Leksyon 100

Alma 43–44

Pasiuna

Samtang si Alma ug ang iyang mga anak nga lalaki mipadayon sa pagsangyaw sa ebanghelyo, ang mga Zoramite mitipon sa kasundalohan sa Lamanite aron sa pag-ataki sa mga Nephite. Si Kapitan Moroni mipakita sa hugot nga pagtuo ug kaalam sa paggiya sa mga Nephite sa pagdepensa sa ilang mga kaugalingon batok sa kasundalohan sa Lamanite. Bisan og sila nalabwan sa gidaghanon, ang mga pagpangandam ug ang hugot nga pagtuo ni Jesukristo sa mga sundalo nga Nephite nakahatag kanila og bintaha diha sa gubat. Sa dihang nagsagubang ang mga Lamanite og siguradong kapildihan, mihimo sila og pakigsaad sa kalinaw ug mibiya sa kayutaan sulod sa usa ka panahon.

Mga Sugyot alang sa Pagtudlo

Alma 43

Ang mga pagpangandam ug mga estratehiya ni Kapitan Moroni nakatabang sa paglupig sa mga laraw sa kasundalohan sa Lamanite

Dapita ang mga estudyante sa pagsulat diha sa mga notebook o scripture study journal og usa ka lista sa mga plano, tumong, ug mga tinguha alang sa ilang kaugmaon. Samtang sila nagsulat, pahinumdumi sila nga hunahunaon ang mahitungod sa espirituhanon nga mga tumong ug mga tinguha sama sa pagserbisyo og misyon, ma-sealed sa templo, ug maghimo og usa ka pamilya. Sa dili pa magklase, mahimo nimong isulat ang ingon nga lista sa mga tumong ug mga tinguha alang sa imong kaugalingon nga kaugmaon. Mahimo nimong ipakigbahin ang pipila sa imong mga plano ug mga tinguha agi og sumbanan aron matabangan ang mga estudyante nga makasugod sa pagsulat.

Human makahimo ang mga estudyante sa ilang mga lista, dapita sila sa pag-ila sa mga tinguha ug mga tumong nga ilang nabati nga dili gusto ni Satanas nga ilang matuman. Dapita ang pipila ka estudyante sa pagpakigbahin sa mga tumong nga ilang nailhan. Hangyoa sila sa pagpasabut kon nganong dili gusto ni Satanas nga sila makatuman niadtong mga tumong. Mahimo usab nimo silang pangutan-on kon nganong kusganon silang mibati mahitungod sa pagtuman niining mga tumong. Isugyot nga ang pagtuon sa Alma 43–44 makatabang kanato nga makita kon unsaon nato nga makatuman sa atong matarung nga mga tumong bisan sa makaguba nga mga paningkamot sa kaaway.

I-summarize ang Alma 43:1–4 pinaagi sa pagpasabut nga bisan sa mga paningkamot ni Alma sa pagdala sa mga Zoramite balik ngadto sa Simbahan, daghan kanila ang mitipon sa mga Lamanite ug nangandam sa pag-ataki sa mga Nephite. Mitipon usab kanila ang mga Amalekite, kinsa, sama sa mga Zoramite, nga kanhi mga Nephite apan nahisalaag gikan sa kamatuoran.

Dapita ang usa ka estudyante sa pagbasa og kusog sa Alma 43:5–8. Hangyoa ang klase sa pagsunod, mangita sa mga plano, o “mga laraw,” sa lider sa Lamanite, si Zerahemnah.

Ipasabut nga samtang atong tun-an ang mga istorya sa pisikal nga mga gubat diha sa Basahon ni Mormon, atong mahisama kini sa espirituhanon nga mga gubat nga atong atubangon.

• Sa unsang paagi kaha nga ang laraw ni Zerahemnah batok sa mga Nephite nahisama sa mga laraw ni Satanas batok kanato?

Dapita ang usa ka estudyante sa pagbasa og kusog sa Alma 43:9–12. Hangyoa ang klase sa pag-ila sa mga laraw sa mga Nephite.

• Unsa ang mga gilaraw sa mga Nephite?

Dapita ang mga estudyante sa pagbasa sa hilum sa Alma 43:16–19. Dapita sila sa pagpangita sa unsa ang gibuhat ni Moroni, ang punoang kapitan sa mga Nephite, aron maandam ang katawhan sa pagdepensa sa ilang kayutaan ug mga pamilya.

• Unsang piho nga mga butang nga gibuhat sa mga Nephite aron maandam alang sa pag-ataki sa mga Lamanite?

Dapita ang usa ka estudyante sa pagbasa og kusog sa Alma 43:20–22, ug hangyoa ang klase sa pagpangita sa reaksyon sa mga Lamanite ngadto sa mga pagpangandam sa mga Nephite.

• Nganong miatras ang mga Lamanite sa ilang pag-ataki bisan tuod nga ilang nalabwan ang mga Nephite sa gidaghanon?

• Unsa ang atong makat-unan gikan niining panghitabo mahitungod sa pagdepensa sa atong mga kaugalingon batok sa mga laraw ni Satanas?

Dapita ang mga estudyante sa pagbasa sa hilum sa Alma 43:23–24 aron masusi unsa ang gihimo ni Moroni sa dihang wala pa niya mahibaloi kon giunsa pagplano sa iyang mga kaaway ang sunod nga pag-ataki.

• Nganong nagpadala si Moroni og mga mensahero aron makig-istorya ni Alma?

• Unsa ang ikatudlo sa mga ehemplo ni Moroni ngari kanato mahitungod kon unsaon nga kita makapangandam sa espirituhanong paagi batok sa kaaway? (Tabangi ang mga estudyante sa pag-ila sa mosunod nga mga baruganan: Kon kita magtinguha ug magsunod sa propetikanhon nga tambag, mas maayo kitang modepensa sa atong mga kaugalingon batok sa kaaway.)

I-summarize sa daklit ang Alma 43:25–43 pinaagi sa pag-asoy nga si Moroni milihok sa kahibalo nga iyang nadawat gikan sa propeta. Gibahin niya ang iyang kasundalohan ngadto sa duha ka bahin. Ang pipila ka sundalo mipabilin sa siyudad sa Jershon, aron sa pagpanalipod sa mga tawo ni Ammon. Ang nahabilin nga mga kasundalohan mimartsa ngadto sa yuta sa Manti. Si Moroni mipadala og mga espiya aron sa pagsusi kon asa na ang mga Lamanite, ug aduna usab siyay laing mga sundalo nga nagtago sa may agianan sa mga Lamanite. Samtang nagpadulong ang mga Lamanite, ang mga sundalo nga Nephite mipalibut kanila. Sa dihang ang mga Lamanite nakakita nga napalibutan na sila, mapintas silang nakig-away. Daghang Nephite ang nangamatay, apan mas daghan pa ang nangamatay sa mga Lamanite.

Dapita ang pipila ka estudyante nga magpuli-puli sa pagbasa og kusog sa Alma 43:43–54. Hangyoa ang klase sa pagpangita og kalainan tali sa kadasig ug tinubdan sa kusog sa mga Lamanite ug ang kadasig ug tinubdan sa kusog sa mga Nephite.

• Unsa ang inyong nabantayan mahitungod sa mga hinungdan nga nakig-away ang mga Lamanite? Unsa ang inyong nabantayan mahitungod sa mga hinungdan nga nakig-away ang mga Nephite? Sa unsang paagi nga ang tinubdan sa kusog sa mga Nephite lahi gikan sa tinubdan sa kusog sa mga Lamanite? (Kon gikinahanglan, ipasabut nga samtang ang mga Lamanite nakig-away gumikan sa kasilag ug kasuko, ang mga Nephite nadasig pinaagi sa mas maayo nga kawsa [tan-awa sa Alma 43:45–47]. Nag-ampo sila sa Ginoo alang sa panabang, ug Siya mipalig-on kanila [tan-awa sa Alma 43:49–50].)

• Unsa ang atong makat-unan gikan sa mga ehemplo ni Moroni ug sa iyang kasundalohan aron matabangan kita sa atong mga gubat batok sa kaaway?

Dapita ang mga estudyante sa pagsulat sa ilang mga tubag niini nga pangutana. Dayon hangyoa sila sa pagpakigbahin sa ilang nasulat. Tingali ilang mahisgutan ang pipila sa mosunod nga mga baruganan:

Samtang mag-ampo kita alang sa panabang sa pagtuman sa atong matarung nga mga plano ug mga tinguha, ang Dios motabang kanato nga matuman kini.

Nadasig kita pinaagi sa mas maayo nga kawsa kay sa niadtong kinsa mosukwahi sa kamatuoran.

Ang Ginoo motabang kanato sa atong pagtuman sa atong katungdanan sa pagdepensa sa atong mga pamilya, kalingkawasan, ug sa atong relihiyon.

Dapita ang mga estudyante sa pagsulti mahitungod sa mga panahon sa dihang sila nakasinati sa tabang sa Ginoo sa pagtuman sa matarung nga mga tumong. Ikonsiderar ang pagpakigbahin sa imong kaugalingong mga kasinatian. Ipamatuod ang abilidad sa Ginoo sa pagtabang kanato nga matuman ang matarung nga laraw. Dapita ang mga estudyante sa paghimo og matarung nga mga tumong nga usa ka makanunayon nga bahin sa ilang mga pag-ampo.

Alma 44

Si Kapitan Moroni nagmando sa mga Lamanite sa paghimo og usa ka pakigsaad sa kalinaw

Pagdapit og usa ka batan-ong lalaki nga ganahang mobasa og kusog nga moadto sa atubangan uban sa iyang mga kasulatan. Pahinumdumi ang klase nga sa dihang nakakita si Kapitan Moroni sa kalisang sa mga Lamanite, mimando siya sa iyang mga tawo sa paghunong sa pakig-away (tan-awa sa Alma 43:54). Ipabasa sa batan-ong lalaki ang mga pulong ni Moroni diha sa Alma 44:1–6. Hangyoa ang klase sa pagpaminaw sa pagpasabut ni Moroni sa kadaugan sa mga Nephite.

• Unsa ang gusto ni Moroni nga masabtan ni Zerahemnah mahitungod sa tinubdan sa kusog sa mga Nephite diha sa gubat? Unsa ang iyang gitanyag ngadto sa mga Lamanite? (Miingon siya nga ang mga Nephite dili na mopasakit kanila kon sila motugyan sa ilang mga hinagiban ug mosulod ngadto sa usa ka pakigsaad sa kalinaw.)

• Unsa nga mga kamatuoran ang atong makat-unan gikan sa Alma 44:4–6 nga makatabang kanato diha sa espirituhanon nga mga gubat? (Ang mga estudyante mahimong mopakigbahin og pipila ka mga baruganan, ang uban nahisgutan na niining leksyon. Siguroha nga kini maglakip sa mosunod nga kamatuoran: Ang Ginoo mopalig-on ug mopatunhay kanato sumala sa atong hugot nga pagtuo diha Kaniya. Mahimo nimong isugyot nga markahan sa mga estudyante ang mga pulong niining mga bersikulo nga nagtudlo niining kamatuoran.)

Dapita ang usa ka estudyante sa pagbasa og kusog sa mosunod nga tambag ngadto sa mga kabatan-onan sa Simbahan, gikan ni Presidente Boyd K. Packer sa Korum sa Napulog Duha ka mga Apostoles. Mahimo nimong hatagan og kopya ang matag estudyante.

President Boyd K. Packer

“Ang kabatan-onan karon gipadako diha sa teritoryo sa kaaway nga adunay nagkakunhod nga sumbanan sa moralidad. Apan isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghug mo sa mga pag-aghat nga gikan sa Balaang Espiritu.

“Pagsinina og tarung; pagmatinahuron sa pagsulti; paminaw sa makadasig nga musika. Likayi ang tanang pagka-imoral ug mga binuhatan nga makadaut sa pagkatawo. Kontrolaha ang inyong kinabuhi ug mandoi ang inyong kaugalingon nga magmatinud-anon. Tungod kay nagdepende gyud mi ninyo, mapanalanginan mo sa talagsaong paagi. Ang inyong mahigugmaong Langitnong Amahan kanunay nga nagbantay ninyo.” (“Tambag ngadto sa Kabatan-onan,” Ensign o Liahona, Nob. 2011, 18).

• Sa mga pulong ni Presidente Packer, unsa ang labing mahinungdanon diha ninyo? Ngano man?

I-summarize ang Alma 44:7–10 pinaagi sa pagpasabut nga si Zerahemnah namahayag nga siya ug ang iyang mga katawhan wala motuo nga ang mga Nephite nalig-on pinaagi sa Dios. Siya mitanyag nga itugyan sa mga Lamanite ang ilang mga hinagiban, apan midumili siya sa paghimo og usa ka pakigsaad sa kalinaw. Dapita ang estudyante kinsa nagbasa sa Alma 44:1–6 nga basahon og kusog ang tubag ni Moroni ngadto ni Zerahemnah, nga makita sa Alma 44:11. Pangutan-a ang klase:

• Sa inyong hunahuna nganong importante ngadto ni Moroni nga mosulod sa usa ka pakigsaad sa kalinaw ang mga Lamanite?

I-summarize ang Alma 44:12–20 pinaagi sa pagpasabut nga samtang daghan sa mga Lamanite ang mihimo og usa ka pakigsaad sa kalinaw, si Zerahemnah mipundok sa nahabilin niya nga mga katawhan aron sa pagpakigsangka sa kasundalohan ni Moroni. Samtang ang mga Nephite misugod sa pagpamatay kanila, nakita ni Zerahemnah ang ilang dakong kalaglagan ug misaad nga mosulod ngadto sa usa ka pakigsaad sa kalinaw.

Ipamatuod nga ang mapanalipdanong kamot sa Ginoo anaa sa mga kinabuhi niadtong kinsa magmatinud-anon ngadto Kaniya. Awhaga ang mga estudyante nga maisugong makigbatok alang sa ilang matarung nga mga tumong ug magtinguha ug mosalig sa saad sa Dios nga “mobulig, ug moamping, ug mopanalipod kanato, samtang kita matinud-anon ngadto kaniya” (Alma 44:4).

Komentaryo ug Background nga Impormasyon

Alma 43:3. Ang gubat nga atong gipakigbatukan nagsugod sa atong kinabuhi sa wala pa dinhi sa yuta

Si Presidente Gordon B. Hinckley namulong sa katinuod sa gubat nga atong giapilan sukad pa sa wala pa nagsugod ang kalibutan:

“Adunay [usa ka] gubat nga nagpadayon sukad sa wala pa gilalang ang kalibutan ug magpadayon pa sulod sa taas nga panahon bisan sa umaabut. …

“Kana nga gubat … mao ang gubat tali sa kamatuoran ug sayop, tali sa kabubut-on ug pagpugos, tali sa mga sumusunod ni Kristo ug niadtong kinsa milimud Kaniya. Ang Iyang mga kaaway migamit sa tanang pamaagi diha niana nga kasamok. …

“… Nagpadayon kini sama sa sinugdanan. … Ang mga biktima kinsa napukan sama ka bililhon niadtong napukan sa unang panahon. Usa kini ka nagpadayon nga gubat. …

“Ang gubat nagpadayon. … Nakiggubat kini sa kaugalingon natong mga kinabuhi, kada adlaw, sa atong panimalay, sa atong trabaho, sa atong mga kaubanan sa eskwelahan; nakiggubat kini batok sa mga pangutana mahitungod sa gugma ug respeto, sa kamaunungon, sa kamasulundon ug kaligdong. Kitang tanan nalambigit niini. … Dumadaug kita, ug ang kaugmaon mas hayag nang makita” (“The War We Are Winning,” Ensign, Nob. 1986, 42, 44–45).

Alma 43:9, 45. Panalipdi ug palig-una ang pamilya

Si Sister Virginia U. Jensen sa kinatibuk-ang kapangulohan sa Relief Society mipasabut ngadto sa usa ka pasidaan diha sa ang pamahayag sa pamilya “nga ang pagkabungkag sa pamilya makadala sa tagsa-tagsa, sa mga komunidad, ug sa nasud sa mga katalagman nga gipanagna sa karaan ug sa bag-o nga mga propeta” (“Ang Pamilya: Usa ka Pamahayag ngadto sa Kalibutan,” Ensign o Liahona, Nob. 2010, 129). Si Sister Jensen nakaobserbar: “Mga kaigsoonan, anaa kita sa taliwala niana nga reyalidad niining panahona. Katungdanan natong tanan ang pagpanalipod ug pagpalig-on sa pamilya” (“Come, Listen to a Prophet’s Voice,” Ensign, Nob. 1998, 13–14).

Dugang nga mga Ideya sa Pagtudlo

Alma 44. Video presentation

Aron mapakita sa mga estudyante ang pagbinayloay tali ni Zerahemnah ug Kapitan Moroni nga narekord diha sa Alma 44, ikonsiderar ang pagpasalida sa video presentation nga “Firm in the Faith of Christ,” nga anaa sa Book of Mormon DVD Presentations 1–19 (54011) ug LDS.org. Mahimo nimong hunungon ang video pagkahuman sa pasiunang pamulong ni Moroni. Dayon ipangutana ang bulleted nga mga pangutana diha sa leksyon nga makatabang sa mga estudyante nga makita nga: ang Ginoo mopalig-on ug mopatunhay kanato sumala sa atong hugot nga pagtuo diha Kaniya. Dayon sugdi pag-usab ang video.

Alma 43:45–47. Katungdanan nato ang pagdepensa sa atong mga pamilya, sa atong kalingkawasan, ug sa atong relihiyon

Basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Sa nag-edad ko og 18 anyos, gitawag ko ngadto sa military. Samtang wala akoy rason sa paghunahuna niini kaniadto, nakabalaka kaayo ko kon sakto ba nga moadto ko sa gubat. Pag-abut sa panahon, akong nakit-an ang akong tubag diha sa Basahon ni Mormon: [nagkutlo sa Alma 43:45–47].

“Kay nakahibalo niini, andam akong moserbisyo ug may dungog” (“Ang Basahon ni Mormon: Lain nga Tugon ni Jesukristo—Yano ug Bililhong mga Butang,” Ensign o Liahona, Mayo 2005, 7–8).

Hangyoa ang mga estudyante sa pagbasa sa hilum sa Alma 43:45–47. Dapita sila sa paghunahuna mahitungod kon ngano nga kining mga bersikulo nakatabang kaayo ngadto ni Presidente Packer atol niining higayuna sa iyang kinabuhi.

Isulat diha sa pisara: Ang Ginoo motabang kanato sa pagtuman sa atong mga katungdanan sa …

Hangyoa ang mga estudyante sa pagribyu sa Alma 43:46–47 ug kompletuha ang mga sentence nga imong nasulat diha sa pisara. (Siguroha nga ang mga estudyante nakasabut nga ang Ginoo motabang kanato nga matuman ang atong katungdanan sa pagdepensa sa atong mga pamilya, atong kalingkawasan, ug sa atong relihiyon.)

• Sa unsa nga mga paagi nga kamo adunay katungdanan sa pagpanalipod sa mga sakop sa pamilya? Unsaon ninyo kana sa pagbuhat karon, kon kamo anaa sa inyong kabatan-on?

Aron mahatagan og usa ka paghulagway sa atong katungdanan sa pagdepensa sa pamilya, basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Usbon ko sa pagsulti nga ang pamilya mao ang gitumong sa pag-ataki sa dautan ug busa kinahanglan gayud nga mao ang atong pinakaimportante nga tumong sa atong proteksyon ug panalipod. Sama sa akong giingon kaniadto, kon kamo mohunong ug maghunahuna niini gikan sa punto sa pagsabut sa dautan, ang pagpakig-away sa pamilya adunay bili ngadto ni Satanas. … Kon ang dautan gustong moataki ug mosamok sa buhat sa Dios, moataki kini sa pamilya. Mobuhat kini sa ingon pinaagi sa pagbaliwala sa balaod sa kaputli, sa paglibog kon babaye ba o lalaki, dili na panumbalingon ang ka bayolente, sa paghimo sa law-ay ug mapanamastamason nga pinulongan nga maoy uso, ug sa paghimo sa imoral ug dili maayo nga kinaiya ingon nga mao ang lagda imbis mao ang kalainan” (“Ipadungog Nato ang Atong mga Tingog,” Ensign o Liahona, Nob. 2003, 18).

• Unsa ang mahimo sa mga kabatan-onan aron mapanalipdan ang ilang mga pamilya gikan sa mga matang sa impluwensya nga gihulagway ni Elder Ballard?

Dapita ang mga estudyante sa pagpakigbahin og mga paningkamot nga ilang gihimo aron sa pagdepensa sa ilang mga sakop sa pamilya o mga higala sa espirituhanon nga paagi. Mahimo usab nimong dapiton ang mga estudyante sa pagsulat og usa ka paragraph diha sa ilang mga scripture study journal mahitungod kon giunsa nila sa pagplano ang pagdepensa sa ilang mga pamilya ug mga higala batok sa mga pag-ataki ni Satanas. Ipamatuod nga ang Ginoo motabang kanila nga magmalampuson samtang sila nagtuman sa ilang katungdanan.