pagtudlo. Sila nagtudlo uban sa kayano, sa paagi nga ang ilang mga tigpaminaw makasabut (tan-awa sa Alma 18:24–30; 22:7–11). Sila nagtulo gikan sa mga kasulatan (tan-awa sa Alma 18:36–39; 22:12–14). Ang ilang mga pagtulun-an migiya sa uban ngadto sa pag-ampo (tan-awa sa Alma 18:40–41; 22:15–18).